14
ᤔᤧᤸᤗᤢᤰᤛᤠ᤺ᤴ ᤏᤢ ᤁᤢᤔᤏᤠᤜᤠ᤹
1 ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤸᤗᤢᤰᤛᤠ᤺ᤴ ᤛᤡᤕᤥᤏ ᤁᤥ᤺ᤰᤔᤠ ᤛᤶᤍᤠᤱ ᤕᤧᤒᤧᤒᤠ ᤏᤡ᤺ᤛᤢᤱᤗᤥ॥ ᤂᤢᤏᤧ᤹ᤏᤢ ᤗᤠᤅᤧᤴᤇᤡᤱᤎᤡᤰᤁᤠᤱ ᤜᤧᤴᤇᤡᤱ ᤗᤡ-ᤗᤡ (᥇.᥊᥊.᥆᥆᥆) ᤔᤏᤠᤜᤠ᤹ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤥᤘᤠᤒᤥ ᤂᤢᤏᤧ᤹ ᤁᤢᤔᤡᤱ ᤏᤢ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤁᤢᤔᤡᤱᤅᤡᤴ ᤛᤠᤵᤋᤧᤀᤠᤱ ᤐᤳᤇᤧᤖᤥ॥
2 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤆᤫᤠ᤺ᤳ ᤛ᤺ᤰᤋᤧᤒᤠ ᤁᤢᤀᤡᤛᤡ᤺ᤰ ᤏᤢ ᤂᤧᤖᤧᤱ ᤄᤢᤖᤢᤱ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱᤗᤥ॥ ᤂᤧᤴ ᤁᤧᤛ᤺ᤰᤐᤧᤴ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤥᤖᤡᤰ ᤛᤠᤖᤠᤱᤃᤡ ᤔᤧᤔᤢᤰᤂᤢᤒᤠ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥
3 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧᤴ ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤢᤛᤱ ᤛᤠᤶᤗᤥ᤺ᤴ ᤛᤠᤶᤔᤧᤔᤧᤳᤋᤢᤒᤠ ᤀᤡᤱᤃᤠ᤹ ᤂᤧᤵᤛᤢᤱᤗᤥ॥ ᤂᤧᤴ ᤛᤠᤶᤗᤥ᤺ᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤌᤧ᤹ᤔᤏᤠᤒᤠ ᤂᤧᤴ ᤗᤠᤅᤧᤴᤇᤡᤱᤎᤡᤰᤁᤠᤱ ᤜᤧᤴᤇᤡᤱ ᤗᤡ-ᤗᤡ (᥇.᥊᥊.᥆᥆᥆) ᤔᤏᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤜᤢ᤹ᤛᤡᤱᤔᤠ ᤔᤧᤴᤇᤢᤰᤋᤢᤴᤗᤥ॥
4 ᤂᤧᤱᤜᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤢᤔᤠ᤹ᤏᤢ ᤔᤧᤶᤒᤥ᤺ᤳᤋᤣ ᤔᤧᤘᤕᤧ ᤜᤧᤰᤁᤩᤠᤱ ᤀᤠᤒᤠᤅᤣ ᤛᤣᤛᤣ ᤔᤧᤃᤳᤇᤡᤱᤅᤠᤱ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤃ ᤔᤧᤸᤗᤢᤰᤛᤠ᤺ᤴ ᤀᤠᤳᤋᤠᤴ ᤐᤣ᤺ᤰᤛᤠᤱ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤁᤧᤍᤡᤶᤒᤠᤛᤡᤖᤥ॥ ᤂᤧᤱᤜᤠ᤹ᤃ ᤁᤠᤰᤏᤢ ᤋᤃᤡ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤸᤗᤢᤰᤛᤠ᤺ᤀᤥ ᤋᤥ᤺ᤶᤔᤠᤛᤡ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤗᤠᤶ ᤁᤢᤔᤧᤸᤗᤢᤱ ᤜᤢᤱᤔᤏᤠᤀᤠᤱ ᤌᤧ᤹ᤔᤏᤠᤒᤠᤛᤡᤖᤥ॥
5 ᤂᤧᤱᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤀᤡᤱᤗᤧᤰ ᤐᤠ᤺ᤴ ᤔᤧᤶᤒᤠ᤺ᤳᤋᤢᤴᤏᤠᤱ ᤑᤥᤋᤩᤠ ᤔᤧ᤺ᤴᤏᤣ ᤔᤧᤘᤠ᤹ᤖᤥ॥
ᤛᤢᤶᤛᤡ ᤔᤠᤱᤗᤠᤀᤡᤱᤒᤠᤜᤠ᤹
6 ᤜᤧᤰᤁᤩᤠᤱ ᤀᤡᤱᤃᤠ᤹ ᤋᤠᤱᤛᤠᤰᤐᤥ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤐᤧᤖᤧᤖ ᤐᤳᤇᤧᤒᤠ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤔᤧᤴᤏᤢᤵᤔᤏᤠᤒᤠ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤔᤠ ᤁᤳᤋᤢᤖᤥ॥
7 ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡ᤺ᤛᤧᤶᤔᤧ᤹ᤀᤠᤱ ᤔᤡᤔᤡᤍᤡᤱ ᤐᤡᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤄᤠᤛᤧᤴ ᤆᤥ᤺ᤰᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ॥ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤠᤜᤱ ᤏᤢ ᤆᤫᤠ᤺ᤳᤋᤡᤸᤗᤧ ᤁᤢᤒᤢᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠᤴ ᤛᤣᤘᤠ ᤆᤥᤃᤧᤶᤔᤧ᤹ᤀᤥ॥”
8 ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤀᤣᤃᤠᤱ ᤁᤧᤒᤵᤐᤠ ᤏᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤀ᤺ᤰᤋᤧ. “ᤒᤧᤒᤡᤗᤥᤏᤡᤴ ᤔᤧᤃᤧᤖᤥ. ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴ ᤔᤧᤃᤧᤖᤥ॥ ᤂᤧᤴ ᤕᤧᤰᤕᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤡᤈᤱᤘᤠ᤺ᤸᤗᤧ ᤔᤕᤢᤛᤡᤒᤠ ᤁᤢᤀᤡᤛᤡ᤺ᤰ ᤕᤠᤶᤒᤥ᤺ᤵᤔᤠᤸᤗᤧ ᤔ᤺ᤛᤢᤛᤡᤀᤠᤱ ᤘᤠ᤹ᤖᤥ॥”
9 ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤴᤇᤡ᤹ ᤀᤣᤃᤠᤱ ᤋᤡᤶᤍᤢᤛᤡᤖ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧ. “ᤜᤠ᤺ᤳᤗᤧ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤆᤥᤃᤢ᤹. ᤜᤧᤰᤁᤩᤠᤱ ᤁᤢᤍᤥ᤹ᤘᤠᤒᤥ ᤀᤡᤃᤪ ᤁᤢᤜᤢᤰᤁᤥ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴ ᤗᤰᤋᤢ᤹.
10 ᤂᤧᤸᤗᤧᤃ ᤌᤣᤀᤠᤱ ᤔᤧᤶᤓᤢᤳᤋᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤡᤸᤗᤧᤴ ᤂᤥᤷᤕᤠ᤺ᤴᤗᤠᤶ ᤌᤢᤱᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤧᤱᤃ ᤔᤧᤸᤗᤢᤰᤛᤠ᤺ᤴ ᤏᤢ ᤛᤣᤛᤣ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤠᤴᤎᤠᤰ ᤏᤢ ᤔᤡ᤺ᤸᤗᤧ ᤗᤠᤒᤢᤖ ᤋᤢᤰᤂᤣ ᤆᤠᤖᤥ॥
11 ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤠ ᤔᤡ᤺ᤸᤗᤧ ᤔᤡ᤺ᤰᤂᤢ᤹ᤀᤡᤱᤃ ᤛᤍᤠᤍᤡᤱ ᤛᤍᤠᤍᤡᤱ ᤌᤠ᤺ᤱ ᤐᤣ᤺ᤰᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤴ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤵᤑᤠᤸᤗᤧᤀᤠᤱ ᤔᤧᤏᤢᤵᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤔᤧᤈᤥᤃᤢᤀᤠᤱ ᤁᤢᤔᤡᤱᤅᤡᤸᤗᤧᤴ ᤀᤡᤒᤢᤃᤧᤴ ᤔᤡᤰᤛᤣ᤺ᤴᤏᤡᤴ ᤔᤧᤗᤰᤋᤢᤀᤠᤱ ᤔᤧᤘᤕᤧᤖᤥ॥”
12 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤁᤧᤄᤧᤶᤒᤠᤜᤠ᤹ ᤏᤢ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤏᤠᤛᤡ ᤌ᤺ᤵᤔᤠᤀᤣ ᤐᤥ᤺ᤱᤗᤥ॥
13 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤡᤰᤗᤠᤎᤡᤰ ᤀᤰᤂᤣᤗ᤹ᤖᤡᤰ ᤐᤠᤖᤧᤒᤠ ᤂᤧᤵᤛᤢᤱ. “ᤁᤴ ᤐᤠ᤺ᤴᤏᤡᤴ ᤛᤠᤵᤋᤧ᤹. ᤀᤠᤸᤗᤀᤠᤱᤎᤥ ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥”
ᤛᤣᤛᤣᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤛᤧᤰᤂᤠᤀᤣ ᤂᤧᤱᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤂᤧᤱᤜᤠ᤹ ᤂᤢᤏᤡ᤹ ᤕᤠᤶᤒᤢᤎᤡᤰᤗᤠᤶ ᤔᤧᤏᤠ᤺ᤶᤛᤡᤱ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤜᤠᤱᤛᤧᤶ ᤔᤧᤄᤥ᤺ᤛᤢ᤹ᤖᤥ॥”
ᤆᤠ ᤛᤢᤶᤔᤠ ᤕᤧᤶ
14 ᤜᤧᤰᤁᤩᤠᤱ ᤀᤡᤱᤃᤠ᤹ “ᤔᤧᤴᤇᤠᤶᤛᤠ᤺ᤴ” ᤜᤧᤰᤋᤱᤒᤠᤎᤡᤰ ᤑ᤺ᤃᤧᤗ᤹ᤒᤠ ᤂᤠᤵᤔᤡ᤺ᤳᤋᤥ ᤕᤢᤅᤧᤒᤠ ᤏᤡ᤺ᤛᤢᤱᤗᤥ॥ ᤂᤢᤏᤧ᤹ ᤛᤠᤶᤔᤩᤠᤱ ᤋᤡᤆ᤺ᤴ ᤂᤢ᤺ᤰᤂᤢᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤁᤢᤜᤢᤰᤁᤥ ᤂᤠᤃᤧᤛᤢᤰᤐᤠ ᤁᤠᤳᤆᤩᤠ᤺ᤴ ᤁᤳᤋᤢᤖᤥ॥
15 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤥᤗᤠᤶ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤴ ᤗ᤺ᤴᤍᤧᤀᤠᤱ ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤂᤧᤴ ᤂᤠᤵᤔᤡ᤺ᤳᤋᤥ ᤁᤧᤕᤢᤱᤒᤠᤴ ᤔᤧᤳᤋᤢ. “ᤁᤧᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤆᤠ ᤛᤢᤵᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤆᤠ ᤛᤢᤶᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤢᤶᤛᤧᤀᤠᤱ ᤏᤧᤖᤥ॥”
16 ᤜᤧᤰᤁᤩᤠᤱ ᤂᤧᤴ ᤂᤠᤵᤔᤡ᤺ᤳᤋᤥ ᤁᤧᤕᤢᤱᤒᤠᤸᤗᤧ ᤁᤢᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤠᤱ ᤜᤧᤃᤢᤖ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤆᤠ᤺ᤴ ᤛᤢᤵᤛᤢ᤹ᤖᤥ॥
17 ᤂᤧᤴ ᤀᤣᤃᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤗᤠᤶ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤗ᤺ᤴᤍᤧ॥ ᤂᤧᤸᤗᤧᤀᤠᤱ ᤁᤢᤜᤢᤰᤁᤥ ᤂᤠᤃᤧᤛᤢᤰᤐᤠ ᤁᤠᤳᤆᤩᤠ᤺ᤴ ᤁᤳᤋᤢᤖᤥ॥
18 ᤜᤧᤰᤁᤩᤠᤱ ᤛᤠᤱᤛᤡᤱ ᤜᤠ᤺ᤶᤔᤠᤍᤧᤴᤏᤥᤗᤠᤶ ᤔᤡ᤺ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤴ ᤗ᤺ᤴᤍᤧᤀᤠᤱ ᤂᤧᤸᤗᤧ ᤂᤧᤴ ᤂᤠᤃᤧᤛᤢᤰᤐᤠ ᤁᤠᤳᤆᤩᤠ ᤁᤧᤃᤵᤐᤧᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤔᤧᤳᤋᤢ. “ᤂᤧᤴ ᤂᤠᤃᤧᤛᤢᤰᤐᤠ ᤁᤧᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤆᤧᤸᤗᤧᤰᤛᤣ᤹ᤜᤠ᤹ ᤛᤢᤵᤛᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤋᤢᤶᤛᤧᤄᤧᤖᤧᤀᤠᤱ ᤐᤳᤗᤥ॥”
19 ᤜᤧᤰᤁᤣ᤺ᤸᤗᤧ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤠᤰ ᤆᤧᤸᤗᤧᤰᤛᤣ᤹ᤜᤠ᤹ ᤛᤢᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤡᤸᤗᤧᤴ ᤐᤕᤶ ᤕᤶᤒᤠ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤁᤣ᤺ᤳᤋᤢ᤹ᤖᤥ॥
20 ᤜᤧᤰᤁᤩᤠᤱ ᤕᤧᤰᤕᤰ ᤗᤠ᤺ᤰᤁᤠᤳ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤔᤧᤗᤠ᤺ᤰᤋᤢ ᤔᤧᤛ᤹ᤖᤢᤀᤠᤱ ᤂᤧᤵᤔᤥᤗᤠᤶ ᤔᤠᤰᤂᤡ᤹ ᤗ᤺ᤴᤍᤧᤖᤥ॥ ᤂᤧᤴ ᤔᤠᤰᤂᤡ᤹ᤀᤡᤴ ᤀᤴᤜᤠ᤹ᤖᤧ ᤂᤢᤏᤡ᤹ ᤁᤖᤧᤗᤡ ᤌᤠᤖᤡᤰ ᤌᤠ᤺ᤱ ᤌᤠᤅᤧᤀᤠᤱ ᤁᤢᤃᤡᤵ ᤛᤢᤶᤛᤡ (᥉᥆᥆) ᤁᤡᤗᤥᤔᤡᤋᤖ ᤌᤠᤖᤡᤰ ᤘᤠᤃᤢᤛᤧ ᤐᤣᤖᤥ॥