19
ᤒᤧᤒᤡᤗᤥᤏᤧᤴ ᤔᤧᤃᤧᤒᤠᤀᤥ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤛ᤺ᤵᤔᤠᤴ
ᤂᤧᤴ ᤀᤣᤃᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤖᤡᤰ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧᤒᤠ ᤜᤧᤰᤁᤣ ᤂᤧᤵᤛᤢᤱᤗᤥ.
“ᤜᤠᤸᤗᤧᤗᤢᤕᤠ᥄ ᤛᤧᤴᤗᤵ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤡᤱᤃ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤗᤥ. ᤌᤣᤀᤠᤱᤓᤧᤸᤗᤧ ᤁᤢᤄᤠᤛᤧᤴᤏᤡᤱᤃ ᤛᤧᤰᤂᤠᤒᤠ ᤏᤢ ᤏᤢ᤺ᤒᤠ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤕᤠᤶᤒᤥ᤺ᤵᤔᤠ ᤁᤢᤕᤠ᤺ᤶᤒᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤈᤡ᤺ᤶᤔᤠ ᤂᤧᤴ ᤐᤕᤶ ᤕᤶᤔᤠ ᤁᤧᤳᤏᤡᤔᤠᤴ ᤂᤢᤶᤍᤡᤱ ᤐᤡᤖᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ ᤂᤧᤸᤗᤧ ᤛᤧᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤂᤢᤶᤍᤡᤱ ᤐᤡᤖᤢᤀᤠᤱ ᤘᤠ᤹ᤖᤥ॥”
ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤜᤠᤸᤗᤧᤗᤢᤕᤠ᥄ ᤂᤧᤴ ᤕᤧᤰᤕᤰᤁᤡᤴ ᤔᤡᤍᤡᤰᤁᤠᤱ ᤔᤡ᤺ᤰᤂᤢ᤹ᤀᤡᤱᤃ ᤛᤍᤠᤍᤡᤱ ᤌᤠ᤺ᤱ ᤐᤣ᤺ᤰᤗᤥ॥”
ᤜᤧᤰᤁᤩᤠᤱ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤗ ᤛᤣᤘᤠ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤀᤠᤔᤧᤴ. ᤜᤠᤸᤗᤧᤗᤢᤕᤠ᥄”
ᤔᤧᤸᤗᤢᤰᤛᤠ᤺ᤸᤗᤧ ᤋᤧᤴᤎᤠᤶᤃᤧᤴ ᤁᤢᤔᤣ᤺ᤰᤂᤡᤶ ᤛᤠᤓᤠᤱᤈᤠ
ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤗᤠᤶ ᤀᤰᤋᤱᤒᤠ ᤀᤡᤰᤗᤠᤎᤡᤰ ᤋᤩᤧᤖᤥ.
“ᤁᤠᤰ ᤆᤢᤰᤐᤠᤗᤠᤶ ᤕᤶᤒᤠ ᤌᤠᤖᤡᤰ ᤂᤢᤏᤧ᤹ᤏᤢ ᤁᤧᤃᤡᤒᤠ ᤁᤢᤛᤣᤘᤠᤖᤥᤒᤠᤛᤣ. ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧᤶᤔᤧ᤹ᤀᤥ᥄”
ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ ᤜᤧᤰᤋᤱᤒᤠ ᤀᤡᤰᤗᤠ᤺ᤴ ᤂᤧᤵᤛᤢᤱ॥ ᤂᤧᤱᤃ ᤐᤕᤶ ᤕᤶᤒᤠ ᤆᤫᤠ᤺ᤳ ᤛ᤺ᤰᤋᤧᤒᤠ ᤁᤢᤀᤡᤛᤡ᤺ᤰ ᤏᤢ ᤂᤧᤖᤧᤱ ᤄᤢᤖᤢᤱ ᤗ᤹ᤖᤧᤖ ᤗᤥ᤺ᤰᤂᤢᤀᤠᤱ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧ.
“ᤜᤠᤸᤗᤧᤗᤢᤕᤠ᥄ ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱ ᤆᤥᤃᤢ᤹ᤖᤥ॥
ᤀᤠᤸᤗ ᤀᤠᤏᤡ᤹ ᤛᤠ᤹ᤖᤡᤰᤁᤣ ᤛ᤺ᤳᤋᤡ.
ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤔᤡᤍᤡᤱ ᤐᤡᤖᤢᤶᤗᤥ.
ᤌᤣᤀᤠᤱᤓᤧᤸᤗᤧ ᤔᤧᤸᤗᤢᤰᤛᤠ᤺ᤸᤗᤧ ᤋᤧᤴᤎᤠᤶᤃᤧᤴ ᤁᤢᤔᤣ᤺ᤰᤂᤡᤶᤔᤡᤴ ᤋᤩᤧᤀᤠᤱ ᤘᤠ᤹.
ᤜᤧᤰᤁᤩᤠᤱ ᤁᤢᤛᤡᤛᤠᤔᤣ᤺ᤳᤋᤡᤴ* ᤀᤠᤒᤠᤅᤣ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
ᤛᤡᤛᤠᤔᤣ᤺ᤳᤋᤡᤱᤃ ᤑ᤺ᤃᤧᤗ᤹ᤒᤠ ᤁᤧᤀᤥ᤺ᤵᤐᤠ ᤏᤢ᤺ᤒᤠ ᤏᤠᤀᤡᤏᤠᤛᤢ᤺ᤳ ᤆᤠᤱ ᤆᤠᤱᤔᤠ ᤔᤧᤒᤡᤖᤢᤀᤠᤱ ᤘᤠ᤹॥”
(ᤏᤢ᤺ᤒᤠ ᤏᤠᤀᤡᤏᤠᤛᤢ᤺ᤳ ᤆᤠᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰᤗᤥ॥)
ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤠᤱ. “ᤁᤴ ᤐᤠ᤺ᤴᤏᤡᤴ ᤛᤠᤵᤋᤧ᤹–ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤔᤧᤀᤢ᤺ᤳᤋᤢᤛᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥” ᤂᤧᤸᤗᤧ ᤕᤠᤶᤔᤥ ᤀᤡᤱᤃᤠ᤹ ᤔᤧᤳᤋᤠᤱ. “ᤁᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠ ᤁᤢᤒᤠ᤺ᤴᤈᤠᤰᤛᤡᤖᤥ॥”
10 ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤂᤢᤏᤧ᤹ ᤛᤣᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤢᤗᤠᤱᤅᤥ ᤛᤠᤶᤒᤥ᤺ᤴ ᤑᤴᤇᤡᤅᤠᤱ. ᤁᤖ ᤂᤧᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ᥄ ᤀᤡᤱᤃᤠ᤹ᤃ ᤂᤧᤏᤧ᤹ ᤏᤢ ᤁᤧᤶᤓᤢ᤹ ᤁᤧᤴᤛᤠ᤹ᤛᤡ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠ ᤏᤢ ᤕᤧᤛᤢ᤺ᤴ ᤋᤥ᤺ᤴᤍᤡ ᤁᤧᤒᤡᤒᤠᤀᤠᤖᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤛᤣᤘᤠ ᤆᤥᤃᤧ᤹᥄”
ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤳᤋᤢᤒᤠ ᤛᤧᤰᤂᤠ ᤐᤠ᤺ᤴᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡ᤹ᤖᤥ॥
ᤁᤢᤓᤖᤠ ᤀᤴᤃᤧᤕᤢᤰᤐᤠ
11 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤜᤖᤧᤒᤠ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤂᤧᤵᤔᤥ ᤑ᤺ᤍᤠᤱᤒᤠ ᤀᤴᤎᤡᤰ ᤘᤕᤧ॥ ᤂᤧᤴ ᤛᤶᤍᤠᤱ ᤁᤧᤕᤢᤱᤒᤠᤸᤗᤧ ᤁᤢᤔᤡᤱᤅᤡᤴ “ᤏᤛᤠ᤺ᤴᤛᤠᤒᤠ” ᤏᤢ “ᤛᤧᤰᤂᤠ” ᤔᤧᤔᤧᤳᤋᤢᤖᤥ॥ ᤂᤢᤏᤧ᤹ᤃ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤆᤥᤃᤢ᤹ ᤜᤧᤰᤁᤩᤠᤱ ᤌᤱ ᤆᤥᤃᤢ᤹ᤖᤥ॥ 12 ᤂᤢᤏᤧ᤹ ᤁᤢᤔᤡᤰᤜᤠ᤹ᤃ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤆᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥ ᤕᤖᤡᤰ ᤋᤡᤆ᤺ᤜᤠ᤹ ᤔᤧᤒᤳᤇᤧ॥ ᤂᤢᤏᤧ᤹ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤁᤢᤔᤡᤱ ᤛᤠᤵᤋᤧᤀᤠᤱ ᤐᤳᤇᤧ॥ ᤂᤧᤸᤗᤧ ᤁᤢᤒᤣ᤺ᤱᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴ. ᤁᤖ ᤂᤢᤏᤧ᤹ᤖᤰ ᤁᤢᤛᤡᤱ ᤏᤡ᤺ᤳᤋᤢᤖᤥ॥ 13 ᤂᤢᤏᤧ᤹ᤃ ᤔᤠᤰᤂᤡ᤹ᤀᤥ ᤏᤡ᤺ᤶᤔᤏᤠᤒᤠ ᤋᤣ᤺ᤳ ᤆᤠᤰᤂᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤡᤱᤃ “ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤗᤥ”॥ 14 ᤜᤧᤰᤁᤩᤠᤱ ᤑ᤺ᤃᤧᤗ᤹ᤒᤠ ᤏᤢ ᤛᤣᤛᤣᤒᤠ ᤏᤠᤀᤡᤏᤠᤛᤢ᤺ᤳ ᤋᤣ᤺ᤳ ᤁᤧᤈᤠᤱᤒᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤑ᤺ᤃᤧᤗ᤹ᤒᤠ ᤀᤴᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ 15 ᤂᤢᤏᤧ᤹ ᤁᤢᤔᤢᤖᤠᤀᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤠᤃᤧᤛᤢᤰᤐᤠ ᤋᤠᤓᤣ᤺ᤴ ᤗ᤺ᤴᤍᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤑᤧᤴᤈᤣ᤹ ᤋᤰᤁᤠ᤺ᤳᤋᤡᤸᤗᤧ ᤕᤢᤰ ᤆᤥᤃᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤗᤠᤱᤅᤡᤸᤗᤧ ᤆᤧᤸᤗᤧᤰᤛᤣ᤹ᤀᤡᤴ ᤛ᤹ᤔᤏᤠᤒᤠ ᤜᤧᤰᤁᤣ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤁᤢᤏᤡᤱᤔᤡᤜᤠ᤹ ᤛ᤹ᤖᤢᤛᤡᤖᤥ॥ 16 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤣ᤺ᤳᤋᤥ ᤏᤢ ᤁᤢᤛᤧᤒᤱᤒᤥ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤏᤢ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳᤇᤧ॥
17 ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤠᤱᤗᤠᤀᤡᤱᤒᤠᤎᤡᤰ ᤏᤠᤶᤔᤥ ᤕᤧᤒᤧᤒᤠ ᤏᤡ᤺ᤛᤢᤱ. ᤂᤧᤸᤗᤧ ᤋᤠᤱᤛᤠᤰᤐᤥ ᤁᤧᤒᤧᤒᤠᤖ ᤁᤧᤘᤠ᤹ᤒᤠ ᤁᤠᤰ ᤁᤡᤍᤠᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤋᤩᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤐᤕᤶ ᤕᤶᤒᤠ ᤛᤠᤓᤠᤱᤈᤠᤀᤥ ᤆᤢᤵᤛᤧᤶᤔᤧ᤹ᤀᤥ॥ 18 ᤜᤠᤱᤜᤠ᤹. ᤌᤰᤋᤢᤶᤒᤠᤜᤠ᤹. ᤌᤰᤛᤢᤒᤠᤜᤠ᤹. ᤜᤧᤰᤁᤩᤠᤱ ᤀᤴᤜᤠ᤹ ᤏᤢ ᤀᤴ ᤁᤧᤕᤢᤰᤐᤠᤜᤠ᤹. ᤜᤧᤰᤁᤩᤠᤱ ᤕᤥ᤺ᤰᤐᤠ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹. ᤆᤢᤰᤐᤠ ᤏᤢ ᤕᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤧᤰᤛᤠ᤺ᤴ ᤆᤠᤛᤧ ᤋᤩᤧᤶᤔᤧ᤹ᤀᤥ॥”
19 ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤜᤧᤰᤁᤩᤠᤱ ᤂᤢᤏᤡ᤹ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤛᤧ ᤀᤴ ᤁᤧᤕᤢᤰᤐᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤢᤵᤛᤧᤒᤠ ᤏᤡ᤺ᤛᤢᤱᤛᤡᤱᤗᤥ॥ 20 ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤂᤢᤏᤧ᤹ ᤁᤢᤍᤃᤡ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤧᤴ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤔᤧᤍᤧᤶᤛᤢᤛᤡᤖᤥ॥ ᤂᤧᤸᤗᤧ ᤔᤢᤰᤛᤠᤶᤖᤧ ᤁᤢᤎᤡᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤖᤧ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴ ᤁᤧᤗᤰᤐᤠ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤀᤡᤱᤗᤧᤰᤋᤢᤛᤡᤀᤠᤱ ᤘᤕᤧᤖᤥ॥ ᤂᤧᤱᤜᤠ᤹ ᤏᤧᤵᤔᤠᤱ ᤁᤢᤜᤡᤱᤘᤧᤳᤋᤣ ᤁᤠᤴᤎᤠᤰ ᤁᤧᤍᤡ᤺ᤵᤐᤠ ᤔᤡᤖᤠ᤺ᤰ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢᤛᤢᤛᤡᤖᤥ॥ 21 ᤜᤧᤰᤁᤩᤠᤱ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤋᤠᤓᤣᤗᤠᤶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤰᤛᤢᤒᤠᤜᤠ᤹ ᤔᤧᤛᤩᤧᤀᤠᤱ ᤁᤠᤰ ᤁᤡᤌᤜᤠ᤹ᤖᤧ ᤂᤢᤏᤡ᤹ ᤏᤧᤰᤛᤠ᤺ᤴ ᤂᤠᤄᤠ ᤔᤧᤈᤖᤥ॥
* 19:7 ᤁᤢᤛᤡᤛᤠᤔᤣ᤺ᤳᤋᤡᤴ–ᤔᤧᤸᤗᤢᤰᤛᤠ᤺ᤸᤗᤧ ᤁᤢᤛᤡᤛᤠᤔᤣ᤺ᤳᤋᤡᤴ ᤑᤠ᤹ᤀᤡᤴ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ᤖᤥ. ᤕᤠᤶᤔᤥᤀᤠᤱ ᤂᤢᤏᤧ᤹ ᤁᤢᤔᤣ᤺ᤰᤂᤡᤶᤛᤠᤒᤠ ᤜᤧᤰᤁᤣ ᤌᤠ᤺ᤒᤧᤀᤠᤱ ᤘᤠ᤹॥