5
ᤛᤠᤵᤁᤡᤳᤋᤡᤴ ᤏᤢ ᤔᤧᤸᤗᤢᤰᤛᤠ᤺ᤴ
1 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥ ᤀᤣᤃᤠᤱ ᤋᤃᤠᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤵᤁᤡᤳᤋᤡᤴ ᤁᤳᤋᤢᤒᤠ ᤏᤡ᤺ᤛᤢᤱ॥ ᤂᤧᤴ ᤛᤠᤵᤁᤡᤳᤋᤡᤴ ᤔᤧᤛᤢᤒᤢᤀᤠᤱ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤔᤧᤕᤢᤰᤋᤢᤀᤠᤱ ᤐᤳᤇᤧᤖᤥ॥
2 ᤜᤧᤰᤁᤩᤠᤱ ᤂᤧᤵᤔᤥ ᤔᤢᤰᤛᤠᤶᤛᤠᤒᤠ ᤔᤠᤱᤗᤠᤀᤡᤱᤒᤠᤴ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧᤒᤠ ᤀᤡᤱᤃᤠ᤹ ᤏᤡ᤺ᤛᤢᤱ. “ᤁᤴ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤁᤧᤛᤢᤰᤐᤠ ᤏᤢ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤁᤧᤛᤢᤰᤐᤠ ᤜᤠ᤺ᤳ ᤘᤠ᤹ᤒᤣ᥅”
3 ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤛᤡᤃᤠᤱᤅᤠᤱ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱ ᤀᤥᤔᤧᤵᤔᤠ ᤁᤧᤛᤢᤰᤐᤠ ᤀᤠᤳᤋᤡᤴᤏᤠᤱ ᤜᤥ᤺ᤵᤋᤧᤖᤥ॥
4 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤜᤠᤒᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤏᤡ᤺ᤵᤔᤠ ᤁᤧᤛᤢᤰᤐᤠ ᤛᤢᤶᤒᤥᤎᤠᤛᤠᤒᤠ ᤀᤠᤳᤋᤡᤴᤏᤠᤱ ᤂᤥ᤺ᤔᤠ ᤛᤢᤰᤔᤧᤍᤧᤳᤋᤧᤴᤗᤥ॥
5 ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤎᤡᤰᤗᤧ ᤀᤡᤱᤃᤠ᤹ ᤔᤧᤳᤋᤠᤱ. “ᤔᤧᤜᤠᤒᤧᤏᤧ᤹ᤀᤥ᥄ ᤀᤥᤔᤧᤳᤋᤧ᤹. ᤕᤜᤢᤍᤠ ᤛᤢᤘᤠᤱᤒᤠ ᤌᤡᤖᤡᤱᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ᤺ᤸᤗᤧ ᤁᤴ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤜᤧᤰᤁᤩᤠᤱ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤛᤢᤰᤋᤢ᤹ᤖᤥ॥”
6 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤒᤣᤛᤠᤱ. ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ. ᤔᤧᤸᤗᤢᤰᤛᤠ᤺ᤴ ᤕᤧᤒᤧᤒᤠ ᤏᤡ᤺ᤛᤢᤱ॥ ᤂᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥ ᤂᤧᤸᤗᤧ ᤏᤢᤛᤡ ᤁᤢᤍᤠᤱᤜᤠ᤹ ᤕᤢᤅᤧ ᤜᤧᤰᤁᤩᤠᤱ ᤏᤢᤛᤡ ᤁᤢᤔᤡᤰᤜᤠ᤹ ᤔᤧᤒᤳᤇᤧᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤠᤰ ᤐᤡᤛᤠᤱ ᤐᤠᤱᤄᤢᤛᤡᤒᤠ ᤏᤢᤛᤡ ᤁᤢᤛᤣᤛᤣᤔᤠᤱᤛᤡᤖᤥ॥
7 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤴ ᤋᤩᤧᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥᤗᤠᤶ ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱ॥
8 ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱᤅᤡᤸᤗᤧ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤃᤡ ᤛᤠᤶᤒᤥ᤺ᤴ ᤔᤧᤓᤴᤇᤡᤱ॥ ᤂᤧᤴ ᤁᤧᤖᤧᤰᤗᤧ ᤂᤢᤏᤡ᤹ ᤜᤢᤰᤁᤥ ᤛᤠᤖᤠᤱᤃᤡ ᤜᤧᤰᤋᤱᤒᤠ ᤔᤢᤰᤗᤠ ᤏᤢ ᤛᤠᤱᤛᤡᤱᤖᤧ ᤁᤧᤍᤡᤶᤒᤠ ᤛᤠᤶᤔᤩᤠᤱ ᤂᤥᤷᤕᤠᤜᤠ᤹ ᤔᤧᤃᤳᤋᤢ॥ ᤂᤧᤴ ᤛᤠᤱᤛᤡᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠᤖᤥ॥
9 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤁᤢᤛᤱ ᤛᤠᤶᤗᤥᤎᤡᤰ ᤛᤠᤶᤔᤧᤔᤧᤳᤋᤢᤖᤥ.
“ᤂᤧᤏᤧ᤹ᤃ ᤛᤠᤵᤁᤡᤳᤋᤡᤴ ᤐᤱᤔᤠᤀᤠᤱ ᤂᤧᤵᤔᤥ ᤁᤧᤒᤵᤐᤠ ᤁᤢᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤛᤢᤶᤒᤥᤎᤠᤛᤠᤒᤠ ᤁᤧᤈᤥ᤺ᤰᤗᤥ.
ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤁᤧᤶᤛᤧᤖᤧ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣᤜᤠ᤹ᤗᤠᤶ ᤔᤏᤠᤜᤠ᤹ ᤂᤧᤏᤧ᤹ ᤁᤧᤔᤠᤰᤂᤡ᤹ᤀᤡᤸᤗᤧ ᤁᤧᤎᤧ᤹ᤖᤢᤛᤡᤖᤥ.
10 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤁᤢᤜᤠᤱᤈᤢᤶᤔᤥ ᤁᤢᤛᤣᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤈᤥᤃᤢᤛᤡ.
ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤱ ᤔᤧᤈᤥᤃᤢ᤹ᤖᤥ॥”
11 ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ᤺ᤴ ᤂᤧᤵᤛᤢᤱᤅᤠᤱ ᤀᤥᤔᤧᤳᤋᤢᤱᤛᤡᤱᤅᤡᤸᤗᤧ ᤂᤧᤵᤔᤥ ᤜᤠᤱᤕᤢᤰᤏᤠ᤺ᤴ ᤏᤢ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤂᤡᤖᤡ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤒᤠ ᤏᤡ᤺ᤛᤢᤱ॥
12 ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤖᤥ.
“ᤂᤧᤴ ᤔᤧᤛᤧᤖᤢᤒᤠ ᤔᤧᤸᤗᤢᤰᤛᤠ᤺ᤴ. ᤔᤢᤰᤛᤠᤶ ᤏᤢ ᤕᤠᤱᤛᤠᤁᤢᤴᤎᤣ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤌᤢᤶ. ᤔᤡᤱᤛᤥ ᤀᤡᤱᤎᤠ᤺ᤱ. ᤔᤡᤔᤡᤍᤡᤱ. ᤏᤢ ᤏᤠᤖᤠ ᤑᤥ᤺ᤔᤠ ᤛᤢᤶᤒᤥᤎᤠᤛᤠᤒᤠ ᤆᤥ᤺ᤰᤗᤥ᥄”
13 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤛᤡᤃᤠᤱᤒᤠ. ᤜᤧᤰᤁᤩᤠᤱ ᤘᤠᤜᤱᤅᤥᤒᤠ ᤁᤧᤖᤧᤰ ᤐᤠᤌᤢᤱᤛᤠᤜᤠ᤹ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤒᤠ ᤂᤧᤵᤛᤢᤱᤗᤥ.
“ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤏᤠᤖᤠ ᤑᤥ᤺ᤔᤠᤴ.
ᤔᤡᤱᤛᤥ ᤀᤡᤱᤎᤠ᤺ᤱ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶ ᤛᤍᤠᤍᤡᤱ ᤛᤍᤠᤍᤡᤱ ᤐᤥ᤺ᤱᤗᤖᤥ᥄”
14 ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ “ᤀᤠᤔᤧᤴ” ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤴ ᤛᤣᤘᤠ ᤔᤧᤈᤥᤃᤢᤛᤡᤖᤥ॥