3
ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤛᤠᤶᤕᤥ ᤔᤧ᤺ᤴᤏᤣᤒᤠᤜᤠ᤹
1 ᤀᤠᤸᤗ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤁᤧᤛᤠᤰᤐᤠ ᤕᤧᤶ ᤋᤠ᤺ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤛᤥᤀᤥ ᤕᤢᤰᤂᤧ᤹ᤀᤥ॥
2 ᤂᤧᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤃ ᤀᤠᤵᤑᤣ᤺ᤰᤗᤰ ᤔᤡ᤺ᤶᤈᤡ ᤁᤧᤔᤧᤳᤇᤡᤱᤒᤠ. ᤕᤠᤱᤛᤠᤁᤢᤴᤎᤣᤖᤰ ᤔᤡ᤺ᤶᤈᤡ ᤁᤧᤔᤧᤵᤐᤠ ᤏᤢ ᤀᤠᤵᤑᤣ᤺ᤰᤗᤰ ᤕᤶᤒᤠᤛᤡᤃᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ. ᤀᤠᤱᤍᤡᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤔᤏᤠ ᤆᤠ᤺ᤳᤌᤡ ᤁᤧᤍᤣ᤺ᤒᤠ ᤔᤧᤒᤥ᤺ᤱᤗᤥ॥ ᤂᤧᤱᤜᤠ᤹ᤃ ᤐᤠ ᤔᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤔᤧᤶᤒᤵᤔᤏᤠᤒᤠ. ᤀᤥᤒᤧ ᤁᤧᤈᤥᤃᤢ ᤁᤧᤒᤡᤖᤠᤱᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤴᤀᤡ᤺ᤵᤔᤏᤠᤒᤠ. ᤜᤧᤰᤁᤩᤠᤱ ᤛᤠᤶᤕᤥ ᤔᤧᤴᤀᤡ᤺ᤵᤔᤏᤠᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤒᤥ᤺ᤱᤗᤥ॥
3 ᤂᤧᤱᤜᤠ᤹ᤖᤧ ᤀᤠᤳᤋᤡᤴᤜᤠ᤹ᤀᤠᤱ ᤗᤢᤱᤔᤠ᤹ ᤔᤧᤴᤍᤢᤰᤋᤢᤴᤛᤡᤴ. ᤘᤣ᤹ᤜᤠ᤹ ᤗᤧᤵᤔᤡ ᤔᤧᤶᤒᤡᤖᤢᤴᤇᤡᤴ. ᤜᤧᤰᤁᤩᤠᤱ ᤆᤧ᤹ᤕᤠ ᤁᤧᤔ᤺ᤒᤠ. ᤜᤧ᤹ᤗᤧ᤹ᤗᤧᤒᤠ. ᤁᤡᤵᤔᤠ ᤁᤧᤄᤢ᤺ᤒᤠ. ᤏᤢ᤺ᤒᤠ ᤐᤠ᤺ᤴ ᤛᤡᤖᤠ᤹ ᤔᤧᤴᤎᤠᤱᤔᤏᤠᤒᤠ ᤔᤧᤒᤥ᤺ᤱᤗᤥ॥
4 ᤂᤧᤱᤜᤠ᤹ ᤘᤣ᤹ ᤔᤏᤠ ᤀᤡᤱᤗᤧᤰ ᤁᤧᤔᤧᤵᤐᤠ. ᤏᤡᤱᤘᤠ᤹ᤋᤠᤍᤠ ᤁᤧᤈᤥ᤺ᤰᤐᤠ. ᤀᤠᤱᤍᤡᤱᤅᤠᤱ ᤀᤡᤱᤃᤠ᤹ᤀᤣ᤺ᤰ ᤁᤧᤗ᤹ᤒᤠ ᤔᤧᤒᤥ᤺ᤱᤗᤥ॥ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤧᤰᤘᤠ ᤕᤠᤶᤍᤠᤍᤠ ᤏᤡᤱᤘᤠ᤹ᤋᤠᤍᤠ ᤆᤥ᤺ᤰᤔᤠᤀᤣ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥
5 ᤂᤧᤱᤜᤠ᤹ᤃ ᤛᤠᤶᤕᤥᤒᤠ ᤔᤧᤗᤧᤱᤛᤡᤱ ᤁᤖ ᤔᤢᤰᤛᤠᤶᤔᤡᤴ ᤔᤧᤴᤜᤧᤵᤋᤢᤴᤗᤥ॥ ᤀᤰᤋᤱᤒᤠ ᤔᤏᤠᤜᤠ᤹ᤏᤢ ᤂᤧᤏᤧ᤹ᤃ ᤀᤣ᤺ᤰ ᤘᤕᤧ᤹ᤀᤥ॥
6 ᤁᤢᤓᤠᤃ ᤜᤡᤶ ᤜᤡᤶ ᤔᤧᤒᤣ᤺ᤰᤁᤠᤱ ᤗᤠᤕᤥ᤺ᤸᤗᤧ ᤁᤧᤵᤋᤢᤛᤡᤔᤠᤜᤠ᤹ ᤏᤢ ᤁᤠᤰ ᤐᤖᤡᤰᤗᤧᤴ ᤕᤠᤶᤏᤡᤱᤘᤠ᤹ᤀᤥ ᤁᤧᤒᤵᤔᤠ ᤏᤡᤱᤘᤠ᤹ ᤛᤢᤱᤃᤡᤰᤔᤠ ᤔᤧᤴᤇᤢᤔᤠᤜᤠ᤹ ᤕᤢᤰᤁᤥ ᤔᤧᤍᤠᤖᤢᤛᤡᤖᤥ॥
7 ᤂᤧᤴ ᤔᤧᤴᤇᤢᤔᤠᤜᤠ᤹ ᤀᤠᤰᤂᤧᤴ ᤔᤧᤜᤢ᤹ᤛᤡᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤛᤧᤰᤂᤠ᤺ᤴ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
8 ᤈᤣᤴᤏᤛ ᤏᤢ ᤈᤣᤶᤒᤪᤛᤛᤡᤖᤧ ᤔᤥᤛᤠ᤺ᤴ ᤔᤧᤀᤳᤋᤢᤒᤠ ᤁᤢᤀᤡᤛᤡ᤺ᤰ ᤂᤧᤴ ᤔᤏᤠᤜᤠ᤹ᤖᤧ ᤛᤧᤰᤂᤠ᤺ᤴ ᤔᤧᤀᤳᤋᤢᤖᤥ॥ ᤂᤧᤴ ᤔᤏᤠᤜᤠ᤹ ᤑᤧᤴᤏᤡᤱᤘᤠ᤹ᤒᤠᤛᤡᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤛᤧᤰᤂᤠᤒᤠ ᤔᤧᤈᤥ᤺ᤰᤏᤧᤴ॥
9 ᤁᤖ ᤂᤧᤱᤜᤠ᤹ᤖᤧ ᤒᤠ ᤜᤧᤰᤁᤣᤖᤰ ᤆᤥ᤺ᤰᤔᤠᤖ ᤘᤠ᤹ᤔᤠ ᤔᤧᤴᤇᤢᤰᤋᤢᤴᤗᤥ॥ ᤈᤣᤴᤏᤛ ᤏᤢ ᤈᤣᤶᤒᤪᤛᤛᤡ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤖᤧᤀᤠᤱ ᤂᤢᤏᤡ᤹ ᤀᤍᤱ ᤆᤥ᤺ᤰᤔᤠᤴᤏᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢ᤹ᤖᤥ॥
ᤐᤠᤘᤗᤖᤧ ᤋᤡᤔᤥᤌᤡ᤺ᤴ ᤀᤡᤱᤈᤠ᤺ᤱ ᤐᤡᤖᤢ᤹
10-11 ᤁᤖ ᤂᤧᤏᤧ᤹ᤃ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ. ᤀᤠᤕᤧᤵᤗᤧᤰᤁᤡᤴ. ᤜᤡᤱᤔᤴᤗᤧᤴ ᤀᤠᤏᤡᤱᤘᤠ᤹ᤛᤥ᤺ᤰᤁᤡᤴ. ᤀᤠᤏᤛᤠ᤺ᤴᤏᤡᤴ. ᤀᤠᤜᤠᤱᤃᤧᤶᤛᤡᤱᤔᤠᤴ. ᤀᤠᤔᤡ᤺ᤶᤈᤡᤴ. ᤀᤠᤏᤠᤛᤡ ᤌ᤺ᤵᤔᤠᤴ. ᤋᤢᤰᤂᤣ ᤆᤩᤠᤱᤒᤠ ᤐᤠ᤺ᤴᤜᤠ᤹. ᤀᤠᤍᤢᤰᤂᤣᤜᤠ᤹ ᤁᤧᤖᤧᤰ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤣᤴᤋᤡᤀᤥᤁ. ᤀᤠᤀᤡᤁᤥᤏᤡᤕᤔ ᤏᤢ ᤗᤢᤛ᤻ᤋᤪᤠᤀᤥ ᤀᤡᤱᤃᤠ᤹ ᤋᤢᤔᤢᤱᤒᤠ ᤁᤧᤖᤧᤰ ᤋᤢᤰᤂᤣᤜᤠ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤁᤖ ᤍᤠᤱᤒᤠᤸᤗᤧ ᤁᤠᤰ ᤂᤧᤴ ᤋᤢᤰᤂᤣ ᤗᤠᤰᤂᤣᤗᤠᤶ ᤀᤡᤱᤃᤠ᤹ ᤛᤧ᤺ᤵᤋᤠᤱᤗᤥ॥
12 ᤂᤪᤡᤛ᤻ᤋ ᤕᤧᤛᤢᤀᤥ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤱᤃ ᤋᤢᤰᤂᤣ ᤆᤠᤀᤣᤖᤥ॥
13 ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ ᤏᤢ ᤀᤡᤱᤃᤧᤗᤧᤰᤐᤠ ᤔᤏᤠᤜᤠ᤹ᤃ ᤘᤣ᤹ ᤔᤏᤠᤜᤠ᤹ ᤀᤡᤱᤗᤧᤰᤋᤢᤶᤛᤡᤶᤒᤠ. ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤶᤛᤡᤶᤒᤠ ᤗ᤹ᤖᤡᤰ ᤔᤧᤀᤡ᤺ᤳᤋᤢᤖ ᤔᤧᤒᤣ᤺ᤰᤁᤡᤸᤗᤧ ᤀᤠᤵᤑᤣ᤺ᤰ ᤀᤡᤱᤔᤧᤗᤧᤰᤛᤡᤱᤗ ᤛᤠ᤹ᤖᤡᤰᤁᤠᤱ ᤋᤠᤵᤑᤧ᤺ᤶᤒᤠ ᤔᤧᤒᤥ᤺ᤱᤗ ᤔᤧᤒᤣ᤺ᤰᤗᤥ॥
14 ᤁᤖ ᤂᤧᤏᤧ᤹ᤃ ᤁᤧᤄᤥ᤺ᤛᤢᤒᤠ ᤏᤡᤛᤠᤶᤔᤥ ᤆᤰᤔᤧᤸᤗ᤹ᤀᤣ ᤐᤳᤇᤧ᤹ᤀᤥ॥ ᤂᤧᤴ ᤏᤡᤛᤠᤶᤜᤠ᤹ ᤛᤧᤰᤂᤠᤀᤣ ᤔᤧᤈᤥ᤺ᤰ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤡᤛᤠᤶ ᤁᤧᤜᤢ᤹ᤒᤠᤜᤠ᤹ ᤋᤠ᤺ᤰᤐᤥ ᤕᤢᤱᤔᤠ ᤁᤧᤛᤢᤰᤋᤢᤛᤡ᤹ᤖᤥ॥
15 ᤂᤧᤏᤧ᤹ ᤁᤧᤈᤢ᤺ᤰᤋᤧᤀᤠᤱᤎᤥ ᤏᤢ᤺ᤖᤡᤰᤁᤠᤱ ᤛᤣᤛᤣ ᤛᤠᤶᤕᤥᤛᤠᤵᤗᤠ ᤁᤧᤗᤧᤛ᤻ᤛᤢᤀᤠᤱ ᤁᤧᤘᤠ᤹ᤖᤥ॥ ᤒᤠ ᤁᤴ ᤐᤠ᤺ᤴᤜᤠ᤹ᤀᤥᤗᤠᤶ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤠ ᤂᤥᤃᤧᤍᤧᤵᤐᤠ ᤛᤧᤴᤗᤵᤖᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤁᤧᤄᤥ᤺ᤛᤢ᤹ᤖᤥ॥
16 ᤁᤠᤰ ᤛᤠᤶᤕᤥᤛᤠᤵᤗᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤈᤠᤱᤘᤠᤗᤠᤶ ᤀᤠᤒᤡᤖᤧᤒᤠᤖᤥ. ᤜᤧᤰᤁᤩᤠᤱ ᤂᤧᤱᤃ ᤛᤠᤶᤕᤥᤏᤡᤒᤠ ᤏᤡᤛᤠᤶ ᤐᤡᤔᤠ. ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤏᤢ᤺ᤖᤡᤰᤁᤠᤱ ᤋᤥ᤺ᤶᤔᤠ. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤀᤥ᤺ᤴᤎᤠᤰ ᤐᤡᤔᤠ. ᤛᤠ᤹ᤖᤡᤰ ᤕᤠ᤺ᤶᤒᤰ ᤀᤠᤒᤡ᤹ᤖᤥ॥
17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤁᤠᤰ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ ᤀᤠᤒᤡᤖᤧᤒᤠᤖᤥ॥