5
याङ्‌साकुन्‍धेसाबाहाॽ साम्‍दिङ्
याङ्‌साकुन्‍धेसाबासे, नुःरिक्‍काङ् खे़प्‍से़म्‍मे़ॽओ, आल्‍ल खिनिॽ सम्‍दाङ् के़दाःबार के़बप्‍पा साॽरिक् के़साक्‍पा इनोगे़न् तुक्‍खेःल्‍ले़ चोगुल्‍ले़ हाःबे़म्‍मे़ॽ फिःक्‍ते़म्‍मे़ॽओ॥ खिनिॽ याङ्‌साकुन्‍धेःङ्‌ग यःप्‍पेःक्‍लो, हे़क्‍क्‍याङ् खिनिॽ चाङ् तेःत्‍हाॽ थक् थाःरो॥ खिनिॽ साम्‍म्‍याङ् युप्‍पाहाॽ हने़बा पोःक्‍खे़आङ् वाॽरो हे़क्‍क्‍याङ् मिःल्‍ले़ लाबुबा कुइसिःक् ताःक्‍पो के़जोगुम्‍बा याङ्‌साकुन्‍धेःल्‍ले़ खिनिॽ ने़क्‍साःन् चरो॥ खिनिॽ यरिक् याङ्‌गे़घोःत्तुम्‍बा याङ्‌साकुन्‍धेःङ्‌ग ताःन्‍दि खासे़न् चोःक्‍मा ये़न्‍नो खिनिॽ तक्‍ले़ङ्‌वाओ तोःन्‍दि पोःङ्‌लो॥ ओमे़त्ते़म्‍मे़ॽओ! खिनिॽ इक्‍ताप्‍पो नाम्‌याक् मे़म्‍बिए याःम्‍बक्‍को के़भत्‍छुम्‍सिम्‍बा मनाहाॽरे़ खुनिॽ नाम्‌याक्‍किन् खिनिॽ तक्‍ले़ङ्‌वाओ अःक्‍लो॥ खे़न् चागे़सुम्‍बाहाॽरे़ खुनिॽ इक्‍लाःङ्‌ग मुक्‍साम्‍दाङ्‌बा निङ्‌वाॽफुमाङ्‌ङिल्‍ले़ खे़प्‍सुआङ् वाॽरो॥
इक्‍सादिङ् खाम्‍बेःक्‍मो खिनिॽ याम्‍दादा नु आबाङेरक् निङ्‌वाॽ तादा के़वयिॽआङ् से़प्‍मा ये़न्‍नो थारिक् थक्‍साःन् चालुप्‍मनाबा कुइसिःक् खिनिॽ चागे़लुप्‍पासिआङ् के़वयिरो॥ खिनिॽ साम्‌योनिबा मनाहाॽ आप्‍तिक् के़गुःत्तुम्‍सिम्‍माङ् के़से़रुम्‍सिम्‍साङ् के़मे़न्‍अत्तिन्‍लो॥
इनोगे़न् तुक्‍खेओ नासि थःप्‍मा पोःङ्
खे़ल्‍ले़ चोगुल्‍ले़ फुॽनुसाॽ नु ने़ॽनुसाॽसे, दाङ्‌बाल्‍ले़ कुनुःङ्‌मा युःमा ये़म्‍मिन् के़हाङ्‌घुम्‍मिल्‍ले़ खिनिॽ नासि थःप्‍माआङ् हाङ्‌माए पोःङ्‌लो॥ इक्‍मःबाल्‍ले़ कुइक्‍ताप्‍पो इमे़ल्‍लुङ्‌बा कुजाॽ नुःरिक्‍काङ् थोःक्‍ल फाॽआङ् हाङ्वाःम्‍मा नु चुङ्वाःम्‍माओ पाङ्‌गे़न्‍दिङ् वाहित्‍मान् नासि थःत्तुआङ् हाङ्‌घुबान् निङ्‌वाॽ इःत्ते़म्‍मे़ॽओ॥ हे़क्‍केलॽरिक्‍के खिनिॽआङ् नासि के़धःप्‍पा नु निङ्‌साङ् के़जोःक्‍पा पोःक्‍खे़म्‍मे़ॽओ, थेआङ्‌भे़ल्‍ले़ दाङ्‌बाल्‍ले़ कुयुःमा ये़म्‍मिङ्‌ग निःत्ताङ्‌ङे वाॽरो॥
फुॽनुसाॽ नु ने़ॽनुसाॽसे, खिनिॽ लुम्‍मो चे़ॽया मे़मे़त्तासिम्‍मिन्‍ने़ॽओ॥ मे़ःन्‍ने़ फाॽग्र निङ्‌वाॽफुमाङ्‌ङिल्‍ले़ खिनिॽ खासे़न् चोगुॽरो॥ पयम् यम्‍बा खासे़न्‍दाङ्‌बान् ताःमा इःत्ते़आङ् वाॽरो!
10 फुॽनुसाॽ नु ने़ॽनुसाॽसे, दाङ्‌बाल्‍ले़ कुमिङ्‌ङो उन्‍छेःन्‍बा माङ्‌निङ्‌वाॽपाःन् के़बाःप्‍पाहाॽ* ओमे़त्ते़म्‍सिम्‍मे़ॽओ॥ खे़ङ्‌हाॽरे़ इनोगे़न् तुक्‍खेओ नासि मे़धःत्तुआङ् कुबि मे़बोःक्‍खे़आङ् मे़वाॽरो॥ 11 ओमे़त्ते़म्‍मे़ॽ, इनोगे़न् तुक्‍खेओ नासि के़धःप्‍पाहाॽग मुॽइसाबासि फाॽआङ् आइःत्तुम्‍सिम्‍लो॥ अयुबरे़* कुनासि थःप्‍माङ्‌ग खिनिॽ के़घे़प्‍सुम्‍माङ् के़वयिॽ, हे़क्‍क्‍याङ् कुनुप्‍मो दाङ्‌बाल्‍ले़ नुःबा पाःन्‍हाॽ तारु पिरुबान् के़निःसुम्‍माङ् के़वयिॽरो॥ दाङ्‌बाङ्‌ग मिःम्‍जि नु लुङ्‌दुक्‌कुधिम् चोःक्‍लो॥
माङ्‌हे़क्‍सिङ्‌मा मे़ःन्
12 फुॽनुसाॽ नु ने़ॽनुसाॽसे, आल्‍ल साङ्‌ग्राम्‍पेदाङ् इग्र इक्‍सादिङ् खाम्‍बेःक् हे़क्‍क्‍याङ् वेॽ थे पाःन्‍नोआङ् माङ्‌मे़हे़क्‍कासिम्‍मे़न्‍ने़ॽओ॥ हाराॽ खिनिॽ पाःन्‍निन् ओने़ फाॽग्र “ओ” मे़ःन्‍ने़ फाॽग्र “मे़ःन्” पोःङ्‌लरो, मे़ःङ्‌ग्र खिनिॽ खुम्‍दिङ्‌ङो के़ध्‍ये़ॽइरो॥
नसाःन् कुधिम्‍बा तुवा
13 खिनिॽओ हाःत् इनोगे़न् तुक्‍खेओ वाॽबे? हाराॽ खे़ल्‍ले़ तुवा चोगुररो॥ हाःत् ओमु लॽमाओ वाॽ? हाराॽ खे़ल्‍ले़ दाङ्‌बाल्‍ले़ कुनारा फोःमा साम्‍लोःन् साम् मे़त्तुररो॥
14 हे़क्‍क्‍याङ् खिनिॽओ हाःत् तुक्‍पे? हाराॽ खे़ल्‍ले़ सेसेहुप्‍लक्‍कोबा तुम्‍लाम्‍लोःबा तुम्‍भाक्‍साहाॽ उःत्तुसिररो॥ हे़क्‍क्‍याङ् खे़ङ्‌हाॽरे़ वेःत्‍ल फाॽआङ् दाङ्‌बाल्‍ले़ कुमिङ्‌ङो निःङ्‌गेःन् मे़हुःत्तुआङ् तुवा मे़जोगुररो॥ 15 हे़क्‍क्‍याङ् नसाःन्‍लाम्‍बा चोःक्‍मनाबा तुवाःल्‍ले़ खे़न् के़दुक्‍पे़न्‌वेःत्‍लो॥ दाङ्‌बाल्‍ले़ खे़न् वेःन्‍दुॽरो॥ खे़ल्‍ले़ लायो चोगुआङ् वये़साङ्, दाङ्‌बाल्‍ले़ खे़न् ले़प्‍मि पिरुॽरो॥
16 खे़ल्‍ले़ चोगुल्‍ले़ खिनिॽ लायोहाॽ मे़त्तासिम्‍मे़ॽआङ् हिन्‍दे़म्‍मे़ॽओ, हे़क्‍क्‍याङ् दाङ्‌बाल्‍ले़ के़वेःन्‍दिर फाॽआङ् तुवा चोःक्‍का पिआसिम्‍मे़ॽओ॥ साम्‌योनिबा मनाःल्‍ले़ कुदुवाःन् मुक्‍साम्‍बा चोःक्‍काङ् यम्‍बा याःम्‍बक् चोगुॽरो॥ 17 माङ्‌निङ्‌वाॽपाःन् के़बाःप्‍पा एलियाःन्‍नाङ् आनिॽ हे़क्‍तङ्‌बा मनाए चोगे़रो॥ खुने़ॽ पाङ्‌गे़न्‍दिङ् वाहित्‍मान् मे़धाने़न्‍ल फाॽआङ् तुवा चोगुल्‍ले़ खे़न् लाजेॽओ तङ्‌बे सुम्‍सिआङ् तुक्‍सि ला थारिक् वाहित्‍मान् मे़ध्‍ये़न्‍ने़न्‍लो॥ 18 याम्‍मो खे़ल्‍ले़ तुवा चोगु, हे़क्‍क्‍याङ् ताङ्‌साक्‍पोलाम् वाहित्‍मान् थ्‍ये़आङ् खाम्‍बेःक्‍माओ पोगुगे़न् कुजा थोःक्‍ते़रो॥
नसाःन्‍लाम्‍बा ताप्‍के़बे़ॽबाहाॽ नुःक्‍मा ताःप्‍मासि
19 फुॽनुसाॽ नु ने़ॽनुसाॽसे, खिनिॽ लुम्‍मो से़क्‍खालाम् ताप्‍के़बे़ॽबाआङ् के़बेःक्‍पे़न्‌नुःक्‍ते़म् तारे़म्‍मे़ॽओ॥ 20 कन् पाःन्‍नो नुःरिक्‍काङ् निङ्‌वाॽ इःत्ते़म्‍मे़ॽओ–आत्तिल्‍ले़ लायोबान् ताप्‍फे़ःम्‍बा कुलाम्‍मोलाम् नुःक्‍तु तारुॽ, खे़ल्‍ले़ग खे़न्‍निन् सिःमे़न्‍लाम् ताङ्‌से़ःप्‍तुआङ् यरिक् लायोहाॽरे़न् ले़प्‍मि के़घोःबा चोगुॽरो॥
* 5:10 माङ्‌निङ्‌वाॽपाःन् के़बाःप्‍पान् निङ्‌वाॽफुमाङ्‌लाम्‍बाबा इङ्‌घङ् के़बाःप्‍पा मनारो॥ कुभा ये़म्‍मो ताःन्‍दि के़बोःङ्‌बा पाःन्‍नाङ् खुने़ॽ पाःत्तुरो॥ * 5:11 अयुब १.२१-२२, २.१०, निङ्‌वाॽफुसाम्‍लो सुम्‌१०३.८