11
Mǝntǝ Lǝ Olontidi Obonsam Lǝ Obiasǝ Fǝ Nsusu.
1 Nla miǝ lǝ asini ani afo mɛ ku kafo faa, lǝ nyifo fe nwǝ leeninǝ kulaa tsya. Nlɛ fǝ lekpakpa, fo nnya ǝtǝ mɛ nko ete.
2 Maakpɔ kutsyuǝsɛ lǝ mi disi fe kase Onanto leeyifo lǝ mi disi. Ntɔ mi disi ntǝ Kristo hã fe kase baatɔ kebitɛ ka lenyitɔ osani disi kǝtǝ kusǝ.
3 Fɛɛ nlɛ sikpi bote miǝ Obonsam ebobiasǝ mi nsusu bǝ biembudi ɔnukualɛ bitǝ Kristo mate, bisumu wǝ fe kase bíkeyifo. Nko íbǝ bǝ owa ǝmǝ efi wǝ kawɛsu obiasǝ Eva eto nsusu nɛ.
4 Nlɛ mi nyamfo bɔtɛyi nko itsyise biatɔnɔ mlǝ kafo utidi saa wǝ lǝǝbǝ katɛyi mi ditiki bamba nǝ lɛbɔ lete itsyilǝ lǝ Yesu wǝ ǝsuǝ bobe letsya butǝ mi. Nya biafo lɛwɔnɔ ku ditiki nǝ lɛbɔ lete lǝ Onanto eto Lɛwɔnɔ ku bo Ditiki Sɛɛ nǝmǝ ǝsuǝ kanɔ.
5 Fɛɛ mfo ńnɔ miǝ mǝmbǝ kasɔ nso betidi bamfó ba bieminkli ani kafo ku kafo faa fe mba diyifo batɔnkpe sɛɛ banso mba bátsyese sitinti.
6 Lǝ maamfo etiki budi kukɔnɔ tsyaa, inni lǝ Onanto eto Ditiki Sɛɛ ǝsuǝ minyi. Lǝ ɔnukualɛ ǝsuǝǝ, bútǝ bɛnɔ nyamfo kasɔ wuee lǝ kusu saa kusu ǝsuǝ.
7 Lefe nǝ mímbé Ditiki Sɛɛ nǝmǝ letsya míntǝ mii, mámfo mi kulesa fe kayofofo seka. Bomu mbokosǝ mɔ ǝsuǝ kasɔ ntǝ mi bǝ lǝ ebesǝ mi kato. Nyaalɛ se mínyifo nyamfo nko esoo, kabua keni mínyifo?
8 Lefe nǝ minkɛ mfo keyifo keyifo lǝ mi nti, etsyukpa bamba díkafo mɛ kayo, boofo bɔtɛyi bǝ nkeyu mǝ bǝ lǝ mfi nwunsǝ ko mi.
9 Lefe nǝ mínkɛ lǝ mi nti mínkabe mɔ ǝsuǝǝ, mǝnlǝ mi itǝ bɔwunsǝko se atabi lehiã mɛ. Bayimi ba ditsyi Makedonia dikawunsǝko mɛ lǝ lesa saa ǝsuǝ. Nya mémfi bulǝ saa ntǝkǝ mi lǝ ǝsuǝ nya membufi bulǝ saa tsya mbǝ nkǝtǝkǝ mi lǝ ǝsuǝ kulefe.
10 Se Kristo eto ɔnukualɛtiki nkpe lǝ mɛ esoo, nlɛ bokakase miǝ kuutsyuǝ saa embofo mɛ kusu buti lǝ lɛkɔɛsi nǝ maasɔ lǝ ditiki nǝmfo ǝsuǝ lǝ Akaia eto kasɔ lǝ kalebe saa.
11 Bɔtɛyi minlɛ nyamfo nko se manla mi eso lee? Onanto kosate yi nkǝ maala mi.
12 Muusukosǝ keyifo ka minlɛ buyifo nya membofo kulesa intsyiko miǝ ɔflɔ. Nya luutǝ bǝ mba nlɛ mǝ ǝsuǝ bokpo bǝ batɔnkpe beni kabesǝ ǝsuǝ katoo, bayɛ kusu bunyǝ katɛyi bǝnkǝ keyifo ka banlɛ akateko nka bɔnlɛ.
13 Betidi bamfó eni batɔnkpe kosate. Baawɛ betidi katɛyi bidia lǝ mǝ keyifo ǝsuǝ. Beeyifo mǝ ǝsuǝ bǝ lǝ betidi lǝ bǝnyǝ mǝ fe Kristo eto batɔnkpe kosate beni.
14 Nya nyamfo menyifo lesa fɔfɔ, itsyise Obonsam aafo ǝsuǝ bofloma keyifo fe kato eto ɔtɔnkpe wǝ lǝǝyǝnde.
15 Nyaso nyamfo menyifo bo naa bǝ mba ntǝkǝko wǝ aatsyi mǝ ǝsuǝ kawuninsǝ keyifo fe basɛɛ ba leeyifo Onanto eto keyifo. Fɛɛ lǝ kalosǝkɔɔ, boonyǝ nnya kayofofo fe kase ińyǝ itǝ.
Paulo Ábesǝ Ǝsuǝ Kato Lǝ Asa Nnya Úlǝkǝ Óte Ǝsuǝ.
16 Nsi nlɛ bɔtɛyi miǝ, kuutsyuǝ saa membu nkǝ meeninǝ. Fɛɛ lǝ utsyuǝ eebu nkoo, bifi nnya nko bitǝ mɛ bǝ moofo ǝsuǝ kato bobesǝ sɛkɛ ete eso.
17 Nya lesa nǝ minlɛ bɔtɛyi mfoo, eni lesa nǝ Bonamute loola nkǝ ntɛyi. Fɛɛ ǝsuǝ kato bobesǝ eto ditiki nǝ minlɛ bɔtɛyi mfo, eyifo fe kase nwǝ leeninǝ laabesǝ ǝsuǝ kato kedi ebukitiki.
18 Fɛɛ se betidi kpǝ leefi kawunsiǝ kamfo eto asa kabesǝ ǝsuǝ kato esoo, bitǝ lǝ mintsya lǝ mbesǝ ǝsuǝ kato sɛkɛ.
19 Se mi kosate diyifo babesibe nko esoo, nyaso bitsyǝsuǝko mba leeninǝ lǝ disuǝyuǝ ǝsuǝ.
20 Biakɛ lefe kulaa tsya kǝtǝ lǝ utsyuǝ efi mi uyifo wǝ odomunyǝ nye díyifo mi lesafimfi, nye otafa mi nye woǝnyǝ mi lǝ kulesa ǝsuǝ nye ɔsɔ mi lǝ kotosi kulaa tsya.
21 Fɛɛ boo, iyifo bo kofani bǝ bóenyifo mi nyamfo eto okle. Lee bíbu biǝ eni búyifo nko?
Fɛɛ lǝ utsyuǝ ebofo utu bokpe kabesǝ ǝsuǝ kato lǝ lesatsyuǝ ǝsuǝǝ, nlɛ etiki budu fe nwǝ leeninǝ lo, nyalɛɛ, mintsya ebofo utu bokpe nko seka, mbesǝ ǝsuǝ kato.
22 Bɔtɛyi banlɛ bǝ Hebrifɔ benii lee? Mintsya mǝ mini nɛ. Bɔtɛyi banlɛ bǝ Israelfɔ beni lee? Mintsya mǝ mini nɛ. Bɔtɛyi banlɛ bǝ Abraham eto kafo eto bebi beni tsya lee? Mintsya mǝ mini nɛ.
23 Kristo eto beyifoyifo beni lee? Nlɛ etiki budi fenkǝ nwǝ disi lebia, fɛɛ etiki eto ɔnukualɛ ni nlɛkɛ nso mǝ. Nyifo keyifo kekleke nso mǝ, bakpe mɛ lǝ Aba eto diyo sesia sesia baso mǝ. Bablɛ mɛ tsya sesia sesia baso mǝ. Nya minkɛ lǝ ukpǝ ku mǝnkpǝ eto nti sesia sesia.
24 Sɛnɔ sɔ̃ɔ̃ Yudafɔ lɛblɛ mɛ awosi ǝtsyǝ sɛwɔnɔmbǝ ku ukue fiofio.
25 Nya Romafɔ lɛblɛ mɛ ku lekete sitsyǝ. Báto mɛ aba sɔni. Nsiǝ lǝ ɔklɔ sitsyǝ nya séba ku mɛ nya míndufǝ lǝ lekpo eto ntu ǝsuǝ. Nya lefe lɔnii, nkɛ lǝ ntu ketsye kani ku diyi wɔlɔlɔlɔ.
26 Sesia sesia sesia sia mínyɛ kusuu, ńdufǝ lǝ bulǝ akpa akpa ǝsuǝ. Lǝ mɔ kusu bɔyɛ kpǝ kǝmiǝ, ndufǝ lǝ ketuyiyi ku beyu eto ani. Meedufǝ lǝ bulǝ kǝmiǝ lǝ mɔ betidi Yudafɔ kosate ku mba lenni Yudafɔ tsya eto ani. Meedufǝ lǝ bulǝ ǝsuǝ lǝ kǝmǝ nkplɛ eto betidi eto ani ku lǝ ntɛnti. Ńdufǝ lǝ bulǝ lǝ lekpo ǝsuǝ ku bayimi ba ni bayimi ba ni badia eto ani.
27 Ńkplatsya ńyifo keyifo kekleke. Mánkɛ lefe nlabe selabe ntsye kpǝ. Mǝǝsiǝ kukpɛnsɛ nya utukɔɛ laalɛ mɛ, nya lefe kpǝ maankɛ lesa kedi kemi. Lɛyɔ aalɛ mɛ, nya mǝǝnyǝ kulesa nǝ muufi nti ǝsuǝ.
28 Nya ɛkɔ ku nyamfo kenkee, maankɛ lefe kala kǝsiǝ itsyi lǝ kase mǝǝsiǝ kebu disi lǝ bafokanɔfɔ eto etsyukpa kpǝ nnya nkpe lǝ nlebe nlebe eto lɛlɛkɛsǝ ǝsuǝ eso.
29 Lǝ utsyuǝ ǝbǝ kama lǝ wǝ bofokanɔ ǝsuǝǝ, yǝǝtǝ bǝ ani aalo mintsya. Nya lǝ bǝtǝ utsyuǝ edufǝ lǝ lebua ǝsuǝǝ, yǝǝlǝ mɛ lǝ utu.
30 Lǝ ele bǝ mbesǝ ǝsuǝ katoo, yuutsyi lǝ kase minyɔkpɔ eso.
31 Onanto wǝ ni Bonamute Yesu eto Anto, wǝ ni nwǝ boatɛsɛ lefe saa, wǝ ni nwǝ nyi sitinti nkǝ asa nnya minlɛ bɔtɛyi mfoo, minlɛ sídia bɔtɛyi.
32 Lefe nǝ minkɛ lǝ Damasko, Aba eto Unyɛsiǝ ninǝ wǝ lɛkɛ lǝ Oka Areta kalɔ, ala nkǝ lǝ umuǝ mɛ. Lǝ nyaso unyǝnsǝ mba laase asa lǝ ofati wǝ báto batsyilama umǝ ǝmǝ eto mbɔsie nkǝ lǝ bǝmuǝ mɛ.
33 Fɛɛ befi mɛ bakpe lǝ ditsyitsya bayɛnko ku ukuǝ ɛyɛ lǝ ofo wǝ nkpe lǝ ofati ǝmǝ babokosǝ kasɔ ḿbɔ ńtsyetsyi ńdu lǝ wǝ ɔflɔ.