8
Bitǝ Betidi Asa Kafo Faa.
1 Mɔ bayimi, bola boǝ bete asa nnya Onanto díyifo útǝ bafokanɔfɔ eto etsyukpa nnya kenke nkpe lǝ Makedonia ɛyɛ lǝ wǝ lefonǝ ǝsuǝ.
2 Bédufǝ lǝ boto kabe kekleke ǝsuǝ ɛyɛ lǝ bulǝ bo dítu mǝ ǝsuǝ eso. Fɛɛ lǝ nyamfo kenke kamaa, bǝńyǝ disuǝyuǝ tinti nya béyifo kafo ɛkpɛ bǝtǝ betidi asa kpǝ ku kafo faa, ite bǝ beyifo bakombo tinti kulaa tsya fɛ.
3 Moofo bɔtɛyi miǝ bǝtǝ betidi asa fe kase boofo. Nya nlɛ mi bɔtɛyi lǝ ɔnukualɛ ǝsuǝ minkǝ, bǝtǝ asa básonsǝ kase inte mǝ kulaa tsya lǝ mǝ kosate eto lelabi faa ǝsuǝ. Lǝ mǝ kosate eto kafo faa ǝsuǝǝ,
4 bálɛ boo lekpakpa sitinti bǝ lǝ butǝ mǝ kusu lǝ bawunsǝko betidi ba leeyifo Onanto eto keyifo lǝ Yudea eto kasɔ ǝsuǝ.
5 Nya asa nnya béyifo mfóo, so kase bo kosate lébe kusu boǝ bátafo buyifo! Tutɛɛ, béfi mǝ ǝsuǝ bǝtǝ Bonamute nya lǝ nnya kamaa, lǝ Onanto eto lelabi ǝsuǝ, báyani mǝ ǝsuǝ bǝtǝ bo tsya.
6 Lǝ nyamfo esoo, bɔ́tɛyi Tito wǝ dítsyǝ keyifo kamfo kasɔ lǝ mi nti boǝ, úsukosǝ lǝ ɔwunsǝko mi lǝ belosǝ lelabi eto keyifo kamfo.
7 Mɔmɔɔ, bíusu sɛtɔ lǝ lesa saa nǝ nkpe mi ǝsuǝ. Sitintii, bíusu sɛtɔ lǝ mi bofokanɔ ku etikididi ku kobetete ku otsyekle kpekpe ku kase biala bo tsya ǝsuǝ. Nyaso bola boǝ bekpe nkɛale lǝ bisu sɛtɔ̃ lǝ mi lelabi faa eto asatǝtǝ nyamfo ǝsuǝ nko tsya.
8 Inni kɔfi minlɛ mi bokpe, bomu mfi lekplatsya nǝ betidi bamba nlɛɛ, bufi kakatesǝ ko mi lele lǝ mbe lǝ mi ditidila tsya eyifo lelabi tinti.
9 Itsyise biyi kase Bonamute Yesu Kristo dífi lefonǝ útǝ mi. Nya ite bǝ otabinyǝ uni tsyaa, úyifo wǝ ǝsuǝ okombo lǝ mi disi eso bǝ lǝ ɛyɛ lǝ wǝ sekombo ǝsuǝǝ, uyifo mi batabinyǝ.
10 Nsusu bo muutǝ mi ni bǝnkǝ yɔɔlɛkɛ bǝ belosǝ mɔmɔɔ, keyifo ka bítsyǝ kasɔ lɛlɛko. Mi ni betutɛ ba dítsyǝ kasɔ nyamfo buyifo nya bini betidi tutɛ kulaa tsya lǝ nsusu bomfo eto bufi ǝsuǝ.
11 Nya fe kase bífi lelabi bítsyǝ keyifo kamfo kasɔɔ, bisukosǝ ke sɛtɔ fe kase ini mi kosate dífi nnya buyifo eto nsusu bomǝ. Nya bífi lesa nǝ nte mi biyifo ke belosǝ.
12 Lǝ iyifo mi lelabi kekleke biǝ biǝtǝ betidi asaa, Onanto ebofo lesa nǝ nte mi biǝ biǝtǝ. Nya inni lǝ lesa nǝ lente mi ǝsuǝ.
13-14 Inni bɔtɛyi minlɛ miǝ meeyifo lǝ itǝ betidi bamba eto bitsyikǝ lǝ biyifo fomflo, lǝ nyifo mi bele lǝ bɛkɛ kalende, fɛɛ se asa kpǝ nte mi mɔmɔ esoo, ɛlɛkɛ bǝ bɛwunsǝko mba inte. Nya lefe nǝ ehiã mi fɛ kpǝ nte mǝ tsyaa, bɔɔwunsǝko mi. Lǝ ibǝ nkoo, ete bɛwunsǝko bǝtsyuǝ lǝ kase ińyǝ itǝ nɛ.
15 Nko seka báwɔni bákpe lǝ Awɔnisa Kɛnkɛ eto Kukue nɛ bǝnkǝ, “Nwǝ dínyǝ bikǝ kpǝǝ, mǝnnyǝ kpǝ osonsǝ nya nwǝ dínyǝ sɛkɛɛ, klolesa máhiã wǝ.”
Bátsyese Tito Ku Wǝ Bayɛtsyuǝ Korinto.
16 Boasɔ Onanto ani, itsyise útǝ ǝnǝmi ásɛ Tito nkǝ lǝ ɔwunsǝko mi fe kase bola boǝ boawunsǝko mi.
17 Se bɔ́tɔ butsyiko wǝ ɔflɔ boǝ ubǝ ɔwunsǝko mii, ɔ́tɔnɔ itsyise iyifo wǝ lelabi nko, nkǝ lǝ ubǝ ɔwunsǝ, inni lǝ kase bɔ́tɔ wǝ eso, bomu iyifo wǝ lelabi nko, nkǝ lǝ ubǝ mi ɔflɔ.
18 Nya kamaa, bɔlɛ Tito ku ɔyimisani wǝ nkpe dibu lǝ bafokanɔfɔ kenke nti botsyese mi lǝ kase woedi etiki kesensǝ Ditiki Sɛɛ nǝmǝ eso.
19 Lǝ nnya kamaa, uyifo utidi wǝ bafokanɔfɔ eto etsyukpa dílǝkǝ bǝ utǝkǝko bo lǝ ubǝ ɔwunsǝ lǝ lelabi eto ǝsuǝbufikǝtǝ eto keyifo ka boeyifo kefi atɛsǝ kǝtǝ Bonamute lǝ bufi bote tsya bǝnkǝ iyifo bo lelabi boǝ boawunsǝko bǝtsyuǝ.
20 Bɔlɛ bo ǝsuǝ kukɔnɔ nya boalɛ ola kukɔnɔ ǝtǝsa asa nnya betidi dítǝ bo ku kafo faa mfó tsya, le kase kuutsyuǝ saa lembubǝ okpe kǝnǝ ku bo lǝ kase bɔnlɛ atabi nyamǝ buyifoko ǝsuǝ.
21 Itsyise inni lǝ Bonamute eto ǝnǝmi mate ete bola boǝ boeyifo lesa nǝ lɛlɛkɛ, bomu lǝ betidi kenke eto ǝnǝmi tsya.
22 Nyamfo esoo, búfi bo ɔyimi ǝmfo bɔ́kɔ ku mǝ bótsyese mi nɛ. Bóto wǝ bóbe kpǝ búnyǝ boǝ bófo wǝ bɔ́nɔ nya buyi wǝ bǝ okpe otsyekle tinti. Nya se ófo mi ɔ́nɔ nko esoo, iyifo wǝ lelabi kekleke nkǝ woawunsǝko mi.
23 Nya itsyi lǝ Tito ǝsuǝǝ, uyifo mɔ ɔyɛtsyuǝ kekleke wǝ leeyifo keyifo ku mɛ kefi kawumsǝko mi. Nya bayimi fɛfɛ ba nyɛ ku wǝǝ, ni bafokanɔfɔ eto etsyukpa eto bǝnyɛsiǝ. Nya beefi dibu kǝtǝ Kristo.
24 Nyaso bilǝkǝ mi lelabi bete mǝ lǝ bafokanɔfɔ fɛfɛ kenke lǝ bǝnyǝ lǝ bate sitinti bǝ, ɔnukualɛ ini bǝ nyamfo eso boabesǝ ǝsuǝ kato lǝ mǝ disi nɛ.