3
Ditsyǝbi Nǝ Ele Bǝ Lɛkɛ Bofokanɔfɔ Eto Batɔnkotɔnko.
1 Ɔnukualɛ uni, baatɛyi bǝnkǝǝ, lǝ utsyuǝ aala nkǝ woeyifo bafokanɔfɔ eto ɔtɔnkotɔnkoo, ete bǝ woala nkǝ woeyifo keyifo sɛɛ.
2 Fe bafokanɔfɔ eto ɔtɔnkotɔnkoo, ele bǝ uyifo utidi wǝ bulǝ saa lǝmbǝ lǝ ǝsuǝ, uufi kusiǝ kɔni, uyifo obesibe, ɔkɛ dibusǝ, ɔlɛ ǝsuǝ ola, nya betidi leebu wǝ. Ɔkɛ kafoɛkpɛ kafo bafɔ nya uyifo oteasa sɛɛ.
3 Yanle bǝ uyifo utǝkpǝ, nya woankpɔ ekiti. Ele bǝ uyifo utidi wǝ diyuǝ, nya woenyifo nwǝ lǝǝnǝ etiki, nya woansɛsǝ ǝnǝmi lǝ atabi ǝsuǝ tsya.
4 Ele bǝ uyifo nwǝ laalɛ wǝ diyo eto betidi ola, nya wǝǝtǝ nkǝ wǝ bebi tsyue ditiki koto lǝ kusu saa ǝsuǝ.
5 Nya lǝ utidi utsyuǝ kpe wǝ leenyi kase woobe wǝ diyoo, ntsyǝ wɔɔyɛ obe Onanto eto betidi ba wɔɔyɛnko?
6 Yanle bǝ uyifo nwǝ léfo Onanto ɔnɔ fɔfɔ kase woembobesǝ ǝsuǝ kato, nya ɛyɛ lǝ nnya ǝsuǝ ote ǝsuǝ, lǝ ubǝ udu ɔnɔ, nya Onanto luunǝ wǝ koto fe kase únǝ olontidi ǝmǝ koto.
7 Ele bǝ uyifo utidi wǝ nkpe diye sɛɛ lǝ mba dímamfo banɔ tsya eto ǝnǝmi, nya luutǝ bǝmbɔtɛyi kulesa bua saa bakpe wǝ kofani bǝ lǝ obuale ǝmǝ lǝ unyǝ wǝ umuǝ.
8 Nko kǝ ini bǝ wǝ bawunsǝkotsyuǝ tsyaa, ele bǝ mǝǝ tsya yifo betidi ba nkpe ditsyǝbi sɛɛ, nya baalɛ keyifo ola kekleke. Ele bǝ beyifo betidi ba lǝǝnnǝ ntǝ kǝkpǝ, nya baansɛsǝ ǝnǝmi lǝ atabi ǝsuǝ tsya.
9 Ele bǝ beyifo bǝtsyuǝ léfo Ditiki Sɛɛ nǝmǝ báboko mfo banɔ kekleke ketu ka laanlo mǝ dikpi.
10 Nya ele bǝ beto mǝ ditsyibi bebe fɛ. Nya lǝ bǝnyǝ kabua saa lǝ mǝ ǝsuǝǝ, bitǝ lǝ beyifo bawunsǝkotsyuǝ.
11 Ele bǝ mǝ bǝsiǝ tsya, yifo besio ba nkpe ditsyǝbi sɛɛ, nya benyifo betidi ba leedi betidi eto ntikima. Bomu ele bǝ beyifo besio ba leekpǝ ntǝ, nya beeyifo lesa saa lǝ kusu ǝsuǝ.
12 Be fǝ, bawunsǝkotsyuǝ bamfo eto utsyuǝ saa fi kusiǝ kɔni kplon, nya woalɛ wǝ bebi ku wǝ diyo eto betidi kenke ola.
13 Nya bawunsǝkotsyuǝ ba nlɛ mǝ keyifo olaa, mǝ kosate ebunyǝ dibu ku kǝńyǝsǝ sɛɛ lǝ betidi eto ǝnǝmi. Nya bɔɔkɛ utu bedi etiki lǝ mǝ bofokanɔ lǝ Yesu Kristo ǝsuǝ kate betidi bamba.
14-15 Nlɛ bobe bǝ yǝmbɔklɛ muubǝ nyǝ mi. Fɛɛ nlɛ asa nyamfo bɔwɔni kǝtǝ fǝ bǝ lǝ minlɛ bubǝ mlǝǝ, lǝ efo fǝ bɔwunsǝko lǝ ate lesa nǝ ele bǝ yifo fe ɔtɔnkotɔnko lǝ Onanto eto bebi nti. Nya mǝ ba ni Onanto wǝǝ nkpe nkpǝ eto bebii, mǝ ni omayi itǝ Ditiki Sɛɛ nǝmǝ.
16 Onanto eto ditiki kɛnkɛ nǝ bǝlǝkǝ bátee, kpe kalende tinti nya kuutsyuǝ saa ǝmbofo bɔni nko. Nya ni bǝnkǝ,
“Bonamute ǝbǝ bale fe kawunsiǝ eto utidi.
Lɛwɔnɔ Kɛnkɛ ǝlǝkǝ óte nkǝ uyifo kɛnkɛ.
Nya Onanto eto batɔnkpe dínyǝ wǝ.
Nya bǝlǝkǝ wǝ báte lǝ kawunsiǝ eto betidi kenke nti.
Kawunsiǝ eto betidi kpǝ áfo wǝ bánɔ.
Nya Onanto dítsyi wǝ úsuko kato lǝ diyǝnde kplɛ ǝsuǝ.”