11
1 Ei tao tungga au dala sodang, huu au tao tungga Karistus.
Mete ma tao ibadat, na, ina-touk musi matudu hada-holomata tungga hadak natetemen
2 Au koa ei, huu mae leobee boe oo, ei masaneda makandondoo heni au. Ma, dedeꞌa kala fo au anoli ei so, na, ei bei tao tunggan. Malolen seli!
3 Tehuu hambu dedeꞌak esa fo au sangga asanenedak ei leoiak: boso mafalende heni ei dadadi mala leme bee mai. Tou kamahelek esa-esak naoka nai Karistus fo mana dadik neu ndia malanggan. Inak dadi neme touk mai. Ma Karistus neme Manetualain mai.
4 Touk boso mboti langgan, neu ledoeik ana hule-haladoi, fo nafada Lamatuak hehelun. Huu ndia sama leo ana tao nakamamaek Karistus, huu taa fee hadak tungga ita natetemen.
5 Tehuu inak musi mboti langgan neu ledoeik ana hule-haladoi, do ledoeik ana nafada Lamatuak hehelun. Huu, mete ma taa, na, ndia sama leo ana tao nakamamaek sao toun, huu ana taa fee hadak tungga ita natetemen. Ma ndia boe oo, tao nakamamaek ndia ao-ina hehelin, sama leo mete ma inak nggeu momoik langgan.
6 Huu, mete ma hambu inak taa nau mboti langgan, fo dadik tanda nae, ana fee hadak neu ndia sao toun, na, malolenak ana nggute kekeꞌu langga-bulun. Tehuu, mete ma ana nameda ndia langga momoin ndia, tao nakamamaek ndia, na, malolenak ana mboti langgan leo.
7 Hena duduꞌa leoiak: touk taa paluu mboti langgan, huu Manetualain tao touk tungga Ndia mata-aon. Huu ndia de, touk dadik buna-boak fo natudu Manetualain ana selin. Ma inak dadik buna-boak fo natudu touk ana selin.
8 Huu, ledoeik Lamatuak nakadadadik daebafok ia, Ana taa tao touk neme inak mai. Tehuu, Ana tao inak neme touk mai.
9 Ma, Ana taa tao touk soaneu inak. Tehuu, Ana tao inak soaneu touk.
10 De, malolenak inak mboti ndia langgan, fo hataholi bubuluk, lae, ana pake ndia hak fo hule-haladoi, ma nafada Lamatuak hehelun, fo tungga teteben. Ata nusa-sodak boe oo bubuluk leondiak.
11 Tehuu, mete ma sila nanambaꞌak lo Lamatuak, na, inak ma touk, taa esa-esak no ndia soda hehelin.
12 Makasososan, Manetualain tao inak neme touk mai. Tehuu, basa ndia, boe ma inak ndia bonggi touk. Ma Manetualain ndia tao, de basan dadi.
13 Hena ei duduꞌa sudik! Mete ma, inak hule-haladoi neu Manetualain, ma taa mboti langgan, tungga ei, na, ndia malole, do taa?
14 Tungga ei hadam nai kota Korintus, na, mete ma touk langga-bulun manalu, na ndia tao nakamamae kana do?
15 Tehuu mete ma inak langga-bulu manalu, na, ndia malolen ana seli, hetu? Lamatuak fee ndia langga-bulun manalu, fo mboti nala langgan. Tetebes ndia.
16 Tehuu, mete ma hambu mana nau lasisimbo bafak lakandoo laꞌeneu dedeꞌak ia, na, masanenedak, huu ita natetemen ndia, neme ita malanggan, ma salani kala mai.
Boso tao mata-matak, mete ma miꞌa nai Lamatuak mein
17 Hatematak ia, au sangga kokolak dedeꞌak esa bali. Nai dedeꞌak ia, au taa koa ei. Huu, ledoeik ei makabubua, ei taa tao tungga teteben, tehuu, ei boe tamba babali kana bali.
18 Kaesan, au amanene, lae, ledoeik ei makabubua tao ibadat, na, ei mababaꞌe kala. Luma leme au amanenek ndia, neu ko hambu teteben boe.
19 (Memak, huu ei tao bubua-bubuak ndia, dei fo nana nitak see ndia tetebes namanene neu ita Lamatuan, ma see ndia taa nau namanene neu Ndia.)
20 Huu, ledoeik ei hataholi salani kala makabubua fo miꞌa nai Lamatuak mein, na, ei musi masaneda neu Lamatuak Yesus. Ndia ndia, tetebes. Tehuu, ei taa tao leondiak.
21 Ndia butin, fo ndia ledoeik ei manggatuuk miꞌa, hambu luma taa lahani hataholi feꞌek, hambu mana naꞌa balenaꞌo, ma hambu feꞌek bali mana ninu mafuk. Losa hataholi feꞌek taa hambu babaꞌek, de ala ndoe.
22 Talobee ia!? Ei uma heheli mala taa, fo miꞌa-minu nai ndia do? Do, ei mahiik tao makalulutu Lamatuak salani nala nade malolen? Do, ei mahiik tao makamamaek hataholi kadiꞌi-taidae kala? Ei nau au kokolak talobee? Ei nau au koa ei nai dedeꞌak ia do? Boso mamahehenak!
Loti ma anggol oek ndia, dadik tanda tao ita tasaneda teu Yesus mamaten
(Mateos 26:26-29; Markus 14:22-25; Lukas 22:14-20)
23 Lamatuak Yesus mesa kana nafada memak au, dedeꞌak ia, ma au feen neu ei bali. Nae, ledoeik hataholi lahehele fo sangga tao lisa Ndia, na, leꞌodaen ndia, Ana haꞌi nala loti.
24 Boe ma Ana hule-haladoi noke makasi neu Manetualain. Basa de, nafada Ndia ana mana tungga nala, nae, “Miꞌa loti ia. Huu, Au aong ndia ia. Dei fo ala tao lakalulutu Au aong soaneu ei. De, ei musi miꞌa loti ia, fo ei masaneda Au.”
25 Ledoeik laꞌa lateꞌe, Ndia boe oo, tao sama leo manggo te nana isi anggol oek, nae, “Anggol oek ia ndandaan, na ndia: Manetualain mbaꞌa hehelu beuk no ei. Ma Au daang musi faa, losa Au mate dei, bei fo heheluk ndia bisa dadi. Basa na, laꞌi-laꞌik ei minu anggol oek leoiak, na, ei musi masaneda Au mamateng ndia.
26 Laꞌi-laꞌik, ei tao tataos fo miꞌa loti leoiak, ma minu anggol oek leoiak, losa Au fali maing, na, ndia sama leo ei tui seluk, laꞌeneu Au mamateng.”
Mete ma o dalem taa malole, na, boso manggatuuk muꞌa nai Lamatuak mein
27 Huu ndia de, mete ma hambu hataholi naꞌa loti, ma ninu anggol oek fo tao nasanenedak neu ita Lamatuan, tehuu, dalen taa ndoos, na, neu ko Manetualain huku ndia. Huu, Lamatuak Yesus aon ma daan. De, mete ma hataholi dalen taa ndoos, na, taa nandaa naꞌa ma ninu nai ndia, huu, kada ndia tao nakadadaek Lamatuak Yesus.
28 Malolenak, hataholi esa-esak palisak ndia dale hehelin dei. Boe ma, mete ma ana namahele tebe-tebe dalen ndoos, bei fo ana bisa naꞌa loti ndia, ma ninu anggol oek ndia.
29 Tehuu, hambu hataholi naꞌa ma ninu no dale taa ndoos. Huu, ala duduꞌa, lae, “Yesus mamaten ndia, sosoa-ndandaan taa fa boe. Yesus aon sosoa-ndandaan taa soaneu au.” Hataholi leondiak lemba aon sila duduꞌa manggalaun, huu dei fo ala hambu huhukuk.
30 Huu ndia de, nai ei lalada mala ele, hambu mana maꞌa-malek, hambu kamahedik, ma hambu mana matek so.
31 Tehuu mete ma, ita palisak neulalau ita dale nala, na, ita taa hambu huhukuk.
32 Mete ma, ita Lamatuan huku ita, na, Ana tao leondiak fo nanoli ita tungga dala ndoos. Huu, Ana taa nau ita hambu huhukuk, ma dei fo takalulutuk noꞌu to basa hataholi daebafok kala ia.
33 De, tolanoo susue nggalaei! Mete ma, ei makabubua fo miꞌa nai Lamatuak mein, na, esa musi mahani esa dei.
34 Mete ma, hambu mana ndoek nalan seli, na, malolenak, naꞌa nai uman dei. Basa dei fo, mete ma ei makabubua noꞌu, na, ei boso hambu huhukuk.
Laꞌeneu dedeꞌa feꞌe kala fo ei matanek ndia, au neti dei, bei fo au hetin.