3
Manetualain simbok nala ita no malole, huu ita tamahele teu Yesus Karistus
Wei! Hataholi Galati la! Makahulun au mesa nggau afada neu ei mata mala, laꞌeneu Yesus Karistus mamaten neme ai ngganggek. Tehuu hatematak ia hataholi ana kedi nala ei mata-matak! Ei nggoam dei! Au atane kada dedeꞌak esa. Ei simbo mala Dula Dale Malalaok ndia, huu ei tungga heti-heu anggama do? Ta, hetu? Dula Dale Malalaok mai neu ei, huu ei mamahele Hala Malole fo ei mamanenek ndia so. Hatina de ei mamanggoa malan seli leo ndiak bae? Makahulun ei masoda tungga Dula Dale Malalaok hihiin so. Tehuu hatematak ia ei masafali bali, fo tungga hataholi hihiin. Faik fo bei fo ei mulai mamahele Karistus, ei hambu doidosok noꞌun seli. Boso losak basa sila dadik neu kada sosoa tak! (Na te, namahele neu Karistus, na ta bisa dadik neu kada sosoa tak.) Ledoeik Manetualain fee Ndia Dula Dale Malalaon, ma natudu tanda heran mata-matak neu ei mata mala ndia, de ei duduꞌa mae Ana tao leondiak, na huu ei tungga anggama heti-heun do? Ta, hetu? Ana tao leo ndiak, na huu ei mamahele Hala Malole, fo ei mamanenen ndia so.
Masaneda hataholi Yahudi la baꞌi lele ulun, fo ndia baꞌi Abraham. Huu Lamatuak Susula Malalaon nana sulak, nae, “Huu ana namahele Manetualain, de Ana simbok ndia no malole, ma taon neu hataholi dale ndoos.”*
De, ei musi bubuluk neulalau dedeꞌak ia! Hataholi la fo lamahele, sama leo Abraham, na ala dadik Manetualain hataholi tetebe nala. Manetualain nafada memak nai makahulun Ndia Susula Malalaon so, nae, neu ko Ndia boe simbok hataholi nusa feꞌe kala nae, sila dalen ndoos, mete ma lamahele Ndia. Huu makahulun ele Ana nafada memak Hala Malole ndia neu baꞌi Abraham, nae, “Neu ko basa hataholi nusa kala lai daebafok ia, ala hambu babaꞌe-babatik huu o.” Huu Manetualain hehelun ndia, de Ana fee babaꞌe-babatik neu basa hataholi, fo lamahele neu Ndia, fo sama leo Ana fee Abraham.
10 Hataholi mana tungga anggama heti-heun, na ela Manetualain simbo kana no malole, na ana musi lemba belak basa heti-heu kala sila, sama leo ana hambu sumba-sook. Huu nana sulak nai Manetualain Susula Malalaon, nae, “Hataholi fo ta tungga nakandoo anggama heti-heun losa lutu-lutuk, na ana hambu sumba-sook!” 11 Tehuu manggaledok so, Manetualain tana simbok hataholi, huu ana tungga anggama heti-heun. Huu nana sulak, nae, “Hataholi musi namahele Au, bei fo Au simbo kana no malole, leo hataholi dale ndoos, fo ana hambu sodak tetebes.”
12 Naa! Mete ma hataholi nau nasoda tungga anggama heti-heun hihiin, na ana musi tao tungga basa-basan losa lutu-lutuk! Huu Manetualain nafada memak so nai Ndia Susula Malalaon dalek, nae, “Hataholi fo ana nau nasoda tungga heti-heuk, dei fo kada nasambute no heti-heu kala sila.”
13 Tehuu Karistus tifa ketun so, fo nakamboꞌik ai mima heti-heu anggama ndia, fo nanambaꞌak no ai. Makahulun, ai masoda sota mate lemba belak heti-heu anggama ndia, sama leo hataholi mana hambu sumba-sook. Tehuu hatematak ia, Lamatuak Yesus soꞌu heni sumba-sook ndia, neme ai mai so. Huu nana sulak nai Susula Malalaok, nae, “Hataholi mana matek nana londak nai dii, na ndia ana hambu sumba-sook.” 14 Faik fo Yesus Karistus mate, fo nasalaꞌe nala ita, na ndia babaꞌe-babatik fo Manetualain feen neu Abraham so. Boe ma ana konda neu hataholi nusa feꞌe kala. No leo ndiak, basa hataholi mana mamahele neu Karistus, na bisa ana simbok Manetualain Dula Dale Malalaon fo Ana heluk ndia so.
Manetualain toꞌu nahele Ndia hehelun
15 Tolanoo nggalei! Hatematak ia au nau pake natutuduk neme ita soda basa fain mai. Mete ma hataholi sulak nala susula hehelu pusaka, basa de ana lima lee ndia naden neu susulak ndia, na susulak ndia dadik tetebes so. Hataholi feꞌek ta bisa timba heni hata fo nana sulak nai susulak ndia, ma ta bisa sulak tamba hata-hata bali nai ndia so. § * 16 Leo ndiak boe, faik fo Manetualain mbaꞌa heheluk no Abraham, ma ndia numbu sadu nala. Manetualain ta nae, “Au tao heheluk ia, ua o numbu sadu mala”, huu Ndia ta helu fee hataholi makadotok. Tehuu kada Ana helu fee Abraham numbu-sadun, kada hataholi esak, fo ndia Karistus. 17 Au hihiing leo iak: Manetualain tao heheluk nakahuluk no baꞌi Abraham. Basa teuk natun ha ma telu hulu, bei fo Ana nakonda heti-heu anggama fee hataholi Yahudi la, nesik sila baꞌin Musa. Mae leo ndiak boe oo, Lamatuak pake nahele Ndia hehelu makahulun ndia. 18 Lamatuak ta fee babaꞌe-babatik neu Abraham, huu ana tao tungga heti-heuk. Tehuu Ana fee babaꞌe-babatik, huu Ana helu memak so, neme makahulun mai, fo sangga fee hiak neu Abraham. Ndia sama leo kakanak esa ana simbo pusaka neme aman mai. Ana simbo huu ndia aman helu memak so, ta huu kakanak ndia tungga heti-heuk.
19 Naa! Hatematak ia, au sangga atane leo iak: mete ma Manetualain simbok Abraham no malole, huu ndia namahehelen, hatina de Manetualain tamba heti-heu anggama nesik baꞌi Musa bali? Ana tamba heti-heu anggama sila fo nanoli hataholi laꞌeneu sila sala-singgo nala mata-matak. Ndia no hihiik fo hataholi lasoda tungga heti-heuk ndia hihiin, losa Abraham numbu-sadun esa mai. Basa de, mete ma numbu saduk ndia, fo ndia Karistus ndia, Ana mai so, na heti-heuk ndia ta paluu so.
Faik fo Manetualain fee heti-heu anggama Yahudi ndia, Ana ta fee nakandoon memak. Tehuu Ana pake Ndia ata nala leme nusa-sodak mai, lenin neu baꞌi Musa liman, de bei fo Musa feen neu hataholi Yahudi la. No leo ndiak, Musa dadik lelete neu Manetualain no hataholi nala. 20 Tehuu faik fo Manetualain tao heheluk no Abraham, Ana ta pake lelete. Huu Ndia mesa kana helu ma! No leo ndiak, ita bubuluk, tae Manetualain hehelun ndia, lena heni heti-heu kala sila.
Heti-heu anggama nanoli hataholi laꞌeneu sila salan mata-mata kala
21 Faik fo Manetualain fee heti-heu anggama neu baꞌi Musa, ndia nalaba ao no Ndia hehelun do? Taa! Huu makanenin ma hambu heti-heuk fo hataholi ana bisa tao tunggan, fo Manetualain simbok ndia no malole, na neu ko hataholi Yahudi la heti-heun bisa tao leo ndiak boe. Naa te ta hambu heti-heuk esa boe fo hataholi bisa ana tao tunggan, fo tao makasufu Manetualain dalen, fo Ana simbo kana no malole. 22 Huu nai Manetualain Susula Malalaon nana sulak, nae, basa hataholi la nana mbaꞌa nisak, lo sala mata-mata kala. Huu ndia, de kada hataholi fo mamahele neu Yesus Karistus, bisa ana simbo hata fo Manetualain heluk ndia so.
23 Faik fo Karistus bei ta mai, ai hataholi Yahudi la nana mbaꞌa nisak lo heti-heu kala sila, losa ta bisa nakamboꞌik. Tehuu losa ndia fain, Manetualain soi dalak, fo ai makamboꞌik mima heti-heu kala sila, mete ma ai mamahele neu Karistus. 24-25 De, heti-heu anggama sila, natutudun leo mana manea fo nanoli neulalau ita losa Karistus mai. Tehuu mete ma Ana mai so, na bei fo ita bisa tamahele Ndia, fo tasoda neulalau to Manetualain. Huu ndia de hatematak ia, ita ta paluu mana manea ndia so.
Hataholi kamahelek dadik neu Karistus bobonggin so
26 Hatematak ia ei dadik neu Manetualain ana nala, huu ei mamahele neu Yesus Karistus. 27 Ei basa nggei hambu salanik so, fo dadik Ndia hataholin, de nana mbaꞌa nisak mia Ndia. 28 Basa hataholi mana mamahele neu Karistus, ta hataholi feꞌek ndia so. De, mae ei hataholi Yahudi do hataholi ta Yahudi, ata do ta ata, touk do inak, basa hataholi fo nanambaꞌak no Yesus Karistus ndia, sama. 29 Karistus ndia, na ndia Abraham tititi-nonosin, fo Manetualain helu memak so neme makahulun mai. Huu ei nanambaꞌak so mia Karistus, huu ndia de ei boe oo, dadik neu Abraham titi-nonosin teteben so. No leo ndiak, ei boe oo, bisa simbok babaꞌe-babatik ndia fo Manetualain helu memak neu Abraham.
* 3:6 Tutuik laꞌeneu Sososan 15:6; Roma 4:3 3:7 Susula Malalaok Yunani isi-isik nana sulak nae, “ala dadik Abraham ana nala”. Hataholi Yahudi la lateme pake nade ‘Abraham ana nala’ no hihiik, nae, ‘Manetualain hataholi nala’. Mete Roma 4:16 boe. 3:8 Tutuik laꞌeneu Sososan 12:3 3:10 Tui Seluk laꞌeneu Dala Sodak 27:26 3:11 Habakuk 2:4 3:12 Malangga Anggama la Heti-heun 18:5 3:13 Tui Seluk laꞌeneu Dala Sodak 21:23 3:15 Susula Malalaok Yunani nai ia nana sulak, nae, “ta nae ‘mbaꞌa heheluk no o bini nala (noꞌuk), tehuu ‘no o binin (esak)” Nai dedeꞌa fo mbaꞌa heheluk ia, dedeꞌa Yunani “bini” ndandaan nae, “numbu saduk”. Mete Tutuik laꞌeneu sososan 12:7 § 3:15 Tutuik laꞌeneu Sososan 12:7 * 3:15 Kalua neme Masir mai 12:40 3:15 Roma 4:14 3:29 Roma 4:13