7
Faa tuak
1 Basa ndia, boe ma LAMATUAK kokolak no Noh, nae, “Au suli uni suꞌdi bee uu, tehuu kada o mesa nggo dalem ndoos. Huu ndia, de o mua o sao-ana mala mini ofak ndia dalek miu leo.
2-3 Neme basa banda mata-mata kala sila, fo bole ei miꞌan, ma mini fee Au, na, o muni pasan hitu-hituk neni ofak ndia dalek neu. Neme basa mbuik mata-mata kala, muni pasa hitu-hituk boe. Tehuu neme banda feꞌe kala mai, na, muni kada pasan esa-esak. No leondiak, na, banda la, ma mbui kala sila, dadik bini, fo hambu sala taa-taa.
4 Masanenedak neulalau, baa! Faik hitu bali, te Au akonda uda taa no hahaen, leledo-leꞌodaek, faik haa hulu. No leondiak, Au tao akamate basa masodak malai madak lain, fo Au tao ala sala so.”
5 Boe ma, Noh tao tungga sama leo basa MANETUALAIN pelendan ndia.
6 Faik fo faa tuak mai ndia, Noh teunnatun nee so.
7 Basa boe ma Noh no saon, ma ana nala, ma fetofeu nala, leni ofak ndia dalek leu, suek lasoda leme faa tuak ndia mai.
8-9 Noh neni basa mbuik mata-mata kala, ma banda feꞌe kala, esa-esak no ndia pasan neni ofak dale leu, fo neme hataholi bole naꞌa, ma neme hataholi taa bole naꞌa, tungga MANETUALAIN palendan ndia.
10 Basa faik hitu, boe ma faa nggangga mai, de ana mboti nala daebafok ia.
11 Nandaa no Noh teun natun nee, seli bulak dua, ma faik sanahulu hitu, boe ma faa mai! Faik ndia, nonook leo bali lalai natahuꞌak, de oen nggangga dae mai. Ma basa oe matak malai dae dale, ala kadi, de oe nasambumbulak deak mai.
12 Boe ma, uda konda leledo-leꞌodaek, taa no hahaen, losa faik haa hulu.
13 Tehuu faik ndia, boe ma Noh, saon, ma ana nala telu sala, fo Sem, Yafet, ma Ham, ma ndia feto-feu nala, basa sala ala leni ofak dalek leu.
14 Ala maso noꞌu lo banda la, fo banda nakaboik, banda fui, banda mana lae-loꞌdok, mbui kala, ma banda feꞌe kaliꞌda kala.
15-16 Pasan esa-esak neme basa mana masoda kala, ala leni ofak dale leu, lo Noh, sama leo Manetualain palendan neu ndia.
Ledoeik basa sala, maso so, boe ma LAMATUAK nggoe ofak ndia lelesun.
17-19 Uda belak konda nakandoo, losa faik haa hulu, boe ma faa boe hene namadema, losa ofak bonu. Oe hene nakandoo, losa ana mboti nala lete madema la.
20 Oe ndia, hene taa no hahaen, losa deman meter hitu nai letek mboin.
21-23 No leondiak, boe ma basa masodak malai madak lain, fo ndia: hataholi, banda nakaboik, banda fui, banda mana lae-lodok, ma mbui kala, mate basa sala. Ela kada Noh no basa malai ofak ndia dalek, lasoda.
24 Oe ndia, taa no leleꞌen losa faik natun esa lima hulu.