2
1 Ana susue nggalei! Au sulak afada basa ia la, fo suek ei masoda taa tao salak so bali. Tehuu leo hambu mana tao salak, na, dei fo hambu mana masalaꞌe ita nai Amak Manetualain matan. Ndia ndia, Yesus Karistus, Hataholi Malalaok, fo Manetualain haituan neni daebafok ia mai so.
2 Ana mate dadik tunu-hotuk soaneu ita, fo suek Manetualain koka heni ita sala nala. Taa kada soaneu ita mesa nggata, tehuu soaneu basa hataholi malai daebafok ia boe.
Hataholi mana masoda nai manggaledok dale, tao tungga Manetualain palendan, nakalenak palenda laꞌeneu susuek
3 Ita bubuluk tae, ita talelak Manetualain to malole, mete ma ita tungga Ndia palenda nala.
4 Hataholi bisa kada kokolak lae, “Au alelak Manetualain.” Tehuu mete ma ana taa tao tungga Lamatuak palendan, na, ndia ndia nasapepeko, fo kokolak feꞌek, tehuu tao feꞌek.
5 Tehuu hataholi mana tao tungga Lamatuak palendan, na, ndia dadik buti, nae, ndia susuen neu Lamatuak tetebes ndia so. No leondiak, ita bubuluk, tae ita ia, Lamatuak hataholin.
6 De, mete ma hataholi kokolak nae, “Au sodang nanambaꞌak no Manetualain,” na, ana musi nasoda sama leo Yesus Karistus.
7 Ana susue nggalei! Palenda fo au sulak ia, taa dedeꞌa beuk fo fee ei. Huu, palenda ia mana memak so, nai Lamatuak Dedeꞌa-kokolan fo ei mamanenen neme makahulun mai.
8 Mae leondiak boe oo, te hambu dedeꞌa beuk fo au sangga sulak laꞌeneu Lamatuak palendan ia. Nai Yesus sodan, Ndia tao tungga tebe-tebe palenda ia. Ma palenda ia boe, ei tao tunggan so, huu makiuk nai ei dale mala mopon, ma manggaledok tetebes nasaꞌa nai ei soda mala so.
9 Hataholi bisa kada kokolak nae, “Au asoda nai manggaledok.” Tehuu mete ma ana husembuluk neu ndia tolanoon, na, ndia dadik tanda, nae, ana bei nasoda nai makiuk dale.
10 Huu hataholi mana masoda nai manggaledok, ana musi sue ndia tolanoon, ma taa hambu manggalauk fa boe nai dalen, fo tao natudan.
11 Huu ndia de, mete ma hambu hataholi husembuluk neu ndia tolanoon, na, ndia dadik neu tanda, nae, ana bei nasoda nai makiuk dale. Ana laꞌok nafadadaba, huu makiuk tao namboke ndia matan.
Hataholi mana masoda nai manggaledok dale, taa nasoda tungga daebafok hihii-nanaun
12 Ana nggalei! Au sulak susulak ia fee ei,
huu Karistus maten so soaneu ei,
no leondiak Manetualain koka heni ei sala-singgo mala so.
13 Ina-ama la ei! Au sulak susulak ia fee ei,
huu ei malelak Yesus Karistus,
fo mana memak so neme lele uluk mai.
Muli-solu kala ei! Au sulak susulak ia fee ei,
huu ei matati so laban manggalauk inahuun,
losa ei senggi.
14 Kakana kala ei! Au sulak susulak ia fee ei,
huu ei malelak Amak Manetualain.
Ina-ama la ei! Au sulak susulak ia fee ei,
huu ei malelak Yesus Karistus,
fo mana memak neme lele uluk mai so.
Muli-solu kala ei! Au sulak susulak ia fee ei,
huu ei mambeda Lamatuak Dedeꞌa-kokolan nai ei dale mala,
losa ei dadi balakaik,
ma ei matati so laban manggalauk inahuun,
losa ei senggi.
15 Ei boso sue daebafok hihii-nanaun, ma daebafok hata-heto nala. Huu hataholi mana sue daebafok, taa bisa sue Amak Manetualain.
16 Dedeꞌak manai daebafok ia, taa natututik no Manetualain. Sama leo, hataholi fo nasoda kada tao namahoko ndia ao-ina hehelin; hataholi balenaꞌo; ma mana koaok huu ndia suꞌin. Dedeꞌa leondia kala, taa laoka lai Amak Manetualain. Tehuu kada laoka lai daebafok ia.
17 Naa te, neu ko daebafok ia mopon noꞌu no dedeꞌa kala sila, fo hataholi lahiik sanggan. Tehuu, hataholi fo nahiik tao tungga Manetualain hihii-nanaun, na, ndia taa mopon, tehuu dei fo nasoda nakandondoo henin.
Hataholi mana masoda nai manggaledok dale, musi mata neuk, fo boso nana kedi nalak
18 Ana nggalei! Daebafok fai babasan deka-deka mai so. Ei mamanene so, lae, hataholi mana laban Karistus dei fo ala sadu mai, naa te, hatematak ia, hambu so. Huu, mana laban Karistus sudi lai bee so. Ndia dadik tanda, nae, daebafok fai babasan deka-deka mai so.
19 Mana laba nala kalua leme ita lalada nala mai. Naa te, sila ia, ita hataholi nala taa sila. Mete ma, sila tebe-tebe ita hataholi nala, na, neu ko ala taa laꞌo ela ita, tehuu lahele lakandoo sama-sama lo ita. Naa te, ala foꞌa lalai. De, manggaledok so, ita hataholi nala taa sila hetu!?
20 Tehuu, ei taa sama leo sila. Huu, ei simbo mala Lamatuak Hataholi Malalaon Dulan so. Ma, Ana fali nala ei so, fo ei basa nggei bubuluk hata fo ndoos.
21 Huu ndia de, au sulak susulak ia, huu au bubuluk ae, ei bubuluk hata fo ndoos ma pepekok so.
22 Hambu masapepeko kala belaꞌo lai daebafok ia. Talobee fo ita bisa talela kasa? Sila ndia, fo hataholi mana kokolak lae, Yesus ndia, taa Karistus. Tungga sila, Yesus taa Hataholi Malalaok, fo Lamatuak helu memak so, fo sangga haituan mai. Hataholi mana kokolak leondiak, ala laban Karistus, huu ala timba heni Amak Manetualain no Anan.
23 Hataholi mana timba heni Manetualain Anan, na, ala timba heni Ndia Aman boe. Tehuu mete ma hataholi manaku Manetualain Anan, na, sila boe oo, dadik Manetualain ana nala so.
24 De, ei musi toꞌu makandoo hata fo ei mamanenen neme makahulun mai ndia so. No leondiak, ei nanambaꞌak nakandoo mia Amak Manetualain, ma Ndia Anan.
25 Ma Ndia mesa kana helu ita so, nae, dei fo ita tasoda takandondoo henin to Ndia.
26 Au sulak susulak ia, fo ei bubuluk laꞌeneu hataholi mana sangga kedi ei.
27 Ei simbo mala Lamatuak Dula Dale Malalaon so, ma ei boe oo, masoda nanambaꞌak mia Ndia. De, ei taa paluu hataholi feꞌek fo nanoli ei bali. Huu, Lamatuak Dulan dai so, de, Ana bisa nanoli basa dedeꞌa ndoo sala. Ana taa nasapepeko, sama leo masapepeko kala sila. De, toꞌu matetea hata fo Ana nanolik ndia so, fo ei masoda dalek esa makandoo mia Karistus.
28 Leoiak ana nggalei! Ei musi masoda nanambaꞌak nakandoo mia Karistus. Fo, mete ma Ana fali main, na, ei ta mameda bii, ma ta mameda mae, mambadeik miu Ndia matan.
29 Huu ei bubuluk so, mae, Ana tao hata fo ndoos taa-taa, de ei boe oo, bisa bubuluk mae, basa hataholi mana tao tungga hata fo ndoos, na sila boe oo, dadik Lamatuak ana nala.