10
Lamatuak Yesus nadenu ana mana tungga nala hitu hulu dua
1 Basa ndia, boe ma Yesus hele nala ana mana tungga feꞌe nala, hitu hulu dua. Boe ma Ana babaꞌe sala dua-duak, fo leu lakahuluk Ndia, leni mamana kala fo dei fo Ana sangga neni ndia neu.
2 Ana nadenu sala nae, “Hambu hataholi makadotok fo sama leo hade, kuni so. Ela kada maosik haitua ndia hataholi mana tao uen, fo kada ala mai ketu-kolu. De, ei musi hule-haladoi moke Manetualain haitua nakadaik Ndia hataholi mana tao uen, fo lakabubua lala hataholi la fo mana nau tungga Au. Huu, hataholi mana nau tungga Au sila noꞌuk, tehuu hataholi mana tao ue sala kada lumak.
3 Hatematak ia ei laꞌo leo! Au adenu ei, fo mini hataholi noꞌu kala miu. Tehuu masaneda leo iak. Ei sama leo biꞌilombo ana dale malole, fo mini busa fui manggalau kala laladan miu.
4 Ei boso mini doik, do tas baloꞌas, do tabueis lenak nai dalak. Boso ngganggali heni fai no sosoa taak, ma mambue kokolak mia hataholi nai dalak.
5-8 Mete ma ei maso mini nggolok esa dalek miu, na boso ei lali-lali mima uma esa mini uma feꞌek miu. Leo hataholi la simbok ei no malole, nai uma esa, na, leo tataak kada ndia leo, losa ei laꞌo ela nggolok ndia. Mete ma ei mini uma esa miu, ei musi moke Manetualain, fo fee babaꞌe-babatik neu hataholi la malai uma ndia. Mete ma maumak nai ndia, simbok ei no malole, na, neu ko Lamatuak natudu Ndia dale malolen neu uma isi la. Tehuu leo ala taa nau simbok ei, na, ela Lamatuak natudu Ndia dale malolen neu kada ei mesa nggei. Mete ma ei maso mini uma esa miu, do nggolok esa, de, ei miꞌa-minu sudi hata fo ala fee. Na, simbo kana no dale namahokok, huu nandaa mete ma ala fee ei leo ndiak fo nggati ei sosotam.
9 Tao mahai sila hataholi kamahedi nala. Ma mafada sala, mae, ‘Manetualain palendan nai ita matan so!’
10 Tehuu hambu nggolok boe, fo hataholi nala taa nau simbok ei. Mete ma ala tao leo ndiak neu ei, na, miu mambadeik miu nggolok ndia dalan, fo ama kokolak, mae,
11 ‘Mamanene neulalau! Ai mai mini Lamatuak Dedeꞌa-kokolan fee ei so, tehuu ei taa mbali sala fa boe. De, hatematak ia, ai sasambu heni nggolok ia afun neme ai ei nala mai, fo ana dadik tanda, nae, dei fo ei lemba aom ndia nenenin! Tehuu masaneda neulalau! Manetualain palendan nai ita matan so!’
12 Ei bubuluk kota Sodom manggalaun, hetu? Au afada ei baa! Dei fo nandaa no faik fo daebafok babasan, Lamatuak huku hataholi mana timba heni ei ndia, belan lena heni hataholi Sodom asa!”
Hataholi la, fo taa nau simbok Lamatuak Yesus
(Mateos 11:20-24)
13 Yesus kokolak nakadaik bali, nae, “Mata neuk neu ei manai nggolo Korasin ma nggolo Betsaida! Soe laꞌe ei! Au tao tanda heran mata-mata kala neu ei mata deꞌe mala, tehuu ei taa nau mamahele Lamatuak. Naa te, ei ia, hataholi Yahudi fo ei manaku malelak Ndia. Tehuu leo tanda hera nala fo Au tao kala sila, nai ei nggolo mala, dadi leo nai Tirus ma kota Sidon, na neu ko doo basa ia, de hataholi la malai ndia kala hondak so, ma ala laꞌo ela sila sala nala so, de ala lasafali tungga Lamatuak. De neu ko sila boe oo, pake buas fafaluk, ma tao afu neu langgak, fo dadik neu tanda, nae, ala fale dale nala no sila sala-singgo nala. Naa te hataholi Tirus ma Sido nala ia, hataholi taa Yahudi la, fo ala manaku lalelak Manetualain.
14 Tetebes! Ei mita leo! Dei fo mete ma Lamatuak naketu basa hataholi la dedeꞌa nala, na, hataholi Tirus ma hataholi Sido nala huhuku nala bei daꞌuanak lena heni ei huhuku mala.
15 Mata neuk, neu hataholi nggolo Kapernaum! Ei boso duduꞌa, mae, dei fo Lamatuak soꞌu nala ei fo maso mini nusa-sodak miu. Taa! Dei fo Lamatuak mbia heni ei mini naraka dalek miu!
16 Masaneda matalolole! Huu hataholi fo namanene ei, sama leo namanene Au. Ma hataholi fo taa nau namanene ei, na sama leo taa nau namanene Au. Nakalenak bali, hataholi la, fo taa nau namanene Au ndia, sama leo taa nau namanene Manetualain, fo mana nadenu Au uni daebafok ia mai so.”
Hataholi nana nadenu kahitu hulu dua kala fali
17 Faik fo hataholi nana nadenu kahitu hulu dua kala sila fali, de, dale nala lamahoko lalan seli. Boe ma, ala lafada Yesus, lae, “Awii! Ana seli maa! Ledoeik ai pake Lamatuak naden fo husi nitu la. Nitu la lamanene ai, de ala kalua tutik! Ana seli maa!”
18 Boe ma Yesus nataa sala, nae, “Tetebes! Ledoeik ei tao leo ndiak, boe ma Au ita Manetualain mbia heni nitu no ndia malanggan leme lalai mai, sama leo manggahadok fo kalua kii-konak neme lalai mai.
19 Masanenedak baa! Nitu la malanggan ndia, ita musun ndia. Ma ndia naena koasa boe! Tehuu Au fee ei koasa, fo suek ei tao matepa ndia koasan. Ma leo ei heta laꞌe mengge kalasok, do kulak, na, ei taa hambu hedis fa boe. Taa hambu esa ana tao soe neu ei.
20 Ei dale mala lamahoko, huu nitu la lamanene ei. Malole boe, tehuu kada dedeꞌa kadiꞌik ndia! Malolenak ei dale mala lamahoko, huu Lamatuak sulak nala ei nade mala so, fo dadik neu Ndia hataholi nusa-sodan.”
Lamatuak Yesus dalen namahoko
(Mateos 11:25-27; 13:16-17)
21 Faik ndia, Lamatuak Dula Dale Malalaon, tao nala Yesus dalen namahoko. Boe ma Ana koa-kio Lamatuak, nae, “Ama! Ama mana dadi Malangga Inahuuk nai lalai ma daebafok. Au akahehenek makasi noꞌun seli, huu Ama kena dedeꞌa kala ia neu hataholi fo ana taok ndia malelak, ma mana koao kala. Tehuu Ama buka basa dedeꞌa kala ia neu kakana ana kala, ma hataholi dale kadiꞌi taidae kala. Tetebes, Ama! Huu ndia ndia, tao nala Ama dalen namahoko!”
22 Basa de Yesus nafada hataholi noꞌu kala, nae, “Mamanene baa! Au Amang nai nusa-sodak fee basa koasa neu Au. Mana bubuluk no teteben fo nae, Au ia see, na kada Amak. Ma mana bubuluk no teteben, Amak see, na kada Ama Anan, fo ndia Au. Ma Au hele hataholi feꞌek, fo nafada sala, fo suek ala lalelak Ndia.”
23 Basa de Yesus heok nasale Ndia ana mana tungga nala, de nafada heheli sala, nae, “Ei maua tetebes, huu ei mita Lamatuak koasan so.
24 Mane kala ma basa mana kokola makahulun ele dokodoe sangga lita Lamatuak koasan fo ei mitan so, tehuu sila taa bisa. Sila boe oo, dokodoe sangga lamanene hata fo ei mamanenen so, tehuu sila taa bisa.
Hataholi Samaria dale malole
25 Laꞌi esa, malela heti-heu Yahudi esa, nambadeik fo sangga teꞌek Yesus. Ana natane, nae, “Ama Mesen! Tulun mafada dei! Au musi tao hata, fo ela au bubuluk au bisa hambu sodak akandondoo henin ua Lamatuak nai nusa-sodak?”
26 Yesus nataa, nae, “Baꞌi Musa sulak hata laꞌeneu dedeꞌak ia? O duduꞌam leobeek laꞌeneu ndia?”
27 Hataholi ndia nafada, nae, “Ana sulak, nae:
‘O musi sue Manetualain, fo o Lamatuam, lena heni neme basa-basan mai.
Huu ndia de, o musi dokodoe Ndia taa-taa,
tao ues mbilu mbuse fo tungga Ndia hihii-nanaun,
ma malelak neulalau Ndia.’
Boe ma nana sulak, nae, ‘O musi sue o tolanoom, sama leo o sue o aoina hehelim.’ ”
28 Yesus bala nae, “Tetebes! Mete ma o tungga leo ndiak, na o masoda makandondoo henin mua Lamatuak.”
29 Tehuu hataholi ndia sangga taok aon leo hataholi ndoos. Basa de natane Yesus, nae, “Tehuu au ‘tolanoong’ ndia, na ndia bee?”
30 Boe ma Yesus nataa, nae, “Leo iak! Au sangga afada nakandandaak esa. Dei fo o mafada Au, see ndia tetebes o ‘tolanoom’. Tutuik ndia leo iak: Hambu hataholi Yahudi esa neme kota Yerusalem mai, de loe neni Yeriko neu. Tehuu kada nggengge neuk, naꞌo mana mamoa kala, mai de lambuen. Ala mbombokon, basa de ala lamoa lala doin, ma basa ndia baloꞌa papake nala. Boe ma ala mbia henin neni dalak bifin neu, de ala laꞌo elan. Hataholi ndia elabaꞌik maten so.
31 Tehuu see bubuluk nae, huu malangga anggama Yahudi esa konda nesik ndia boe. Tehuu ledoeik nita hataholi makahinak ndia lengga-lengga neme dalak bifin, tehuu ana taa hahae fo tulu-fali hataholi ndia. Ana laꞌok heo nesik dalak selik de laꞌo nakandoo.
32 Taa dook, boe ma hataholi feꞌek esa, laꞌok nesik ndia. Ndia ndia, hataholi Lewi fo nateme tulu-fali nai Manetualain Uma Ina Huhule-Haladoin. Ledoeik nita hataholi ndia lee-lee nai dalak bifin, boe ma kada neu deka-deka fo mete sudi kana, tehuu taa tulu-fali sana. De ana laꞌo nakandoo.
33-34 Taa dook bali, boe ma hataholi esa neme dae Samaria mai, nesik ndia no ndia banda keledein. Ita basa nggata bubuluk, hataholi Yahudi la lateme suli latahihiik hataholi Samaria la. Ledoeik hataholi Samaria ia nita hataholi nana namoak ndia, boe ma dalen tuda kasian neu hataholi ndia. Ana neu deka-deka fo sangga tulu-fali hataholi ndia. Ana diꞌa anggol oek de ana tao nalalao hina kala, basa de ana tao mina neun. Boe ma ana fefeo neulalaun, de ana nakahehene kana neni banda keledein lain neu. Basa de noon losa kota. Boe ma ana feen leo tataak, neu hataholi mauma sesebak esa, fo nakaneni neulalaun.
35 Neu foꞌa fafain, boe ma hataholi Samaria ndia bae nakahuluk doi lilo fulak dua neu mauma sesebak ndia, ma nafadan, nae, ‘Pake doik ia, fo makaneni neulalau hataholi kamahedik ndia, losa ana hai. Mete ma taa dai, na, tulun pake tataak ama doin dei. Faik fo au fali maing, dei fo au nggati basa ama doin.’ ”
36 Yesus nakandandaan ndia, losa ndia leo. Basa de Ana natane malela heti-heuk ndia, nae, “Tungga o, na see ndia ‘tolanoo’ tetebes, neu hataholi nana namoak ndia?”
37 Hataholi ndia nataa, nae, “Memak neu ko ndia hataholi mana tuda kasian neu hataholi ndia.”
Yesus nae, “Tetebes kaꞌa! Muu leo, fo tao tunggan.”
Lamatuak Yesus, Maꞌa ma Mia
38-40 Basa ndia, boe ma Yesus no ana mana tungga nala laꞌo lakandoo leni Yerusalem leu. De ala singgo nai nggolok esa. Nai ndia hambu hataholi dua kaꞌa-fadi kala, nade Marta ma Maria. Marta noke Yesus fo ala leo tataak nai ndia uman. Basa de ala leo tataak lai ndia.
Ledoeik Yesus nanggatuuk fo nanoli hataholi la, boe ma Marta nasambute nakaneni nanaꞌak nai dapu dale. Tehuu ndia fadin Maria, nanggatuuk deka-deka neu Yesus ein, fo namanene Ndia kokolan. Taa dook boe ma, Marta maso mai, de ana manggalau neu Yesus, nae, “Ama aa! Talobee ia! Au asambute alan seli tao nanaꞌa-nininuk, naa te au fading kada nanggatuuk neulalau nai ia. Tulun dei! Madenun neu fali au nai dapu dale!”
41 Tehuu Lamatuak Yesus nataa, nae, “Maꞌa, Maꞌa. O ia, masambute mua kada duduꞌa mata-mata kala.
42 Malole boe, tehuu hambu dedeꞌak esa inahuun lena heni nai hatematak ia. Mia nanggatuuk fo namanene Au kokolang. Ana hele nala nelaun manai lain seli so. Hataholi taa bisa namoa nala Dedeꞌa-kokolak neme ndia mai.