21
Ina falu hata taak, fee doi kolete inahuuk nalan seli
(Markus 12:41-44)
1 Faik fo Yesus nanoli nai Uma Ina Huhule-haladoik, nita hataholi kamasuꞌi kala tao doi kolete neni peti derma dalek neu.
2 Ndia boe oo, nita ina falu hata taak esa, ana mai tungga hule-haladoik. Ana nanggodi doik sen dua neni peti ndia neu. Doik ndia belin kada fa anak nalan seli.
3 Basa de Yesus kokolak no Ndia ana mana tungga nala nae, “Mamanene neulalau! Ina falu hata taak ia, nanggodi doik kada sen duak, tehuu ana fee lena heni basa hataholi la so.
4 Hataholi feꞌe kala sila langgodi doi kolete neme kada sila doi sisa nala. Tehuu ina falu ia, fee basa ndia doi nala. Naa te, doik ndia, na ndia doin fo nasoda nenik.”
Lamatuak Yesus nafada laꞌeneu Uma Ina Huhule-haladoik tutuꞌun
(Mateos 24:1-2; Markus 13:1-2)
5 Faik ndia, Yesus ana mana tungga nala, kokolak koa Uma Ina Huhule-haladoik, lae, “Ama! Mete sudik Uma ia neulaun ana seli maa! Ala taon nenik batu-batu nana tatik inahuuk ana seli, basa de ala lakatotodok lalan mandaa hiak. Ma hambu hataholi la fee bua mabeli fo heuneu Lamatuak Uman ia!”
Tehuu Yesus nataa, nae,
6 “Uma ia memak malole. Tehuu taa dook, huu hataholi la, tao latuꞌu heni basa batu la ia, losa bebelak no dae.”
Fai-fai toꞌa-taak ma doidosok
(Mateos 24:3-14; Markus 13:3-13)
7 Basa de Yesus ana mana tungga nala latane, lae, “Ama Mesen! Hata fo Ama kokolak isinaak ndia, meda dadi nai faik bee ndia? Mete ma fain dekak so, na, dei fo ndia tanda nala leobeek?”
8 Boe ma Yesus nataa, nae, “Sadi ei manea matalolole, fo boso ei nana kedi nalak. Huu dei fo hambu hataholi mata-mata kala mai, fo bamba kala nala, lae, ‘Au ia Karistus.’ Luma boe lae, ‘Fai daebafok babasan deka-deka mai so!’ Tehuu boso mamahele!
9 Mete ma ei mamanene halak, nae, hataholi la tao husanak, ma latati nai sudi bee, na, boso bii. Memak basa sila dadi lakahuluk dei. Tehuu daebafok fai babasan bei ta losa.
10 Dei fo leo esa, natati laban leo feꞌek. Nusak esa, natati laban nusa feꞌek.
11 Dei fo hambu dae nanggeꞌo nalan seli. Sudi nai bee hambu fai ndoes ana seli, ma hedi manggalauk napadaka nalan seli. Dei fo hataholi la boe lita dedeꞌak, fo ana tao nala ao bulu nala lambadei, ma tanda-tanda manai lain seli nai lalai.
12 Basa dedeꞌa kala ia bei ta lateꞌe, tehuu dei fo hataholi la humu lala ei, fo tao lala ei doidoso, huu ei mamahele Au. Basa de ala fee ei miu tao dedeꞌak nai uma huhule-haladoi kala, ma ala kena ei nai bui dale. Sila boe oo, ladenu ei miu masale manek ma mana toꞌu palenda feꞌe kala. Basa ia la, huu ei tungga Au.
13 Tehuu ei musi pake lelak ndia, fo mafada sala Au Hala Maloleng.
14 De, boso duduꞌa, ei sili ei aon leobee dei.
15 Huu dei fo Au afada ei dedeꞌa deꞌek mandaak, fo sili ei aoina mala. No leo ndiak, na, ei musu mala taa bubuluk lae hata so bali.
16-17 Dei fo hataholi noꞌu kala husembuluk nalan seli neu ei, huu ei tungga Au. Hambu neme ei bobonggi hehelim, fo leo inama, kaꞌa-fadi tolanoo mala, ma ei nonoo mala. Dei fo hambu neme sila mai, sangga dalak, fo seꞌo heni ei, losa hambu luma leme ei mai nana tao nisak.
18 Tehuu ei boso bii, huu dei fo Lamatuak taa nafalende heni ei. Langga-buluk dok esa taa bisa moꞌu neme ei langga mala mai, mete ma taa no Ndia hihiin.
19 Mete ma ei mahele makandondoo henin, na, neu ko Manetualain tao nasoda ei.”
Yerusalem tutuꞌun
(Mateos 24:15-21; Markus 13:14-19)
20 Yesus kokolak nakadaik, nae, “Mete ma ei mita musu la eꞌo lala kota Yerusalem, na ei bubuluk ndia sangga nakalulutuk.
21 Lita leo ndia, na, hataholi malai propinsi Yudea, foꞌa fo lalai leni letek leu leo. Hataholi manai kota boe, foꞌa lalai leo. Ma hataholi malai nggolok, na, boso ala maso leni kota dale leu bali.
22 Huu Lamatuak haitua fai totoꞌa kala sila, fo huku hataholi la fo taa mana nau lamanene Ndia. Basa sila dadi nandaa no hata fo Manetualain mana kokola nala, sulak mema kana so, neme makahulun mai.
23 Faik ndia, hataholi fo kasian nalan seli, ndia inak kailus, ma ina-ina mana masusu ana mbimbilanak. Faik ndia basa hataholi daebafok, hambu totoꞌak, ma basa hataholi Yahudi la, hambu doidosok belak huu Manetualain luli sala.
24 Dei fo musu la tao lisa hataholi luma, ma humu lala luma, fo ala dadik ata sudi lai bee, nai daebafok ia. Boe ma hataholi nusa feꞌek fo taa lalelak Manetualain, ala mai heheta tao langgenggeo kota Yerusalem, ma ala koasa basa kota isin, losa basa sila fain.”
Hataholi Isi-isik mamain
(Mateos 24:29-31; Markus 13:24-27)
25 Basa boe ma Yesus nafada laꞌeneu Ndia fafali main, nae, “Dei fo mete ma Hataholi Isi-isik sangga fali main, na, hambu tanda la kalua lai ledo, lai bulak, ma, lai nduu kala. Nai daebafok boe, hambu tanda, fo ndia tasi ani foe, de lii inahuuk mana mbombonuk hene mai. Basa ia la, tao lala hataholi la bii ma lasapangga, losa ala taa bubuluk tao hata so bali.
26 Koasa-koasa malai lalai, fo ndia ledo, bulak ma ndu kala, langgeꞌo kii-konak, dulu-mulik. Lita leo ndia, boe ma hataholi la, bii lalan seli, huu daebafok sangga hambu soe!
27 Basa ndia, bei fo hataholi la lita Au, ‘Hataholi Isi-isik, konda mai no koꞌas.’ Au konda ua koasa, ma basa Au ana seling.
28 Mete ma basa tanda la ia mulai dadi so, na, ei botik ei langga mala leo, huu Lamatuak fain losa so, fo tao nasoda ei.”
Nakandandaak neme ai la mai
(Mateos 24:32-35; Markus 13:28-31)
29 Basa ndia, boe ma Yesus tui nakandaak esa, nae, “Ei mete neulalau ai la.
30 Mete ma doo nala mulai kuni, na, ndia dadik tanda, nae, fai hanan deka-deka mai so.
31 Leo ndiak boe, no fai totoꞌa kala. Mete ma ala sadu mai, na, dadik tanda, nae, Manetualain palendan deka-deka mai so.
32 Au afada memak! Neme basa hataholi la fo bei lasoda hatematak ia, dei fo hambu luma bei ta mate, tehuu fai-fai totoꞌak sadu mai so.
33 Mae lalai no daebafok mopo sala so, tehuu Au Kokolang ia nahele nakandoo.”
Paluu manea Lamatuak mamain
34 Basa boe ma, Yesus tuti Ndia kokolan, nae, “Manea neulalau, huu kada nggengge neuk Au sadu mai so! Boso losak ei taa duduꞌa no teteben bali, boe ma ei masoda mia minu mafuk, ma masambute kada sangga soda namahokok. Boso losak ei taa tanda malelak ndia tandan, huu ei kada masambute mia dedeꞌa feꞌek.
35 Mete ma Au fali maing, na, taa hambu hataholi esa boe, bisa kekek aon neme Au matang mai.
36 De, manea taa-taa. Hule-haladoi na, boso no namaketuk, fo ela ei bisa makatataka nai basa toꞌa-taak. No leo ndiak, fo, mete ma Au fali maing, na, ei taa toꞌa-mae mambadeik nai Hataholi Isi-isik matan.”
37 Tungga-tungga faik Yesus neu nanoli nai Uma Ina Huhule-haladoik. Tehuu mete ma leꞌodae so, na, Ana kalua neme Yerusalem mai, fo neu sunggu nai nggolok, manai lete Saitun ndia.
38 Fafai anan, tehuu hataholi noꞌu kala mai lakabubua so, fo sangga lamanene Ndia nanonolin nai Uma Ina Huhule-haladoik.