16
Lamatuak Yesus nasoda fali!
(Mateos 28:1-8; Lukas 24:1-12; Yohanis 20:1-10)
1 Neu foꞌa main, laꞌe neu fai nee, fo hataholi Yahudi la fai huhule-haladoin. Faik fo ledo tesa so, boe ma Maria neme nggolok Magdala, Maria feꞌek ndia (fo Yakobis inan), no Salome leu hasa mina kaboo menik, suek foꞌa na, ala sangga leu mbimbilun neu Yesus mbombolan, tungga hataholi Yahudi la hadan.
2 Neu Sosoda ina fafai anan, boe ma telu sala leni lates leu.
3-4 Ala losa dala laladak, boe ma telu sala lakokola lae, “Wei! Tehuu see ana bisa fali ita, fo loli heni batu inahuuk ndia, neme lates lelesun mai? Memak ita telu nggata taa tabeꞌi loli batu ndia, huu batu ndia inahuun ana seli.”
Ala losa ndia, tehuu lita batu ndia, nana loli henik so.
5 Boe ma ala lakandoo leni lates dale leu. Tehuu ala nggengge lalan seli, huu lita touanak esa papaken fula manggadilak, nanggatuuk nai sila boboa konan.
6 Boe ma touanak ndia kokolak no sala nae, “Wei! Ei boso bii! Au bubuluk ei mai sangga Yesus maneme Nasaret mai fo ala tao lisan nai ai ngganggek lain ndia. Tehuu Ndia taa nai ia so. Ana nasoda fali so. Mai fo mita aom mamanak fo lakambembeu Yesus mbombolan ndia louk so.
7 Ei fali lai-lai leo! Miu mafaꞌda Petrus asa mae, Yesus Ana nasoda fali so. Ana laꞌo nakahuluk neni Galilea neu so. Neu ko ala latonggo lo Yesus nai ele, fo leo makahulun nafada basa sila so. De, ama fali leo!”
8 Ledoeik fo ina kala sila lita mamanak ndia louk tetebes so, boe ma ala nggengge. De lalai deak leu. De, ala fali lai-lai. Ala taa lafada see esa boe nai dala laladak, huu ala bii lalan seli.
[Lamatuak Yesus natonggo no Maria maneme nggolok Magdala mai
(Mateos 28:9-10; Yohanis 20:11-18)
9 Sosoda ina fafain, Yesus neu natudu aon makasososan neu Maria, fo maneme nggolo Magdala mai, fo makahulun Yesus husi heni nitak nitu hitu leme inak ndia aon dale mai.
10 Nita basa Yesus, boe ma ana fali de neu nafada basa hataholi la fo makahulun mana tungga Yesus. Ala bei lakabubua lo dale hedik, ma luu nala tuda huu lasaneda Yesus mamaten.
11 Basa boe ma Maria nafada sala nae, “Talobee, de ei bei dale hedi? Boso dale hedi bali, huu Yesus nasoda fali so. Bei lai-laik ia, au atonggo ua Ndia so!”
Tehuu sila basa sala lataa lae, “Wei, O pepeko ndia!”
Lamatuak Yesus natudu seluk aon neu ana mana tungga nala dua
(Lukas 24:13-35)
12 Basa ndia boe ma Yesus ana mana tungga nala dua leni nggolok esa leu. Ala losa dala lalaꞌdak, boe ma Yesus natudu aon neu dua sala. Tehuu Yesus namata-ao feꞌek. Tehuu taa dook boe ma lalela kana.
13 De dua sala fali leu lafada nonoo nala lae, “Wei, mamanene dei! Isinaak ai bei fo ai matonggo mia Yesus neme dala laladak!”
Tehuu basa nonoo nala lataa lae, “Wei! Ei boso pepeko leo ndiak.”
Lamatuak Yesus natudu aon neu basa ana mana tungga nala
(Mateos 28:16-20; Lukas 24:36-49; Yohanis 20:19-23; Hataholi Nadedenu nala Tutuin 1:6-8)
14 Boe ma Yesus natonggo no ana mana tungga kasanahulu esa nala, neu ledoeik fo bei laꞌa-linu. Nafada sala nae, “Wei! Ei langga batu nala seli! Hataholi la lafada ei lae, lita Au no sila mata deꞌe heheli nala so, tehuu ei taa nau mamahele fa boe, maa! Ei mafada mae, basa sala pepeko ndia! Hatematak ia Au mai matang so. Memak Au mate so, tehuu hatematak ia, ei mita mata nggei, Au asoda asafali so! De, ei mita mata nggei leo.
15 De, hatematak ia ei musi miu laꞌok ndule daebafok ia, fo miu mafada basa hataholi la, Au Tutui Maloleng ia.
16 Hataholi fo namahele neu Au, ma ana hambu salanik, na, neu ko Manetualain feen sodak, fo, ana leo losa dodoon neu, no Manetualain nai nusa-sodak. Tehuu hataholi fo taa namahele, na, neu ko ana hambu huhukuk, ma Manetualain timba henin, fo ana leo nai nusa-sodak deak losa dodoon neu.
17 Ma hataholi fo namahele neu Au, neu ko ala tao tanda heran mata-mata kala fo basa hataholi la lamahele lae sila koasan ndia memak neme Manetualain mai. Leo, neu ko ala husi nitu la pake Au nadeng. Neu ko Manetualain tao nala sala bisa lakokola pake dedeꞌa feꞌek, fo ala taa bubuluk.
18 Boe ma mete ma ala toꞌu mengge kalasok, do linu laꞌe laso, na, ala taa hambu soe. Boe ma mete ma ala tao lima nala fo hule-haladoi fee hataholi kamahedik, na, neu ko hataholi ndia hai.”
Lamatuak Yesus mana soꞌuk neni nusa soꞌdak neu
(Lukas 24:50-53; Hataholi Nadedenu nala Tutuin 1:9-11)
19 Yesus kokolak no basa ana mana tungga nala, boe ma Manetualain soꞌun neni nusa soꞌdak dalek neu. Nai ndia Ana dadik neu Manetualain lima boboa konan, fo dua sala palenda leu esa.
20 Basa boe ma ana mana tungga nala tungga Ndia palendan. Ala leni basa sudi bee leu, de ala tui-bengga Yesus Tutui Malolen neu basa hataholi la. Boe ma Manetualain fee sala koasa, fo ala tao tanda heran fo sama leo Yesus nafadak ndia so. Boe ma hataholi noꞌu kala lamahele Yesus, huu ala bubuluk lae, Tutui Malole ndia, memak tetebes].
[MARKUS TUTUI MATEꞌEN TUNGGA SUSULA LELE ULU FEꞌE KALA
Ledoeik fo ina katelu kala sila losa Petrus no nonoo nala, boe ma ala tui sala basa dedeꞌa kala, laꞌeneu touanak fo mana kokolak no sala leme lates isinaak ndia. Basa boe ma, Yesus mesa kana palenda ana mana tungga nala, fo leu tui-bengga Tutui Malole ia nai basa mamanak lalaꞌen, losa daebafok buꞌu nala. Tutui Malole ia natudu dalak fo Manetualain tao nasoda hataholi la leme sala-singgo nala mai, suek lasoda lakandoo lo Ndia.
Tutui Malole ia, memak tetebes. Huu ndia. de nahele nakandoo, losa taa mana basak.]