21
Lamatuak Yesus maso neni kota Yerusalem neu sama leo Manek
(Markus 11:1-11; Lukas 19:28-40; Yohanis 12:12-19)
1 Basa ndia, boe ma Yesus asa laꞌok lakandoo losa nggolok esa nade Betfage, nai lete Setun boboan. Nggolok ndia deka-deka no kota Yerusalem. Leu ndia, de ala hahae tataak. Boe ma Ana nadenu Ndia ana mana tunggan dua, fo leu lakahuluk.
2 Ana palenda sala nae, “Ei dua nggei mini nggolok ele miu. Mete ma ei maso, na, dei fo ei mita banda keledei ina esa no anan, nanambaꞌak lai ndia. Ei miu sefi heni tali nala, fo hela mini sala leni Au mai.
3 Tehuu mete ma hataholi natane ei, nae, ‘Hatina de ei hela mini hataholi banda keledein?’ Naa, ei mataa mae, ‘Lamatuak sangga paken. Mete ma pake basan, na, dei fo Ana haitua fali kana mai tutik.’
4 Basa ia musi dadi, tungga hata fo Manetualain mana kokolan sulak mema kana so, nae,
5 ‘Wei, ei hataholi Yerusalem asa!
Mai mita ia dei baa!
Huu ei Manem mai.
Ana mai no dale kadiꞌi-taidaek.
Ana mai saꞌe banda kaledei ana.’ ”
6 Basa boe ma ana mana tungga nala leu de ala tao tungga basan, sama leo Yesus hehelun neu sala.
7 Ala hela loo banda keledei ina no anan leni Yesus leu. Boe ma ala bela sila lafa naluse nala neu banda keledei ana dean, de Yesus saꞌe neu lain, fo sangga maso neni kota neu.
8 Ledoeik ala sangga maso leni kota dale leu, boe ma hataholi noꞌu kala haꞌi lala lafa nala ma lafa ana nala, de bela sala leu dalak. Hambu luma boe, leu tati lala ai palm doo nala, de lakambembela sala leu dalak laladan. No leondiak, ala tao tanda lae, ala soluk Ndia leo hataholi ina-huuk.
9 Boe ma luma laꞌok lakahuluk lai Yesus matan, ma mana tungga kala lai dea. Ala eki noꞌu lae,
“Hosana! Ai koa-kio Manetualain!
Huu Dauk numbu-sadun mai so!
Hosana! Ai koa-kio neu Manetualain!
Huu Lamatuak nadenu Hataholi ia mai.
Hosana! Ai koa-kio neu Manetualain!
Huu Lamatuak nanggatuuk toꞌu palenda memak, nai lalai fo deman ana seli!”
10 Ledoeik Yesus maso Yerusalem no nakasoek leondiak, boe ma basa kota isi nala kalua de latane lae, “Awii! See mana maik ia bae?”
11 Hataholi noꞌu kala lataa, lae, “Ndia ia, Manetualain mana kokolan. Naden Yesus, fo hataholi Nasaret, neme propinsi Galelea mai.”
Lamatuak Yesus maso neni Uma Ina Huhule-haladoik neu, de ofe heni pasak manai ndiak
(Markus 11:15-19; Lukas 19:45-48; Yohanis 2:13-22)
12 Basa de Yesus asa laꞌok lakandoo, boe ma ala maso leni Uma Ina Huhule-haladoik dalek leu. Nai Uma Ina Huhule-haladoik pasan, hataholi la taon dadik pasak, fo laseꞌo lunda, suek hataholi paken dadik neu tunu-hotuk huhule-haladoik. Nita leondiak, boe ma Yesus husi kalua heni sala. Ana fae nalengga mei la fo ala taon neu mamana tuka doik, ma Ana fae nalengga banggu la fo ala paken neu laseꞌo mbui kala.
13 Boe ma nafada sala, nae, “Lamatuak mana kokolan sulak mema kana so, nae,
‘Au ambadedei Uma ia,
fo suek hataholi la mai hule-haladoi lai ia.’
Lamatuak hihiin leondiak, tehuu ei tao Uma ia dadik neu mana mamoa la mamana nakabubuan so!”
14 Basa boe ma hataholi la loo hataholi mbokek ma luꞌu kala leni Yesus leu, lai Manetualain Uma Huhule-haladoin ndia. Boe ma Ana tao nahai basa sala.
15 Nai ndia boe, hambu malangga anggama Yahudi malanggan nala, ma mese anggama la. Ledoeik lita Yesus tao tanda heran leondiak, boe ma ala luli. Nakalenak bali ledoeik lamanene kakana kala sila eki landaa lai Uma Huhule-haladoik ndia lae,
“Hosana! Ai koa-kio Manetualain!
Huu mane Dauk numbu-sadun mai so!”
16 Basa de, malangga nala sila lafada Yesus lae, “Weih! O mamanene kakana kala sila kokolan? Ndia taa tetebes!”
Tehuu Yesus nataa sala nae, “Hei, Au amanene. Tehuu hatina? Ei bei taa les mitak nai Manetualain Susula Malalaon laꞌeneu kakana kala mana koa-kio neu Manetualain do? Huu nai ndia nana sulak, nae,
‘Manetualain nahehele memak kakana mbimbilanak ma kakana kadiꞌik bafan nala,
fo ala koa-kio Ndia.’ ”
17 Basa boe ma, Yesus kalua laꞌo ela kota ndia, de neu sunggu nai nggolo Betania.
Lamatuak Yesus palenda ai huuk esa, fo boso naboa bali
(Markus 11:12-14, 20-24)
18 Neu foꞌa fafain, Yesus asa laꞌok leni Yerusalem leu bali. Tehuu nai dala laladak, Ana nameda ndoe so.
19 Nita ai huuk esa nai dalak bifin fo hataholi la lateme laꞌa boan. De, Ana neu deka-deka no ai huuk ndia, fo sangga memete sudik kaboak do taa. Tehuu ledoeik Ana losa ai huuk ndia, Ana taa nita boak esa boe, huu ai huuk ndia bei fo nadoo. Boe ma Ana kokolak neu ai huuk ndia, nae, “Huu o taa kalua o boam fee Au, de o taa bole maboa so!” Ana kokolak nateꞌe, boe ma ai huuk ndia namatuu tutik.
20 Ana mana tungga nala lita leondiak, boe ma ala nggengge. Ala latane lae, “Hatina de kada nggengge neuk ai huuk ia namatuu tutik?”
21 Boe ma nataa nae, “Mamanene neulalau baa! Mete ma ei mamahele tebe-tebe Lamatuak, taa no dale kabaꞌek fa boe, na, ei bisa tao sama leo Au taok ndia. Ei bisa tao lena heni ndia boe. Conto leo: ei bisa palenda letek esa nanasoꞌuk neni tasi dale neu. Neu ko Manetualain keko heni letek ndia tutik, sadi ei mamahele tebe-tebe neu Ndia.
22 Huu basa hata fo ei moke Manetualain, na, dei fo ei simbon, sadi ei mamahele tebe-tebe neu Ndia.”
Malangga nala latane laꞌeneu Lamatuak Yesus hak
(Markus 11:27-33; Lukas 20:1-8)
23 Basa de Yesus asa laꞌok lakandoo. Losa Yerusalem, boe ma ala maso fali leni Uma Ina Huhule-haladoik pasan leu bali. Ledoeik Ana nanoli hataholi laꞌeneu Manetualain dala sodan, boe ma malangga anggama Yahudi la malangga nala, ma lasi hada kala mai latane Ndia, lae, “Afik see nadenu o mai tao naodek nai ia? See fee o hak ndia?”
24 Tehuu Ana bubuluk ala mai sangga dalak fo tao latuda Ndia. Boe ma Ana nataa nae, “Au boe oo, sangga atane ei. Ei mataa Au dei, bei fo Au ataa ei.
25 Au sangga atane leoiak: ei basa nggei malelak Yohanis Mana Salanik ndia, hetu? See feen hak, fo ana salani hataholi? Manetualain do hataholi?”
Boe ma ala duduꞌa leu-mai, boe ma lakokola lae, “Awii! Ita nana teꞌe nalak ia so maa! Huu mete ma ita tataa tae, ‘Manetualain fee hak’ na, dei fo Ana bala nae, mete ma leondiak, na, hatina de ei taa mamahele neu Yohanis?’
26 Tehuu ita boe oo taa bisa tae, ‘Hataholi fee hak’, te dei fo basa hataholi la manggalau lo ita. Huu sila lamahele, lae, Yohanis ndia, na, Manetualain mana kokolan.”
27 Huu ndia de ala lataa Yesus lae, “Ai taa bubuluk.”
Boe ma Yesus bala nae, “Naa! Mete ma leondiak, na, Au boe oo, taa paluu afada see ndia fee Au hak.”
Lamatuak Yesus fee nakandandaak laꞌeneu touk esa, ma ana touanan dua
28 Yesus kokolak nakandoo no malangga nala sila, nae, “Ei duduꞌam leobee no nakandandaak ia? Touk esa ma ndia ana touanan dua. Ana palenda kakana kaꞌak, nae, ‘Ana nggo ei! Leledon ia, o muu tao ues nai osi dei.’
29 Tehuu kakanak ndia nataa nae, ‘Eh! Au taa uu.’ Tehuu taa dook boe ma ana fale dalen, de neu.
30 Basa ndia boe ma, touk ndia nadenu kakana fadik nae, ‘ana nggo ei! Leledon ia, na, o muu tao ues nai osi dei.’
Boe ma kakanak ndia nataa nae, ‘Malole ama. Dei fo au uu.’ Tehuu naa te taa neu.”
31 Tui basa leondiak, boe ma Yesus natane sala nae, “Naa, Au sangga atane leoiak: neme kakana kadua kala sila mai, see ndia tao tungga aman palendan ndia?”
Boe ma lataa lae, “Kaꞌak!”
Basa de Ana kokolak nae, “Hei. Tehuu mamanene neulalau, huu Au kokolak tetebes. Hataholi fo ei mae sila papake taa kala, sama leo mana susu-bea, ma ina kalabik, dei fo ala maso lakahuluk dadik Manetualain hataholin leme ei mai. Huu kada ei makaheik Lamatuak, tehuu taa tao tungga Ndia hihiin.
32 Makahulun, Yohanis Mana Salanik nanoli ei so, dalan leobeek fo ei bisa masoda ndoos. Tehuu ei taa nau mamahelen. Naa te, ledoeik hataholi papake taa kala lamanene Yohanis, boe ma ala laꞌo ela sala-singgo nala, de ala tungga ndia nanonolin. Ei boe oo bubuluk basa sila. Tehuu ei taa nau hahae mima ei sala mala mai, fo tungga Manetualain hihii-nanaun.”
Lamatuak Yesus fee nakandadaak laꞌeneu hataholi manggalauk tao osi anggol
(Markus 12:1-12; Lukas 20:9-19)
33 Basa ndia, boe ma Yesus tui nakandandaak esa bali, nae, “Hataholi madaek esa tao osi, fo sangga sele ai anggol nai ndia dae bibian ndia. Boe ma ana mbaꞌa ndulen. Ma ana tao bak heꞌe anggol boak oen. Boe ma ana nambadedei mamana nanea madema esa. De ana fee hataholi mana tao osi la seba osi ndia, fo ala baꞌe duak osi ndia buna-boan lo ndia. Basa de touk ndia neni nusa dea neu.
34 Losa fai ketu anggol boak, boe ma maosik nadenu ndia ana mana tao uen nala leni mana tao osi leu, fo loke ndia babaꞌen.
35 Tehuu mana tao osi la sila taa mbali ndia hataholi nadedenu nala. Hambu nana fembak, ma hambu nana tao nisak, ma hambu nana mbiak nenik batu.
36 Tehuu maosik ndia nadenu ndia ana mana tao ues bubua ina-huuk esa lena heni bubua makasososak ndia. Tehuu mana tao osi la, tao manggalauk leondiak leu sala boe.
37 Doo-doo boe ma, maosik ndia, nadenu ndia ana hehelin neu. Huu ana duduꞌa nae, ‘Mete ma au haitua au ana heheling neu, na, neu ko ala simbo kana no malole, ma lamanenen.’
38 Tehuu ledoeik mana tao osi la lita kakanak ndia, boe ma lakokola lae, ‘Wei, ei mita dei! Te tou lasik haitua ana hehelin mai so. Dei fo ndia simbo basa tou lasik pusakan. De, mai fo ita tao tisan leo, fo suek ita hambu osi ia.’
39 Boe ma ala humu lala kakanak ndia, de hela lenin neni osi deak neu, de ala tao lisan.”
40 Yesus tui nateꞌe, boe ma Ana natane sala nae, “Naa, Au sangga atane leoiak: mete ma maosik fali main, na, meda ana tao leobee neu hataholi mana tao osi la sila?”
41 Basa boe ma hataholi Yahudi la malangga nala lataa lae, “Neu ko ana tao nisa basa hataholi manggalauk kala sila. Basa ndia, na, ana fee hataholi feꞌek seba osi ndia, fo dei fo labaꞌe buna-boak, nandaa no ndia fai seseun.”
42 Boe ma Yesus kokolak no sala nae, “Fama ei taa les mitak hata fo nana sulak nai Manetualain Susula Malalaon, nae,
‘Hambu batu esa tuka nala nggali henin,
tehuu hatematak ia batu ndia dadik neu uma batu dii neten!
Manetualain mesa kana hele nalan, fo nanggatutuu batu ndia.
Huu ndia de ita titan, ndia neulaun ana seli!’ ”
43 Basa de Yesus tuti Ndia kokolan bali, nae, “De, ei duduꞌa neulalaun dei baa! Makahulun, Lamatuak hele nala ita hataholi Yahudi ia, fo dadik Ndia hataholin. Tehuu ei taa nau mbali Au, de, neu ko Lamatuak hele nala hataholi feꞌek. Huu kada hataholi fo mana tungga Ndia hihii-nanaun, bisa maso dadik Ndia hataholin.
44 [Au afada tungga ndoon. Au ia, ndia batu netes ndia. Hataholi mana tuda laꞌeneu batu ndia, dei fo hataholi ndia lulutu ndoos. Ma mete ma batu ndia tuda laꞌe hataholi, na, dei fo hataholi ndia sosombu ndoos.]”
45 Ledoeik malangga anggama Yahudi la malangga nala, ma hataholi Farisi la lamanene Yesus tutuin ndia, boe ma ala bubuluk lae, Ana uku ndandaak sila. Sila sama matetuk leo mana tao osi la sila, ma tuka batu mana mbia heni batu netes ndia.
46 De ala luli lalan seli. Boe ma ala heti dalan fo sangga humu Ndia. Tehuu ala bei bii hataholi noꞌu kala, fo mana taok Yesus ndia, Manetualain mana kokolan. De ala taa bisa tao hata-hata neu Ndia.