28
Lamatuak Yesus nasoda fali!
(Markus 16:1-10; Lukas 24:1-12; Yohanis 20:1-10)
1 Boe ma Sosodaina fafain, Maria maneme Magdala mai, ma Maria feꞌek, leu tilo lates ndia.
2 Kada nggengge neuk, daebafok nanggeꞌo nalan seli. Manetualain atan esa konda neme nusa-sodak mai, boe ma neu loli heni batu ina-huuk fo nana kenak neu bolok ndia. Basa de ana nanggatuuk neu batu ndia lain.
3 Ata nusa-sodak ndia matan nasaꞌa leo manggahadok, ma baloꞌan fula malalaok.
4 Hataholi mana manea kala sila bii lalan seli, losa ala dele mbuse makasufuk, ma ala taa bisa lakababalek leo bali hataholi kamate sala.
5 Boe ma ata nusa-sodak ndia, nafada ina kala sila, nae, “Ei boso bii! Au bubuluk ei mai sangga Yesus, fo ndia, Hataholi fo ala mbaku lisan nai ai ngganggek ndia.
6 Tehuu Ndia taa nai ia so. Ana nasoda fali so, sama leo Ana kokolak memak ndia so. Mai, fo mita aom mamanak fo ala lakambembeꞌu Ndia mbombolan neu. Mamanak ndia louk so!
7 Naa, hatematak ia, ei fali lai-lai leo! Miu mafada Ndia ana mana tungga nala, mae, Yesus nasoda fali so. Ana laꞌo nakahuluk neni Galelea neu. Ala musi leu latonggo lo Ndia nai ele, sama leo makahulun Ana helu memak sila so. Kada mamahele leo. Fali leo, fo mafada hata fo au kokolak ia!”
8 Boe ma ina kala sila lalai kalua laꞌo ela mamanak ndia. Ala lameda bii, tehuu ala lameda lamahoko boe. Ala fali lai-lai fo lafada dedeꞌak ndia neu basa Ndia ana mana tungga nala.
9 Tehuu losa dala laladak, kada nggengge neuk Yesus mai natonggo no sala. Ana kokolak nae, “Soda-molek!” Lita leondiak, boe ma ala leu deka-deka fo sangga holu Ndia ein, ma lakaluku-lakatele neu Ndia.
10 Boe ma Ana kokolak nae, “Boso bii baa! Miu mafada Au ana mana tungga nggala, fo ala leu lahani Au nai Galelea.”
Hataholi mana manea kala leu lafada laꞌeneu hata fo mana dadik so, neme mamanak mbembeda Lamatuak Yesus mbombolan
11 Ledoeik ina kala sila bei lai dala laladak, boe ma hataholi mana manea kala fali leni kota leu. Leu lafada malangga anggama Yahudi la malangga nala, basa hata fo mana dadik ndia so.
12 Boe ma malangga nala sila heti dalak lo lasi hada kala, fo ala seba hataholi mana manea kala doik makadotok, fo suek seu bafa nala.
13 Malangga nala sila lafada lae, “Leoiak. Mete ma hataholi latane, na, ei musi mataa mae, leꞌodaen ndia ei sunggu mamanee. Naa te Ndia ana mana tungga nala mai lamanaꞌo leni Ndia mbombolan.
14 Ma mete ma ama gub namanene dedeꞌak ia, na, ei boso bii, huu dei fo ai ndia heti tou lasik.”
15 Boe ma hataholi mana manea kala haꞌi lala doi kala sila. Ala tao tungga malangga nala sila hihiin. Huu ndia de, losa hatematak ia hataholi Yahudi la bei lamahele tutui pepekok ndia.
Lamatuak Yesus natudu mata-aon neu Ndia ana mana tungga nala
(Markus 16:14-18; Lukas 24:36-49; Yohanis 20:19-23; Hataholi Nadedenu nala Tutuin 1:6-8)
16 Lamanene basa ina kala sila nafafadan, boe ma Yesus ana mana tungga kasanahulu esa nala sila, leni propinsi Galelea leu, fo latonggo lo Ndia nai letek esa, tungga Ndia hehelun ndia.
17 Ledoeik ala lita Ndia nai ele, boe ma ala lakaluku-lakatele neu Ndia. Mae leondiak boe oo, tehuu bei hambu luma dalen nala bei lakandaa.
18 Boe ma Ana mai deka-deka no sala, de Ana kokolak, nae, “Manetualain fee Au koasa, fo Au palenda basa malai nusa-sodak, ma basa malai daebafok.
19 De, ei mini sudi bee miu, na, ei musi mafada basa hataholi nusa kala Au Tutui Maloleng ia. Ei musi manoli neulalau sala, fo suek ala dadik Au ana nggala. Ma ei musi salani sala fo dadik tanda, nae, ala nanambaꞌak so, lo Amak, ma Ndia Anan, ma Ndia Dula Dale Malalaon.
20 Ma manoli sala fo ala tao tungga basa palenda fo Au afada ei so. Masanenedak baa! Au ua ei taa-taa nai ei lalada mala, losa daebafok babasan.”