5
Lamatuak Yesus nanoli nai lete anak lain
1 Ledoeik Yesus nita hataholi makadotok ala mai tunggan, boe ma Ana hene neni lete anak esa lain neu, de nanggatuuk neu ndia. Ndia ana mana tungga nala fo Ana hele nala kala sila, leu deka-deka, fo lamanenen.
2 Basa de, Ana mulai nanoli sala, nae,
Hataholi maua-nale malole tetebes
(Lukas 6:20-23)
3 “Hataholi mana toꞌa-taa kala ua-nale nala malole,
huu Manetualain ndia mesa kana sila Mane malolen.
4 Hataholi mana nameda dale hedi kala, ua-nale nala malole,
huu Manetualain mesa kana ndia kokoe sala.
5 Hataholi kadiꞌi-taidae kala, ua-nale nala malole,
huu neu ko ala simbo basa babaꞌe-babatik fo Manetualain helun so.
6 Hataholi fo mana dokodoe nalan seli neu Manetualain dala ndoon, ua-nale nala malole,
huu neu ko Ana tao natetu hihiin nala.
7 Hataholi mana matudu namemeda kasia nala, ua-nale nala malole,
huu neu ko Manetualain tuda kasian neu sala.
8 Hataholi dale malalao kala, ua-nale nala malole,
huu neu ko sila mesa kasa bisa lita Manetualain.
9 Hataholi mana tao mole-dame sila, ua-nale nala malole,
huu neu ko Manetualain nae, ‘Sila ndia, Au anang.’
10 Hataholi mana hambu doidosok, huu ala tungga Manetualain, ua-nale nala malole,
huu Lamatuak ndia mesa kana, sila Mane malolen.
11 Mete ma hataholi feꞌek tao doidoso ei, huu ei tungga Au, na, ei boe oo ua-nale mala malole boe. Mete ma ala kokolak manggalauk neu ei, ma tui pepekok fo tao laboo ei nade mala, na, ei boe oo ua-nale mala malole.
12 Mae leondiak, tehuu ei musi kada tao mamahoko ei dale mala, huu Manetualain sadia bala fee ei babaꞌe mala makadotok nai nusa-sodak. Tehuu masanenedak bou! Taa kada ei mesa nggei hambu doidosok leondiak, huu lele uluk ele, hataholi la tao manggalauk leondiak neu Manetualain mana kokola nala.
Hataholi mana tungga Lamatuak Yesus sama leo masik ma manggaledok
(Markus 9:50; Lukas 14:34-35)
13 “Mete ma ita sangga tao talalada nanaꞌak, na, ita paluu tao masik neu dei. Leondiak boe, hataholi la fo lasoda lai daebafok ia, ala paluu ei. Tehuu mete ma masik mamin so, na, ndia sosoan hata? Kada nggali henin neu dalak lain fo nana hehetak.
14 Ei boe oo, musi masoda leo banduk, suek hataholi noꞌu kala lita neulalau. Ei musi mbila manggaledo ndoos, sama leo kota manai letek lain, fo basa hataholi la litan.
15 Hataholi mana dede bandu anak, taa tao banduk ndia neni ule dae dale neu. Tehuu ala tao bandu anak ndia neu mamana madema, suek bisa ana nanggaledo neu basa uma isi nala.
16 Ei boe musi masoda leondiak. Ei musi masaꞌa, suek hataholi feꞌe kala bisa lita ei soda malole mala. De lita leondiak, na, dei fo ala koa-kio Manetualain, lae, ‘Wei! Ei Amam manai nusa-sodak ndia, ana seli, bae maa!’ ”
Lamatuak Yesus mai, fo tao natetu Manetualain heti-heun
17 “Ei boso duduꞌa mae, Au uni daebafok ia mai, fo koka heni Manetualain heti-heun, fo Ana feen neu baꞌi Musa. Ma boso maehetuk Au taa mbali Manetualain mana kokola nala fo ala kokolak mema kana neme makahulun mai. Tehuu Au mai ia, sangga tao basan ala dadi meuaok leo basa dedeꞌa kala fo ala kokola mema kana so.
18 Huu ndia, de mamanene neulalau baa! Lalai no daebafok bei taa lakalulutuk heni sala, mete ma basan bei taa dadi tungga Manetualain heti-heu nala. Mae titik do koma esa boe oo, taa hambu nana koka henik.
19 Neme Manetualain hataholin basan, mete ma hambu mana laꞌo-lena Lamatuak heti-heun, huu ana duduꞌa nae, ‘Heh! Heti-heuk ia, kada kadiꞌik, de sosoan taa fa boe!’ Basa de, neu nanoli leondiak neu hataholi feꞌek, de dei fo Manetualain nai nusa-sodak tao ndia dadik hataholi kadiꞌi anak. Tehuu, hataholi mana tao tungga basa Manetualain heti-heun, boe ma neu nanoli leondiak neu hataholi feꞌek, na, dei fo Manetualain tao ndia dadik neu hataholi kasosoak.
20 Mamahele neu Au! Mete ma ei taa masoda ndoos malolen lena mese anggama ma hataholi partei Farisi la, na, ei taa bisa maso dadik neu Manetualain hataholin nala.”
Lamatuak Yesus nanoli hataholi la fo boso lamananasa aok
(Lukas 12:57-59)
21 “Ei bubuluk baꞌi Musa heti-heun, fo ana nafada mema kana neu ita bei-baꞌi nala so, nae, ‘Boso tao misa hataholi, huu see tao nisa hataholi, na, dei fo ana hambu huhukuk.’
22 Tehuu Au sangga afada leoiak: boso mamananasa aok, huu see namanasa ndia tolanoon, na, dei fo ana hambu huhukuk. Hataholi mana manggalau neu ndia tolanoon, nae, ‘O langgaute kea!’ dei fo hataholi ndia nasale neu lasi anggama la. Ma hataholi mana masapalak ndia tolanoon, nae, ‘Nggoak aa!’, dei fo ana hambu huhukuk nai haꞌi naraka.
23 De, mete ma o muni fefeek neu Manetualain, tehuu o masaneda, mae, tolanook esa bei namanasa o,
24 na, boso fee fefeek ndia dei. Muu mole mua o tolanoom ndia dei, basa ndia bei fo muu fee fefeek ndia neu Manetualain.
25 Mete ma hambu hataholi sangga nadedeꞌa no o, na, malolenak muu tao mole-dame lai-lai mua ndia dei. Mete ma taa, na, dei fo hataholi ndia ana hela noo o neni mana maketu dedeꞌak miu. Basa boe ma mana maketu dedeꞌak fee o muu polisi, boe ma ala sese o muni bui dale muu.
26 Au kokolak tetebes ia! Dei fo o leo makandoo nai bui dale, losa o bae ketu basa o huta mala.”
Lamatuak Yesus nanoli hataholi fo boso hohongge
27 “Ei bubuluk baꞌi Musa heti-heun so, nae, ‘Boso hohongge.’
28 Tehuu Au sangga afada leoiak: hataholi botik matan fo ana suli inak esa, basa de dalen nahiik sunggu non, na, touk ndia hohongge no inak ndia nai ndia dalen.
29 Mete ma o tao salak munik o mata konam, na, doꞌi henin leo. Huu malolenak o maso muni nusa-sodak muu, mua kada mata deꞌek esak, neme kada ala mbia o muni haꞌi naraka muu, mua o mata deꞌem dua sala.
30 Ma, mete ma o tao salak munik o lima konam, na, tete heni limak ndia leo. Huu malolenak o maso muni nusa-sodak muu mua kada o limam esak, neme kada ala mbia heni o muni haꞌi naraka muu, mua o limam dua sala.
Lamatuak Yesus nanoli fo boso mamaketu
(Mateos 19:9; Markus 10:11-12; Lukas 16:18)
31 “Ei bubuluk baꞌi Musa heti-heun so, nae, ‘Hataholi mana namaketu no sao-inan, na, ana musi fee susula namaketuk neu inak ndia.”
32 Tehuu Au afada leoiak: mete ma hambu hataholi namaketu heni sao-inan, naa te sao-inan taa hohongge nitak, boe ma inak ndia sao seluk, na, sao-tou kaesan ndia, tao ndia hohongge. Ma mete ma hambu touk fo sao nala inak esa nana namaketu nitak, na, sila dua sala hohongge ndia so boe.”
Lamatuak Yesus nanoli laꞌeneu heheluk
33 “Ei bubuluk baꞌi Musa heti-heun fo nafada ita bei-baꞌi nala, nae, ‘Mete ma o helu munik soo no Manetualain naden, na, o nanambaꞌak mua heheluk ndia.’
34 Tehuu Au afada leoiak: mete ma helu, na, boso munik sosook. Boso soo munik nusa-sodak naden, huu nusa-sodak ndia, Manetualain mamana leleon.
35 Boso soo munik daebafok naden, huu daebafok ndia Manetualain tabu ein. Ma boso soo munik Yerusalem naden, huu Yerusalem ndia, Mane Ina-huuk kotan.
36 Boso soo munik ei langga mala. Huu ei taa maena koasa fo koasa langga buluk dok esa fo ana dadik nggeok do fulak.
37 De, ei sangga helu mae, hei, na, mafada mae, ‘hei’ leo. Tehuu mete ma taa, na, mafada mae ‘taa’ leo. Mete ma ei mafada lenak neme ndia mai, na, ndia naoka nai nitu so.”
Lamatuak Yesus nanoli fo boso mabala manggalauk no manggalauk, tehuu musi ono-lau no malolen lena bali
(Lukas 6:29-30)
38 “Ei bubuluk baꞌi Musa heti-heun so, nae, ‘Mete ma hambu hataholi tao nakalulutu o matam, na, bala tao makalulutu ndia matan. Ma mete ma hambu hataholi tao namoꞌu heni o nisim, na, bala tao mamoꞌu heni ndia nisin boe.’
39 Tehuu Au afada leoiak: boso bala manggalauk neu manggalauk. Mete ma hataholi famba o nasum seli, na, elan neme naa fo ana famba o nasum seli bali.
40 Mete ma hambu hataholi nadedeꞌa no o, do, haꞌi nala o badum, na, fee o jeket neun bali.
41 Mete ma hambu soldadu esa nakaseti o, fo lemba ndia buan doon kilo esa, na, lemba makandoon losa kilo dua.
42 Mete ma hambu hataholi noke o buam sudi hata, na, feen neu leo. Ma mete ma hambu hataholi tonda o buam sudi hata, na, kada feen leo.”
Lamatuak Yesus nanoli fo sue hataholi mana husembuluk neu ita
(Lukas 6:27-28, 32-36)
43 “Ei mamanene so, hataholi lae, ‘Sue o tolanoom, ma husembuluk neu hataholi mana husembuluk neu o.’
44 Tehuu Au afada leoiak: o musi sue hataholi mana husembuluk neu o. Ma moke Lamatuak fee babaꞌe-babatik neu hataholi mana tao doidoso o.
45 Mete ma o tao leondiak, na, o matudu mae, o ia Amak manai nusa-sodak anan. Huu Ana tao ledo nasaꞌa fee hataholi malole, ma hataholi manggalauk boe. Ana nakonda uda fee hataholi mana tao tungga Ndia palendan noꞌu no hataholi mana laban Ndia palendan.
46 De, mete ma kada o sue hataholi mana sue o, na, o maehetuk Manetualain musi bala nenik babaꞌe-babatik neu o do? Taa! Huu hataholi manggalauk boe oo, sue sila nonoon mana sue sila.
47 De, mete ma kada o mafada mae, soda-molek neu o nonoom, na, ndia lenan hata? Huu hataholi taa kamahelek neu Manetualain boe oo, ala tao leondiak boe.
48 De, masanenedak baa! O Amam nai nusa-sodak sue basa hataholi la. De, o boe oo, musi tao leondiak!”