Paulus susulan
fee hataholi kamahele kala lai kota
Roma
1
Soda-molek
1 Susulak ia neme au, Paulus mai. Manetualain hele nala au so, fo dadik neu Yesus Karistus nadedenun. De Ana soꞌu nala au dadik neu Karistus atan, suek au uu afada hataholi sudi lai bee, laꞌeneu Ndia Hala Malolen.
2-3 Makahulun ele, Manetualain heti memak, fo Ndia mana kokola nala sulak laꞌeneu Hala Malole ndia neu Ndia Susula Malalaon. Te nai Susulak ndia, Lamatuak helu, fo sangga haitua Anan Yesus mai, fo dadik Hataholi. Tehuu hatematak ia, Ndia hehelun dadi so, huu Yesus mai so, fo Ana dadik hataholi neme mane Dauk numbu-sadun mai.
4 Tehuu nai dedeꞌak esa bali, na, Manetualain natudu buti, nae, Yesus Karistus boe, dadik Ndia Ana hehelin. Te Yesus Dula Dale Malalaon ndia, tebe-tebe malalaok, sama leo Manetualain. Ma Lamatuak pake Ndia koasan, fo tao nasoda falik Yesus neme Ndia mamaten mai. Huu ndia, de ita bubuluk, Manetualain Anan ndia, na ndia Yesus, fo ita Lamatuan.
5 Yesus natudu dale malolen neu au, huu Ana hele nala au dadik Ndia nadedenun, fo au uu tui-bengga Ndia hehelun nai sudi bee. Te Ana nahiik fo hataholi ta Yahudi la boe oo, lamahele leu Ndia, ma ala lasoda tungga Ndia hihii-nanaun. Au boe oo ahiik fo hataholi mana neme basa nusak kala, lamahele leu Karistus ma lasoda tungga Ndia hihii-nanaun.
6 Leondiak boe oo ei malai kota Roma. Ei mai mima hataholi nusak noꞌuk, neme mamana noꞌuk mai. Yesus Karistus hele nala ei so, nae, “Mai leo! Mai fo dadik neu Au hataholi nggala!”
7 Huu ndia de au haitua susulak ia neu ei manai kota Roma, ma tao nasanenedak, ae, Manetualain sue ei. Ndia boe oo noke ei dadik miu Ndia hataholin fo mana masoda malalaok.
Au hule-haladoi neu Manetualain, ita Aman, ma Yesus Karistus, ita Lamatuan, fo Ala latudu Sila dale malolen neu ei, suek ei bisa masoda no sodak, mole, ma ndoo-ndoo.
Paulus hule-haladoi fee ndia nonoo nala
8 Au mulai au susulang ia, ma au oke makasi noꞌuk neu Manetualain, huu Yesus Karistus naue-naosa nai ei dale mala. Au boe oo oke makasi, huu hataholi mana leo nai basa mana palenda Roma dae babaꞌe nala lamanene ei namahehelem neu Yesus so.
9 Lamatuak mesa kana bubuluk tebebes nae, au hule-haladoi ta no namaketuk soaneu ei. Ndia boe oo Ana bubuluk, au ue-osang henuk no samane nana boi-boik fo tui-bengga hataholi, laꞌeneu Ndia Anan Tutui Malolen.
10 Mete ma au hule-haladoi, na au oke leoiak: “Lamatuak, au mesa nggau ta bubuluk ndia dalan leobeek. Tehuu mete ma tungga Lamatuak hihii-nanaun, na, soi dalak fo au bisa uu ita au nonoo nggala lai Roma”.
11 Au hule-haladoi leondiak, te au ahiik ana seli uu tilo ei, suek au bisa baꞌe fee ei koasa neme Lamatuak Dula Dale Malalaon mai, suek ei namahehelem boe natea.
12 Au hihiing leoiak: mete ma au dadi mai, fo leo ua ei, na, au sangga tao atetea ei dale mala, suek ei namahehele mala bisa boe natea. Ma au ahiik, fo ei boe tao matetea au daleng.
13 Tolanoo susue nggalei! Au ahiik ei bubuluk mae, laꞌi noꞌuk au sangga uu tilo ei nai Roma ele. Tehuu losa hatematak ia, bei ta dadi boe. Naa, mete ma au dadi mai, na, au amahena hataholi noꞌuk bei lamahele latea neu Karistus, sama leo nai mamana feꞌe kala. No leondiak, na au ue-osang buna-boan malole.
14-15 Mae talobee boe oo, au ameda musi tui-bengga Lamatuak Hala Malolen neu basa hataholi la. Mae hataholi mana pake dedeꞌa Yunani do, hataholi ta kamahelek fo ala pake dedeꞌa feꞌek, hataholi inahuuk, hataholi kadiꞌi taidaek, hataholi mana sakolak do hataholi ta mana sakolak. Huu ndia de au ahehele sangga uni Roma ele uu, fo tilo ei.
Lamatuak Hala Malolen ndia, naena koasa fo tao nasoda basa hataholi la
16 Au ta mae fa boe, laꞌeneu Lamatuak Hala Malolen. Te mete ma hataholi kamahele kala neu Manetualain, na, Halak ndia naena koasa neme Ndia mai, fo nakamboꞌik hataholi ndia neme ndia sala-singgo nala mai. Naa, hataholi Yahudi la ala bubuluk lakahuluk dedeꞌak ia, basa dei fo hataholi nusa feꞌe kala.
17 Halak ndia boe oo, natudu Lamatuak dalan, fo tao namandoo hataholi sala-singgon. Basa sila ala bisa dadi, sadi hataholi namahele neu Ndia. Te nana sulak nai Lamatuak Susula Malalaon, nae,
“Hataholi musi namahele neu Manetualain dei,
bei fo ala bisa malole lo Ndia.
Te mete ma sila lasoda lamahele neu Ndia,
bei fo ala hambu soda tetebes.”
Lamatuak luli hataholi fo ta nau nalelak Ndia
18 Tehuu Manetualain nafada so, leoiak: hambu hataholi tana mbali Ndia. Ma hambu hataholi tao dedeꞌa manggalauk mata-matak. Tehuu Lamatuak ta simbok sila tatao-nonoꞌin ndia. Te nai sila dale nala dale, na, hataholi la ia bubuluk bee ndia tetebes. Mae leondiak boe oo, tehuu sila lambue tao lakandoo dedeꞌa kasala kala. Ala kokoe hataholi, losa hataholi la tala bubuluk bee ndia tetebes so bali. Huu ndia de, Lamatuak sangga nakonda huhukuk neu sala neme lalai mai.
19-20 Hataholi la ia, ta laena toꞌok fo lasalaꞌe ao nala, huu Manetualain natudu Ndia aon nenik Ndia tatao-nonoꞌin neu basa hataholi la so, losa ala lalelak Ndia. Au maksud leoiak: mae Lamatuak mesa kana ta nananitak, tehuu ita hataholi, bei bisa talelak Ndia, neme hata fo Ana taok. Mulai neme Ana nakadadadik lalai no daebafok losa hatematak ia, hataholi bisa bubuluk laꞌeneu Lamatuak aon ma Ndia koasan fo ta namaketuk. Huu ndia, de au ae, hataholi manggalau kala sila, ta laena toꞌok, fo bisa ala lasalaꞌe ao nala bali, lae, “Au ta bubuluk hata esa boe laꞌeneu Manetualain”.
21 De, mae ala bubuluk Lamatuak, tehuu ta nau manaku Ndia, lae, “Lamatuak ndia, na ita Manetualain!” Sila boe tala nau loke makasi neu Ndia. Boe ma sila duduꞌa nala labali ao, losa ta bubuluk hata-hata fo tetebes bali. Ala lamanggonggoak, de ala duduꞌa mata-matak, laꞌeneu Lamatuak ao-ina hehelin. Ma sila dale nala dadik makiuk.
22 Ala sosoꞌuk aok, lae, “Au ia, hataholi mana bubuluk dedeꞌak noꞌuk!” Mae ala duduꞌa leondiak, tehuu tungga teteben, na sila ndia nggoan leo kamba.
23 Boe ma, ala ta lakaluku-lakatele neu Manetualain fo ana seli ndia, te lae, “Ai ta paluu Lamatuak mata leondiak!” Tehuu ala mulai lakaluku-lakatele neu bua nana dokik namata-ao leo hataholi. Basa ndia, de ala lakaluku-lakatele neu bua nana dokik namata-ao leo mbuik, leo banda feꞌek, losa namata-ao leo mengge la boe. No leondiak, na ala timba heni Lamatuak fo ta mana matek, de nggati no buas fo bisa maten!
24 Huu ndia de Lamatuak ela sala, fo suek ala tao tungga kada sila hihii-nanaun. Ana ela sala fo tao dedeꞌa manggalauk mata-mata kala fo naoka nai sila dale nala. Losak ala ta mae lalelak so. Boe ma ala tao dedeꞌa manggenggeok mata-mata kala, no sila ao-ina hehelin, ma ala latao ao leondiak boe neu hataholi feꞌek ao-inan.
25 Nai sila dale nala, ala bubuluk nanonoli tetebes so, laꞌeneu Manetualain, tehuu ta nau mbali. Sila duduꞌa nala lakalulutuk so, de ala duduꞌa, lae, “Malolenak, mae ita tao dedeꞌa mata-matak, losa lakalulutuk te nenenin ta hata-hata!” De, ala lakaluku-lakatele neu buas fo Lamatuak taon so, tehuu tala nau lakaluku-lakatele neu Lamatuak! Ala tao aon leo hataholi malalaok, naa te sila tatao-nonoꞌin manggalauk!
Teteben, ita hataholi musi koa-kio, ma fee hada-holomata neu Manetualain nakandondoo henin! Naa, ndia bei fo nandaa!
26 Huu sila manggalaun ndia, de Lamatuak ela sala, fo ala tao langgenggeo leondiak, tungga kada sila hihiin. Boe ma ala lambue hohongge mata-matak, ma tala mae lalelak. Sila sao ina nala ala ta lahiik sunggu lo sila sao tou nala, tehuu lahiik kada ta malole la. Te inak nahiik sunggu no inak!
27 Tou kala leondiak boe! Ala ta lahiik sunggu lo sila sao ina nala so, tehuu ala lahiik sunggu lo kada touk! Tala mae fa boe! Huu ndia de dei fo ala hambu huhukuk no mandaan! Te ala heok dook leme dala ndoos mai.
28 Ala duduꞌa, lae, “Malolenak ita ta nanambaꞌak to Lamatuak”. Huu ndia de Lamatuak ela sala leme naa, fo ala tao tungga kada sila hihiin! De, ala duduꞌa lalelak kada manggalauk! Boe ma ala tao kada dedeꞌa ta malole!
29 Sila soda nala henuk no kada dedeꞌa manggalauk mata-matak. Ala ta tao lalelak dedeꞌa malole, ma lalelak kada tao dedeꞌa manggalauk. Ala balenaꞌo. Ala lambeda dalek. Sila mana holok. Ala tao lisa hataholi. Ala lambue lasisimbo bafak. Ala lasapepeko. Sila masapepekok. Ala lakamuti hataholi.
30 Ala lateme kokolak tao lakalulutu hataholi feꞌek naden. Ala husembuluk neu Lamatuak. Ta kalela hadak. Ala lateme lakadadaek hataholi. Ala lateme sosoꞌuk aok. Ala lateme sangga dala manggalauk mata-matak. Ala lateme laban ina-ma nala.
31 Ala ta nau bubuluk hata fo tetebes. Ala laꞌolena sila hehelu heheli nala, losa hataholi ta bisa lamahele sala bali. Ala ta nau sue hataholi. Ala ta lameda kasian fa boe neu hataholi.
32 Ala bubuluk Manetualain heti-heun so, fo nae, hataholi manggalauk matak leondia kala, fo nandaa nana huku matek. Mae ala bubuluk heti-heuk ndia so, tehuu ala bei tao manggalauk mata-mata kala. Ta kada leondiak, tehuu ala lambue mbau-edo hataholi feꞌek, fo sila boe tao tungga manggalauk leondiak. Ana seli ndia maa!