12
Mengge naga natati no inak ma anan
1 Basa ndia, boe ma nggengge neuk, te au ita tanda esa ana seli, ana sadu nai lalai, fo hataholi bei ta nita nita kana: hambu inak esa aon nana mbotik no ledo. Ana heta ein neu bulak. Ana pake solangga manek fo nana heti nduuk sanahulu dua.
2 Ndia kailus, ma namatani, te tein hedis fo sangga bonggi.
3 Kada nggengge neuk, te, au ita tanda feꞌek bali fo ana seli, sadu nai lalai. Hambu mengge naga mbila inahuuk esa. Langgan hitu, ma susulan sanahulu. Ana pake solangga manek hitu neu langga nala.
4 Ana pake ikon, fo sapu nalalao tao namopo babaꞌek esa neme basa nduu kala malai lalai. Ela kala, kada babaꞌek dua. Boe ma ana mbia heni nduu kala leni daebafok leu. De ana neu nambadeik nasale inak ndia, fo nahani losa ana bonggi, huu ana nau kodo memak Kakanak ndia.
5 Boe ma, inak ndia bonggi nala Ana tou anak esa. Tehuu Manetualain atan esa neme nusa-sodak mai, de sambu nala Kakanak ndia. Boe ma nenin neu Manetualain, fo Kakanak ndia, palenda noꞌu no Manetualain lai nusa-sodak. Te Kakanak ndia, neu ko palenda basa hataholi nusa kala manai daebafok, ma koasan nai lain seli.
6 Inak ndia, nalai neni mamana nes neu, fo Manetualain sadia ela fee ndia so. Dei fo ala lakanenin nai ndia, losa teuk telu seselik (fo ndia, faik lifun esa natun dua nee hulu (1.260)).
Mikael natati laban mengge naga nai nusa-sodak
7 Basa ndia, boe ma natati inahuuk dadi nai nusa-sodak. Manetualain ata nala lo sila malanggan manade Mikael, latati laban mengge naga ndia ma ana mana tungga nala.
8 Boe ma Mikael asa senggi mengge naga ndia, ma ana mana tungga nala. De ala kaꞌi mengge naga ndia ma ana mana tungga nala fo ta bole leo lai nusa-sodak so bali.
9 De, ala husi heni sala leme nusa-sodak mai, ma mbia sala leni daebafok ia mai. Mengge naga ndia, na ndia nitu la malanggan, fo lateme loken na lae, ‘Iblis’. Neme sososan mai, ana kada nambue pepeko hataholi fo ala tao salak.
10 Basa de, au amanene seluk hala malii esa neme lalai mai, nae,
“Makahulun mengge naga ndia nambadeik nakandoo nai Manetualain matan.
Ana nambue nakamuti soli salak neu ita tolanoo kamahele nala.
Ana nambue nakasasaꞌek salak neu sala leledo-leꞌodaen.
Te hatematak ia, ndia nana mbia henik neme nusa-sodak mai so.
De, hatematak ia, basan mana daik so.
Hatematak ia, Manetualain fain losa so, fo fee sodak neu hataholi daebafok kala.
Hatematak ia, Manetualain toꞌu palenda ma koasan ana seli.
Ana soꞌu nala Karistus,
Hataholi ndia fo Ana hele nalan so, fo dadi Manek neu basa hataholi nusa kala.
11 Ita tolanoo kamahele nala senggi mengge naga ndia, fo makahulun nambue soli salak neu sala,
huu Biꞌilombo Ana daan faa henin so, fo koka heni sila sala nala.
Sila boe oo, senggi mengge naga ndia,
huu ala lambalani tui hataholi laꞌeneu Biꞌilombo Ana dale malolen neu sala.
Mae hataholi la luli losa lae sangga tao lisa sala boe oo,
ala ta heok.
12 De, basa mana masodak lai nusa-sodak musi lamahoko!
Ma, basa mana masodak malai daebafok musi lanea,
huu soe sangga saꞌe laꞌe ei.
Nitu la malanggan konda neni ei mai so.
Ana luli nalan seli,
huu ana bubuluk, nae, ndia fain tao manggalauk ndia, sangga basan so!”
Mengge naga neu nasanggak inak ndia nai daebafok
13 Ledoeik mengge naga ndia bubuluk, nae ndia nana mbia henik neni daebafok neu, boe ma neu sangga inak mana bonggi nala Kakanak ndia, fo tao nakatotoꞌa kana.
14 Te ala fee inak ndia lidak dua, sama leo balambua inahuuk lida nala, suek ana laa neu kekek nai mamana nes, fo dook neme mengge naga ndia mai. Nai ndia, ala lakaneni ndia losa teuk telu seselik.
15 Nita leondia, boe ma mengge naga mbula oe leo faa, fo sangga lemba neni inak ndia.
16 Te daebafok fali nala inak ndia, no dalak dae natanggaa, de kodo nabasa oe maneme mengge naga ndia bafan mai, fo suek oe ndia, ta losa inak ndia.
17 Basa boe ma, mengge naga ndia luli inak ndia nalan seli. De, ana kalua fo neu natati laban inak ndia ana mana tungga feꞌe nala, fo ndia hataholi mana masoda tungga Manetualain palendan, ma manaku lae sila ndia Yesus hataholin nala.
18 Basa boe ma, mengge naga ndia, neu nambadeik neu tasi bifin, ma ana henggu nisin.