5
Susula nana luluk fo nana segel
1 Basa de, au ita seluk Ndia fo mana nanggatuuk nai kadela mana palenda ndia. Ana toꞌu lululuk esa nai lima konan. Lululuk ndia, dea-dalen henuk no susulak. Ma ala segel lisan nai mamanak hitu so.
2 Boe ma au ita ata nusa-sodak esa fo ana seli tetebes. Ana natane au no hala malii, nae, “See naena hak fo bisa buka segel sila, ma les susulak ndia?”
3 Mae Ana natane leondiak boe, te, ta hambu hataholi esa boe, naena hak fo bisa buka susulak ndia, ma les isin. Nai nusa-sodak ma mae nai daebafok, ta hambu esa naena hak boe. Nai mamana hataholi mana mate kala samane nala, ta hambu boe.
4 Au ita leondia, boe ma au amatani huu ta hambu hataholi esa boe fo naena hak, fo bisa buka susulak ndia, ma les isin.
5 Boe ma esa neme malangga kadua hulu haa kala sila, kokolak no au, nae, “We kaꞌa! Boso mamatani. Te mane Dauk numbu-sadun esa ana seli, fo loken na lae, ‘Meoasu neme leo Yahuda mai’. Ana bala nakalulutu basa manggalauk kala. De, Ndia ndia naena hak fo bisa buka segel ma les susulak ndia isin.”
6 Amanene leondia, boe ma au ita Biꞌilombo Ana esa nambadeik deka kadela mana palendan manai lalada ndia, ma banda kahaa kala sila fo ala seli no malangga kadua hulu haa kala eꞌo lala Ndia. Biꞌilombo Ana ndia, nonook leo hataholi tao nisa nitak so. Ndia susulan hitu, ma ndia matan hitu boe. Ndia mata deꞌe kahitu nala sila, sama leo Dula Dalen naena mata-aok hitu. Biꞌilombo Ana haitua Dula Dale mata-ao kahitu kala leni daebafok katematuan neu so.
7 Basa de au ita Biꞌilombo Ana ndia, neni Manetualain fo mana manggatuuk nai kadela mana palenda ndia neu, de haꞌi nala susula nana luluk ndia neme lima konan mai.
8 Ledoeik fo Biꞌilombo Ana ndia haꞌi nalan, boe ma banda kahaa kala, ma malangga kadua hulu haa kala sendek lunggulanggak de lakaluku-lakatele leu matan. Sila esa-esako toꞌu bua musik sama leo sasanu, ma manggo lilo mbilas esa, nana isik no boo menik fo ala deden tao masun naboo meni. Ai daa kaboo menik ndia, na ndia huhule-haladoi neme Manetualain hataholi nala mai.
9 Basa de basa sala ala soda sosoda beuk esa, lae:
“Biꞌilombo Ana ia, nandaa simbok susulak ia.
Biꞌilombo Ana ia, naena hak fo buka segel ndia.
Huu Biꞌilombo Ana ala hala lisan so.
Boe ma Manetualain pake Ndia daan,
fo soi nala hataholi daebafok leme basa leo la ma nusa kala,
suek sila luma dadik Manetualain hataholi nala.
No leondiak, na hataholi leme basa dedeꞌa-kokola kala ma nusa kala,
bisa dadi Manetualain bobonggi nala.
10 Biꞌilombo Ana ia, nakabubua nala basa sala so,
dadik neu nusak esa, fo Ana palenda sala.
Biꞌilombo Ana, hele nala sala so,
dadik Manetualain hataholi mana tao ue nala.
Basa de, ala toꞌu palenda nai daebafok ia.
Ma ala tao ues soaneu Manetualain nai daebafok ia.”
11 Basa ndia, boe ma au botik au matang, de au amanene hala inahuuk esa ma au ita banda kahaa kala fo ala seli ndia, ma malanggan kadua hulu haa kala sila. Manetualain ata nala makadotok leme nusa-sodak mai. Ata nala sila makadotok losa ta bisa hingga nala sala.
12 Basa sala soda lo hala inahuuk, lae,
“Ai soꞌu dema-demak Biꞌilombo Ana nana hala nitak ndia,
Huu Ndia ndia nandaa simbok ai koa-kio nala!
Ndia koasan ndia, inahuun ana seli.
Ndia hata-heto nala, noꞌun seli.
Ndia duduꞌan, ndaan seli.
Ndia balakain, ana seli.
Ai soꞌu dema-demak Ndia naden.
Ai fee hada-holomata neu Ndia.
Ai koa-kio neu Ndia.”
13 Basa ndia, boe ma au amanene sosoda feꞌek esa bali. Neme basa masoda kala, mae nai nusa-sodak, nai lalai, nai daebafok, ma nai tasi dale, sila basa sala ala soꞌuk halan de ala soda. Neme mamana hataholi mana matek samane nala boe, ala soda tungga. Basa sala soda noꞌu, lae,
“Ai koa-kio Manetualain fo mana manggatuuk nai kadela mana palenda ia.
Ai soꞌu dema-demak Biꞌilombo Ana ia boe.
Ai fee hada-holomata neu Sala.
Ai makaluku-makatele neu Sala.
Huu Ala toꞌu palenda lakandondoo henin!
Ma Sila koasa nala ta mana basak!”
14 Basa de banda kahaa kala fo mana ono-lau Manetualain, lataa lakandondoo henin lae, “Tetebes ndia! Tetebes ndia so!” Boe ma malanggan kadua hulu haa kala sila, sendek lunggulanggak bali, de lakaluku-lakatele leu Manetualain ma Biꞌilombo Ana ndia.