12
OIakup pokkuttathe ana oPoththuruc ponekkettathe ikorrkkor
1 Ana nocaꞌri cen aIli oIruthuc ikkat cik acciccokot ul wꞌrek noul ioccokothe lon loIeccuo othakka itti akkiet kin thiak.
2 Kwokkwothe oIakup opang poIuanna ngkꞌrittang ikukwit.
3 Anakka kwimmat itti lon len lopiriet ul woIouth noka, kwoccokathe oPoththuruc cakuruk. Lon len lokkattathe nocaꞌri cokamuthe karrakith iella müꞌrükül tit.
4 Anakka kwoccokothok akwonekkekathok ikorrkkor, aul irro iokat mungkut mocoꞌrin ana cungkut culukku conat ul wocoꞌrin akin angwothok akamuthe koThaurrot kaman kꞌrek cik komarttakot akwantothipittakot lon tokït koul.
5 Ittina oPoththuruc pikkatheik ikorrkkor ana ul ioccokothe lon loIeccuo wikkatheik aꞌranok ngaꞌrama appinappin.
6 Ana ngkoꞌra aIruthuc parthuk ona oPoththuruc akwothipittakot lon tokït koul ngorrot ngen, oPoththuruc pokat inthe ana nili nokat cik anangwothok akkwaik ithoꞌrkït then akkwïꞌrïkïkkakot nynyol nyeꞌra ana ul irro inangwot cik acoꞌro icürük cothapat.
7 Menik accokkot auꞌrupa wothothïlettat woIli ummanthet oPoththuruc ncik ngkꞌran kothik akkwathok nti inthe aiꞌrekathok itti, “Uroki cokoccokot.” Ittina anyol apukkat nnonyaun.
8 Auꞌrupa wothothïlettat woKapik iꞌrekathok itti, “Aki eret ana wok ana ïꞌrïko kuꞌrat korikin.” Ana oPoththuruc pokkathe ammakka wiꞌrethok. Uꞌrupa wothothïlettat woKapik wappiꞌrekathok itti, “Omakothin.”
9 OPoththuruc pomakathok thapat nti ikorrkkor ana kwommat itti ngimpen akka uꞌrupa wothothïlettat woKapik waik wokkot ana lon len laik ïcari ana kwokat akwere itti kwathantakot.
10 Okin thoppathe noul iokat cik angwot cik akin akkakat nokathat kopaponte ipanekarot icarak coman coUruccelim. Kathat kanyanthet kin prek ana okin thoppatherit. Anakka okin thomakothe kathar papotte, uꞌrupa wothothïlettat woKapik woththekathe naak accokkot.
11 Ittina oPoththuruc inakat nan itti kwokat akwokorronno athantako akwiꞌrekat itti, “Inenni Kapik kothïnthin uꞌrupa wothothïlettat wung athoꞌrethin nti ilon loIruthuc ana nti ilon ila ul woIouth waik waꞌrikot itti lakkattat naun.”
12 Menik akka kwinat lon ilaik, kwoingkathe tuan toMeriom onnan poIuanna ipoccot kꞌran cakuruk itti oMarkkoc na ul woppot wokat awaꞌrntakothe ana wokat aꞌra ngaꞌrama.
13 APoththuruc okkwat kathat othakka itti akin anyinok, aukul iopari iorekot ioccot kꞌran itti oRotha oingkat athanyo.
14 Anakka woccïkothe poꞌre poPoththuruc, apirakat noka ana wollathe opakkot tit okorronno anyo athiꞌre itti, “OPoththuruc paik icürük.”
15 Okin thiꞌrekathe ukul iopari itti, “Ngkwonu purruri?” Anakka ukul iopari wꞌrat ere itti oPoththuruc, akin iꞌrekat itti, “Aththoka uꞌrupa wothothïlettat woKapik (okorronno oka oPoththuruc).”
16 Anaruk oPoththuruc poꞌrungkwathe nan akwokkwe kathat puccuk akin anyat anakka okin thimmarok okin thikkatheik akin oprttakattit.
17 APoththuruc onthanthekin ukun kapik itti okin thangkoik okorronnokkot poꞌre ana kwerekanthet kin tat akka Ili kelikkorok nti ikorrkkor ana kwiꞌrekathekin itti, “Niꞌret oIakup ana ul ioccokothe lon loIeccuo wꞌrek lon len,” ana kwoththekathe nakin akweo nokaꞌran kꞌrek.
18 Ana ngïꞌrïmak alon ommakekat ul irro aikkat cik aprttakot tit aere itti ngintha akka ainet oPoththuruc.
19 Ana oIruthuc pokwancathe oPoththuruc ana kwanniathok ana kwipittathe ul iokat cik angwot cik lon ilokat cik akwiꞌrekat lon lonthomat itti okin thangutta.
Thio thoIruthuc
Ittina aIruthuc urokat nnoththok poIouthia akwoingkat nokaꞌran koKaiccaria akwothikkat cik than papotte.
20 Ana kwikkatheik akwaꞌretto nul wonokaꞌran koCcur ana koCcithon. Ittina aul wonokaꞌran koCcur ana koCcithon ïꞌrïkat lon ithun ana okin thakkakathe akin oingkanthet Ili oIruthuc akin othopakket kuꞌri cik okin aththut. Ana akka oPilacoththoc ili wung ittarothok wanginthet ul lon lothopakkot ikuꞌri, okin thokat thonu itti okin thapakkot ikuꞌri akka okin thokat akin occere thuꞌrit nnoththok pung.
21 Ana nocaꞌri icakin thokat cik thatherene ili nan, Ili oIruthuc akat eret wung woili ana kwikkatheik noprrok pung akwerene ul appik.
22 Ul wokkwathe kuri itti, “Poꞌre empi pakannoka popul iponyi, poꞌre empi pokapik.”
23 Ncïnang auꞌrupa wothothïlettat woIli akkakat athikkiekat ili pongo anangak oꞌrakkathok icarak akwiat. Akka kwinnikothe itti kwrïk noKapik.
24 Anaruk ul wikkatheik arttakot nan ithoccokot lon loIeccuo ana lon loKapik appaththakat cik naꞌran appik.
25 Anakka oParnapa ana oCcaul thomarttot ngre ngen, okin thokkaprttakathe ntan nokaꞌran koUruccelim okin oIuanna ipoccot kꞌran itti oMarkkoc akwittarot kin.