14
OPoluc ana oParnapa thangkene nokaꞌran koIkkonia
1 Anakka oPoluc ana oParnapa thaat nokaꞌran koIkkonia, okin thoingkathe nocuththun caꞌrama ammakka oPoluc ana oParnapa okkettet. Okin thongkenekathe ul lon loKapik, ana ul woIouth ana iakonnoka woIouth woccokathe lon loKapik nomïkït.
2 Anaruk ul woIouth iꞌrat occokot lon loIeccuo wocikittanthet ul iakonnoka woIouth lon ima, akin ꞌra ul ioccokothe lon loIeccuo nomïkït.
3 Ittina oPoluc ana oParnapa thikkatheik maꞌri moppot akin ongkene ul lon loIli ella nꞌre, ana Kapik kekathekin puꞌran akin ikkat cik akin okkot lon ilommaththik ilokenet itti lon lothoporot thoKapik lokat ïcat.
4 Ana ul wonokaꞌran willillakatherit mungkut meꞌra aꞌrek wokat okin oul woIouth ana aꞌrek wokat okin oul wothothïlettat woIeccuo.
5 Ittina ul woIouth ana iakonnoka woIouth ana nili nen thiꞌrekathe itti okin thie oPoluc ana oParnapa ka kongo ana okin thokincathekin mmothok.
6 Anaruk oPoluc ana oParnapa thinakathe nolon len ana okin thollathe eo nokaꞌran koLicththra ana koTherpa ikokat noththok poLikkonia ana naꞌran iaik iccik ken.
7 Ana okin thoꞌrungkothe akin ongkene lon iloporot loIeccuo than.
Nokaꞌran koLicththra ana koTherpa
8 Ana nokaꞌran koLicththra, pul pꞌrek pappokat cik than pakimico nci ammakka pokwontat ana ponnonyaro aththik.
9 Ana pikkatheik apoccïkot akka oPoluc erene ul ana oPoluc pokathakathok ana kwimmakathe itti kwonu thoccokot lon loIeccuo nocïkït ana kwathakka poporot.
10 Akwiꞌrekathok mpoꞌre cittan itti, “Ocoꞌrothe kapik accokkot,” apul urokwat ana pikkatheik aponyaro.
11 Anakka cungkut coul cimmat lon ila oPoluc pokkothe, okin thokkwathe kuri ngkarru koul woLikkonia itti, “Kapik kungkwiet ka kung mpul iponyi ana kainet ton.”
12 Ana okin thocciekathe oParnapa kꞌran itti oCappic kꞌran kokapik ken. Ana oPoluc itti Armic akka kwokat pul ipothïllathe pokapik ken, ana akka kwokat akwere cannan napilingon.
13 Ana man mothaꞌrane oCappic ngaꞌrama mokat thapat nti icarak coman. Ana pul poman mothaꞌrane oCappic ngaꞌrama monnat nyura ana poꞌren akwonakat icürük coricarak coman akka ook ana ul wung thongothe itti okin thakinthet oPoluc ana oParanapa aꞌrupu wothokiot ngüccük cik.
14 Anakka ul wothothïlettat, oPoluc ana oParnapa thoccïkothe lon len okin thillillathe eret nnoka akka okin thoccïkothe aul ocungko Kapik nthokinthet kin aꞌrupu wothokiot ngüccük cik ithokat thannoka then anaruk thoKapik tulluk, akin ollat tocungkut akin aꞌretto itti,
15 “Ul ngintha akka annokkinthet ittina? Onïn ul ionyi ammakka onon, onïn thaik thonanet non lon iloporot loIeccuo, itti nthapaꞌrine lon cik illella lon cik, annopakkinthet Kapik ikaik ïcat ikokkothe tothiꞌrot ana capu ana tok inapangka ana okkot aꞌrupu appik tit.
16 Kokorronnot ul womaꞌrot appik akkot lon ilakin thongothe itti okin thakkot.
17 Anaruk kwokat akwokene itti kwaik nthoporot thung, nthapie kapik ana nthora cükkü ana ethet non thuꞌrit itharako ana kethet non thuꞌrit thoppot annoꞌrko ana kopiriet non noka.”
18 Mommakathe oceꞌre cungkut coul llon len itti wangwinekin aꞌrupu wothokiot ngüccük cik anaruk akka okin therenet kin ittaꞌrene akin antocoꞌro.
19 Ittina ul wꞌrek woIouth wakkakathe nokaꞌran kAnththakkia ana koIkkonia ana werekanthet cungkut coul acoprttakat iaPoluc ana okin thokincathok mmothok mono akin othathok thapat nokaꞌran koLicththra akin iꞌre itti kwiot pꞌrin.
20 Anaruk akka ul iammakot oIeccuo waꞌrntakathe iccik kung kurokathe ana kwopakkathe icarak coman. Ana ngorrot ngen, ook ana oParnapa thoingkathe nokaꞌran ikoccot kꞌran itti Therpa.
Thopakkot nokaꞌran kAnththakkia noththok poCcuria
21 Menik okin thongkenekathe lon iloporot loIeccuo nokaꞌran koTherpa ana ul woppot womakathe lon iloporot loIeccuo. Ana okin thopakkathe nokaꞌran koLicththra ana nokaꞌran koIkkonia ana kAnththakkia noththok poPiccithia,
22 akin opoꞌrie ul iammakothok than ana omareket kin akin oꞌrungkot ilon lothoccokot lon iloporot loIeccuo nomïkït, akin iꞌrekat kin itti, “Oron thonu itti thakkette ilon ilokithak aron tharthuk iꞌriko ingili ngoKapik ioporot.”
23 OPoluc ana oParnapa thokat akin onekket ul cik ittïttïk woul iakatha lon loul ioccokothe lon loIeccuo ana akin aꞌrane ngaꞌrama naꞌran ana ocoꞌro nti ithuꞌrit appik ana ethet kin ikkun woIli iakin thonekkethe cïkït nan.
24 Anakka oPoluc ana oParnapa theot nokaꞌran noththok poPiccithia akin akkakat noththok poMippilia.
25 Ana okin thongkenekathe lon loKapik nokaꞌran koPerca ana okin thoingkathe nokaꞌran kAththalia.
26 Ana nnan okin tharrathe tok irapangka akin eo nokaꞌran kAnththakkia ana na ul iammakot lon loKapik waꞌranet kin ngaꞌrama akka okin thocothothe ngre ngen nthoporot thoKapik.
27 Manakka okin theot, akin aꞌrntat ul ioccokothe lon loIeccuo tothun akin erekanthet kin lon ila Kapik kokkothe nti inyaun nyen ana tat akka kanyinet ul iakonnoka woIouth kathar kothoccokot lon loKapik.
28 Ana okin thikkatheik ceneket puccuk okin oul iammakot oIeccuo.