13
Opaꞌrinet lon lang cik ilokithak akka lakkwothung
1 Caꞌri cen ul wꞌrek wokat cik iꞌrethe oIeccuo lon loul wonoththok poCelïl ia ili oPilaththoc pongwot caꞌri icakin thokat akin ethet Kapik aꞌrupu wothokiot ngüccük cik noppan toKapik.
2 AIeccuo othïat tit itti, “Ntheret nomïkït mon itti ul enni wonoththok poCelïl wokat wolon ilokithak cannan noul wꞌrek appik woCelïl akka okin thokkiettathe thiak ngkathar ngngki?
3 Mpiꞌret non itti annoka menik, anaruk amma onon thannopaꞌrine lon cik ilokithak onon thille appik cakuruk.
4 Laka laraththa noul iokat willet iattul ana ikken mormor (18) ia kaman ikukwit kukwit kapothe nan korikꞌral koCiluam? Nthame itti okin thokat tholon ilokithak cannan noul iaik nokaꞌran koUruccelim appiki?
5 Mpiꞌret non itti annoka menik anaruk amma onon thannopaꞌrine lon cik ilokithak cik ana onon thille appik.”
Thokkwie lon kuru ncik lopira ipannokwono
6 OIeccuo piꞌrekathe ul lon elli okkwie kuru ncik, itti, “Pul pꞌrek pokat cik ponat pira popïcït ittak akwoingkat itti kwothiththo nyukul nyen anaruk kwakanniat nyukul.
7 Menik apul iꞌrekat pul ipakathanok lon lottak itti, ‘Luput lothakkat lꞌrapuruk anaukko cene itti mpiththo ïcït nopïcït anaruk anokorronno incet aththik. Okiotheik, ngintha akka apokittinthet karak cik?’
8 Apul ipakatha lon lottak iꞌrekathok itti, ‘Opït pin, antokorronno thuput thulukku anorane cik anipot pocok tit.
9 Amma pokwonot nyukul thuput ithanthan laka loporot. Ana amma pannokwono antokiot cik.’ ”
Pul ipopari ipakimico pittiettat nocaꞌri caCcepith
10 Ana nocaꞌri caCcepith aIeccuo pappokat cik akwongkene ul lon nocuththun caꞌrama.
11 Ana pul pꞌrek ipopari pokat cik cïnang ipa uꞌrupa iokithak wothikkiet kimico ana ponu luput attul ana ikken mormor (18) pappuꞌrumakot cik ana pommat ocoꞌrot tit kirrkkir.
12 Anakka oIeccuo pimmarok akwakkarathok tokït koul akwomekathok itti, “Pul ipopari, ngko ngkwothikkiettat poporot nomio mang.”
13 Ittina akwonekkekat nyaun naak apul ocoꞌrat tit accokkot akwopirakanthet Kapik noka.
14 Apul iprïk ponocuththun caꞌrama uakat ka akka oIeccuo pittiethe pul ipopari nocaꞌri caCcepith apiꞌrekat ul itti, “Maꞌri maik mꞌrakkuruk mongre nanthan annittiettat nan annoka nocaꞌri caCcepith.”
15 AIli iꞌrekathok itti, “Onon ithinnikot lon, opilin nti ianon pannokꞌro ngura ngung ana ngeꞌringka nothoꞌrak nocaꞌri caCcepith akwothïkkïe ngꞌrii?
16 Pul ipopari empi pothiki thAprein ipa pul pothopulut pïꞌrïkïkkot thupuththuput luput attul ana ikken mormor lakannoka loporot itti kwelikkako nti iloꞌrak nocaꞌri caCcepethi?”
17 Anakka kwiꞌret lon elli, aul appik iꞌrat lon lung othiakat cik anaruk ul wopirakathe noka appik nolon ilopreththere ila kwokat akwokkot.
Thokkwie lon kuru ncik thocore icoththeik
(Maththa 13.31–32; Markkoc 4.30–32)
18 Ittina aIeccuo iꞌrekat itti, “Ngili ngoKapik ngungkot ngintha ana ngintha akka anungkie ngngin?
19 Ngili ngoKapik ngungkot core icoththe cannan iceera nocapu. Pacokka apothakkakat pira ana uꞌrupe wuno nune nouꞌri wen.”
Thokkwie lon kuru ncik thomüꞌrükül
(Maththa 13.33)
20 AIeccuo appipittat lon itti, “Ngintha akkungkot ngili ngoKapik?
21 Ngili ngoKapik ngikkoik ere müꞌrükül ima pul ipopari pocikittot mmꞌre moppot mono amꞌre inyakat ncik appik.”
Cürük icomü
(Maththa 7.13–14, 21–23)
22 Ittina aIeccuo oingkat okko ikarkoman ana naꞌran akwongkene akka kwokat cik akweo nokaꞌran koUruccelim.
23 Apul pꞌrek ipittathok itti, “Ili, ul wathoꞌrettat wotteik tulluki?”
AIeccuo othïanthet kin tit itti,
24 “Noꞌrumoik annina akka anniꞌriko nti icürük cokathat icomü akka mpiꞌret non itti, ul woppot wenekke itti wiꞌriko anaruk okin thakinniꞌriko.
25 Amma pul pokaman purokot mono unukkwot kathat ana nthacoꞌro thapat annakkakkaro ana annuet cik itti, ‘Paththi, anyinet nïn kathat.’
Anaruk kwathïot tit itti, ‘Mpommanon, ana manna itti onon thaat ngkartha.’
26 Ana onon thiꞌre itti, ‘Oron thoꞌrkot cik tothun ana ngkwongkenet iathar nakaman kïn kaik.’
27 Ana kwathïot tit itti, ‘Mpommanon, ana manna itti onon thaat ngkartha. Nopaꞌroik ntokït kin, onon ul appik iakkot lon ilokithak.’
28 Caꞌri cen onon thoo ana okꞌrellot kïnyït thocipit amma onon thimat Aprein ana oIccaak ana oIakup ana ul appik wothernte lon loKapik ingili ngorothiꞌrot anon ngka kon thorrettathe thapat.
29 Ul wanthan na acïngkï ummot ngngin ana na acorungkwot ana nthokkun wothokure amma akatha na acïngkï ummot ngngin ana thokkun wothothari amma akatha na acïngkï ummot ngngin ana wathikkoik nokamuthe ingili ngoKapik.
30 Okkwion ithaik tokït inenni thathoka thoceken ana okkwion ithaik thoceken inenni thathoka tokït.”
OIeccuo ana oIruthuc
31 Caꞌri cen aul wꞌrek woPriccin akkakanthet oIeccuo aiꞌrekathok itti, “Opaꞌrik ncene aeo imakkren oIruthuc pongothe itti kwakkwothung.”
32 AIeccuo othïanthok tit itti, “Ngkonon aniꞌret pul emprïk ipokithak itti mpakïcce uꞌrupa iokithak ana ittiet ul iongo inenni ana ngorrot ana nomaꞌri imꞌrapuruk mpamartto lon lin.
33 Anaruk mpaik nokathar inenni ana ngorrot ana nomaꞌri imomakothe mpiꞌret non ïcarïcat itti, pul pella pothernte lon loKapik piot nokaꞌran koka nokaꞌran koUruccelim.”
OIeccuo pongothe kaꞌran koUruccelim
(Maththa 23.37–39)
34 “Uruccelim, Uruccelim, oung ipangwo ul wothernte lon loKapik ana okincot ul cik iothïlanthet non antokatha maꞌri mornoththa ima mpenekket itti mpaꞌrntot non tothun ammakka thakuꞌruk aꞌrntot opeon iuꞌruccu ana onon thꞌrat.
35 Nokatha kaman kon kei koththettanet non nan thellek. Mpiꞌret non ïcat itti onon thakinnimman attang puccuk acaꞌri akkakat ica anniꞌret itti, ‘Athethïe oka nopul ipaat ngkꞌran koIli.’”