6
Thipitto lon locaꞌri caCcepith
(Maththa 12.1–8; Markkoc 2.23–28)
1 Nocaꞌri cꞌrek cokat cik caCcepith aIeccuo pokkot ikkwon imïl ana ul iammakothok wikkatheik auot mïl ana ocottot akin oꞌrko.
2 Aul wꞌrek woPriccin ipittat itti, “Onon thontha akka annokkot lon ilonu itti lakannokkattat nocaꞌri caCcepith?”
3 OIeccuo popakkenthet kin tit itti, “Onon thakannakkakkaro lon nti iatham ila aThauth pappokkothe akka okin thokat thiamat nul wungi?
4 Kwiꞌrikot noppan toKapik akwummat arrakith iothun iettathe Kapik iokat itti ul wulluk wonoppan toKapik akkaꞌrko akwoꞌrkkat ana kwekathe ul wung cakuruk ana woꞌrkkathe.”
5 Menik aIeccuo iꞌrekat kin itti, “Ukul wopul iponyi akka Ili wocaꞌri caCcepith.”
Pul ipaiꞌrilla ukun
(Maththa 12.9–14; Markkoc 3.1–6)
6 Ana nocaꞌri cꞌrek caCcepith akwoingkat nocuththun caꞌrama ana kwokat cik akwongkene ana pul pokat cik than ponat ukun wothothari waiꞌrilla.
7 Ul woPriccin ana ul iangkene lon lothonceꞌret lon cik wokat cik akwancot lon ilakin orukwet oIeccuo ngngin, menik akin ikkat cik akin okathaccek kicce amma akwittiet pul nocaꞌri caCcepith.
8 Anaruk oIeccuo pinat lon len ilakin thonat nomïkït men ana kwiꞌrekathe pul iponat ukun waiꞌrilla itti, “Urokothe kapik tokït koul.” Ana kurokathe kapik akwocoꞌrat.
9 Ittina aIeccuo iꞌrekat kin itti, “Mpipittot non lon, liatha akkocoꞌrotheik itti lakkattat nocaꞌri caCcepith, itti okkot iloporori? Ana amma okorronno okkot iloporot ana ilokithaki? Okkie pul ciki ana amma okorronno okkie cik okkwori?”
10 AIeccuo okathakat kin appik akwiꞌrekat pul itti, “Othie ukun ntit.” Apul okkat menik aukun othakkakat woporot kirrkkir.
11 Anaruk okin thaththuaka ana okin thikkatheik akin erettarane itti okin thakkot ngimpen naIeccuo.
OIeccuo pakkarot ul wothothïlettat attul ana ikken keꞌra
(Maththa 10.1–4; Markkoc 3.13–19)
12 Caꞌri cen oIeccuo pokuꞌrathe tocoꞌrong akwothaꞌra ngaꞌrama ana kwaꞌrakathe ngaꞌrama nokkꞌrokkꞌra.
13 Akka ngorrot ngothakkat, akwakkarat ul iammakothok ana kwipathe ul cik iattul ana ikken keꞌra, okin then itha kwothikkiet ul wothothïlettat
14 ana ꞌran wen itti, oCcamaan (iponat kꞌran itti oPoththuruc) ana opang Anthrauc, ana oIakup ana oIuanna, ana oPilippic ana oPerththolomauc
15 ana oMaththa ana oThthoma ana oIakup ukul wAlappaoc, ana oCcamaan ipokat pongothe lon loththok pung,
16 ana oIoutha ukul woIakup, ana oIoutha Icikkariuththi ipokerathe oIeccuo nili.
OIeccuo pangkene ana ittiet
(Maththa 4.23–25)
17 Kuathe ntan nnocoꞌrong akin oul wung iammakothok akin ocoꞌrat nothampang. Ul iammakothok wokat cik woppot ana ul cakuruk woppot iaat nnoththok poIouthia ana nokaꞌran koUruccelim ana naꞌran iaik iccik korok irapangka toCcur ana toCcithon,
18 okin ithaat itti okin thathoccïkot lon lung ana ittiettat nomio men. Okkwion itha uꞌrupa iokithak wokkiethe thiak appik thittakathe.
19 Ana ul appik wannekkekathe itti wathntok akka puꞌran pokat cik apanthan nti iaak apittiet kin appik.
Thopira noka ana thokithak ka
(Maththa 5.1–12)
20 Akwokathakat ul iammakothok akwiꞌrekat itti,
“Thethïetta thaka thon onon ithella aꞌrupu cik akka ngili ngoKapik ngaka ngon.
21 Thethïetta thaka thon onon ithiamat inenni
akka onon thaththakat.
Thethïetta thaka thon onon ithaik thoo inenni,
akka onon thathocciro.
22 Thethïetta thaka thon amma ul wꞌrat non
ana ꞌra non nti iccik ken ana ocungko non
ana ꞌra ꞌran won nti ilon lokkul wopul iponyi.
23 Nopira noka caꞌri cen ana iththrako akka thocco thon tholon iloporot thaka thrïk tothiꞌrot. Akka kathar ken ika aththangon thokkinthet ul wothernte lon loKapik lon ngngin.
24 Anaruk angkre, ul ithathaꞌrathn
akka onon thoccot lon lon pꞌrïn.
25 Angkre, nanon ithoththakathe inenni,
akka onon thathiama.
Angkre, nanon onon ithaik thacciro inenni,
akka onon thathoccokot thiak ana oo.
26 Angkre, nanon amma ul omereket non,
akka oththangon thokat akin omereket ul wothernte lon loKapik ngkarra.”
Ongathe ul iꞌrarung
(Maththa 5.38–48; 7.12)
27 “Anaruk mpiꞌret non okkwion ithaccïkothin, nongat ul iꞌrat non, nokkinthet ul iꞌrat non lon loporot.
28 Nipittot Kapik akethïe ul iattatta non, naꞌrane ul ngꞌrama iakkinthet non lon ilokithak.
29 Amma pul pꞌrek pokkworung thounu, appoprttinok thounu thꞌrek ana amma opilin ponekothung kret ikiththia ikakuꞌrupakot, korronnok akwoneko kret konoka cakuruk.
30 Ethet okkwi ipipittothung aꞌrupu ia kwongothe ana amma opilin ponekothung papꞌrek pang akorronno okkaprttothok.
31 Nokkinthet ul lon ammakka onon thongothe itti wakkinthet non.
32 Amma ngkwongothe ul iongothung, thocco tholon iloporot thang thaka thiatha ithakanung cik? Akka manna ul ionu lon ilokithak wangat ul iongothekin.
33 Ana amma ngkwokkinthet ul lon loporot iakkinthung lon iloporot lang liatha ilathokanung cik? Akka manna ul ionu lon ilokithak waik wakkot menik cakuruk.
34 Ana amma ngkwethet pul pꞌrek aꞌrupu wokamucu mono aꞌrikothok itti kwakkenung kamucu kang kiatha ikakanung cik naak? Akka manna ul ionu lon ilokithak wakkene ul aꞌrupu akin oꞌrïkat cik itti okin thakketta appik.
35 Anaruk ongathe ul iꞌrarung ana okkinthet kin lon loporot, ethet kin aꞌrupu akorronno oꞌrïkot cik itti okin thakkarttinung, ittina thocco tholon iloporot thon thaka thrïk ana onon thaka nyukul nyoKapik ikaik cittothiꞌrot akka kwoporot lon noul iakannopiranok noka ana iokithak.
36 Ona thiak ammakka Kapik oththe pon ponu thiak.”
Thakkma opilingon
(Maththa 7.1–5)
37 “Amma ngkwakorronno ethet ul wꞌrek lon moloko ana ngkwakorronno ethettat lon moloko. Amma ngkwannakkma ul wꞌrek ana ngkwannakkmako. Noccïkïnthet ul lon ilokithak alon lon occïkakot.
38 Amma onon thethet ul aꞌrupu ana onon thethettat cakuruk. Akka amma ngkwethet aꞌrupu nuthuk ana ngkwiot woppot ntit cakuruk.”
39 AIeccuo iꞌrekat lon elli okkwienekin kuru ncik itti, “Pul ipiꞌrimathe pathutho pul ipiꞌrimathei? Okin thakannapot ippu aththuththeꞌrai?
40 Akka pul ipangkenetta pakannoka prïk nakkwi ipangkenek. Anaruk okkwi ipongkenettat kicce paka ammakka pul ipongkenerok.
41 Ngkwontha akka accot kït nokwira ikaik icït copangkang akorronno occot kït nokwoꞌren ikaik icït cang?
42 Taththa akka amet opangkang itti, ‘Pangkin, kirrnni anumminung kwira nti icït cang,’ angkwakinnimma kwoꞌren icït cang? Oung ipongothe itti ngkwinnikot lon, ummi kwoꞌren nti icït cang cittokït aimmaik kicce antummine opangkang kwira nti icït cung.”
Pira ana nyukul nyen
(Maththa 7.17–20; 12.34–35)
43 “Pira pella ipoporot pakwono nyukul nyokithak ana pira pella ipokithak pakwono nyukul nyoporot.
44 Kira kurekkurek kinako nyukul nyen inyakokwono. Ul wakinniththo ïce nopira polï ana moꞌriompong nopira pakek.
45 Pul ipoporot pere lon iloporot nolon iloporot ilaik nocïkït cung, pul ipokithak pere lon ilokithak nolon ilokithak ilaik nocïkït cung. Akka thon there lon iloppathe nocïkït.”
Pul ipuno ipinaik nti ica ana ipommaik
(Maththa 7.24–27)
46 “Nthontha akka annakkaron itti, ‘Ili, Ili,’ anon okorronno okkot ila aniꞌret non?
47 Okkwi ipainin mono occïkot lon lin ana akworeko ngngin, mpakenenon itti lon len laka tat.
48 Kwaka ere pul ipokat cik apuno man ana pipanthet millang cik nocik icoporot. Akka ngike ngaat ana ngokkwathe man ngka anaruk ngannoꞌrïntïttat akka mokat muntat papenang.
49 Anaruk okkwi ipaccïkot lon lin ana akwokorronno oreko ngngin, kwikkoik ere pul ipunot man mung nothampang nuthuk okorronno ipinthet millang cik nouttu, ana akka ngike ngaat angokkwat man ngka amapat thapo thokïtheththak.”