Atham woThitto thoIeccuo
Atham woThitto lon loIeccuo ammakka oIuanna pokurrot
Lon lonothon
Atham enni wapul pothothïlettat poIeccuo oIuanna akkokurrot othakka itti aul ioccokothe lon loIeccuo naꞌran ia kwonat ikkun ieꞌreꞌrapuruk iot lon nnan loporot. Kwokurrot aꞌramacak kurekkurek iaine ul ioccokkot lon loIeccuo. Kwaꞌrettot nakin iaꞌramacak wen itti okin thapaꞌrine lon ilokithak cik len ana ittarot kin akin oꞌrungkot ilon loKapik, antoka manna itti okin thaik thakkiettat thiak (Kuꞌrathal 2-3). Atham appik ncik wonu lon loIuanna ila Kapik kerenthok ithathantako lopuꞌran poKapik ana thrïk itha kwimmat. Ithathantako enthi appik, Kapik kittinok itti kokat kua ka tat nolon ilokithak ilaik nocapu ncik appik ana tat akka oMiccie athalkot lon ilokithak akwakkmakat ul appik iꞌrat lon lung. Ana Kapik kapaꞌre capu enci cik ana kakkot capu icie na ul ionekkethe cïkït naak ana ook ikkoik tothun thupuththuput.
Lon ilaik iatham
1. Lon lonothon (1.1–8)
2. Lon lonothon ilerettanok ana naꞌramacak inothïlanthet ul ioccokothe lon loIeccuo (1.9—3.22)
4. Atham ioꞌremethettat ionemittathe ngngaꞌra ieꞌreꞌrapuruk (4.1—8.1)
4. Lïpïl ileꞌreꞌrapuruk (8.2—11.19)
5. Papu ipokithak ipungkot pre ana aꞌrupu worikira weꞌra (12.1—13.18)
6. Lon ilerettanet oIuanna inthe ilaik kurekkurek (14.1—15.8)
7. Maththak imeꞌreꞌrapuruk mothua ka thoKapik (16.1–21)
8. Thokïttako thoPapilon ana thalkot papu ipokithak ipungkot pre ana ul wokarra wothernte lon loKapik ana pul pothopulut (17.1—20.10)
9. Thakkma ithacothot (20.11–15)
10. Tothiꞌrot irie ana capu icie ana Uruccelim iie (21.1—22.5)
1
OIuanna peret atham enni
1 Thitto lon ncik thoIeccuo itha Kapik kokenerok nan itti akwittine ul ncik ioccokothe lon loKapik lon ilaik lathokaik nomaꞌri motte imanthan. Kwokenet lon len nthothïnthet pul ipaik parekinok oIuanna uꞌrupa wothothïlettat woKapik wung
2 ana oIuanna perekathe lon appik ila kwimmat nolon ila Kapik kothïothe ana nolon ila oIeccuo oMicce piꞌret ana okkot.
3 Okkwi ipakkakkaro lon elli ilerettat mpul ipernte lon loKapik kwethïetta, ana okkwion ithoccïkothe mono onekket nocïkït ilokurrakot nthethïetta, akka caꞌri cakko napuththut.
Thomicco
4 Elli laat naIuanna ana laine ul ioccokothe lon loIeccuo naꞌran ieꞌreꞌrapuruk noththok pAccia. Lon len liꞌret itti thoporot ana thomicco thaik thainenon noKapik iakaik ana ikokat cik ana ikaik kao, ana nokanang ikeꞌreꞌrapuruk tokït koprrok pung poili,
5 ana naIeccuo oMiccie ook iperet lon ila kwimmat okorronno ocukko nalꞌrek, ana ook ponothon ipurokot nti ithio ana Ili wonili nonocapu.
Lon elli laine okkwi ipongotheron ana okkwi ipelikkot ton nti ilon ilokithak lonnon ngngüccük ngung.
6 Kwothikkiet ton thongili ngung ana ul wonoppan toKapik arekine Kapik kung ana oththan ipa thrïk oine ana puꞌran thupuththuput. Amin.
7 Nantokatha, kwei panthan nnuththe,
ana kït appik kimmak, ana manna ul ierok ngkathuk
ana ul wonocapu appik woo ana ipo thiak. Amin.
8 Ili Kapik wiꞌret itti, “Oun Alppa ana Omeka, okkwi ipaik, ana ipokat cik ana okkwi ipaik panthan, ook ipakannalkakot.”
Opilin pungkwot ukul wopul iponyi
9 Oun oIuanna opang pon ana oron thulukku ithoccokot thiak ana ingili ana ithoccokot cïkït thonnon ilon loIeccuo, mpokat nocarkan corirok irapangka nokaꞌran koPaththamoc nti ilon loKapik ana ilimmakot ngkït loIeccuo.
10 Nocaꞌri cothaꞌrane Ili ngaꞌrama ana Kanang koKapik kokat naun anoccïkat poꞌre cittan ere pothïpïl thoccul kin,
11 apoꞌre pen iꞌrekat itti, “Okurrothe iatham lon ila ngkwaik pakathacce athïnthet mungkut imeꞌreꞌrapuruk moul ioccokothe lon loIeccuo. Othïnthet kin nokaꞌran kApuccuc ana nokaꞌran koCcimirna ana nokaꞌran koPerkkamuc ana nokaꞌran koThiaththira ana nokaꞌran koCcarthic ana nokaꞌran koPilathelppia ana nokaꞌran koLathukkia.”
12 Anoprttakat itti anokatha poꞌre ipokat cik aperenin. Manakka mpoprttakot cik, animmakat oꞌren na amuꞌru imonu ngaak iacco amikkoik meꞌreꞌrapuruk imokkattathe nothaap,
13 ana ithoꞌrkït thoꞌren ieꞌreꞌrapuruk na amuꞌru imonu ngaak iacco ikkoik pul pꞌrek pokat cik “Pungkot ukul wopul iponyi” kwokat pakot kret kukwit koꞌrumothe tacok ana kuꞌrat kokkattathe nothaap topere.
14 Ca cung cokat cipuk ippuk ere paꞌra ana kït kung kokat ere luꞌre lolik.
15 Tacok tung tokat arollio ere paponte ipoiththa ana poꞌre pung pokat ere poꞌre pongike.
16 Kwonat mothot meꞌreꞌrapuruk thokkun wothothari ana kiꞌrittang ikukwit koppot nti ithon thung korrerriettathe. Toca tung tokat arollio ere kꞌran kocïngkï amma cella nuththe nan.
17 Manakka mpimmarok anapat iracok tung ere mpiot. Akwonekkekat ukun wung wothothari naun akwiꞌrekat itti, “Kirrnni ipo nꞌre. Oun poNothon ana Ipacothot.
18 Oun Ipaik thupuththuput, mpokat piot anaruk inenni mpaik thupuththuput ana oun akkonu puꞌran ikkun pothio ana pothothïrïn.
19 Okurri lon ila ngkwimmat ana ila ngkwaik pakathacce ana ilathokaik nomaꞌri imanthan.
20 Kumitta ikorukot ncik kolon lomothot imeꞌreꞌrapuruk ima ngkwimmathe thokkun win wothothari ana loꞌren na amuꞌru imonu ngaak iacco ikkoik iokkattathe nothaap ieꞌreꞌrapuruk laik itti, mothot imeꞌreꞌrapuruk mauꞌrupa wothothïlettat woKapik womungkut moul ioccokothe lon loIeccuo. Oꞌren ianekkettat ngaak nan iacco mmuꞌru ngonu itti mungkut moul iocckothe lon loIeccuo ieꞌreꞌrapuruk.”