13
1 Ana papu ipokithak ipungkot pre pocoꞌrathe nocarkan corok irapangka.
Papu poripira paat nti irok irapangka
Ana mpimmakathe papu poripira apanthan nti irok irapangka. Ponat ma meꞌreꞌrapuruk ana lipil attul, ana mupul monili attul nolipil. Ana noma men mokurrakot ꞌran nan wathocungko Kapik.
2 Papu poripira ipa mpimmat pungkot papokira, anaruk ponat tacok tungkot tongun ana thon thungkot thothepa. Ana papu ipokithak ipungkot pre pekathe papokira puꞌran ana prrok poili ana ngili irïk.
3 Mpimmakathe itti ca cꞌrek copapu poripira nti ipangken conat kïnyï kïttïk ana kokat kittathe. Ana capu ncik appik coprttakatherit comakathe lon lopapu poripira.
4 Ul appik wꞌrakanthet papu ipokithak ipungkot pre ngaꞌrama akka pethet papu poripira puꞌran ana nthaꞌrakanthet papu poripira ngaꞌrama cakuruk. Okin thipittathe itti, “Oththa akkammakka papu poripira ana okkwen akkrro iaak?”
5 Papu poripira pokat pettathe thon itti pere lon lothipot ka thoura ana ocungko Kapik. Ana pettathe puꞌran itti pakkot ila pongothe anok arrial weꞌra ana ikken keꞌra (42).
6 Panyothe thon cik apikkat cik apocungko Kapik ana kꞌran koKapik ana kaꞌran na Kapik kaik ana ul iaik tothiꞌrot.
7 Pokat pettathe puꞌran itti prro iul iupupure woKapik apalkot kin. Ana pettathe ngili itti pakkma ul mothok mothok ngkarru ken kurekkurek ana ul appik ana karru appik ana ul wonomothok appik.
8 Ana ul wonocapu nci appik waꞌrane papu poripira ngaꞌrama. Okin itha ꞌran wen wakannokurrakot iatham wothikkoik thothungkat ithokkuttathe acapu ncik appik carthuk okuꞌretta ncik.
9 Okkwi iponu kunu akwaccïkot.
10 “Amma oplin ponu itti kwaeo ikorrkkor,
kwonu itti kwaeo ikorrkkor.
Amma oplin ponu itti kwio ngkꞌrittang ikukwit,
kwonu itti kwio ngkꞌrittang ikukwit.”
Elli lakeneron itti ul woKapik iupupure wonu itti waꞌrungkot ilon nthoccokot cïkït ana oꞌrungkot nothoꞌrumo nolon.
Papu poripira poppot nocapu
11 Animmakat papu poripira pꞌrek apuroko nocapu, ponat lipil leꞌra ammakka lothungkat anaruk peret ere papu ipokithak ipungkot pre.
12 Papu poripira pꞌrek pokkothe ngre appik mpuꞌran papu poripira porokït. Ana piꞌrekathe ul appik ana capu itti waꞌrane papu poripira ngaꞌrama porokït ipa kïnyï ikokithak kittanthet.
13 Pokkot lon ilommaththik ana manna kue thik nti ithiꞌrot atheo nocapu tokït koul appik.
14 Ana nti ilon ilommaththik len, kwettakathe puꞌran akwokkot ngre ngkꞌran kopapu poripira porokït, kwammikkothe ul wonocapu appik. Kwiꞌrekathe ul lon lonthomat itti okin thakkot purrut popapu poripira ipokat peettat ngkꞌrittang ikukwit apokorronno iat akin othiane cik.
15 Papu poripira pꞌrek pokat pettathe puꞌran itti pakwot kanang ipurrut popapu poripira ipokkattathe apere ana ongwo ul appik iꞌrat aꞌrane purrut pen ngaꞌrama.
16 Kwokkiethe ul lon mpuꞌran appik, iprïk ana ipotte, ipapaꞌrthan ana ipakannoka papaꞌrthan, ana ipa piak ana ipakannoka papiak, akin onekkettanthet urret nonyaun nyothothari ana manna nomuthu.
17 Othakka itti apul ella ipakero papu pꞌrek amma pella kurret ika kꞌran kopapu poripira porokït ana manna maun mokꞌran kopapu poripira.
18 Oron thonu itti oron thana thinaik nti ica cene. Apilin ipinaik nti ica ongante maun mopapu poripira, akka maun men mopul iponyi imamaun itti, 666.