18
Thokïttako thoPapil
1 Anakka elli locothakothe, mpimmakathe uꞌrupa wothothïlettat woKapik wꞌrek auo ntan ntothiꞌrot. Wonat puꞌran ikkun pïttïk ana capu cupukakathe nthrïk thung.
2 Uꞌrupa wothothïlettat wiꞌrekathe mpoꞌre cittan itti,
“Pothok Papil papot, papot, pothok poPapil ipokat prïk papot,
pothakkat kaman kouꞌrupa iokithak,
ana korrkkor kouꞌrupa iokithak
ana korrkkor kouꞌrupe iokithak iiꞌrakot
ana aꞌrupu iiꞌrakot.
3 Akka ul wonocapu ncik appik wïkkot ngapak iopun ngopul iponu namat.
Nili nonocapu naꞌrorok ngngin,
ana ul iakettet ul wonocapu aꞌrupu wothakkat aꞌrthan naꞌrupu wothaꞌrthan thung.”
4 Ana mpapproccïkat poꞌre pꞌrek ntothiꞌrot apiꞌre itti,
“Ul win, nopaꞌrinok cik
othakka itti annokorronno oka ilon lung ilokithak,
othakka itti alon lothoꞌrarot cik ilaik lainok alokorronno ainenon.
5 Akka lon lung ilokithak laꞌrntakothe cik tothiꞌrot,
ana Kapik kokwarikothe ngre ngung iokithak.
6 Nokkinthok ammakka kwokkinthet opilingon,
nopakkenthok lon tit maꞌri meꞌra ilokithak ila kwokkothe.
Noppenthok cakkolok cung coungkak ngngapak maꞌri meꞌra.
7 Nokkiethok thiak ana ipiek thiak noka
ammakka thaꞌrthan thung itha kwomonanet ka kung.
Kwipot ka thoura noucce wung akwiꞌre itti,
‘Mpaik pikkoik noprrok karkko ili iopari mpakannoka pacuruma
ana mpakannoka ithmeru.’
8 Ittina thoꞌrarot cik tholon ammakka thio ana tï ana ithmeru
thainok nocaꞌri culukku.
Kwakꞌretta nthik,
akka Ili Kapik konthomat oththa akkakkmak.
9 Amma nili inaꞌrorok ngngin ana ikkoik thikkoik thoul iaaꞌrthan okin aththut nimmarok akka akwokꞌro ngkucuk, nipo thiak thung ana oothok.
10 Okin thacoꞌro ciththan nꞌre nothoccokot thiak thung akin oo itti,
‘Ngaia ooi, ngaia ooi, pothok poPapil ipakannalkakot,
lon lothoꞌrarot cik loꞌrothok cik accokkot.’
11 Ul iakette aꞌrupu woothok ana occokot thiak akka pul pella pakerot kin aꞌrupu pꞌrin
12 aꞌrupu ammakka thaap ana mallong ana mothok imallio imonu cekerek crïk ana muccu morirok imallio, ana eret iothukkwakot ana eret iinyan ana eret ionu cekerek coppot, ana aꞌrupu ammakka oꞌren ia ul wongothe ionu cekerek coppot ana aꞌrupu appik ionu cekerek coppot iokkattathe nokïnyït koumathon ana noꞌren ana nomallong imoiththa ana naꞌroponte,
13 ana cakuruk aꞌrupu ammakka kira ikonu utha wakkunako ere amutha ana aꞌrupu iakkattat ngucul ammakka itti nyiritheni, ana ngapak ana ngaak, mꞌre ana mïl, kie ana lungkat, mapprththa ana aꞌrupu iathuthako mmapprththa, ul ionyi iaketta.
14 Ul iaaꞌrthan wiꞌre itti, ‘Aꞌrupu ia ngkwokat pongothe weot ncik pꞌrin. Aꞌrupu wothaꞌrthan thang ana thikkoik thang ithoporot thintatheik ana wakorronno appopakkot cik attang.’
15 Ul iathaꞌrthan iothakkat aꞌrthan iokat akette aꞌrupu ana iokat aiot thaꞌrthan naak wacoꞌro ciththan nꞌre nothoccokot thiak thung, akin oo ana ipo thiak
16 ana okin thoo itti,
‘Ngaia ooi, ngaia ooi, pothok iprïk,
pakot kret konu cekerek crïk ana kothlo ere maa ana koꞌre,
ana kokat akollio nthaap ana mothok imonu cekerek crïk ana muccu moriꞌri imallio.
17 Thaꞌrthan enthi ithrïk thokïttakathe accokkot.’
Ul ionu lon ikkun louppuꞌrung wonoiꞌri ana ul iarrothe iuppuꞌrung wonoiꞌri iaeo nciththan ana ul iallillie uppuꞌrung wonoiꞌri ana ul iamona nti irok irapangka wacoꞌro ciththan.
18 Amma okin thimmat kucuk kothik ithaik thakꞌrekok akokuꞌrot ithiꞌrot ana okin thiꞌre itti, ‘Pothok pꞌrek pokat cik prïk ammakka empi?’
19 Ana okin thapporet nunthu ima ana oo ana occokot thiak akin oo itti,
‘Ngaia ooi, ngaia ooi, pothok iprïk,
okkwion ithonat uppuꞌrung wonoiꞌri irok irapangka
thothakkat aꞌrthan nti ithaꞌrthan thung,
kwintakatheik accokkot.
20 Onon ithaik tothiꞌrot, nopira noka,
Ul woKapik ana ul wothothïlettat woIeccuo ana ul wothernte lon loKapik
wonu itti wapira noka.
Akka Kapik kakkmat Papil nti ilon ila pokkinthet non.’ ”
21 Ittina uꞌrupa wothothïlettat woKapik wonekathe pothok pikkoik ere cna arrekat irok irapangka aiꞌrekat itti,
“Mpuꞌran ittina
pothok poPapil iprïk pikko parrettat nocapu
ana pakannappincat attang.
22 Ngeme ngoperenmperen ana ul iee ereneren ana ul iee uꞌrumpillang ana lïpïl
ngakannappoccïkakot iaung attang.
Pul pella ipakette aꞌrupu.
Poꞌre pocna pakannappoccïkakot iaung attang.
23 Kꞌran kothik kakorronno appocco iaung attang.
Poꞌre popul ipocura ipipo ana popul ipopari ipitta pakannappoccïkakot iaung attang.
Ul iaaꞌrthan wang wokat wittïttïk nocapu ncik appik
ana nthurukut thang ngkwammikkothe ul appik ana wurttakatheik.
24 Nguccuk ngoul wothernte lon loKapik ana ngoul iupupure woKapik,
ana ngoul ionguttathe noththok ncik appik ngincathe iaak.”