20
Luput kathar
1 Ana mpimmakathe uꞌrupa wothothïlettat woKapik aanthan ntothiꞌrot ionu lon ikkun lorippu thothïrïn ana ngngol ikkun ngonthomat ngïttïk.
2 Auꞌrupa wothothïlettat occokat papu ipokithak ipungkot pre ipa pinyil ipïpe ana kwoccot kꞌran cakuruk itti okkwi ipammikkot ul ana pul pothopulut. Ana aꞌrupa wothothïlettat wïꞌrïkïkkathe pul pothopulut luput kathar.
3 Auꞌrupa wothothïlettat orrekathok ciki ippu thothïrïn akwullukkathok kicce itti akworronno appammikkot ul wonomothok appik pꞌrin aluput kathar omarttakat. Ana amma luput lomarttakot, kwamelikkako maꞌri mantaka.
4 Ana mpimmakathe orrok ana ul iikkot cik nan wettathe lon ikkun itti okin thakkma. Ana mpimmakathe utha wokkwion ithokeccettathe ma cik akka okin thimmat ana ere lon loIeccuo, ana akka okin thokat akin erentene ul lon loKapik. Okin thokat thakorronno aꞌrane papu poripira ngaꞌrama ana purrut pen ana okurrakinthet urret wung nomuthu ana nonyaun. Okin thokat thillet ana nthokkot cik ana okin thakkmakathe okin oMiccie luput kathar.
5 (Opilingon thꞌrek ithillet thakannuroko nti ithio mono aluput kathar omarttakat.) Thuroko enthi nti ithio thonomun.
6 Okkwion ithokat ithuroko thonomun thethïettat. Akka thio itheꞌra thella puꞌran nakin, anaruk okin thathakka ul wononupan toKapik ana woMiccie ana okin thakkma okin aththut luput kathar.
Thakkmako thopul pothopulut
7 Ana amma luput kathar lomttathe, pul pothopulut pamelikkako nti ikorrkkor,
8 kwaeo akwothammikkot ul wonocapu ncik appik oKok ana oMakok, ana kwaꞌrntot kin tothun akin othorro. Okin thaka thoppot ere thamur thorirok irapangka.
9 Aul irro wopul pothopulut oingkat cungkut naꞌran appik nocapu akin okkwekat ul woKapik ithoꞌrkït ana kaꞌran koUruccelim ika Kapik kongothe. Anaruk thik thakkakathe ntothiꞌrot athokꞌrekat kin akin intakat cik.
10 Ana pul pothopulut ipammikkothekin porrettakathe irok tothik thalparut, na papu poripira ana pul pothernte lon loKapik ngkarra thorrettathe. Okin thaccokot thiak ngkoꞌra ana icïngkï thupuththuput.
Thakkmako thoul illet
11 Ana mpimmakathe prrok poili pipuk pïttïk ana okkwi ipokat cik akwikkoik nan. Capu ana thiꞌrot thollinok ana nthellakathe kaꞌran cik na akin ikkoik.
12 Ana mpimmakathe ul iokat willet ittïttïk ana iarran acoꞌro tokït koprrok poili ana natham nokat nanyattatheik. Atham wꞌrek wokat cik wanyattatheik ana ien atham wothikkoik. Ul iokat willet wokat cik akkmakot nolon ila akin thokkothe ammakka lokurrakot inatham.
13 Tok irapangka tothukkwathe ul illethe irok thapat, ana thio ana thothïrïn thonakathe ul iillet iokat iakin, ana ul wakkmakathe kurekkurek nolon ilakin thokkettethe.
14 Ittina thio ana thothïrïn thorrettakathe irok tothik. Tok tothik then tokat, thio itheꞌra.
15 Ana okkwi ipakꞌran kakinnicat iatham wothikkoik, ana kwarrettat irok tothik.