BÚKÙ TÀ TƗ́DHƗ́//RU YÌZO DHƗ ÀDHYA 1 YÒWÁNƗ̀ 1

Wárágà Yòwánɨ̀ dré tɨsɨ̀le dhɨ nɨ àlo

Wárágà kònɨ̀dhɨ nɨ tà àndu ngɨ̀le drìdrì dhɨ

À adré kisùá dhɨ, dhya wárágà kònɨ̀dhɨ nɨ tɨsɨ̀lepi dhɨ tá Yòwánɨ̀, àpóstolò kɨ àlo ꞌɨ, ɨ̀ndɨ̀ Èkèlézyà nɨ drì kobhá kàdrɨ̀ dhɨ kɨ àlo ꞌɨ. Tágba à dré adrézó Yòwánɨ̀ nda nɨ rú kisú wárágà kònɨ̀dhɨ léna ko dhɨ, à nɨ kɨtswá nòá ngádra ꞌá dhɨ, dhya wárágà kònɨ̀dhɨ nɨ tɨsɨ̀lepi dhɨ tá dhya Yésu nɨ tà nobhá mì sè dhɨ kɨ àlo ꞌɨ (1:1-4).

Yòwánɨ̀ adré wárágà kònɨ̀dhɨ nɨ tɨsɨ̀ tà kàdrɨ̀kàdrɨ̀ rì dhɨ ɨ sè. Àlo nɨ, adré móndyá kaꞌìbhá dhɨ kɨ kodzó tàzoá dhɨ, ngóró ɨ̀ dré ru amúlé Gìká Atá be, ɨ̀ndɨ̀ akódhɨ nɨ Mvá, Yésu Krísto be dre dhɨ tɨ́nɨ dhɨ, lè ɨ̀ kàdré adrélé àyɨ léna. Ɨ̀ kàdré kpà tròle tà ɨ̀ dré yìle àpóstolò ɨ tí dhɨ ɨ rú. Adré kpà tàá dhɨ, dhya ángùdhi Gìká nɨ nìlepi bàti dhɨ nɨ kpà akódhɨ nɨ tòlɨ́ kɨ kaꞌì ꞌòle. Kòdhɨ adré tàá dhɨ, ɨ̀ nɨ Gìká nɨ Mváagó, Yésu Krísto nɨ kaꞌì, adrézó kpà ru le àyɨ kòfalésè. Tàko ko, Gìká nɨ tàndɨ lèle ꞌɨ (3:11-24; 4:7-21).

Rì nɨ, Yòwánɨ̀ adré àyɨ kɨ kodzó, ɨ̀ kàdréró àyɨ kɨ lɨkɨ́ tà pròfétà kɨnzò ro dhɨ ɨ̀ dré adrélé tadhálé dhɨ kɨ tà sè. Adré tàá dhɨ, ɨ̀ kàdré móndyá títí dhɨ kɨ tabhì, nìzoá ngalè tɨrɨ́ àyɨ léna dhɨ ɨ Tɨrɨ́ Gìká àdhya ꞌɨ bàti yà dhɨ (4:1-6). Adré kpà àyɨ kɨ kodzó tàzoá dhɨ, ɨ̀ lavú bvò kònɨ̀dhɨ dre, ɨ̀ndɨ̀ Tɨrɨ́ adrélépi àyɨ lé dhɨ kàdrɨ̀, tɨrɨ́ adrélépi bvò kònɨ̀dhɨ lé dhɨ nɨ lavú (4:4).

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Kúlí adrélépi lɨ́drɨ̀ fe dhɨ (1:1-4)

2) Ngádra ɨ tínímvá be dhɨ (1:5–2:29)

3) Gìká nɨ ànzɨ ɨ Dzáborò kya ɨ́be dhɨ ɨ (3:1-24)

4) Tà bàti ɨ kɨnzò be dhɨ (4:1-6)

5) Gìká nɨ lèle, ɨ̀ndɨ̀ ru lèma àma kòfalésè dhɨ (4:7-21)

6) Gìká nɨ Mváagó nɨ kaꞌìma (5:1-21)

Kúlí adrélépi lɨ́drɨ̀ fe dhɨ

1 Mà adré dhya adrélépi tá be kɨ́nó tà títí dhɨ kɨ kɨdhoma lésè, mà dré yìle, mà dré nòle mì sè, mà dré tabèle, ɨ̀ndɨ̀ mà dré tà nɨ nɨ kisùzo dhɨ nɨ tà longó kòdhya. Akódhɨ nda Kúlí adrélépi lɨ́drɨ̀ fe dhɨ ꞌɨ. 2 Lɨ́drɨ̀ nda apfò tá àma kòfalé gò, mà dré nòzoá. Dɨ mà adré tà mà dré nòle mì sè nda nɨ tà ta, adrézó lɨ́drɨ̀ kóná vésè kólyá adrélépi tá Gìká Atá véna gò, dré apfòzo àma kòfalé nda nɨ tà longó kòdhya. 3 Mà adré tà mà dré nòle ɨ̀ndɨ̀ mà dré yìle nda nɨ longó àmɨ dré, mɨ̀ kàmúró kpà ru àma ɨ́be adrélé túmä́ní be dhɨ bvó. Àma, mà amú ru Gìká Atá be, ɨ̀ndɨ̀ akódhɨ nɨ Mváagó, Yésu Krísto be dre. 4 Mà adré tà kòdhɨ kɨ tɨsɨ̀, mà kàdréró lenzélé túmä́ní àmɨ ɨ́be kɨtswálé títí.

Atsima ngádra ꞌásè dhɨ

5 Tà mà dré yìle Yésu Krísto nda tí gò, mà dré adrézó longóá àmɨ dré dhɨ, tà kònɨ̀dhɨ ꞌɨ: Gìká ngádra ꞌɨ, ɨ̀ndɨ̀ akódhɨ léna dhɨ, tínímvá àlomvá yókódhó. 6 Mà kàdré tàá dhɨ, mà amú ru Gìká be dre gò, mà dré adrézó atsílé tínímvá na dhɨ, kòdhɨ mà adré kɨnzò ta, ɨ̀ndɨ̀ mà adré atsílé tà bàti na ko. 7 Dɨ, mà kàdré àmakya atsílé ngádra ꞌásè ngóró Gìká nɨ tàndɨ dré adrélé ngádra ꞌá dhɨ tɨ́nɨ dhɨ, mà amú ru àma kòfalésè gò, akódhɨ nɨ Mvá, Yésu nɨ kàrɨ́ dré adrézó àma kɨ temvé tàkonzɨ̀ wä́yi dhɨ ɨ lésè.

8 Mà kàdré tàá dhɨ, àma tàkonzɨ̀ àko dhɨ, kòdhɨ mà adré àma kɨ tàndɨ kɨ lɨtɨ́, ɨ̀ndɨ̀ tà bàti àma léna yókódhó. 9 Dɨ, mà kàdré àma kɨ tàkonzɨ̀ kɨ ta ngádra ꞌá Gìká kandrá dhɨ, akódhɨ nɨ àma kɨ tàkonzɨ̀ nda kɨ tri gò, àma kɨ temvézó àma kɨ tà kònzɨ wä́yi dhɨ ɨ lésè. Tàko ko, akódhɨ gyǎgya, ɨ̀ndɨ̀ kɨtswá adrélé kaꞌìle togó wä́yi sè. 10 Mà kàdré tàá dhɨ, mà ꞌo tàkonzɨ̀ ko dhɨ, mà adré Gìká nɨ bha kɨnzò líyí ro, adrézó kpà tadhá dhɨ, akódhɨ nɨ kúlí àma léna yókódhó.