BÚKÙ TÀ TƗ́DHƗ́//RU YÌZO DHƗ ÀDHYA TÀ TADHÁLÉ DHƗ Ɨ 1

Tà lùzu ró tadhálé Yòwánɨ̀ dré dhɨ ɨ

Búkù kònɨ̀dhɨ nɨ tà àndu ngɨ̀le drìdrì dhɨ

Dhya búkù kònɨ̀dhɨ nɨ tɨsɨ̀lepi dhɨ tá Yòwánɨ̀ ꞌɨ (1:1, 4, 9; 22:8-9). À adré kisùá dhɨ, akódhɨ nda tá Yòwánɨ̀, àpóstolò mudrí-drì-rì dhɨ kɨ àlo ꞌɨ, ɨ̀ndɨ̀ dhya Yésu nɨ Rúbí Tanɨ tɨsɨ̀bhá dhɨ kɨ àlo ꞌɨ. Akódhɨ tɨsɨ̀ tá búkù kònɨ̀dhɨ lókyá adréràꞌa Yésu nɨ kaꞌìbhá kɨ mì pfo lavúlé, ɨ̀ dré tá adrélé akódhɨ nɨ kaꞌì àyɨ kɨ Mírì ro dhɨ sè dhɨ ꞌá. Adré dɨ àyɨ kɨ tɨmbà àyɨ kɨ tà kaꞌìkaꞌì na, adrézó àyɨ kɨ kodzó, ɨ̀ kàdréró tròle àyɨ kɨ tà kaꞌìkaꞌì rú.

Yòwánɨ̀ adré tàá dhɨ, Yésu Krísto nɨ tàndɨ mù ángéló Gìká nɨ tà lùzu ró dhɨ kɨ tadhá ɨ́ dré, ɨ́ kòlongóró tà dra ru ꞌobhá nda ɨ Yésu nɨ kaꞌìbhá ɨ dré (1:1-2). Adré tà twátwa agábhá ɨ́ mi dhɨ ɨ ɨ̀ndɨ̀ tà ángéló ɨ̀ dré tadhálé ɨ́ dré dhɨ kɨ tɨsɨ̀, kúlí alaala móndyá kaꞌìbhá dhɨ ɨ̀ dré ngbà ꞌí kɨtswálé àndu nìle àyɨ dhɨ ɨ sè. Àngyá ko, kúlí alaala bǐ nda ɨ̀ angá Búkù tà àku ru yìzo dhɨ àdhya lésè. Móndɨ́ kɨ kɨtswá tà kayí àyɨ kòfalésè tà àruka tɨsɨ̀le búkù kònɨ̀dhɨ lé dhɨ kɨ àndu ndàzo nìle. Dɨ, Yòwánɨ̀ adré tà kàdrɨ̀ kònɨ̀dhɨ nɨ tadhá ngádra ꞌá: Mírì Yésu Krísto sè dhɨ, Gìká nɨ àdzú bhu áyɨ kàrɨbhá ɨ́be lókyá be vwàvwà ro, àyɨ kɨ lavúzó títí gò, áyɨ móndyá kɨ ꞌòzo fɨ̀le bhù tɨ́dhɨ́ ro ɨ̀ndɨ̀ bvò tɨ́dhɨ́ ro dhɨ na, ɨ̀ kàdréró adrélé túmä́ní ɨ́ be kóná vésè kólyá.

Tà kàdrɨ̀kàdrɨ̀ búkù kònɨ̀dhɨ léna dhɨ kɨ atìma

1) Tà lùzu ro tadhálé Yòwánɨ̀ dré dhɨ ɨ (1:1-8)

2) Tà agálépi drìdrì akódhɨ mi dhɨ, ɨ̀ndɨ̀ tà dré tɨsɨ̀le Èkèlézyà nzi-drì-rì dhɨ ɨ dré dhɨ ɨ (1:9–3:22)

3) Gìká nɨ lɨndrɨ̀ bhàma Kábilígyà Mvá be dhɨ (4:1–5:14)

4) Búkù pàle dhɨ, kɨ́dhá nɨ nzi-drì-rì dhɨ ɨ́be dhɨ ɨ (6:1–8:1)

5) Gòká nzi-drì-rì dhɨ ɨ (8:2–11:19)

6) Nì máláwú gú dhɨ, ɨ̀ndɨ̀ kàꞌwá àtrá rì dhɨ ɨ (12:1–13:18)

7) Tàbvó Gìká dré dra tàle dhɨ nɨ tà longoma (14:1-20)

8) Kópò nzi-drì-rì gabhá Gìká nɨ kombà sè bǐbi dhɨ ɨ (15:1–16:21)

9) Gìká nɨ kàrɨbhá kɨ lavuma (17:1–20:10)

10) Tàbvó Gìká dré dra tàle kùdù ro dhɨ (20:11-15)

11) Bhù tɨ́dhɨ́ ro dhɨ, bvò tɨ́dhɨ́ ro dhɨ, ɨ̀ndɨ̀ Yèrúsalémà tɨ́dhɨ́ ró dhɨ (21:1–22:6)

12) Yésu nɨ alɨ̀ma nɨ tà longoma (22:7-21)

Búkù kònɨ̀dhɨ nɨ tà àndu ngɨ̀le drìdrì dhɨ

1 Tà búkù kònɨ̀dhɨ léna dhɨ ɨ, tà lùzu ró Yésu Krísto dré tadhálé dhɨ ꞌɨ. Gìká fè tá tà nda ɨ Yésu dré tadhálé áyɨ màrábà ɨ dré dhɨ nɨ̀, ɨ̀ kònìró tà dra ru ꞌobhá lókyá tsà àmvolésè dhɨ ɨ be dhɨ bvó. Dɨ Yésu amù tá áyɨ ángéló tà nda kɨ tadhá ma, Yòwánɨ̀, áyɨ màrábà ro dhɨ dré. 2 Dɨ má adré tà títí má dré nòle nda kɨ longó. Kòdhɨ adré tàá dhɨ, má adré Gìká nɨ kúlí longó tà bàti Yésu Krísto dré tadhálé dhɨ ɨ́be. 3 Kólénzé nɨ adré dhya dra kúlí pròfétà àdhya kònɨ kɨ nàlepi móndɨ́ ɨ dré dhɨ dré! Kólénzé nɨ kpà adré móndyá dra kúlí nda kɨ yibhá gò, ɨ̀ dré adrézó tàmìga dri kúlí nda ɨ sè dhɨ ɨ dré! Tàko ko, lókyá atsá ànyɨ dre.

Mòdo fèma Èkèlézyà nzi-drì-rì dhɨ ɨ dré dhɨ

4 Ma, Yòwánɨ̀, má adré tà kònɨ kɨ tɨsɨ̀ Èkèlézyà nzi-drì-rì bvò Àsɨ́yà àdhya na dhɨ ɨ dré. Gìká adrélépi be, adrélépi tá be kɨ́nó lésè, ɨ̀ndɨ̀ adrélépi alɨ̀le dhɨ kòbhà áyɨ togó tanɨ àmɨ rú, ɨ̀ndɨ̀ kòfè tà kɨ̀drɨ́kɨ̀drɨ àmɨ dré! Kòꞌo kònɨ̀nɨ túmä́ní tɨrɨ́ nzi-drì-rì adrébhá áyɨ lɨrɨ́rà òpɨ̀ àdhya kandrá dhɨ ɨ́be, 5 ɨ̀ndɨ̀ Yésu Krísto be. Yésu Krísto nda, dhya adrélépi tà títí ɨ́ dré yìle Gìká vélésè dhɨ kɨ longó gyǎgya dhɨ ꞌɨ. Akódhɨ kókpà dhya ngàlepi dràdrà ꞌásè drìdrì móndyá àruka títí dhɨ ɨ kandrána dhɨ ꞌɨ, ɨ̀ndɨ̀ ópɨ́ kàdrɨ̀ ópɨ́ títí bvò àdhya ɨ drìle dhɨ ꞌɨ.

Mìlanzìlanzì kàdré akódhɨ adrélépi àma kɨ le tò, àma kɨ apálépi àma kɨ tàkonzɨ̀ lésè áyɨ kàrɨ́ sè nda dré! 6 Akódhɨ bhà àma adrélé òpɨ̀ ro, ɨ̀ndɨ̀ kòwánà ɨ ró, mà kàdréró tà ꞌo áyɨ Atá Gìká dré. Mìlanzìlanzì ɨ rìnyí be dhɨ ɨ̀ kàdré akódhɨ dré kóná vésè kólyá! Kònɨ̀nɨ.

7 Mɨ̀ nò rè ká! Akódhɨ adré alɨ̀le ndùrùku ꞌásè!

Móndyá títí dhɨ kɨ akódhɨ nɨ no mì sè, ndɨ̀ndɨ̀ àyɨ akódhɨ nɨ sobhá dɨ̀lɨ̀ sè dhɨ ɨ.

Súrú títí bvò dri dhɨ kɨ tongó akódhɨ nɨ tà sè.

Àyíya, kàdré kònɨ̀nɨ!

8 Mírì Gìká tà dhɨ: «Ma Álefà ꞌɨ, ɨ̀ndɨ̀ Òmégà ꞌɨ.* Ma Gìká rìnyí líyí ro adrélépi be, adrélépi tá be kɨ́nó lésè, ɨ̀ndɨ̀ adrélépi alɨ̀le dhɨ ꞌɨ.»

Yòwánɨ̀ nò Krísto mìlanzìlanzì ro

9 Ma, Yòwánɨ̀, ma àmɨ kɨ adrúpi adrélépi Gìká nɨ Òpɨ̀ ꞌa, adrélépi kɨzà nya, ɨ̀ndɨ̀ adrélépi togó tsɨ túmä́ní àmɨ ɨ́be Yésu na dhɨ ꞌɨ. À ru tá ma bhàle tùrù Pátomò àdhya na Gìká nɨ kúlí nɨ tà sè, ɨ̀ndɨ̀ tà bàti Yésu dré tadhálé dhɨ nɨ tà sè. 10 Kìtú Mírì àdhya sè dhɨ, Tɨrɨ́ Lólo asó tá ma gò, má dré kúlí ꞌuꞌù gòká nɨ ꞌuꞌù tɨ́nɨ dhɨ nɨ yìzo má àmvolésè, 11 tàá dhɨ: «Mɨ́ tɨsɨ̀ tà mɨ́ dré dra nòle dhɨ ɨ búkù na, mùle Èkèlézyà nzi-drì-rì dhɨ ɨ dré: Èkèlézyà Èfésò àdhya dré, Sìmìrúnà àdhya dré, Pèrùgámò àdhya dré, Tìyàtírà àdhya dré, Sàrúdì àdhya dré, Fìlàdèlèfíyà àdhya dré, ɨ̀ndɨ̀ Làwòdìkíyà àdhya dré.»

12 Dɨ má dré áma alázó kɨtswálé kúlí adrélépi tà ta má dré nda nɨ no. Má kàlá ma dre dhɨ, má dré ngá nzi-drì-rì ledélé órò sè adrézó àtsɨ́ tosó sílá dhɨ kɨ nòzo. 13 Ngá nda kɨ kɨ́tó ꞌá dhɨ, dhya làsú be móndɨ́ nɨ mvá tɨ́nɨ dhɨ totó tá ɨ. Asó tá kánzò kàtswa tsàlepi ɨ́ pána dhɨ, áyɨ agá dròzo bǎ ledélé órò sè dhɨ sè.† 14 Akódhɨ nɨ drì drìbhɨ́ nɨ ɨ́be dhɨ ɨ tá kemve lavúlé ngóró kábilígyà bhɨ́ mvě tɨ́nɨ, ɨ̀ndɨ̀ pfúrí kemve dhɨ tɨ́nɨ. Akódhɨ nɨ mì adré tá kòle rìnyi ró àtsɨ́ tɨ́nɨ. 15 Akódhɨ nɨ pá adré tá lagúlé ngóró bòrónzè kobvólé àtsɨ́ sè dhɨ tɨ́nɨ. Akódhɨ nɨ kúlí adré tá ndròle ngóró kòlyá kàdrɨ̀ dhɨ nɨ ndròma tɨ́nɨ. 16 Akódhɨ nɨ drɨ́ágó lésè dhɨ, ru tá bhìbhínyà nzi-drì-rì dhɨ ɨ. Akódhɨ sílésè dhɨ, sápɨ́ tɨ̀le sí lɨ̀tsɨ be rì dhɨ adré tá apfòle. Akódhɨ nɨ mìbhalé adré tá lagúlé ngóró kìtú dré adrélé lagúlé áyɨ rìnyí sè wä́yi dhɨ tɨ́nɨ.

17 Má kònò akódhɨ dre dhɨ, má dré dhèzo akódhɨ pá àbvò tɨ́nɨ. Dɨ, akódhɨ dré áyɨ drɨ́ágó bhàzo má dri, tàzoá dhɨ: «Mɨ́ ro ngá ko! Ma dhya drìdrì dhɨ ꞌɨ, ɨ̀ndɨ̀ dhya kùdù dhɨ ꞌɨ. 18 Ma dhya adrélépi lɨ́drɨ̀ ro dhɨ ꞌɨ. Má drà tá dràdrà. Dɨ, mɨ́ nò rè ká, ma mána lɨ́drɨ̀ ro kóná vésè kólyá! Ma lìfùngúlà ànzɨ dràdrà àdhya ɨ́be, ɨ̀ndɨ̀ móndyá dràbhá dre dhɨ kɨ àrà àdhya be má drɨ́gá. 19 Mɨ́ tɨsɨ̀ dɨ tà mɨ́ dré nòle dhɨ ɨ: tà adrébhá ru ꞌo nyànomvá dhɨ ɨ, túmä́ní tà dra ru ꞌobhá àmvolásà dhɨ ɨ́be. 20 Tà lùzu ró mɨ́ dré nòle dhɨ kɨ àndu kònɨ ꞌɨ: Bhìbhínyà nzi-drì-rì mɨ́ dré nòle áma drɨ́ágó lésè dhɨ ɨ, Èkèlézyà nzi-drì-rì dhɨ kɨ ángéló ꞌɨ. Ngá nzi-drì-rì adrézó àtsɨ́ tosó sílá dhɨ ɨ, Èkèlézyà nzi-drì-rì dhɨ ꞌɨ.»

* 1:8 1:8 «Álefà» kònɨ̀dhɨ, wárágà pá drìdrì Gìríkì ti àdhya ꞌɨ. «Òmégà» kònɨ̀dhɨ wárágà pá kùdù dhɨ ꞌɨ. Dɨ Gìká adré tàá kònwa dhɨ, ɨ dhya drìdrì dhɨ ꞌɨ, ɨ̀ndɨ̀ dhya kùdù dhɨ ꞌɨ. Yésu adré kpà tà nda nɨ ta áyɨ tàndɨ nɨ tà sè 1:15 na. † 1:13 1:13 Rú «Móndɨ́ nɨ Mvá» kònɨ̀dhɨ, rú àzya fèle Mèsɨ́yà dré dhɨ ꞌɨ. À kònò Dànyélè 7:13; 10:5.