3
1 Gwodanalu, anni minyii ꞌti burna ndi geraji länï gwani badatanu gilingeno, nyii ïrïyï ngwäyälü ndi ari yijayana aar nje gatanalu jücü nyii jalu Ätïnä.
2 Nyii ükäjä diwengga dege dani Timijawuj, gwanni gwuru nyii le gimaad ndi ape yiiru Ngwaalinga le yidi bädïyï ngwujaꞌralu ngwanni ngwujaw ngwudi Kirictu, ndi ara je orꞌtemaji ara je ojemeye nono ndi ämnï Ngwaalu gwalu,
3 nunnu aaꞌti gwere gwa ji gwaꞌti mätïnälü ndi mïmïnnï nono nggwee. Ngaa lïlïngïdï mama ndi ari alanga liru ngwïkïrïjïn gay gege giru ndi mbuji dïrbä no.
4 Yiru gu ndi ari anni jar, lata je ondaci yomon ꞌdar ndi ari ngwüjï ngwunje übïnälü. A yima gu ru no anaku lïngïdä gu mama.
5 Ndi ari yiru giyee yanni yïgäbïcïny anni minyi ꞌti burna ndi geraji länï, nyi ükäjïdä ndi nyi lenge ämnï gwe Ngwaalu gwalu yorta ye ngwaalinga. Yedeny yïtïny ndi ari ngwaalu ngwere rïgüm, dijegoꞌrr dima je ïdäjï na undi ngwäy gwärï ngwaalu ngwere gwuma ru ꞌtur.
A Timijawuj äpïjä Bulijing ngwujaꞌri
6 A be anni ma Timijawuj oꞌra ꞌdanggalu gweneno, gwuminje äpïjä ngwujaꞌri ngwujaw ngwuminje ꞌdingini ngwani ämnï Ngwaalu gwalu na ämnï gwalu. Aar nje ondaci ndi ari ngaa lati nje diwayini giyomonalu ꞌdar diwayining gwujaw ndi ari ngaa lïmïnä ndi nje engga, nono raar gu ꞌto ꞌdänggärï ndi ari lïjädï ndi ara je engga.
7 Yäy gu no, lani ngweengga, gïdïrbä därï ꞌdar na ndi übïnälü gwanni gwübïnäär nje gwe ngwüjälü, nyii lorꞌtemaja gwani ämnï Ngwaalu gwalu.
8 A gweneno ꞌdiꞌdanu nyii lijalu limidu, anni määtïnängälü ꞌdïꞌdäny Gideleny.
9 Awa nyii ci Ngwaalinga yäy ꞌtu gwonyadu gwani nga nga lanni liminje gäbïcï lima jayanu ngwäyänü Ngwaalu ngwege?
10 Dilu de na lingen le lati otaci Ngwaalingalu gwonyadu yigor ye ꞌdar ndi ari a gay ji ara je engga mana ara je gu gendaci yanni yamiꞌrata gu ndi ämnï Ngwaalu gwalu.
11 Gwenene gäbïcär a Ngwaalu ngwege ngwuru Papa ligoꞌro le lüngün na Deleny dege dani Yicu, jaꞌrima gay ndi ari nyii ila ꞌdanggalu.
12 Ara je Ngwaalu gendaci ämnïng gwalu ngwïrälü ꞌdanggalu na ngwüjï ngwuꞌter ꞌto anaku ru gu ämnï gwärï ꞌdanggalu.
13 Ara je ojemeye yigor nono yalu nunnu ngaa ji nga jayi nono ngaa juꞌri ngwäyänü Ngwaalu ngwuru Papa gwege ma ji ma Deleny dege dani Yicu oꞌra ngwüjï ngwe ngwüngün ꞌdar ngwanni ngwujuꞌru. Yiru gu.