12
Mïꞌrï ngwujaꞌri gwani ngwäänü
(Mätä 21.33–46; Luka 20.9–19)
1 A be Yicu ꞌdïꞌrï ndi ondaci ngwüjü ngwuje mïꞌrïcï ngwujaꞌri ngwuje ci, “Gur geꞌte gïkwüdï yügïrï gidaartanu ngwuje gwalaci ngwugeꞌte ngwaalinga ngwudi ündï yügïrï ngwugeꞌte gangida. Ngwube gätïjänï ngwäänä aar ombaci ngwüꞌdïꞌrï ngwele ngwaalu ngwolanu.
2 A gaji ila gidi uni ngwükäjï dïnädä düngün ngwäänü ndi ari aar äkïjä yügïrï gidaartanu.
3 Aar be määtä dïnädä aar pï aar linynya ngwuy ngwanu.
4 Ngwoꞌre ngwükäjï dïnädä diꞌter, oꞌre aar mïꞌrïdä kiꞌrala aar ärrä yïrgïnä.
5 Ngwoꞌre mana ngwükäjï dïnädä diꞌter, ndoo, aar määtä aar ꞌrinye. Ngwoꞌre ngwuje ükäjï ngwuꞌter ngwonyadu ngwoko aar je pï, na ngwoko aar je ꞌrinye.
6 Ngwube diwayinalu gweꞌte pu nding ükäjï, gïjü güngün ganni gämnïng ngwükäjälü gwodan ngwari, ‘La je yedeny kïjï güny.’
7 A ngwäänü ondajidi kïjälä güngün aar ari, ‘Nginde gwuru be nggwee gwudi yuꞌrin. Ilar ar määtä ar ꞌrinye nunnu a yuꞌrin ru yege.’
8 No, aar määtä aar ꞌrinye aar ape aar gatu kulu poor gidaarti didi yügïrï.
9 Gur gidi daarti didi yügïrï gadi be ärrï ange? Nginde gwila gwa ꞌrinye ngwäänä ngwoo gwa pe daarti didi yügïrï ding ätädä ngwäänä ngwuꞌter.”
10 Ngwuje ci, “Ngaa laꞌti ulu ngwujaꞌri ngwudi gitab ngwanni ngwaru,
‘Goꞌrr ganni gïꞌdünyïdädï ngwüjälü ngwanni ngwati oda,
giru ganni gima ru goꞌrr giru gidingo.
11 Deleny diru därrü yiꞌral giyee,
a yima ru yiima ꞌter ngwäyänü ꞌdengge’?”
12 Aar be mïnï gay gadi aar määtä ndi ari ngindenga lima lenge ndi ari Yicu gwäbïngädï ꞌdenggegen. A je be yedeny eny ngwüjï ngwonyadu. No aar gatani aar ele.
Gïꞌtïjï delenya didi Rumang dulba
(Mätä 22.15–22; Luka 20.20–26)
13 Aji aar ele aar ükäcä Yicung Ngwübärrïjï na ngwüjï ngwudi Yïrüdïj ndi ari aar mätädä ngwujaꞌri ngwere ngwulem ngwanni ngwuki.
14 Aar ila ꞌdünggüngün aar ci, “Gwani doorta, nyängä lïlïngïdï ndi ari nga gwuru dïjï dati ondaji ngwujaꞌri ngwïndï kayalu, ndi ari nga gwati ꞌti geꞌtaja ngwüjï ngwäyänü ndi ari ngwani yärüngä, ati ang be enggaci ngwüjü ngwujaꞌri ngwudi Ngwaalu ngwanni ngwïndï kayalu ngwuru ꞌdidanu. Yijayi gu ndi nyii gïꞌtïjï Delenya didi Rumang dani Gayijar dulba gwalla yaꞌti jaw?
15 Nyii geꞌte gwalla nyii ꞌti geꞌta?”
A Yicu lenge yimurꞌtunya yegen ngwuje ci, “Ngaa larra nyii be ïdäjï? Ätädïny ꞌdi dinar nyi ombaji.”
16 Aar ätädä bartad. Ngwuje ci, “Giꞌremna nggee gidi yärü giru? Na yuuli giyee yüllïnä?”
Aar ci, “Yidi Deleny didi Rumang dani Gayijar yiru.”
17 A je Yicu ci, “Ngwong ngwudi Deleny didi Rumang dani Gayijar, ätädär je Delenya didi Rumang na ngwong ngwudi Ngwaalu, ätädär je Ngwaalinga.” A je ngwe ngwaalu elalu ngwujaꞌri ngwüngün.
ꞌDïꞌrï gwudi ngwüjï ngwayu
(Mätä 22.23–33; Luka 20.27–40)
18 A be Ngwüjändügï ngwanni ngwati ari ꞌdïꞌrï gwaꞌti gwudi ngwüjï ngwayu ila ndi Yicu gwadi aar otacalu
19 aar ci, “Gwani doorta, Müjä gwullu ndi ari manari diweengga dima ayi ngwugatani dayalu düngün ngwuꞌti ätï yïjü, a gwenggen ape dedela ngwulengaci gwenggen yïjü.
20 A be yïjï yiju yiru yengga kwoꞌra täꞌrïl (7) a be Gaanni agu ngwayi ngwuꞌti lingetana yïjü.
21 A Gwoone ape. Ngwoꞌre ngwayi ngwugatani daꞌti lïngïtï, a Gwallu ape. Ngwoꞌre ngwayi ngwugatani daꞌti lïngïtï.
22 Aar gu ele ꞌdi aar medadi ꞌdar kwoꞌra täꞌrïl (7) aar ꞌti gatana gïjälü gere a be gwodanalu a daw ayi ꞌto.
23 A be gomon gidi ꞌdïꞌrï giyiꞌranyanu, daw ndoo dadi be ru didi yärü gweꞌte gweꞌte ꞌdar kwoꞌra täꞌrïl (7)?”
24 A je Yicu ci, “Ngaa lidudu, ngaa laꞌti lïngïdï ngwujaꞌri ngwe ngwudi gitab na yiima yidi Ngwaalu yorto ye ngwaalinga.
25 Ma ji ma ngwüjï ꞌdïꞌrï ngwanni ngwayu, ngwaꞌti ba be ngwagu aar ägïnï, ngwadi ru nono yïꞌrrä yidi gerala.
26 A be gwenene ngwujaꞌri ngwani a ngwüjï ꞌdïꞌrï, ngaa laꞌti ulu ngwujaꞌri kitabanu gidi Müjä ngwudi daꞌri danni duꞌdu ndi ari Ngwaalu gwondaca Müjäng ngwuca? Gwuca Müjäng, ‘Äny gwuru Ngwaalu ngwudi Äbräyïm, Ngwaalu ngwudi Ijaag na Ngwaalu ngwudi Yagub.’
27 Nginde gwäꞌtüdï Ngwaalu gwudi ngwüjï ngwanni ngwayu, ngwube ru Ngwaalu ngwudi ngwüjï ngwanni ngwumidu. Yäy gu no, ngaa lidudu gwulleny!”
Ngwujaꞌri ngwanni ngwojemana guꞌru
(Mätä 22.34–40; Luka 10.25–28)
28 A doorta deꞌte didi yobo ila ngwuje ꞌdingini ndi aar garnati. Anni mung engga ndi ari lima je Yicu gatu ngwujaꞌri ngwe ngwüngün ngwujaw, ngwotacalu ngwuci, “Ngwujaꞌri ngwïndï ne ngwujaꞌranu ꞌdar ngwanni ngwojemana guꞌru?”
29 A Yicu ci, “Ngwujaꞌri ngwanni ngwojemana guꞌru ngwujaꞌranu ꞌdar ngwuru ngwee ndi ari, ‘ꞌDinginar liru ngwüjï ngwudi Yïjïräyïl, Deleny diru Ngwaalu ngwege, diru Deleny deꞌte pu.
30 Ämnä Delenya diru Ngwaalu ngwunga ligor le lunga ku na lingeno le lunga ku na yaꞌrany ye yunga ku na yiima ye yunga ku.’
31 Na ngwujaꞌri ngwanni ngwugwujanalu mana ngwuru ngwee ndi ari, ‘Ämnä gwanggalu nono ata gu ämnï ligoꞌro lunga.’ Ngwujaꞌri ngwere ngwaꞌti ngwanni ngwojemana guꞌru ngwujaꞌri ngwee rom (2).”
32 A be doorta ndoo ci, “Nga gwätïyä ngwujaꞌri ngwäyänü gwani Doorta, ndi ari Ngwaalu ngwuru Ngwaalu ngweꞌte pu na ndi ari ngwaꞌta be ngwere a be nginde ru.
33 Na ndi ämnï ngindeng ligor le lunga ku na bebere gwe gwunga ku na yiima ye yunga ku na ndi ämnï gwanggalu nono ligoꞌro lunga yiru yanni yojemana guꞌru ndi gïꞌtïjï Ngwaalinga deꞌrenya na mïꞌrïnïng nono.”
34 Anni ma Yicu engga ndi ari nginde gwuma gwäꞌräjänü ngwujaꞌranu bebere gwe gwujaw, ngwuci, “Nga gwaꞌti ola ngwaalinganu giyeleny yidi Ngwaalu.” ꞌTuꞌtu gaji nggoo, aaꞌti ba be dïjï dere ädïnä ndi otacalu mana ngwujaꞌri ngwe ngwere.
Gwanni Gwubrutaar yelenya na Däwüd
(Mätä 22.41–46; Luka 20.41–44)
35 Ju gu Yicu ndi enggaci ngwüjü ngwämrä gwudi gobo, ngwutalu ngwari, “Awa gu ati be ngwoorta ngwudi yobo ari gwanni Gwubrutaar yelenya gwuru gïjï gidi Däwüd?
36 A mine Däwüd ondaji ligoꞌro le lüngün Lïgïꞌrïm le ngwari,
‘Deleny dica Delenya düny,
Jalu kaama güny
ꞌdi nga gïꞌtïjï güwänälü gunga
giyoranu yunga.’
37 Däwüd nginde ligoꞌro le lüngün, gwucung ‘Deleny.’ Ngwube ru gïjï güngün awa?”
A ngwüjï ngwonyadu geraji länï ngwujayanu.
Girinya gwani arngani ngworta ngwudi yobo
(Mätä 23.1–36; Luka 20.45–47)
38 Ngwuji ndi ondaci ngwüjü ngwuje ci, “Arnganar ngworta ngwudi yobo. Ngwati jada ndi elellalu ngwured ngwanu ngwola a je ngwüjï aganni ngwaalu ngwudi ngwiliny
39 a je ngwüjï geꞌtalu ngwuduꞌrala kiꞌra ngwämrä a je ngwüjï denya ngwaalu ngwudi yïꞌrïnyïnä.
40 Ngwati ïꞌdäjï ngwedelanu aar je apada ngwuꞌduna ngwegen ma aar otaci Ngwaalingalu, aar ïrïngïnï oleye gwe ngwujaꞌranu. Ngwüjï ngwanni ngwuru gu no, ngwuru ngwanni ngwadi aar ngwe obalu gwulleny.”
Dedel diru diwayi
(Luka 21.1–4)
41 A Yicu jalu aar gwomajidanu ngwaalinga ngwe ngwati gu ngwüjï geꞌte kiꞌdu. Ngwombaji ngwüjü ngwonyadu ngwanni ngwünänü aar geꞌte gwegen gwonyadu.
42 A be dedel diru diwayi ila ngwugatu bartadalu ngwäy rom gwuru guꞌru gookoꞌriny ꞌdogo.
43 A Yicu urnidi ngwoꞌra ngwüngün ngwuje ci, “Nggwa je ci ꞌdidanu, dedel ndee diru diwayi, dima geꞌte kiꞌdu gwonyadana ngwüjï ꞌdar.
44 Ndi ari ngwüjï ꞌdar ngwugeꞌta gwooko koola gegen gonyadu gätäär a be ndee, digeꞌta giyiwayi yüngün ꞌdar gwanni gwätïng.”