2
A ngwïkïrïjïn elelle elelleng gwïndï kayalu
1 A be nga, enggaci ngwüjü ngwujaꞌri ngwanni ngwïndï kayalu.
2 Enggaca ngwuru ngwanni ngwupana ndi ari aar bebere, aar je denya, aar määtä yigoꞌro yegen, aar ru ngwüjï ngwämnä Ngwaalu, aar ätï ämnïng, aar ätï orꞌtemajing gwanni gwïndï kayalu.
3 Nga enggaci ngwayu ꞌto ngwanni ngwupana aar elelle elelleng gwudi denya, aaꞌti ngwa ari ngwulem, aaꞌti ngwa äbräjï ndi ïyï aar ru ngwïnäd ngwudi rlälï, aar be inggidi yiꞌral yanni yijaw.
4 Aar ola ngwayu ngwanni ngwüꞌdïꞌrälü nunnu aar ämnï ngwuru ngwegen aar ämnï yïjü yegen,
5 aar määtä yigoꞌro yegen, aar juꞌri, aar arngani ngwuꞌdun ngwe ngwegen, aar jayi yiguri, aar ꞌdengenaci ngwuru ngwegen nunnu aaꞌti yere ya ji yanni yadi gäbïcï ngwujaꞌri ngwudi Ngwaalu a je ngwüjü calu mireny.
6 Ülädï ngwamal ꞌto aar määtä yigoꞌro yegen.
7 Giyiꞌral ꞌdar nga ru gora gegen ärrï gwe yiꞌral yanni yijaw. Dünälü nga arri ꞌdidanu ndi enggaci gwunga.
8 A ngwujaꞌri ngwunga ele kayalu aaꞌti ngwa ke ngwüjü ngwäy, nunnu aar gäbïcï güwänü gunga a yaaru ape nunnu yaꞌti yere ya aar ye ari ꞌdengge.
9 Enggaca ngwïnädä aar ꞌdengenaci ngworta ngwegen giyiꞌral ꞌdar, aar je äpïjï yiiru yanni yadi je gäbïcï aar jayanu, aaꞌti la aar le garnati,
10 aaꞌti la aar je iyada yuꞌrimi, aar be inggidi ndi ari liru yigor ꞌdidanu ndi aar je ämnäcï. Nunnu kay gere ꞌdar, aar gäbïcï enggacing ngwüjü gwani Ngwaalu ngwuru Gilang gwege, ngwujayi ngwokta ngwüjü.
11 Ndi ari Ngwaalu ngwuma ꞌtäjä yïmïꞌrälü yanni yadi ye ngwüjï gïlängïdïnï ꞌdar.
12 Yati nje enggaci ndi ari ar ïnyïnï giyiꞌral ꞌdar yanni yäꞌtüdï drü didi Ngwaalu, ar gatani yamila yidi dïdlä, ar elelle elelleng gwudi määtä lingina, gwudi dünälü, na ar elelle drü de didi Ngwaalu gïdïdlänü ndee.
13 Anni jicar geꞌtajingalu gwudi jayanu nunnu ngwüꞌtädälü, ila gwudi näjï gwudi Ngwaalu ngwupa na Gilang gwege gwani Yicu Kirictu.
14 Nginde gwanni gwayu gwani alanga nunnu aar nje üꞌrälü giyiꞌral ꞌdar yanni yiki. Aar nje juꞌriyi nono aar nje ruji ngwüjü ngwüngün jücü ngwïtï je yigoranu ndi ärrï yiꞌral yanni yijaw.
15 Yäy yiꞌral yiru giyee yanni ya je enggaci ngwüjü. Orꞌtemaja je, a ngwe rimalu yeleny ye yunga ꞌdar. Aaꞌti dïjï dere da ang calu mireny.