8
Jo-Israel biro kayo kalausi
1 “Ket turumbete e dhogi mondo igo!
Ongo ni ewi od Jehova Nyasaye,
nikech ji oseketho singruokna
kendo gisekwedo chikna.
2 Jo-Israel noywakna niya,
‘Yaye Nyasachwa, wayangi!’
3 To wasigu biro lawo Israel
nikech gisekwedo gima ber.
4 Giketo ruodhi e loch ka ok gipenja;
kendo giyiero jotelo ka ok gingʼeyo parona.
Giloso nyiseche manono
kuom fedha gi dhahabu ma gin-go,
to magi kelonegi mana kethruok.
5 Yaye Samaria, wit oko nyasachi mar nyaroya!
Mirimba ger kodgi.
Nyaka karangʼo ma ok ginyal bedo maler?
6 Gin joma oa Israel!
Nyaroyani oselos mana gi lwet dhano omiyo
ok en Nyasaye.
Nyaroya mar Samaria-no
noto matindo tindo.
7 “Gichwoyo yamo
to gikayo kalausi.
Gin gi cham ma ok ket wiye;
kendo ok onyal kelo mogo.
To kane onyalo nyago cham,
to jopinje mamoko dochame duto.
8 Israel osetiek duto;
kendo sani en e kind ogendini,
mana kaka gima nono.
9 Gisedhi nyaka Asuria
mana kaka kanyna mar bungu mabayo abaya.
Efraim oseusore ne joherane.
10 Kata obedo ni giseusore kendgi e kind ogendini,
abiro chokogi kaachiel.
Gibiro lal nono
kendo enosandgi e bwo loch mar ruoth maratego.
11 “Kata ka obedo ni Efraim nogero kende mangʼeny mag misango mar golo richo,
kendegi osebedo mar timo richo.
12 Ne andiko negi gik mangʼeny mag chikena,
to ne gikawogi kaka gigo ma welo kuomgi.
13 Gichiwo misengni mokelna
kendo gichamo ring misenginigo,
to Jehova Nyasaye ok mor kodgi.
Omiyo sani obiro paro anjawo ma gitimo
kendo enokumgi kuom richogi.
Ginidogi Misri.
14 Jo-Israel wigi osewil gi Jachwechgi,
mi gigero ute mag ruodhi;
Juda osechielo mier madongo mangʼeny.
To anaor mach e miechgi madongogo
mitiek kargi mar pondono.”