33
Achiedh-nade kod resruok
1 Unune malit un joma osetieko ji, to pok otieku!
Unune malit un joma osendhogo ji, to un pok ondhogu!
Ka uweyo tieko ji to notieku;
bende ka uweyo ndhogo ji to nondhogu.
2 Yaye Jehova Nyasaye, yie ikechwa;
nimar chunywa dwari.
Miwae teko okinyi ka okinyi,
kendo bednwa kar resruok,
e kinde mag chandruok.
3 Ka dwondi omor to ji ringo;
ka ia malo to ogendini ke.
4 Yaye un ogendini,
mwandu noyaki mana ka kama nyithi bonyo omonjo;
kendo ji noyak mwandugi,
mana kaka bonyo monjo piny.
5 Nying Jehova Nyasaye otingʼ malo, nimar odak e polo;
obiro pongʼo Sayun gi tim makare kod adiera.
6 Enobed mise mar adier e ndalou,
kar mwandu mar resruok gi rieko kod ngʼeyo;
luoro Jehova Nyasaye e rayaw mar mwanduni.
7 To neuru kaka thuondige ywak malit e wangʼ yore;
joote ma oseor mondo odwar kwe ywak malit.
8 Yore osedongʼ nono,
kendo onge jowuoth e yo.
Winjruok osekethi mi joma nobedo joneno ok dew,
kendo onge ngʼama omi luor.
9 Piny ywak kendo dok chien,
Lebanon ni e wichkuot kendo okethore,
Sharon olokore ongoro ka Araba,
kendo Bashan gi Karmel oyaki modongʼ nono.
10 Jehova Nyasaye wacho niya,
“Koro abiro aa malo,
mondo anyisu duongʼna gi tekona.
11 Ubiro mako ich to unywolo yamo;
muya muyweyo en mach ma tiekou.
12 Ogendini nowangʼ,
mi lokre pidhe mag buru,
kendo mana kaka kudho mobet e bungu
enowangʼ gi mach!”
13 Un mudak mabor,
winjuru gima asetimo,
un mudak machiegni ngʼeuru tekona!
14 Joricho man Sayun,
kihondko osemako;
kibaji ogoyo joma okia nyasaye,
mi gisepenjore kendgi niya,
“En ngʼa kuomwa manyalo dak kod mach mawengʼo magerni?
Koso en ngʼa kuomwa manyalo
dak kod mach maliel maonge gikone?”
15 Ngʼatno mawuotho e ratiro
kendo wacho gima adiera,
ma tamore yudo ohala e yor mecho
kendo ok oyie kawo asoya,
ngʼatno ma ok chik ite e chenro mar neko,
kendo odino wengene e neno timbe mamono,
16 ma e ngʼama nodagi kuonde motingʼore gi malo,
ma kare mar pondo nobedi got mochiel gohinga motegno.
Chiembe ibiro chiw,
kendo pi ok nodwon-ne.
17 Wengeni biro neno ruoth
kober kendo iningʼi piny molandore malach.
18 E pachi inipar masiche machon:
“Ere jatelo maduongʼ cha?
Ere ngʼatno mane okawo osuru?
Ere jatelo mochungʼne kuonde ngʼicho man malo?”
19 Ok inichak ine jonjorego kendo,
jogo ma wechegi oyombore,
kendo mawacho dhok matek winjo.
20 Ka irango Sayun,
dala maduongʼ mar sewniwa moyier;
ibiro neno Jerusalem kama kwe nitie,
hema ma ok bi muki;
loje mage ok nopudhi, kata tondene ok nochodi.
21 Kanyo Jehova Nyasaye biro bedonwa Jal Maratego.
Kanyo nochalnwa ka aore kod mago matindo.
Yiedhi man-gi tanga ok nokwangʼ kanyo,
meli maduongʼ ok nokwangʼ e aore.
22 Nimar Jehova Nyasaye e jangʼadnwa bura,
Jehova Nyasaye e jaketonwa chik,
kendo Jehova Nyasaye e ruodhwa;
en ema obiro resowa.
23 Tondegi mag meli obwodhore:
Tanga ok otwe motegno,
ok ginyal kwangʼ maber.
Eka gik moyaki ibiro pogi
kendo kata mana joma rongʼonde noyud pok.
24 Onge ngʼama odak Sayun manowachi niya, “Atuo,”
kendo richo mag joma odak kanyo nowenegi.