10
Nyasaye kod nyiseche manono
1 Winji gima Jehova Nyasaye wachoni, yaye od Israel.
2 Ma e gima Jehova Nyasaye wacho:
“Kik ipuonjri yore ogendini
kata ibed gi bwok gi ranyisi manie kor polo,
kata obedo ni gibwogo ogendini.
3 Nimar kit jogi kod timbegi onge tiende;
gingʼado yien koa e bungu,
bangʼe japecho paye gi koyo mare.
4 Giwire gi fedha gi dhahabu;
giriwe motegno gi musmal ka gigoye gi nyundo,
mondo kik oyiengni.
5 Mana kaka gima ibwogogo gik moko e puothe mag budho,
e kaka nyisechegi manonogo ok nyal wuoyo;
nyaka tingʼ-gi nikech ok ginyal wuotho.
Kik uluorgi;
ok ginyal hinyou
kata timonu gima ber.”
6 Onge ngʼama chalo kodi, yaye Jehova Nyasaye;
iduongʼ, kendo nyingi maratego nigi teko.
7 En ngʼa ma ok onego miyi luor,
yaye Ruodh ogendini?
Ma gima iwinjori godo.
Kuom jorieko duto mag ogendini kod
kuom pinjeruodhigi duto,
onge ngʼama chalo kodi.
8 Giduto gionge paro kendo gifuwo;
ipuonjogi gi nyiseche manono mag bepe mopa maonge tich.
9 Fedha mothedhi ikelo koa Tarshish
kendo dhahabu koa Ufaz.
Gima japecho kod jatheth oseloso
irwako gi lewni marambulu gi maralik,
giduto olosgi gi jotich molony.
10 To Jehova Nyasaye e Nyasaye madieri;
en e Nyasaye mangima, Ruoth manyaka chiengʼ.
Ka iye owangʼ, to piny tetni;
ogendini ok nyal mirimbe.
11 “Nyisgi ma: ‘Nyiseche manonogi, mane ok ochweyo polo gi piny, nolal nono e piny kendo e bwo polo.’ ”
12 To Nyasaye nochweyo piny gi tekone;
ne ochako piny gi riekone,
kendo oyaro polo gi ngʼeyo mare.
13 Ka omor ka polo, to pige manie polo wuo;
omiyo boche polo dhwolore koa e giko piny.
Ooro mil polo gi koth
kendo okelo yamo koa e kuondege mag keno.
14 Ji duto parogi ok ti
kendo gionge ngʼeyo;
jotheth duto wigi
kuot gi nyisechegi manono ma githedho.
Kido mage moloso gin gik manono;
gionge muya eigi.
15 Gionge tich, gin gik minyiero;
ka ndalogi mar ngʼado bura ochopo,
to ginilal nono.
16 Jalno ma en Pok mar Jakobo ok chal kodgi,
nimar en e Jachwech mar gik moko duto,
nyaka Israel, ma en dhood girkeni mare,
Jehova Nyasaye Maratego e nyinge.
Masira mabiro gi sand mabiro
17 Chokuru giu duto mondo ua e pinyno,
un joma ogengʼnigi.
18 Nimar ma e gima Jehova Nyasaye wacho:
“E kindeni machalo kama,
abiro daro ji modak e pinyni;
anakel sandruok kuomgi mondo mi omakgi.”
19 To mano kaka litna nikech hinyruok mara!
Adhonda ok thiedhre!
Kata kamano awacho ne an owuon ni,
“Ma en twona, kendo nyaka angʼi kode.”
20 Hemba okethi; tonde mitweyego duto ochodi.
Yawuota oweya kendo ok gin koda;
onge ngʼama odongʼ manyalo
gurona hemba kata gerona kambi.
21 Jokwath onge rieko to
bende ok gipenj Jehova Nyasaye wach;
mano emomiyo ok gidhi nyime maber
kendo rombe mag-gi duto oke.
22 Chik iti! Wach biro niya,
tungni maduongʼ koa e piny man yo nyandwat!
Anami dala mag Juda odongʼ nono,
kama ondiegi ema odakie.
Lemo mar Jeremia
23 Angʼeyo, yaye Jehova Nyasaye,
ni ngima dhano ok en mare owuon;
ok en mar dhano mondo ochik yorene.
24 Rieya, Jehova Nyasaye, to mana gi bura
makare ma ok e ich wangʼ,
ka ok kamano to ditieka chuth.
25 Ol mirimbi kuom
ogendini ma ok ongʼeyi,
kuom ji ma ok luong nyingi.
Nimar gisetieko Jakobo;
gisetieke chuth kendo giseketho dalane.