23
Bad yath makare
1 Jehova Nyasaye wacho niya, “Mano kaka unune malit un jokwath maketho kendo keyo romba kar kwadhgi!”
2 Emomiyo ma e gima Jehova Nyasaye, Nyasach Israel, wachone jokwath makwayo joga: “Nikech usekeyo romba kendo uriembogi kendo ok useritogi, anakumu kuom timbe mamono musetimo,” Jehova Nyasaye owacho.
3 Jehova Nyasaye wacho niya, “An awuon anachok romba modongʼ e pinje duto kuonde maseriembogie anadwog-gi legegi kama gibiro nyaa kendo kwan-gi nomedre.
4 Anamigi jokwath manoritgi, kendo ok ginibed maluor kata ok ginibwogi, bende onge manolal,” Jehova Nyasaye owacho.
5 Jehova Nyasaye wacho niya,
“Kinde biro ma anami Daudi Bad Yath makare,
Ruoth manobed gi loch mar rieko
kendo tim gima kare kendo ratiro e piny.
6 E ndalone Juda noresi
kendo Israel nodag gi kwe.
Ma e nying ma ibiro luongego:
Jehova Nyasaye mamiyo wabedo jo-ratiro.”
7 Jehova Nyasaye wacho niya, “Ndalo biro ma ji ok nowach kendo ni, ‘Akwongʼora gi nying Jehova Nyasaye mangima, manogolo jo-Israel Misri,’
8 to giniwachi, ‘Akwongʼora gi nying Jehova Nyasaye mangima, mane ogolo nyithind Israel e piny ma yo nyandwat kendo e pinje duto mane oseriembogie.’ Bangʼe gibiro dak e pinygi giwegi.”
Jonabi ma jo-miriambo
9 Kuom jonabi:
Chunya maiye ool;
chokega duto tetni.
Achalo ngʼama omer,
mana ka ngʼama divai osemero,
nikech Jehova Nyasaye kod wechene maler.
10 Piny opongʼ gi joma terore;
nikech kwongʼ, piny obaro okak
kendo kuonde kwath otimo ongoro.
Jonabi luwo bangʼ timbe mamono
kendo gitiyo gi teko mag-gi e yo ma ok nikare.
11 Jehova Nyasaye wacho niya,
“Jonabi kod jodolo ok oluoro Nyasaye;
kata mana ei hekalu mara ayudoe timbegi maricho.”
12 Jehova Nyasaye wacho niya,
“Emomiyo yoregi nobed mapoth poth;
notergi e mudho
kendo kanyo ginipodhie piny.
Anakel masira kuomgi
e higa mokumgie.
13 “Kuom jonabi mag Samaria
ne aneno gino mawangʼo ich:
Ne gikoro e nying Baal
kendo ma gimiyo joga Israel obayo yo.
14 Kendo e kind jonabi
mag Jerusalem aseneno gimoro malich mokadho:
Giterore kendo gidak e ngima mar miriambo.
Gijiwo joma timbegi mono,
mondo omi kik ngʼato
olokre owe timbene maricho.
Giduto gichalo Sodom ne an;
jo-Jerusalem chalo gi Gomora.”
15 Emomiyo, ma e gima Jehova Nyasaye Maratego wacho kuom jonabi:
“Anami gicham chiemo makech
kendo modh pi motimo sum,
nikech koa kuom jonabi mag
Jerusalem kia Nyasaye oselandore e piny ngima.”
16 Ma e gima Jehova Nyasaye Maratego wacho:
“Kik uchik itu ne gigo ma jonabi koronu;
gipongʼo itu gi geno mag miriambo.
Giwachonu fweny moa e pachgi giwegi,
ok moa e dho Jehova Nyasaye.
17 Gisiko giwachone jogo ma jara ni,
‘Jehova Nyasaye wacho: Unubed gi kwe.’
Kendo ne jogo maluwo timbe achach mag chunjegi wacho ni,
‘Onge gima biro hinyowa.’
18 To en ngʼa kuomgi mosechungoe
kar ngʼado bura mar Jehova Nyasaye,
mondo one kata owinji wachne?
19 Neuru, apaka mar Jehova Nyasaye
nomwomre gi mirima,
ka kalausi mafuyo e wiye joma timbegi richo.
20 Mirimb Jehova Nyasaye ok nodog
chien nyaka one ni ochopo thoro mar chunye.
E ndalo mabiro iniwinj tiende malongʼo.
21 Ne ok aoro jonabigi,
kata kamano giseringo gi wechegi;
ne ok awuoyo kodgi,
to kata kamano gisekoro wach.
22 To kane ginyalo chungoe
kara mar ngʼado bura,
dine gilando wechena ne joga
kendo gilokore gia e yoregi mamono,
kod timbegi mamono.”
23 Jehova Nyasaye wacho niya,
“Ok an Nyasaye mantie machiegni kende,
to an Nyasaye man mabor bende.”
24 Jehova Nyasaye wacho niya,
“Bende ngʼato nyalo pondo
kuonde mopandore mondo omi kik anene?
Donge apongʼo polo gi piny?”
25 Jehova Nyasaye wacho niya, “Asewinjo gima jonabi makoro e nyinga gi miriambo wacho. Giwacho ni, ‘Ne aleko! Ne aleko!’
26 Nyaka karangʼo ma gigi nosik e chunje jonabi mariambogi, makoro gigo moa e pachgi giwegi?
27 Giparo ni lek ma ginyisore giwegi nomi ji wigi nowil gi nyinga, mana kaka wuonegi wigi nowil koda kaluwore gilamo mane gilamogo Baal.”
28 Jehova Nyasaye wacho niya, “We janabi man-gi lek owach lekne, to we ngʼat man giwachna owache gadiera. Nimar en angʼo ma miudhwe nyalo timo gi cham?”
29 Jehova Nyasaye wacho niya, “Donge wachna chalo gi mach kendo ka nyundo matoyo kidi matindo tindo?”
30 Jehova Nyasaye wacho niya, “Emomiyo amon gi jonabi makwalo weche ma giwacho ni oa kuoma e kindgi giwegi.”
31 Jehova Nyasaye wacho niya, “Ee, ok ahero jonabi ma milo lewgi giwegi kagiwacho ni, ‘Jehova Nyasaye owacho.’ ”
32 Jehova Nyasaye wacho niya, “Adiera, ok ahero jogo makoro lek mag miriambo. Ginyisogi kendo giwito joga gi miriambo mag-gi maonge korgi gi atachgi, to ne ok aorogi kata yierogi. Ok gimi jogi ohala kata matin,” Jehova Nyasaye owacho.
Wach mar miriambo kod jonabi ma jo-miriambo
33 “Ka jogi, kata janabi kata jadolo, openji ni, ‘Wach mar Jehova Nyasaye en mane?’ To penjgi ni, ‘Wach mane? Anajwangʼu, Jehova Nyasaye owacho.’
34 Ka janabi kata jadolo kata ngʼato angʼata owacho ni, ‘Ma en wach mar Jehova Nyasaye,’ to anakum ngʼatno kod joode duto.
35 Ma e gima ngʼato ka ngʼato kuomu siko wachone osiepne kata watne: ‘Dwoko Jehova Nyasaye en angʼo?’ kata, ‘En angʼo ma Jehova Nyasaye wacho?’
36 To kik ichak iwach kendo ni, ‘wach mar Jehova Nyasaye,’ nikech wach ngʼato ka ngʼato owuon ema bedone wach maber bangʼe ijaro weche Nyasaye mangima, Jehova Nyasaye Maratego ma Nyasachwa.
37 Ma e gima usebedo ka unyiso janabi: ‘Jehova Nyasaye miyi dwoko mane?’ kata, ‘Jehova Nyasaye osewacho angʼo?’
38 Kata obedo ni iwacho ni, ‘Ma e wach mar Jehova Nyasaye,’ to ma e gima Jehova Nyasaye wacho: Ne itiyo gi weche ka iwacho ni, ‘Ma e wach mar Jehova Nyasaye,’ kata obedoni ne awachonu ni kik uwach ni, ‘Ma e wach mar Jehova Nyasaye.’
39 Emomiyo, adiera wiya nowil kodu kendo ma agolu oko e nyim wangʼa kaachiel gi dala maduongʼ mane amiyou kod wuoneu.
40 Anakelnu wichkuot manyaka chiengʼ ma en wichkuot ma wich ok nowilgo.”