48
Wach kuom Moab
To kuom Moab:
 
Ma e gima Jehova Nyasaye Maratego, ma Nyasach Israel wacho:
“Mano kaka nobed malit ne Nebo,
nimar enokethe.
Kiriathaim nokuod wiye
kendo enomake;
kar pondogi nobed kama
inyiero kendo nomuke.
Pak mar Moab ok nobedi kendo;
ji nochan kethruokne ei Heshbon kagiwacho kama:
‘Biuru, watiek pinyni.’
Yaye joma odak Madmen,
un bende ligangla nolawu mulingʼ thii.
Winj ywak moa Horonaim,
ywak mar duwruok maduongʼ gi kethruok.
Moab nokethi;
nyithinde matindo noywagre.
Giidho ka giluwo yo madhi Luhith,
gi ywak malit ka gidhi;
e yo maridore kadhi Horonaim
kendo ywak malit mar kethruok winjore.
Ringuru! Ringuru ukony ngimau;
muchal gi bungu manie thim!
Nikech ugeno kuom timbeu kod mwandu mau,
un bende nomaku,
kendo Kemosh noter e twech,
kanyakla gi jodolo mage kod jotelo mage.
Jaketh gik moko nobi e dala
ka dala kendo onge dala ma notony.
Holo noum kendo got mar mesa nomuki,
nikech Jehova Nyasaye osewacho.
Ket chumbi kuom Moab,
nimar enotieke;
miechgi nodongʼ gunda,
maonge ngʼama nodagi eigi.
 
10 “Okwongʼ ngʼat mayom yom e tich Jehova Nyasaye!
Okwongʼ ngʼat ma okano liganglane ma ok ochwerogo remo!
 
11 “Moab oseyweyo chakre tin-ne,
ka divai mowe mos e aguche,
ma ok ool koa ei agulu achiel
kiloko machielo kendo pod ok odhi e twech.
Omiyo ndhathe pod nikare,
kendo tik mare ok olokore.”
12 Jehova Nyasaye wacho niya,
“Kinde biro, ma anaor ji manopuke oko,
kendo gini ole oko;
giniwe agulni mage nono kendo toyo agulni mage.
13 Eka Moab wiye nokuodi gi Kemosh,
mana kaka od Israel wiye nokuot,
kane gin-gi geno kuom Bethel.
 
14 “Ere kaka inyalo wacho ni, ‘Wan jokedo,
ji mathuondi maroteke e lweny’?”
15 Ruoth, ma nyinge Jehova Nyasaye Maratego wacho niya,
“Moab nokethi kendo mier mage nomonji;
yawuote mabeyo noter e kar nek.
16 Podho mar Moab osechopone;
masichene nobi mapiyo.
17 Ywageuru, un jogo duto modak machiegni kode,
un jogo duto mongʼeyo humbe;
wachuru ni, ‘Mano kaka otur odunga mar loch maratego,
mano kaka otur ludh duongʼ!’
 
18 “Auru malo e duongʼu ulor piny
kendo ubedi e lowo motwo,
yaye jodak mar Nyar Dibon,
nimar ngʼama oketho Moab nobi
mondo oked kodu,
kendo otiek miechu madongo mochiel motegno gohinga.
19 Chunguru e bath yo kendo ungʼi,
un joma odak Aroer.
Penj dichwo maringo
kod dhako maringo, ni,
Angʼo mosetimore?
20 Okuod wi Moab,
nimar ongʼinje matindo tindo.
Dengi kendo iywag matek!
Land e Arnon ni Moab okethi.
21 Ngʼado bura osebiro
e got mar mesa kuom Holon,
Jaza kod Mefath,
22 kuom Dibon,
Nebo kod Beth Diblathaim,
23 kuom Kiriathaim,
Beth Gamul kod Beth Mion,
24 kuom Kerioth gi
Bozra, kuom mier duto mag Moab,
man mabor kod mago man machiegni.
25 Tung Moab ongʼad oko;
bade otur,”
Jehova Nyasaye ema owacho.
 
26 “Kete omer,
nimar osetamore winjo Jehova Nyasaye.
We Moab odwanyre e ngʼokne;
we obed gima ijaro.
27 Donge Israel ema ne ijaro?
Bende nomake e dier jokwoge,
ma itengʼone wiyi gi achaya sa moro
amora miwuoyo kuome?
28 Jwangʼuru miechu
kendo udagi e kind lwendni,
un joma odak Moab.
Chaluru ka akuch odugla maloso ode e dho rogo.
 
29 “Wasewinjo sunga mar Moab,
sungane mokadhore gi miriambo,
sunga mare gi jendeke
mare kod ngʼayi mar chunye.”
30 Jehova Nyasaye wacho niya,
“Angʼeyo mirimbe to oonge tiende,
kendo ngʼayi mage ok nyal gimoro.
31 Emomiyo aywak kadengo kuom Moab,
nimar kuom Moab duto aywak,
aywago jo-Kir Hareseth.
32 Aywagou, kaka Jazer ywak,
yaye mzabibu mag Sibma.
Bedeni kar machopo e nam;
negichopo nyaka e nam mar Jazer.
Jaketh gik moko osepodho e olembegi
mochiek kod olemo mar mzabibu.
33 Ilo gi mor orumo e puoth olembe
kod puothe mag Moab.
Asechungo chwer mar divai koa
e kuonde mibiyogie;
onge ngʼama nyonogi gi koko mar ilo.
Kata obedo ni nitiere koko,
ok gin koko mar ilo.
 
34 “Dwond ywak mag-gi winjore
koa Heshbon nyaka Eleale gi Jahaz,
koa Zoar nyaka chop Horonaim gi Eglath Shelishiya,
nimar kata pige mag Nimrim bende osetwo.
35 E Moab anatiek jogo matimo misengini
e kuonde motingʼore gi malo,
kendo ma wangʼo ubani ne nyisechegi,”
Jehova Nyasaye ema owacho.
36 “Omiyo chunya ywagorene Moab ka asili;
oywagore ka asili ne jo-Kir Hareseth.
Mwandu mane giyudo oserumo.
37 Wich ka wich oliel
kendo yie tik ka yie tik ongʼad oko;
lwedo ka lwedo otongʼ
oko kendo nungo ka nungo oum gi law ywak.
38 Ewi tat udi duto man Moab
kendo e laru mar galamoro
onge gimoro makmana ywak,
nimar aseketho Moab ka
agulu motore maonge ngʼama dwaro,”
Jehova Nyasaye ema owacho.
39 “Mano kaka otieke! Mano kaka gidengo!
Mano kaka Moab loko ngʼeye kopondo nikech wichkuot!
Moab osebedo gir ajara,
gima bwogo ji duto man bute.”
40 Ma e gima Jehova Nyasaye wacho:
“Ne! Otenga fuyo kochiko piny,
oyaro bwombene ewi Moab.
41 Kerioth nomaki
kendo kuondegi mag pondo nokaw.
E odiechiengno chunje mag jolwenj Moab
nochal gi chuny dhako mamuoch kayo.
42 Moab notieki kaka oganda
nikech ne otamore winjo Jehova Nyasaye.
43 Masira maduongʼ gi bur matut
kod otegu ritou, yaye jo-Moab,”
Jehova Nyasaye ema owacho.
44 “Ngʼatno manotem tony
nikech masira nolwar e bur matut,
ngʼatno manotem kawuok ei bur matut,
nomak gi obadho;
nimar anakel magi
kuom Moab e higa mar kum,”
Jehova Nyasaye ema owacho.
 
45 “E tipo mar Heshbon
joma noringo odongʼ ka ok nyal,
nimar mach osemoko liel Heshbon
kendo ligek mach osewuok e dier Sihon;
owangʼo lela wangʼ Moab,
kod choke wich mag jongʼayigo!
46 Mano kaka inine malit, yaye Moab!
Jo-Kemosh otieki;
yawuoti oter e twech,
kendo nyigi oket wasumbini.
 
47 “Kata kamano anaduog gweth mag Moab
e ndalo mabiro,”
Jehova Nyasaye ema owacho.
Ma e giko mar ngʼadone Moab bura.