Zaburi 7
Wend shigaion mane Daudi owero ne Jehova Nyasaye kuom Kush ja-Benjamin.
1 Yaye Jehova Nyasaye ma Nyasacha, in e kar pondona;
Resa kendo igola e lwet joma lawa duto,
2 nono to gibiro kidha kaka sibuor kidho gik moko.
Kendo gibiro yiecha matindo tindo maonge ngʼama diresa e lwetgi.
3 Yaye Jehova Nyasaye Nyasacha, kapo ni asetimo gima kamano adieri
kendo lweta osetimo gima rach,
4 kaponi asetimo marach ni ngʼama onge koda gi wach
kata kapo ni asemayo wasika kaonge gima omiyo,
5 to yie ni wasikano mondo olawa mi juka;
we ginyon ngimana piny e lowo,
mi gimi anind e buru mar lowo.
Sela
6 Aa malo, yaye Jehova Nyasaye, ka in gi mirima
aa malo irad gi gero mar wasika.
Chiew, Nyasacha; chiew inyis adierana.
7 We chokruoge mag ogendini olwori koni gi koni.
Ngʼad negi bura gie kom loch mari man malo;
8 Jehova Nyasaye mondo ongʼad bura ne ogendini.
Ngʼadna bura, yaye Jehova Nyasaye,
kaluwore gi ngimana makare,
ngʼadna bura, yaye Nyasaye Man Malo Moloyo,
kaluwore gi ngimana moriere tir.
9 Yaye Nyasaye makare,
In ema inono pach ji gi chunje ji,
tiek timbe mamono mag joma richo
mondo imi joma kare odag gi kwe.
10 Okumbana en Nyasaye Man Malo Moloyo,
ma reso joma chunygi oriere tir.
11 Nyasaye en jangʼad bura makare;
en e Nyasaye matoyo mirimbe pile ka pile.
12 Ka ok oloko pache
to obiro piago liganglane;
obiro dolo okumbane mi otwe tondene.
13 Oseiko gige mag lweny mager;
oiko asernige makakni ka mach.
14 Ngʼama iye okuot gi gik maricho
kendo ma yach gi chandruok nywolo yamo nono.
15 Ngʼama loso bur kendo kunye maber
podho e bure mokunyono.
16 Chandruok mokelo gaje en owuon;
timbene mag mahundu dwogone e wiye owuon.
17 Abiro goyo erokamano ne Jehova Nyasaye nikech en ngʼama kare
kendo abiro wero wend pak ne nying Jehova Nyasaye Man Malo Moloyo.