M̃aki Nalua Nap̃a
YOANE
Siriyuia
Visayuena Na Tusi Nene
Suniena plas na tusi nini
E m̃aki kiena Yoane na lua, Yoane pio si naga sape “nasumonena”, a pisa ke sape siria “pa sira tai nap̃a Ntewa pisirlua naga”, a sape siri m̃ena “pa narina lala”. Kinasnen visena lalua nene “sira” amio “narina lala”, tesape naga pe pisa re sira tai amio narina lala, ana pisa ke “sum̃are” amio “nalelagaena lala”. M̃aki nini pisa panila vena sinela sisi la m̃a silaga, a naga pisa panila sape monar avisuar ruru la, vena navianena la nap̃a kiela vianiena la pe mesmesu re poli ve aimi akila kare la re e kiela vianiena na visokanena lala.
Komp̃asnen tusi la na nini
Visena p̃esa 1-3
Li nalelagaena lala monar sinela si yaru lala 4-6
Visena na visap̃egeen li nalelagaena lala 7-11
Visena maro 12-13
1
Visena p̃esia
1 Inu nasumonena marua nesiri m̃aki nini pimi pan ko, sane ope sira tai nap̃a Ntewa pisirlua ko, ana narum̃a wa m̃ena lala. Sineu si pap̃isi na vitawe amiuena sina e m̃aki nini, nesitom amiu pap̃isi, ana pe in ga taaga re poli, li na lelagaena tap̃ena m̃ena lala asitom̃al amiu silau.
2 Sineta sisi ita ke sanene vanon visena lelaga kiena ne Ntewa teke e kieta malena la rui, ana tom̃a e ita vano ve uro re sina pogos tai.
3 Nemlen wo amiu, sane lemamena, sineyeena, a sum̃arena, vim kome arimata Ntewa, amio narina Yesu Kristo, sike e ita, kila p̃elaga na lelagaena a sitomena vim ve keviu manene laa sane e ita silau.
Ataveve p̃elaga na sinesiena silaga
4 Nesape nevisawal van ko, nepisu narum̃a la p̃asia e yo nini rui, ana nekekaran la pap̃isi nap̃a nepisu la amial ruru ke e p̃elaga na visena na lelagaena po pap̃isi, sa nap̃a Arimata pisa pan ita.
5 Auia, nepisu sur nene, ana nesape neiilaar amiu sina, vena alogear kiena navisaluaena la, nap̃a ita tetol sumo e purp̃es rui, sa nap̃a ve nevisa re sur viu tai van amiu, ana nevisawal ga visena m̃a nena nene, nap̃a nesape ita monar sineta sisi ita silau.
6 Visae sinetan tesape tekila ve sa nene, naga kana mrapa sa nini: monar telogear visena kiena ne Ntewa. A kiena pupia navisaluaena nap̃a temloge nanua rui pimi tol nagane pisa sape monar teiali silau e p̃elaga na sinesiena.
7 Yeririna na visokanena lala la mokliu asike pa e yomarava rui, vena vilonen sitomena kiena ne yeririna lala. La apisa ke asape Yesu naga pe yar ga tai maran taaga ga sa ga ita, pe sinelan re asape yar la alelaga e Yesu poli, nap̃a asape pe Navisaarena pimi kome Ntewa a pe natamalia itaena. Yar la na sa nene, ape yar na tap̃alien yeririna ga lala, ape nasinekar lala kiena ne Kristo.
8 Visae ve sanene, monar avisuar ruru amiu e visena la ne sanene, vena ve akila pal re sina ga malena wo nap̃a memiyum̃aen m̃areran vanon amiu. Monar asum̃al m̃arera ga, p̃isi na akilia atol kiamiu nalaena nowo punu ga sirau.
9 Yar nap̃a sum̃alu, pula petan kove pa vanua, pe mlelaga re si e na vianena na Kristo, naga pe pe kiena ne re si Ntewa poli. Ana yar nap̃a sum̃a ruru ga loyum̃a e kieta visena na lelaga lala, Ntewa arimata amio narina asike e naga.
10 Visae akirawal lala tai imi m̃alivin amiu, ana pe pisa re visena la nap̃a mesmes sa nap̃a kieta na kilapianena poli, aligan lua si naga vano. Ve aure re naga va e m̃amiu yum̃a lala, ve aurear re naga su amio amiu,
11 visae peraga, amiilaar ke naga pe na kilaen kiena yum̃aena viowa nene pa ke metava ne.
Visena maro
12 Visena moki navisaena sike ga wa, ana pe sineun re neligan se e m̃aki nene poli. Yoko nekilalia nevim nevisu amiu ga, vena tekilia tevisi ruru ga van ita e ga e marata. Visae ve sanene naga po manene laa sane, yoko ita punu ga tekilia teloge wo vap̃isi.
13 Luem̃a tap̃ena ta nene, nap̃a Ntewa pisirlar naga sum̃alu sa nap̃a ko, narina m̃ena ga lala asike e nini, apisa ke asape Ntewa visa ruru amiu.
Nesape naga ga nene yo, nap̃a nesape nevisa, visena maro ga e nene.