3
Jesu Wa Kuneneba okubita Mushe
1 Cwalehe, anyi abaange no kukena, anyi mu tabelwe ku kwisanwa na ku wilu, mu lemuhe Jesu, omutumiwa ni mupulisita mukulu no tumelo yetu eyi twamba.
2 Na kusepahala kwa woyo ona kumu keta, kanyi ngeeso Mushe aba ana ku sepahala mu ndoo ya Nyambe.
3 Kakuli Jesu kame akutekiwa onene mu kanya eyi ibita Mushe kanyi omuyaki no ndoo aba akutekiwa onene okubita endoo.
4 Kakuli endoo einjili ni injili kame ili ni munu ona kwiyaka, kono omuyaki no inu yonje Nyambe.
5 Cwale Mushe kame ana ku sepahala mu ndoo ya Nyambe kanyi omubika, aba ana ku paka einu eyo ina ku fanena okwambiwa kulubala.
6 Kono Kilesite na kusepahala mu ndoo ya Nyambe kanyi Omwana. Cwale aci kame tuli asindoo yaye nji kame toongoteta mu tumelo yetu ni ukukumusa mu sepo yetu.
Emamela Kwawo no kwa Pumena
7 Abakulingeso, kanyi Emebo No Kukena aba yamba nji,
“Balelo aba mu yupa eliywi lyaye,
8 mu lese oku tatafaza emicima mu ku futuka,
kanyi ba liywaa liya mu na kwetekiwa
mu lihalaupa.
9 Omo anjekulyenu aba ana ku neteka,
mi kame ana mono emisebezi yange ba myaka makumi anee (40).
10 Mulibakaelyo kame nina kutinisiwa ku lusika olo ni kwamba nji,
‘Kame ayauluka enako yonje mu micima yoo,
Mi kasi limuka etindila tange.’
11 Kanyi aba ni kweta mu kutweba kwange nji,
‘Ka tamba okwingena mu pumulo yange!’ ”
12 Abaange mu tokomele, omunjili kwaayi alese okulumelela okwiiba ni mucima no kwapumena okumi twaletela okutunda kwa Nyambe no ku yoya.
13 Kono mu kususuweze omunjili ku munjili mu liywaa ni liywaa, konji fela aba liisaniwa balelo, nji kuulwe kwaanyi woyo so tatafala omucima mu ku komiwa ku sibi.
14 Kakuli kame tuku tabela mwa Kilesite, konji aba satuleme etumelo yetu no weli mu koongola okutwala ku mamaneneno.
15 Eileminwe okwambiwa nji,
“Balelo aba mu yupa eliywi lyaye,
mu lese oku tatafaza emicima yenu,
kanyi mu kufutuka kwenu.”
16 Anyine awo ana kuyupa mi sebeli amu shamaeta okumulwisa? Kasa nji neli onje awo ana ku tunda mu Egepita munji no ketelelo ya Mushe?
17 Mi anyine awo ana kutinisa Nyambe emyaka ina kukwana makumi anee? kasa nji neli awo ana kutenda esibi awo etinyutu too natikukwela ni kufa mu lihalaupa?
18 Mi kwa nyine awo ana kwetela nji katamba okwengena mu pumulo yaye, kono neli kwawo ana kuulwa oku mukuteka.
19 Cwale kame tumona nji kasi kutwesa okwingena kakuli kasi kupumena.