15
Tej tok kychmoꞌn Ttanim Dios kyibꞌ toj Jerusalén
1 Tojjo ambꞌil anetziꞌn, jun jteꞌbꞌin xjal otaq cheꞌx toj txꞌotxꞌ te Judey, tuꞌn kykanin toj tnam Antyokiy, ex xi kyxikybꞌin jun xnaqꞌtzbꞌil kye nimil, ex kyqꞌma qa nlay chi klet, qa mina s-ok kyqitin jun kyechil tiꞌj kytzꞌumil, tzeꞌnkuxjo otaq tqꞌma Moisés toj Tuꞌjil Tyol Dios.
2 Me atzin te Pabl ex Bernabé nimku i jaw chꞌotj kyukꞌaxjal. Me atzaj teꞌ tjapin bꞌajjo yol, bꞌeꞌx i xi chqꞌoꞌn Pabl ex Bernabé, junx kyukꞌa junjun nimil, tuꞌn kyxiꞌ tzma Jerusalén tuꞌn kyyolin kyukꞌa tsanjil exqe nejinel toj Ttanim Dios, tiꞌj tkyaqiljo a otaq kyij ttzꞌibꞌin Moisés.
3 Otaqtzin chex chqꞌoꞌn ikyjo tuꞌn Ttanim Dios toj Antyokiy; atzaj teꞌ kyikyꞌ toj txꞌotxꞌ te Fenicia ex Samaria, xi kyqꞌmaꞌn kye nimil anetziꞌn, qa otaq kyij kytzaqpiꞌn aye nya Judiy a nbꞌanttaq kyuꞌn, tuꞌn kyok lipe tiꞌj qMan Dios. Tuꞌnjo tqanil ikyjo, bꞌeꞌx i ja tzalaj tkyaqil nimil.
4 Tej kykanin Pabl ex Bernabé toj Jerusalén, i kꞌmet tukꞌa tzaljbꞌil kyuꞌn tsanjil, junx kyukꞌa jniꞌ nejinel ex tkyaqil Ttanim Dios. Xitzin kyyolintz tkyaqiljo otaq bꞌant kyuꞌn, noq tiꞌj tbꞌi Dios.
5 Me kyxol Ttanim Dios antza, iteꞌtaq jun chꞌuq Parisey, a otaq chi nimin. Jaw weꞌks, ex kyqꞌma kyjaluꞌn: Il tiꞌj tuꞌn tok kyqitiꞌn jun kyechiljo nimil, a nya Judiyqe ikyxjo tzeꞌnku qeꞌ; quꞌn ikytzin knimitiljo tkyaqil tkawbꞌil Moisés tibꞌaj qchwinqil, a awo aj Judiyqo.
6 Oktzin kychmoꞌn kyibꞌjo tsanjil exqetziꞌn jniꞌ nejinel, noq tuꞌn kyximin tiꞌj tkyaqiljo ikyjo.
7 Ilaꞌ or bꞌaj chꞌotj. Atzaj teꞌ tjapin bꞌaj kyyol, jawtzin weꞌks Pegr, ex tqꞌma: Ayiꞌy werman, bꞌin kyeꞌ kyuꞌn, qa atxix ojtxe, o chin skꞌeta tuꞌn qMan Dios kyxola, tuꞌn tqꞌmetjo Tbꞌanil Tqanil kolbꞌil kye xjal nya Judiyqe, tuꞌntla kynimin.
8 Ex tuꞌn tojtzqiꞌntaq te Dios kyanmin, xi tqꞌoꞌn kyoklin, ex xi tqꞌoꞌn Xewbꞌaj Xjan toj kyanmin te jun techil qa o chi nimin tiꞌj, ex qa nya il tiꞌj jun techil tiꞌj kytzꞌumil, ikyxjo tzeꞌnku qeꞌ, awo aj Judiy.
9 Tuꞌntzintzjo, junx qten kyukꞌa twutz Dios, quꞌn o txꞌixpit kychwinqil noq tuꞌn kynimbꞌil, ikyxjo tzeꞌnku qe.
10 ¿Tiquꞌntzin njaw kynimsin kyeꞌ kyibꞌ twutz Dios, tuꞌn t-xi kyqꞌmaꞌn kye nimil nya Judiyqe, qa il tiꞌj tuꞌn tkubꞌ nimit tkyaqil tkawbꞌil Moisés tibꞌajjo kychwinqil xjal, ex naꞌmx tbꞌantqe qniminte, exqetziꞌn ojtxe qxeꞌchil? Noq ma tzꞌok kytzꞌaqtzin kyejiꞌy mikyxi te Diosjo ntqꞌmaꞌn.
11 Awotzinqe nxi qnimin qa kloꞌnqo toj il nya tukꞌa juntl tiꞌ, chi Pegr, qalaꞌ noq tuꞌn t-xtalbꞌil qAjaw Jesús, ikyxjo tzeꞌnku kye nimil nya Judiy.
12 Tbꞌajlinxiꞌ ikyjo, kykyaqilx kubꞌ numle, exsin kubꞌ kybꞌiꞌn kyyol Bernabé ex Pabl, a nchi yolintaq tiꞌj tkyaqiljo tbꞌanil techil exqetziꞌn nim kyoklin, a otaq bꞌant kyuꞌn kyxoljo aj nya Judiyqe, me noq tuꞌn attaq Dios kyukꞌa.
13 Atzaj teꞌ tjapin bꞌaj kyyol, jawtzin yolin Santyaw ex tqꞌma: Chin kybꞌintza, werman.
14 Ma tzaj tqꞌmaꞌn Pegr qe, tzeꞌn tten xi tqꞌoꞌn Dios kyoklin ayeꞌ nya Judiyqe exqotzintz, tuꞌn qok qkyaqilx te Ttanim Dios.
15 A qmujbꞌil qibꞌ kyukꞌa nya Judiyqe, bꞌeꞌx qꞌumle toj Tuꞌjil Tyol Dios kyuꞌn yolil Tyol. Chiꞌ kyjaluꞌn:
16 Tbꞌajlinxitziꞌn luꞌn, chin ul juntl majla nikꞌulte tkawbꞌil tyajil David, a nmaq kawil ojtxe, a ma tzꞌel xitj,
tuꞌntzin tel wen juntl majltz,
17 tuꞌntzintla kykyaqilxjo Judiy ex nya Judiyqe, a at kyoklin noq tiꞌj tumil nbꞌiy, nchi jyon wiꞌja, a ayiꞌn tAjaw Tkyaqil.
18 Ate tAjaw Tkyaqil qꞌman teꞌ jniꞌxjo luꞌn, atxix ojtxe.
19 Tzuntzin nkubꞌ nbꞌisintza, chi Santyawjo, qa nya il tiꞌj tuꞌn tkubꞌ kybꞌinchin aye nya Judiyqe tkyaqiljo nbꞌant quꞌn, a awo Judiyqo.
20 Me tuꞌntzin ntiꞌ qꞌoj kyxoljo nimil Judiy ex nya Judiy, noq tuꞌn qbꞌinchbꞌin qxolx, iltzin tiꞌj tuꞌn t-xi tzꞌibꞌit jun uꞌj kyeꞌ nya Judiy, tuꞌn mina t-xi kychyoꞌn kychibꞌjiljo aluꞌmj, a nchi kubꞌ bꞌyet te chojbꞌil il kywutzjo txqantl kydiosxjal; ex tuꞌn mina txi kychyoꞌn kychibꞌjiljo aluꞌmj, a nchi jaw kyim, mo nchi jaw kyjtzꞌoꞌn kyibꞌ; ex tuꞌn mina tkubꞌ kytzqꞌajsiꞌn chikyꞌ te kychiꞌ; ex nya wen tuꞌn kykubꞌ kẍe kyukꞌa junxil qya, qa nya kyxuꞌjil.
Tzuntzin nxi nqꞌmaꞌntza ikyjo, quꞌn tkyaqiljo lo, manyor tzꞌilx toj qwutz awo Judiyqo. Me nya taj qMan Dios, tuꞌn tkux ikyꞌbꞌil qxol awo nimilqo, noq tuꞌn nya junxjo qbꞌinchbꞌin qxolx.
21 Me toj nwutza nya tuꞌn tel ikyꞌit tkawbꞌil Moisés, quꞌn toj tkyaqil tnam, nimku Judiy at, a o tzꞌel kynikyꞌ te tkyaqil tkawbꞌil Moisés, ex kyajxix tuꞌn tkubꞌ nimit tkyaqil; quꞌn atxix ojtxe nchi qꞌumlaj tiꞌj tkawbꞌil Moisés kyojileꞌ tkyaqil ja te nabꞌl Dios, tzeꞌnku nkubꞌ ikyꞌsitjo qꞌij te ajlabꞌl.
Tej tkubꞌ kytzꞌibꞌin tsanjil Jesús jun uꞌj kye nimil, a nya aj Judiyqe
22 Jaw kyskꞌoꞌn kye tsanjil exqe nejinel toj Ttanim Dios, jun jteꞌ ichin kyxol nimil, ex tuꞌn kyxi chqꞌet tzma toj tnam te Antyokiy. I xitzin chqꞌoꞌn kabꞌe nejinel kyxol, a Silas ex Judas, a Barsabásjo juntl tbꞌi, tuꞌn kyxiꞌ junx tukꞌa Pabl ex Bernabé.
23 Ex kye xi qꞌoꞌne jun uꞌj, a iky ntqꞌmaꞌn kyjaluꞌn:
Kchi xel qqꞌolbꞌiꞌn ayiꞌy erman, kꞌuꞌjlinqe quꞌn: Awoqejiꞌy tsanjil Jesús exqetziꞌn nejinel toj Ttanim Dios toj Jerusalén, nxi qtzꞌibꞌiꞌn kyeꞌy, a ayiꞌy nya Judiyqiꞌy ex najleqiꞌy toj Antyokiy, Siria ex Cilicia.
24 Bꞌiꞌn quꞌn, qa ilaꞌ xjal o chi kanin kyxola, me nya awoꞌy o qox chqꞌonkye, ex qa ma jawje kykꞌuꞌja tuꞌn kyyol, ex tuꞌntziꞌn, o chi jaw naja.
25 Tuꞌnpetziꞌn, ma qo kyija toj wen, tuꞌn kyxi chqꞌet jun jteꞌbꞌin qxola, tuꞌn kykanin kyukꞌiy, junx kyukꞌa qerman Bernabé ex Pabl, a kꞌuꞌjlinqexix quꞌn,
26 quꞌn ayetzin kye o txi kyqꞌoꞌn kyibꞌ te kyimin, noq tiꞌj tbꞌi Jesucrist, a tAjaw Tkyaqil.
27 Ex ma chex qchqꞌoꞌn Judas ex Silas, ayetzin chi yoliljo kyukꞌiy, tuꞌn t-xi kychikyꞌbꞌin tkyaqiljo ma bꞌaj qqꞌmaꞌn.
28 Bꞌaꞌn ma tzꞌele te Xewbꞌaj Xjan ex te qeꞌy, tuꞌn mina xkubꞌ kyniminjiꞌy tkyaqiljo tkawbꞌil Moisés, a tzeꞌnku nbꞌant quꞌn, a awoꞌy Judiyqoꞌy, qalaꞌ oꞌkxjo luꞌn:
29 Tuꞌn mina t-xi kychyoꞌn kychibꞌjiljo aluꞌmj, a nchi kubꞌ bꞌyet te chojbꞌil il kywutzjo txqantl kydiosxjal; ex tuꞌn mina t-xi kychyoꞌn kychibꞌjiljo aluꞌmj, a njaw kyjtzꞌoꞌn kyibꞌ; ex tuꞌn mina chi tzqꞌajsiꞌn tiꞌjjo chikyꞌ te kychiꞌy; ex nya wen tuꞌn kykubꞌ kẍeꞌy kyukꞌa junxil qya, qa nya kyxuꞌjila. Qa ma kubꞌ kytzyuꞌn kyibꞌa te tkyaqiljo lo, tbꞌanilxsin kybꞌinchbꞌintza ikyjo. Kykaꞌyinktzin kyibꞌtza.
30 Atzaj teꞌ kybꞌaj yolin, ex tej tbꞌaj kytzꞌibꞌin uꞌj, bꞌeꞌxsin i xiꞌtz toj Antyokiy. Atzaj teꞌ kykanin, oktzin kychmoꞌn Ttanim Dios, ex xi kyqꞌoꞌn uꞌj.
31 Atzaj teꞌ tjaw kyuꞌjiꞌn nimil toj Antyokiy, bꞌeꞌx i jaw tzalaj nimxix, quꞌn tuꞌn qꞌuqbꞌil kꞌuꞌjbꞌaj tzꞌibꞌin toj, qa nya il tiꞌj tuꞌn kybꞌinchin tiꞌj tkyaqiltaqjo nbꞌant kyuꞌn aj Judiy.
32 Ayetzin kye Judas ex Silas, a qꞌoꞌntztaq kyoklin tuꞌn qMan Dios te qꞌmal teꞌ Tyol, i nimsin kykꞌuꞌjjo nimil tuꞌn kyyol, ex xi kyqꞌmaꞌn, tzeꞌn tuꞌn tjaw kyin kyibꞌ tojjo kynimbꞌil.
33 Tbꞌajlinxiꞌ jun jteꞌbꞌin qꞌij ikyjo, bꞌeꞌxsin i meltzꞌajtz toj Ttanim Dios toj Jerusalén, ex kyij kyqꞌoꞌn jun qꞌolbꞌil te nukꞌbꞌil ex toj tbꞌanilxix.
34 Me bꞌeꞌx kyij Silas antza.
35 Ex atzin te Pabl ex Bernabé axsa i kyije kyeꞌ toj Antyokiy, ex junx kyukꞌa txqantl, i xnaqꞌtzin, ex i qꞌumlaj tiꞌj Tyol tAjaw Tkyaqil.
Tej t-xiꞌ Pabl toj tkabꞌ majin qꞌolbꞌil kye nimil
36 Tbꞌajlinxi jteꞌbꞌin qꞌij, xi tqꞌmaꞌn Pabl te Bernabé kyjaluꞌn: Qoꞌ juntl majl qꞌolbꞌil kyeꞌ erman toj tkyaqil tnam, jaꞌ o qꞌmete Tyol tAjaw Tkyaqil, tuꞌntzin tel qnikyꞌ te tzeꞌn iteꞌye.
37 Kutzin, chte Bernabé.
Me tajtaq Bernabé tuꞌn t-xiꞌ Juan, a Marksjo juntl tbꞌi, kyukꞌa.
38 Me nya bꞌaꞌn ele luꞌn toj twutz Pabl, quꞌn tuꞌn otaq tzꞌel tpaꞌn te Marks tibꞌ kyiꞌj, tej iteꞌtaq toj txꞌotxꞌ te Panfilia, ex tkyꞌeꞌtaq tuꞌn tten kyukꞌa toj taqꞌin Dios.
39 Nimx xaꞌyeꞌ chꞌotjin lo. Tuꞌntziꞌn, bꞌeꞌx el kypaꞌn kyibꞌ; atzin te Bernabé xi kꞌlente Marks, ex bꞌeꞌx i xiꞌ toj txꞌotxꞌ te Chipre.
40 Atzin te Pabl jaw tskꞌoꞌn Silas, ex xi oqxenin toj tqꞌaqꞌbꞌil tkꞌuꞌj tAjaw Tkyaqil kyuꞌn txqantl nimil.
41 Atzaj teꞌ kyikyꞌx toj txꞌotxꞌ Siria ex Cilicia, i nimsin kykꞌuꞌjjo nimil toj Ttanim Dios, a iteꞌtaq antza.