3
Tej tkubꞌ qꞌanit jun kox
1 Jun qꞌij, i xtaꞌj Pegr ex Juan toj tnejil ja te naꞌbꞌl Dios, teꞌ tok oxe or te qale, quꞌn antaq orjo te naꞌbꞌl Dios.
2 Tojjo ja anetziꞌn, attaq jun ichin kox te titzꞌjlin. Tzuntaq nxi qꞌiꞌn kykyaqil qꞌij ex nkubꞌtaq qꞌoꞌn ttxlaj jun nim ttzi ja, Ponix tbꞌi, tuꞌn tqanin tmobꞌitz kyeꞌ xjal nchi okxtaq.
3 Tej tlontej kox, teꞌ kykanin Pegr ex Juan antza, xi tqanin jun tmobꞌitz kye.
4 Tej tiwle kox tuꞌn Pegr, xi tqꞌmaꞌn te: Qo tkaꞌyitza.
5 Atzin tej kox xi kaꞌyin, kubꞌ tbꞌiꞌn, ex kubꞌ tnabꞌlin qa attaq tuꞌn t-xi qꞌoꞌn te.
6 Me ante Pegr xi tqꞌmaꞌn: Ntiꞌ weꞌ npwaq; me kxel nqꞌoꞌn tey a at weꞌy. Tiꞌj tipin tbꞌi tAjaw Tkyaqil, a Jesucrist aj Nazaret, weꞌksa ex kux bꞌeta.
7 Tej tqꞌmaꞌnte Pegr ikyjo, ok ttzyuꞌn tman qꞌobꞌjo kox, ex jaw tjkꞌuꞌn. Ex bꞌeꞌxsin ul kyanmin tqantz,
8 ex jaw lipin tej kox ex ok ten bꞌetil.
Bꞌeꞌxsin okxtz toj tnejil ja te naꞌbꞌl Dios, me nya xkoꞌn. Ex ok ten tꞌikypajil, ex nimsil tbꞌi qMan Dios.
9 Kykyaqilxjo lonte tej tbꞌet, ex tej tnimsin tbꞌi Dios,
10 bꞌeꞌx i jaw kaꞌylaj, ex bꞌeꞌx i jaw xobꞌ tiꞌjjo otaq bꞌaj tiꞌj kox, quꞌn tuꞌn ojtzqiꞌntaq kyuꞌn qa axjo ichin, a koxtaq, a qꞌuqletaq twutz nim ttzi ja, Ponix tbꞌi, a nqanintaq tmobꞌitz.
Tej tyolin Pegr tiꞌjjo tipin Jesús
11 Atziꞌn ichin otaq qꞌanit, bꞌeꞌx ok tzoje tiꞌj Pegr ex Juan. Kykyaqil xjal jaw kaꞌylaj, ex i xi rinin tuꞌn kykanin tojjo twutz ja, Salomón tbꞌi, jaꞌ taꞌtaqjo ichin, junx tukꞌa Pegr ex Juan.
12 Tej tlonte Pegr ikyjo, xi tqꞌmaꞌn kye: ¿Tiquꞌn nchi jaw kaꞌylaj kyeꞌ, ayiꞌy nxjalil, aj Israel? ¿Tiquꞌn nqo tzaj kykaꞌyiꞌn? ¿Ma awotzin qeꞌ quꞌnx qibꞌa, ma qo kubꞌ qꞌanin teꞌ ichin lo? ¿Ma tuꞌntzin qipiꞌn mo tuꞌn qwenila twutz Dios, ma bꞌant tbꞌetjo ichin lo?
13 Ate Dios, a tDios Abraham, Isaac, Jacob ex kykyaqil qe ojtxe qxeꞌchil, a o tzaj qꞌonte nimxix toklin Jesús, a taqꞌnil. Ayiꞌy xi qꞌonte kye kawil te Rom, ex mix kytziyiꞌy tuꞌn t-xi tzaqpet, tej tqꞌmante Pilat.
14 Me tuꞌn tchꞌuẍil kyanmiꞌn, kykyꞌetaqa tuꞌn t-xi kyqaniꞌn tuꞌn ttzaqpaj Jesús, a xjan ex wenxix, me kyja xi kyqaniꞌn tuꞌn ttzaqpaj jun bꞌyol xjal.
15 Ex ikytzin kubꞌe kybꞌyoꞌnejiy Jesús, a tAjaw chwinqil; me jaw anqꞌin juntl majl tuꞌn Dios. Ex twutzxixjo anetziꞌn, quꞌn o qliꞌy, ex bꞌiꞌn quꞌn.
16 Noq tuꞌn qnimbꞌila tiꞌj tipin tbꞌi Jesús, ma qꞌanit teꞌ ichin, a n-ok kykaꞌyiꞌn ex kyojtzqiꞌn. Axjo qnimbꞌila tiꞌj Jesús, atzin ma kubꞌ qꞌanin teꞌ te jun majx, ikyx tzeꞌnku ayiꞌy kykyaqilxa loqiꞌy nchi kaꞌyin tiꞌj.
17 Ayiꞌy nxjalil, chi Pegrjo, bꞌiꞌn wuꞌn qa ayiꞌy, junx kyukꞌa kynejila, a kawil aj Israel, i kubꞌ bꞌyoꞌnte Jesús; me mix ele kynikyꞌa te, qa ataq Tkꞌwal qMan Diosjo kubꞌ kybꞌyoꞌn.
18 Ayiꞌy kubꞌ bꞌinchinte il; me tuꞌn ikyjo, ate Dios japin bꞌaj Tyol, a otaq tqꞌma ojtxe, noq kyuꞌn kykyaqil yolil Tyol, qa iltaq tiꞌj, tuꞌn tkyim Crist, a Kolil kyiꞌja.
19 Tuꞌnpetziꞌn, kymeltzꞌintz kyibꞌa, ex kybꞌinchinku kyteꞌn twutz Dios, tuꞌntzin tnajsit kyila,
20 ex tuꞌn ttzaj tsmaꞌn qMan Dios kyꞌiwbꞌil kyeꞌy noq tuꞌn Jesús, a atxix ojtxe ok qꞌoꞌn te Kolil kyiꞌja.
21 Il tiꞌj, chi Pegr, tuꞌn tten Jesús toj kyaꞌj jaꞌlin, ex kmeltzꞌajil tzmaxi tojjo qꞌij, aj tkubꞌ tnikꞌuꞌn tkyaqil, ikyxjo tzeꞌnkuj tqꞌma, aj kyqꞌma xjan yolil Tyol Dios ojtxe.
22 Ex majxte Moisés qꞌmante kye ojtxe qxeꞌchil kyjaluꞌn:
Atziꞌn tAjaw Tkyaqil, a kyDiosa, kjawil qꞌiꞌnte jun yolil Tyol Dios kyxola tzeꞌnku weꞌ.
Kyniminkuy tkyaqiljo kxel tqꞌmaꞌn,
23 quꞌn tkyaqiljo a mina nkubꞌ nimin teꞌ yolil anetziꞌn, bꞌeꞌx kꞌwel yuchꞌin kyxolxjal, chi Moisésjo.
24 Ex kykyaqiljo yolil Tyol Dios, chi Pegr, tzaj xkye tukꞌa Samuel, ex jniꞌ txqantl, i yolin kyiꞌjjo qꞌij te jaꞌlin.
25 Ex ayetzin kyeꞌ o chi kyija toj wen tukꞌa Dios, ex tuꞌn ikyjo, etzilqiꞌy tiꞌj tkyaqiljo tqꞌma qMan Dios kyuꞌnjo yolil Tyol ojtxe. Ex ikyxjo, at kyokliꞌn tiꞌjjo kyij bꞌant tiꞌj tuꞌn Dios kyukꞌa ojtxe qxeꞌchil, quꞌn ikytziꞌn tqꞌma Dios te Abraham:
Kchi kyꞌiwlitiljo kykyaqil xjal twutz txꞌotxꞌ noq tuꞌn xkachmanbꞌaj, kchi elil anqꞌin tiꞌj tyajila.
26 Tej tjaw anqꞌin juntl majl Jesús tuꞌn Dios, chi Pegr, tnejil tzaj tsmaꞌn te kyeꞌy, ayiꞌy aj Judiyqiꞌy, tuꞌn kykyꞌiwlita, ex tuꞌn ttzaqpaj junjun kyeꞌ toj til.