3
Jesús nimxixtl toklin tzeꞌn te Moisés
1 Atzin jaꞌlin, ayiꞌy werman, saqxix taꞌye kyanmiꞌn twutz Dios, ex o chi txokliꞌy tuꞌn qMan Dios, tuꞌn kyoka te Ttanim ex te tja. Chi ximintzintza tiꞌj Crist, a Jesús, a smaꞌn tuꞌn Dios te onilqe, ex tok te tnejilxix pale te qe twutz Dios.
2 Atzin te Jesús jikyinxix twutz Dios tojjo toklin tzaluꞌn twutz txꞌotxꞌ, ikytziꞌn tzeꞌn te Moisés ok jikyin tojjo toklin toj tja Dios ojtxe.
3 Me atzin te Jesús nimxixtl toklin tzeꞌnku te Moisés, ikyxjo tzeꞌnku jun bꞌinchil ja nimxixtl toklin tzeꞌnku te ja.
4 Quꞌn tkyaqil ja, at jun bꞌinchilte, me ate qMan Dios bꞌinchilte tkyaqil tchꞌiꞌysbꞌin, noq tuꞌn Tkꞌwal.
5 Atzin te Moisés ok jikyin toj tja Dios, me noq tzeꞌnku jun aqꞌnil, ex tuꞌn tyolin tiꞌjjo a ktzajil tqꞌmaꞌn Dios te.
6 Qalatziꞌn te Crist, nya jun aqꞌnil, qalaꞌ Kꞌwalbꞌaj, ex jikyinxixjo tkawbꞌil qibꞌaj, a awo, tja Diosqo, qa ma japin quꞌn, ex qa ma qe qkꞌuꞌj te jun majx tiꞌjjo a nqo ayoꞌn tiꞌj toj kyaꞌj, ex nqo yolin tiꞌj tzaluꞌn twutz txꞌotxꞌ.
Jun ajlabꞌl o tzaj tqꞌoꞌn qMan Dios qe, noq tuꞌn qnimbꞌil
7 Tuꞌntziꞌn ikyjo, chitzin Xewbꞌaj Xjan toj Tuꞌjil Tyol Dios kyjaluꞌn:
Qatzin ma kubꞌ kybꞌiꞌn jaꞌlin, a ntqꞌman Tyol Dios,
8 mi kubꞌ kykujsin kyanmiꞌn tuꞌn kynimiꞌn,
tzeꞌnqekuꞌ kyxeꞌchila ojtxe,
ayeꞌ el kyiꞌjlin tajbꞌil Dios toj tzqij txꞌotxꞌ.
9 Ayeqetziꞌn kyxeꞌchila ojtxe, ayeꞌ el kyiꞌjlin wajbꞌila,
¿Ma mitzin xkylijiꞌy jniꞌ yekꞌbꞌil wipiꞌn toj kaꞌwnaq abꞌqꞌe?
10 Tuꞌntzin ikyjo, o tzaj nqꞌoja kyiꞌj, chi Diosjo.
Ex kukx ntxalpajjo kyanmin,
ex kukx nchi txalpajjo toj kychwinqil,
ex ntiꞌx nchi ximin tiꞌjjo wajbꞌila.
11 Tuꞌnpetziꞌn, chi Diosjo, tzaj nqꞌoja kyiꞌj,
ex xi nqꞌmaꞌn kye, tuꞌn mina chi okx tojjo Canaán,
a txꞌotxꞌ te ajlabꞌl, a bꞌantnin wuꞌn, tuꞌn kyajlan wukꞌiy.
12 Werman, tuꞌnpetziꞌn tkyaqiljo lo, kyajsintz tiꞌj kyanmiꞌn, tuꞌn mina chi txalpajiꞌy toj kynimbꞌila tiꞌj qMan Dios.
13 Qalaꞌ, kyqꞌonx kynabꞌla kyxolxa tkyaqil qꞌij, tzeꞌnku at ambꞌil; tuꞌntzin mi chi kubꞌ sbꞌuꞌniꞌy tuꞌn il, ex tuꞌn mina txi kykujsin kyanmiꞌn tiꞌjjo tajbꞌil qMan Dios.
14 Qa qaj tuꞌn qten junx tukꞌa Crist toj kyaꞌj, il tiꞌj tuꞌn qten waꞌlxix toj tkyaqil, tuꞌn qbꞌet wen toj qchwinqil, ex tuꞌn tqexix qkꞌuꞌj, tzeꞌnkuxjo tej xqo nimin te tnejil.
15 Tuꞌn ikyjo, chitzin Tyol Diosjo kyjaluꞌn:
Qatzin ma kubꞌ kybꞌiꞌn jaꞌlin, a ntqꞌmaꞌn Tyol Dios,
mi kubꞌ kykujsin kyanmiꞌn tuꞌn kynimiꞌn tzeꞌnqeku kyxeꞌchila ojtxe,
ayeꞌ el kyiꞌjlin tajbꞌil Dios.
16 Tuꞌntziꞌn tkyaqiljo ikyjo, at ilaꞌ nxjelbꞌitza kyeꞌy:
Tnejil, ¿Ankyeqexixjo xi kykujsin kyanmin, a otaqxi kybꞌi Tyol Dios? ¿Nyapele ayeꞌ i etz tiꞌn Moisés toj txꞌotxꞌ Egipto?
17 Tkabꞌ, ¿Anqiꞌj tzaje tqꞌoj Dios toj kaꞌwnaq abꞌqꞌe? ¿Nyapela kyiꞌjjo i bꞌinchin il toj tzqij txꞌotxꞌ? Ex tuꞌn ikyjo, bꞌeꞌx i kyim.
18 Toxin, ¿Anqiꞌj tzaje tqꞌoj Dios, ex anqiꞌj kubꞌ tqꞌmaꞌn Dios, tuꞌn mi chi okxi tojjo txꞌotxꞌ te ajlabꞌl, a otaq txi tqꞌmaꞌn Dios kye? ¿Nyapela aye xjal, mix kubꞌe kynimine Tyol Dios?
19 Tuꞌntzintzjo, n-el qnikyꞌ te, qa mix i okxi xjal toj txꞌotxꞌ te ajlabꞌl, tuꞌn mix kubꞌe kynimine Tyol Dios.