6
Tej kykꞌaꞌchit jweꞌ mil ichin tuꞌn tipin Jesús
(Mt. 14:13-21; Mr. 6:30-44; Lc. 9:10-17)
1 Tbꞌajlinxitziꞌn ikyjo; bꞌeꞌx ikyꞌx Jesús tjlajxi Nijabꞌ te Galiley, ex axjo Tiberias tbꞌi.
2 Nimku xjal lipchex tiꞌj, quꞌn o bꞌaj kykaꞌyiꞌn yekꞌbꞌil teꞌ tipin o bꞌant, tej kybꞌaj qꞌanj yabꞌ tuꞌn.
3 Ex bꞌeꞌx jax twiꞌ wutz, ex antza kubꞌe qe qukꞌiy, a awoꞌy t-xnaqꞌtzbꞌin.
4 Chꞌixtaq tul kaniꞌn nintz qꞌij te Xjan Qꞌij, a n-ikyꞌ kyuꞌn aj Judiy, te naꞌbꞌlte kyelintz ojtxe toj Egipto.
5 Atzaj teꞌ t-xi tkaꞌyin Jesús, nimxtaqxjal o tzꞌok lipe tiꞌj, xi tqꞌmaꞌn te Lip: ¿Jaꞌtzin ktzajile qlaqꞌon kywa txqan xjal lo?
6 Xi tqꞌmaꞌn Jesús ikyjo, noq tuꞌn tnikyꞌbꞌajtz Lip tiꞌ ktqꞌmaꞌ tiꞌjjo lo, quꞌn bꞌintaql te Jesús tuꞌn, tiꞌ tuꞌn tkubꞌ tbꞌinchin.
7 Xitzin ttzaqꞌwin Lip: ¿Ma attzin qpwaq tuꞌn t-xi loqꞌbꞌaj txqan wabꞌj, tuꞌn txiꞌ tal kyinchaqjo kye?
8 Xitzin tqꞌmaꞌnljo junl t-xnaqꞌtzbꞌin, Andrés tbꞌi, a titzꞌin Simun Pegr:
9 Lu jun qꞌa lo, qꞌin jweꞌ wabꞌj tuꞌn, junxte nmaq triy, ex qꞌiꞌn kabꞌe tal netzꞌ kyiẍ tuꞌn, me ¿Ma akutzin kanin kyxoljo txqan xjal lo?
10 Tzaj ttzaqꞌwin Jesús qeꞌy, a awoꞌy t-xnaqꞌtzbꞌin: Kyqꞌmaꞌnxa kyeꞌ, tuꞌn kybꞌaj kubꞌ qe kykyaqil, quꞌn attaq tal kꞌul antza. Bꞌeꞌxsin i kubꞌ qeꞌ xjal, bꞌalaqa jun jweꞌ mil ichin.
11 I jaw ttzyuꞌn Jesúsjo wabꞌj, ex xi tqꞌoꞌn chjonte te Dios tiꞌj. Tbꞌajlinxi naꞌn Dios, tzaj tqꞌoꞌn qeꞌy, ex xi qsipiꞌn kyxoljo a qꞌuqejqetaq. Ex ikyx kubꞌ tbꞌinchin kyukꞌa tal kyiẍ; ex tzaj tqꞌoꞌn qeꞌy tuꞌn t-xi qsipiꞌn, noq jniꞌ tuꞌn tbꞌaj kyuꞌn.
12 Atzaj teꞌ kybꞌaj noj wen, tzaj tqꞌmaꞌn Jesús qeꞌy: Kychmoꞌnksjiꞌy tbꞌuchil, a ma kyij, tuꞌntzin ntiꞌx chꞌin tuꞌn tkubꞌ naj.
13 Atzaj teꞌ tjaw bꞌaj quꞌn, i noj kabꞌlajaj chiꞌl tiꞌjjo tbꞌuchil jweꞌ wabꞌj kybꞌajlin xi waꞌn kykyaqil xjal.
14 Tej tok kykaꞌyin tkyaqil xjal techil tipin Jesús, xi kyqꞌmaꞌn: Twutzxpentetz qa a ichin lo, a yolil Tyol Dios, a iltaq tiꞌj tuꞌn tul klolqe.
15 Me liwey el tnikyꞌ Jesús tiꞌj kyximxjal, qa kyajtaq tuꞌn tok kyqꞌoꞌn te nmaq kawil kyibꞌaj te jun majx. Tuꞌntziꞌn ikyjo, bꞌeꞌx el tpaꞌn tibꞌ Jesús kyiꞌj, ex bꞌeꞌx jax twiꞌ wutz tjunalx.
Tej tbꞌet Jesús tibꞌaj aꞌ
(Mt. 14:22-27; Mr. 6:45-52)
16 Atzaj teꞌ qok yupj, bꞌeꞌx o kuꞌxa, a awoꞌy t-xnaqꞌtzbꞌin, ttzi nijabꞌ,
17 ex antza o okxa qeꞌy toj jun bark, tuꞌn qpon kaniꞌn jlajxi tzma toj tnam Capernaum. Ex otaq qo ok qxopexix wen, ex naꞌmtaq tmeltzꞌaj Jesús.
18 Bꞌeꞌx tzaj jun nim kyqꞌiqꞌ xupil te aꞌ, tuꞌn tja pulj tiꞌj bark.
19 Tzmataq jun ajlabꞌ tukꞌa nikyꞌjin qxilin bꞌeta tibꞌaj nijabꞌ, tej t-xi qkaꞌyiꞌn Jesús, nbꞌettaq tibꞌaj aꞌ, tuꞌn tpon kanin tkꞌatz bark; ex bꞌeꞌx o jaw xobꞌa te, quꞌn mix ele qnikyꞌa tiꞌj.
20 Tzaj tqꞌmaꞌn Jesús qeꞌy: Mina chi jaw xobꞌa. Ayin wejiꞌy.
21 Ex bꞌeꞌx tzaj qkꞌmoꞌn Jesús tukꞌa tzaljbꞌil tuꞌn tokx toj bark, ex jun paqx o poꞌn tjlajxi aꞌ, jaꞌ iltaq tiꞌj tuꞌn qpon kaniꞌn.
Tej kyjyoꞌnxjal tiꞌj Jesús
22 Toj junxil qꞌij, ayetzin xjal otaq chi kyij tjlajxi nijabꞌ, tzaj kynaꞌnl qa noq junchꞌin bark attaq qnikyꞌin iqil kyexjal, a jaꞌ o xiyiy, ex nyajin Jesús okx qukꞌiy.
23 Ex ax qꞌijjo i kanin junjun bark, a tzajninqe toj tnam Tiberias, nchi pon kanin ttzi txꞌotxꞌ, nqayin jaꞌ o qo bꞌaj waꞌniꞌy, tej t-xi tqꞌoꞌn Jesús chjonte kyiꞌj wabꞌj.
24 Tej tbꞌaj kykaꞌyin qa ntiꞌtaq Jesús, ex ntiꞌqotaqla, bꞌeꞌx i okxkux kyoj bark tuꞌn kypon kanin jyolte toj tnam Capernaum.
Tej tyolin Jesús tiꞌjjo wabꞌj, a qꞌol chwinqil
25 Tej kyjlajinxjo xjal, jyet Jesús kyuꞌn, ex xi kyqꞌmaꞌn te: ¿Xnaqꞌtzil, jtojetzin tkanliꞌn tzaluꞌn?
26 I xi ttzaqꞌwin Jesús: Twutzxix kxel nqꞌmaꞌn kyeꞌy, qa nchi jyoꞌn wiꞌja noq tuꞌn noj kykꞌuꞌja wuꞌn, ex nya tuꞌn ma tzꞌel kynikyꞌa tiꞌjjo t-xilin techil wipiꞌn.
27 Tuꞌnpetziꞌn, mi tzꞌok tilil kyuꞌn tiꞌjjo wabꞌj te twutz txꞌotxꞌ, a kbꞌajil; qalaꞌ tzꞌokx tilil kyuꞌn tiꞌjjo wabꞌj te kyanmiꞌn, a kolbꞌil te jun majx. Quꞌn a Dios saj smaꞌn weꞌy, a ayiꞌn Tkꞌwal Ichin, tuꞌn nqꞌoꞌn chwinqil kyeꞌy, tzeꞌnku jun oyaj te jun majx. Quꞌn noq tuꞌn techil wipiꞌn, nyekꞌine qa ayiꞌn Tkꞌwal Dios.
28 Xi kyqanin xjal te: ¿Tiꞌtzin tuꞌn tkubꞌ qbꞌinchiꞌn tuꞌn ttzalaj Dios qiꞌja, ex tuꞌn tzaj tqꞌoꞌnjo oyaj anetziꞌn?
29 Ex i xi ttzaqꞌwin: Atziꞌn taj Diosjo tuꞌn tkubꞌ kybꞌinchiꞌn, noq tuꞌn kynimiꞌn wiꞌja, a ayiꞌn ẍin tzaj smaꞌn tuꞌn.
30 Xitzin kyqꞌmaꞌntz te Jesús: Qa twutzxix qa ma tzaj smaꞌn tuꞌn Dios, ¿Tiꞌtzin jun techiltz ktzajil tyekꞌiꞌn qeꞌy, noq tuꞌn qlontiꞌy, ex tuꞌn t-xi qnimintza? ¿Tiꞌtzin chꞌin ma bꞌanttz tuꞌn?
31 Qalatziꞌn kye qtzan qtaꞌẍ ojtxe i waꞌn tiꞌjjo wabꞌj, a maná, a xiꞌ tqꞌoꞌn Moisés tojjo tzqij txꞌotxꞌ, ikyxtaqjo tzeꞌnkuꞌ ntqꞌmaꞌn Tuꞌjil Tyol Dios: Xi tqꞌoꞌn kywa, aj kuꞌtz toj kyaꞌj.
32 Xi ttzaqꞌwin Jesús kye: Twutzxix kxel nqꞌmaꞌn kyeꞌy, nya te Moisés saj qꞌoꞌnte wabꞌj te toj kyaꞌj, qalaꞌ aku te nMaꞌn. Ikytzin wejiꞌy, ma chin tzaj tchqꞌoꞌn weꞌ te jun wabꞌj, a twutzxix te toj kyaꞌj.
33 Quꞌn atziꞌn wabꞌj, a maná, xi tqꞌoꞌn chwinqil kye xjal aj Judiy ojtxe, noq te jteꞌbꞌin qꞌij; me anteꞌ saj smaꞌn tuꞌn Dios, apente wabꞌjjo, a ayiꞌn, a ktzajil tqꞌoꞌn chwinqil te jun majx.
34 Xitzin kyqanintz te Jesús: Ay Tata, qꞌontzjiy wabꞌj qeꞌy junjun qꞌij, a xkuꞌtz toj kyaꞌj.
35 Bꞌeꞌx xi tqꞌmaꞌn Jesús kye: Ayin wejiꞌy a Wabꞌj, a qꞌolte chwinqil. Ankye teꞌ ma tzaj lipey wiꞌja nlayxpen tzaj te waꞌyaj tiꞌj; ex ankye teꞌ knimil wiꞌja, ex nlayxpen tzaj te kꞌwaj tiꞌj.
36 Me ma txi nqꞌmaꞌn kyeꞌy, me mi nchinx kynimiꞌn, exla qa ma chin kyliꞌy.
37 Quꞌn tkyaqiljo o tzaj tqꞌoꞌn qMan Dios weꞌy, ktzajil lipe wiꞌja; ex ajo ktzajil lipe wiꞌja, nlayx chi ex nlajoꞌn.
38 Quꞌn nya ma chin tzaj weꞌ toj kyaꞌj, tuꞌn tkubꞌ nbꞌinchiꞌn noqx alkye waja; qalaꞌ oꞌkx tuꞌn tkubꞌ nbꞌinchiꞌn a tajjo Dios, a saj smaꞌn weꞌy.
39 Ex atziꞌn taj nManjiꞌy, a saj smaꞌn weꞌy, tuꞌn mi naje jun xjal, ayeꞌ ma chi tzaj tqꞌoꞌn weꞌy; qalaꞌ tuꞌn kyjaw anqꞌin wuꞌn, aj tjapin bꞌaj tqꞌijil tzaluꞌn twutz txꞌotxꞌ.
40 Quꞌn atzin taj nManjiꞌy, tuꞌn kykyaqilxjo ma chi tzaj lipe wiꞌja, ayiꞌn Tkꞌwal Dios, ex nqe kykꞌuꞌj wiꞌja toj tkyaqil, atpen kye kychwinqil te jun majx, ex kchi jawil anqꞌin wuꞌn, aj tjapin bꞌaj tqꞌijil tzaluꞌn twutz txꞌotxꞌ.
41 Junjun aj Judiy i ok ten yolbꞌil tiꞌj Jesús, tuꞌn otaq tqꞌma qa aku wabꞌj ma kuꞌtz toj kyaꞌj.
42 Exsin i ok tentz yolbꞌilte kyxolile: ¿Nyapela a Jesúsjo lo, aj tkꞌwal Jse? Ex ojtzqiꞌn ttata quꞌn, tukꞌaxjo tnana. ¿Tzeꞌntzin ttentz ntqꞌmaꞌn qa toj kyaꞌj ma kuꞌtze?
43 Bꞌeꞌxsin i xi ttzaqꞌwiꞌn Jesús: Kytzaqpinxa tuꞌn kyyolbꞌiꞌn.
44 Mix aꞌl jun aku tzaj lipe wiꞌja, qa nya nMaꞌn saj qꞌmante. Ex qa ma qe kykꞌuꞌj wiꞌja, kchi jawil anqꞌin wuꞌn, aj tjapin bꞌaj tqꞌijil tzaluꞌn twutz txꞌotxꞌ.
45 Quꞌn kyojjo uꞌj kyij kytzꞌibꞌiꞌn yolil Tyol Dios ojtxe, ntqꞌmaꞌn kyjaluꞌn: Chi xel t-xnaqꞌtzin Dios kykyaqilch.
Tuꞌnpetziꞌn, kxel nqꞌmaꞌn kyeꞌy qa kykyaqiljo ma tzaj xnaqꞌtzin tuꞌn Dios, ex qa ma kubꞌ kybꞌiꞌn tukꞌa tkyaqil kyanmin, okpin kchi tzajil lipe kyeꞌ wiꞌja.
46 Mix aꞌl jun o tli twutz qMan Dios, qalaꞌ oꞌkqinxa, ayiꞌn, a ẍin tzaj tsmaꞌn.
47 Twutzxix kxel nqꞌmaꞌn kyeꞌy, ankye kxel nimin weꞌy, atpen te chwinqil te jun majx.
48 Ayin wejiꞌy a wabꞌj, a qꞌol teꞌ chwinqil anetziꞌn.
49 Ayetziꞌn qtzan kytaꞌẍa ojtxe, i bꞌaj waꞌn tiꞌjjo wabꞌj, a maná, a tzaj smaꞌn tuꞌn Dios toj tzqij txꞌotxꞌ te qꞌol chwinqil te twutz txꞌotxꞌ; me kykyaqilx bꞌeꞌx i bꞌaj kyim.
50 Me metzin weꞌ, ayin wejiꞌy, a wabꞌj xkuꞌtz toj kyaꞌj. Ankye qe kchi waꞌl tiꞌj, nlayxpin chi kyim kyeꞌ.
51 Ayin wejiꞌy wabꞌj itzꞌ, a kuꞌtz toj kyaꞌj te qꞌol te kychwinqilxjal. Ankye teꞌ kxel waꞌnte, k-anqꞌil teꞌ te jun majx. Atzin wabꞌj kxel nqꞌoꞌn, aku nchibꞌjila, a kxel nqꞌoꞌn te qꞌol chwinqil tkyaqilxjal twutz txꞌotxꞌ.
52 Me junjun kyxol aj Judiy i ok ten yolbꞌilte kyxolile: ¿Tzeꞌntzin tten tuꞌn t-xi tqꞌoꞌn xjal lo tchibꞌjil tuꞌn t-xi qwaꞌn?
53 Atzin te Jesús xi tqꞌmaꞌn kye: Twutzxix kxel nqꞌmaꞌn kyeꞌy, qa mi xi kywaꞌnjiꞌy nchibꞌjila, a ayiꞌn Tkꞌwal Ichin, ex qa mi xi kykꞌwaꞌnjiꞌy nchkyꞌela, ntiꞌ t-xilin kychwinqila tzaluꞌn twutz txꞌotxꞌ, ex ntiꞌ kyokliꞌn tiꞌjjo chwinqil te jun majx toj kyaꞌj.
54 Ikytziꞌn, alkye te kxel waꞌn teꞌ nchibꞌjila ex kxel kꞌwan teꞌ nchkyꞌela, at teꞌ tbꞌanil tchwinqil te jun majx; ex kjawil anqꞌintl wuꞌn, aj tjapin bꞌaj tqꞌijil tzaluꞌn twutz txꞌotxꞌ.
55 Quꞌn ajo nchibꞌjila, ante wabꞌjjo, a twutzxix, ex ajo nchkyꞌela, ex ikyxjo, ante kꞌwabꞌjjo, a twutzxix.
56 Ankye te kxel waꞌn teꞌ nchibꞌjila, ex kxel kꞌwaꞌn teꞌ nchkyꞌela, ante ma tzꞌok tmujbꞌin tibꞌjo wukꞌiy, ex ayiꞌn ma tzꞌok nmujbꞌin wibꞌa tukꞌa.
57 Quꞌn ajo wipiꞌn ex ajo nchwinqila tzajninqe tuꞌn qMan Dios itzꞌ, a saj smaꞌn weꞌy. Ikytzin wejiꞌy, alkye teꞌ kwaꞌl wiꞌja, at chwinqil te jun majx wuꞌn.
58 Ayin wejiꞌy wabꞌj, a twutzxix, a kuꞌtz toj kyaꞌj te qꞌol chwinqil te jun majx. Mikyxiꞌ tzeꞌnku te maná, a qꞌol chwinqil te twutz txꞌotxꞌ, a xi kywaꞌn qtzan qtaꞌẍ. Quꞌn ayetzin qtaꞌẍ, exla qa i waꞌn tiꞌj, me bꞌeꞌx i bꞌaj kyim. Me ankye te kwaꞌl tiꞌjjo wabꞌj lo, atpen teꞌ chwinqil te jun majx.
59 Tkyaqilxjo lo bꞌaj tqꞌmaꞌn Jesús, tej tbꞌaj xnaqꞌtzin tojjo ja te naꞌbꞌl Dios toj tnam Capernaum.
Tej tkyij kytzaqpiꞌnxjal Jesús, noq tuꞌn Tyol kuj
60 Atzin tej qbꞌintejiꞌy xnaqꞌtzbꞌil lo, ilaꞌku lipcheqetaq tiꞌj xi kyqꞌmaꞌn: Kujxix teꞌ yol luꞌn, tuꞌn t-xi qnimin. ¿Ma atpela jun aku txi bꞌinte?
61 Ex liwey el tnikyꞌ Jesús, qa ayex o chi ok ten chꞌotjil tiꞌj, ex xi tqanin kye: ¿Nyapela wenjo nxnaqꞌtzbꞌila toj kywutza?
62 Bꞌalaqa tuꞌn n-ok kykaꞌyiꞌn nyakuj jun xjalqiꞌn te twutz txꞌotxꞌ. ¿Me tiꞌtzila kyqꞌmaꞌy, aj nxi kykaꞌyiꞌn, aj njaxa toj kyaꞌj, ayiꞌn Tkꞌwal Ichin, qꞌuqleqinkxa toj nqꞌuqbꞌila, a jaꞌ intinetaqa te tnejil? ¿Akupela txi kyqꞌmaꞌn qa nya wenjo nxnaqꞌtzbꞌila?
63 Ajo Xewbꞌaj Xjan ntzaj tqꞌon teꞌ chwinqil te jun majx; atzin teꞌ qxmilil te twutz txꞌotxꞌ teꞌ, ex ntiꞌ tajbꞌin tiꞌjjo chwinqil anetziꞌn. Ex ikyxjo, ayejo nxnaqꞌtzbꞌila twutzxix, quꞌn tzajninqe tiꞌjjo Xewbꞌaj Xjan. Qa ma qe kykꞌuꞌja kyiꞌj, at kychwinqila te jun majx.
64 Me at junjun kyxola, a mi nxi kynimin.
Xi tqꞌmaꞌn ikyjo, quꞌn ojtzqiꞌntaq tuꞌn atxix teꞌ tzaj xkye taqꞌin, alkye mi chex niminte, ex alkye tuꞌn t-xi kꞌayinte toj kyqꞌobꞌ tajqꞌoj.
65 Ex xi tqꞌmaꞌnl: Tuꞌnpetziꞌn, o txi nqꞌmaꞌn kyeꞌy, qa mix aꞌl jun aku tzaj lipe wiꞌja, qa nya nMaꞌn saj qꞌmante.
66 Ex tej tbꞌaj tqꞌmaꞌn Jesús tkyaqiljo ikyjo, ilaꞌku lipcheqetaq tiꞌj el kypaꞌn kyibꞌ tiꞌj.
67 Tuꞌnpetziꞌn, tzaj tqanin Jesús qeꞌy, a awoꞌy kabꞌlajaj t-xnaqꞌtzbꞌin: ¿Yajtziꞌn kyeꞌ, majqexpela kye kchi xel lipe kyiꞌj?
68 Me ante Pegr xi ttzaqꞌwin: Tata, ¿Altzin qiꞌj qo xela lipeꞌy? Quꞌn noq oꞌkx te at t-xnaqꞌtzbꞌil, a ntzaj tqꞌoꞌn qchwinqila te jun majx.
69 Ex ma txi qnimiꞌn, ex ma tzꞌel qnikyꞌa te, qa a tejiy Crist, a xjanxix, a Tkꞌwal Dios itzꞌ.
70 Tzaj ttzaqꞌwin Jesús: ¿Ma nyatzin ayiꞌn o chin jaw skꞌoꞌnte kabꞌlajaj kybꞌaja? Me atziꞌn jaꞌlin, at jun kyeꞌ ma txi tqꞌoꞌn ambꞌil te tajaw il, tuꞌn tokx toj tanmin tuꞌn tbꞌinchin il wiꞌja.
71 Tqꞌma Jesúsjo ikyjo, quꞌn ataqtza nyoline tiꞌj Judas Iscariot, a tkꞌwal Simun, quꞌn ataq Judas tuꞌn t-xi kꞌayinte Jesús toj kyqꞌobꞌ tajqꞌoj, exla qa attaq toklin qxola, a awoꞌy kabꞌlajaj t-xnaqꞌtzbꞌin.