24
Tej tyolin Jesús tiꞌj aj tjapin bꞌaj tkyaqil
(Mr. 13:1-2; Lc. 21:5-6)
1 Tej tetz Jesús toj tnejil ja te naꞌbꞌl Dios, kyjaꞌtaq t-xiꞌ, bꞌeꞌx o tzaj laqꞌeꞌy, a awoꞌy t-xnaqꞌtzbꞌin tkꞌatz, ex xi qqꞌmaꞌn te: Kanqex kyejiꞌy junjun tij ja te naꞌbꞌl Dios, tbꞌanilqex wen, qo chijiꞌy.
2 Tzaj ttzaqꞌwin Jesús qeꞌy: Tbꞌanilqex kye junjun tij ja nchi ok kykaꞌyiꞌn, me twutzxix kxel nqꞌmaꞌn kyeꞌy, qa tkyaqilx kchi kꞌwel yuchꞌj, ex ntiꞌx jun abꞌj kyjel tibꞌaj juntl, aj tpon tqꞌijil.
Tej t-xi tqꞌmaꞌn Jesús tiꞌchaq kbꞌajil, aj chꞌixtaq tjapin bꞌaj tkyaqil
(Mr. 13:3-23; Lc. 17:22-24; 21:7-24)
3 Tbꞌajlinxiꞌ ikyjo, bꞌeꞌx o xiꞌy tzma twiꞌ wutz Olivos. Tej tkubꞌ qe Jesús, bꞌeꞌx o xi laqꞌeꞌy tkꞌatz qjunalxa, ex xi qqaniꞌn te: QAjaw, qꞌmantza qeꞌy. ¿Jtojtzila bꞌaꞌn tbꞌajjo ikyjo? ¿Ex tiꞌtzila techil kqlaꞌbꞌila, aj chꞌixtaq tula, ex a chꞌixtaq tjapin bꞌaj tkyaqil twutz txꞌotxꞌ?
4 Tzaj tqꞌmaꞌn Jesús: Kykaꞌyink kyibꞌa, tuꞌn mix aꞌl jun kubꞌ sbꞌun kyeꞌy.
5 Quꞌn ma nintz te tzul tiꞌj nbꞌiꞌy, ex ok kyqꞌmaꞌbꞌil: Ayiꞌn weꞌ Crist, chichkulaꞌ. Ex ma nintzxjal kꞌwel kysbꞌuꞌn, tuꞌn kyxi lipe kyiꞌj.
6 Aj tok kybꞌiꞌn tqanil qꞌoj ex aj kybꞌaj ok qꞌoj kyojile junjuntl tnam najchaq, mi chi tzaj xobꞌa, quꞌn ikytzin ilx tiꞌj tuꞌn tbꞌajjo ikyjo. Me naꞌmtaqx tpon qꞌij tuꞌn tjapin bꞌaj tkyaqil.
7 Quꞌn il tiꞌj tuꞌn tok qꞌoj kyxolile junjun chꞌuq xjal, ex kyojile junjun ma tij tnam. Ex waꞌyaj tzul, ex jniꞌ yabꞌil ex kyaqnajnabꞌ noq jaꞌchaqku.
8 Me tkyaqiljo kbꞌajil ikyjo, ikytziꞌn tzeꞌnku tnejil tchyoꞌn tkꞌuꞌj jun qya tukꞌa tal.
9 Quꞌn ex kchi xel qꞌoꞌn toj kyqꞌobꞌ kawil, tuꞌn kybꞌaj jubꞌchiꞌn kyuꞌn, ex okpe kchi kꞌwel bꞌyoꞌn junjun kyeꞌ kyuꞌn. Ex kykyaqilxjal kchi elil ikyꞌin kyeꞌ tuꞌn npaja.
10 Kyojjo qꞌij anetziꞌn, nimxte kyjel ttzaqpiꞌn kynimbꞌil, ex kbꞌajil kyikyꞌin kyibꞌ, ex kchi bꞌaj okil meltzꞌaj kyiꞌjx.
11 Ex kchi ul xjal sbꞌul, a kbꞌaj okil kyqꞌoꞌn kyibꞌ qa chqꞌonqe tuꞌn Dios. Ex nimxxjal kꞌwel kysbꞌuꞌn.
12 Noq tuꞌn tpajjo ikyjo, ex tuꞌn nimku il kbꞌantil, nimxlaxjal k-elil tqꞌaqꞌbꞌil tkꞌuꞌj tiꞌj juntl.
13 Me ankye teꞌ kweꞌbꞌilx wen, ajxi tpon tqꞌijil, apente kletiljo.
14 Aj telpin bꞌaj tyolajtzjo Tbꞌanil Tqanil Tkawbꞌil Dios tkyaqil twutz txꞌotxꞌ, tuꞌntzin ntiꞌx jun chꞌuqxjal, a mit tzꞌel tnikyꞌ tiꞌj. Atzin qꞌijjo japin bꞌaj tqꞌijil tkyaqil.
15 Tuꞌnpetziꞌn, k-okil kykaꞌyiꞌn tzeꞌnkuꞌ kubꞌ ttzꞌibꞌin Daniel, a yolil Tyol Dios ojtxe, tiꞌj jun ichin, a kꞌwel tbꞌinchin tkyaqil, me tixqex toj Najbꞌil Xjanxix toj tnejil ja te kynaꞌbꞌl Judiy Dios (aj tkux kyujinjiꞌy luꞌn, tzꞌelku kynikyꞌa te).
16 Aj tok kykaꞌyiꞌn jniꞌjo lo, tkyaqilxjal iteꞌ toj txꞌotxꞌ te Judey, bꞌeꞌx chi xel oq toj kꞌul.
17 Ex atzin xjal, a tokxtaq twiꞌja, nlay taqꞌ ambꞌil tuꞌn tkuꞌtz qꞌilte jun tiꞌ te tuja.
18 Ex ikyxljo, a tzmataq n-aqꞌnin toj ttxꞌotxꞌ, mi taqꞌ ambꞌil tuꞌn tul qꞌilkye t-xbꞌalin tja.
19 ¡Ayexjo tal qya, ayeꞌ chꞌixtaq kykubꞌ tzꞌaq, ex ayeꞌ tzmataq nbꞌaj miꞌẍin kyal!
20 Chi naꞌn Dios, noqit nya toj jbꞌalilku, mo tojku jun qꞌij te ajlabꞌl kubꞌ tzꞌaqe ikyjo.
21 Quꞌn nimkux jun kyixkꞌoj kkyꞌelix kyuꞌnxjal, a bꞌajxi kylaꞌye tukꞌaxjo tzajlin xkye twutz txꞌotxꞌ, ex mixla kqlaꞌbꞌil juntl majl, aj tjapin bꞌaj tkyaqil.
22 Quꞌn noqit mi tzꞌajtz tajsin Dios kyiꞌjjo qꞌij anetziꞌn, mixitla aꞌlx jun aku kyij anqꞌin. Me ok ajitz tajsin Dios, noq tuꞌn tqꞌaqꞌbꞌil tkꞌuꞌj kyiꞌjjo o chi jaw tskꞌoꞌn.
23 Qa at jun saj qꞌmante kyeꞌy kyojjo qꞌij anetziꞌn: Lu Crist lo, mo qa: Luꞌ at tzachiꞌn, qa chiꞌ, mi txi kynimiꞌn.
24 Quꞌn chi ul sbꞌul k-okil kyqꞌoꞌn kyibꞌ te Crist, mo te jun xjal tzeꞌnku jun yolil Tyol Dios ojtxe. Ex okpe kꞌwel kybꞌinchin nim techil kyipin, noq tuꞌn kysbꞌetkuxjal kyuꞌn. Ex okpela k-okil kynikyꞌin tuꞌn kykubꞌjo skꞌoꞌnqe tuꞌn Dios, me nlay chi kubꞌ.
25 Tuꞌnpetziꞌn, ma txi nqꞌmaꞌn kyeꞌy naꞌmtaq tuꞌn tul kanin ikyjo.
26 Ex qa ma tzaj qꞌmaꞌn kyeꞌy: Lu at toj kꞌul, qa chiꞌ, mi cheꞌxa lolte. Ex qa ma tzaj kyqꞌmaꞌn: Ku kytzaja. Lu at tuja, qa chiꞌ, mi txi kynimiꞌn.
27 Quꞌn ikytzin k-ikyꞌile tzeꞌnku jun xloqꞌlin kyaꞌj qꞌanchaꞌl toj tkyaqil twutz kyaꞌj; ktzajil qoptzꞌaj toj tjawitz qꞌij ex toj telix qꞌij. Ex tkyaqil xjal kxel kaꞌyin weꞌy, ayiꞌn, a Tkꞌwal Ichin, aj wula.
28 Jun paqx k-elil tqanil, ikyxjo tzeꞌnku tqanil jun kyimnin n-el kyxol kꞌutz.
A tulil Jesucrist juntl majl
(Mr. 13:24-37; Lc. 17:26-36; 21:25-33)
29 Noqx aj kybꞌajjo qꞌij ikyjo te yajbꞌil, k-okil qloljix twutz qꞌij, ex mi kꞌantl yaye. Ex jniꞌ qeꞌ cheꞌw kchi kꞌwelitz tzꞌaq twutz txꞌotxꞌ. Ex tkyaqiljo jniꞌ at twutz kyaꞌj okx chi luꞌlilx.
30 Ex kylaꞌbꞌila twutz kyaꞌj a techiljo ayiꞌn Tkꞌwal Ichin, aj wula. Tkyaqil xjal twutz txꞌotxꞌ kchi bꞌaj jawil oqꞌ, aj nxi kykaꞌyin a ayiꞌn Tkꞌwal Ichin, aj ntzaja toj muj twutz kyaꞌj tukꞌa tkyaqil wipiꞌn ex jniꞌ nqoptzꞌajiyila.
31 Ex tukꞌa tkyaqil tqꞌajqꞌojil chun, kchi tzajil nsmaꞌn n-angela, tuꞌn kyok chmetjo jniꞌ skꞌoꞌnqe wuꞌn toj tkyaqil twutz txꞌotxꞌ.
32 Kykaꞌyinkjiꞌy techil tiꞌj tqan iw: Aj ttzaj xulin tal tqꞌobꞌ, ex aj tzaj poqꞌle t-xaq, antza k-elile kynikyꞌa te, qa chꞌix tul kanin tqꞌijil.
33 Ikyxsintzjo, aj tok kykaꞌyiꞌn tkyaqiljo luꞌn, tzꞌelku kynikyꞌa te, qa chꞌix tpon tqꞌijil tuꞌn wula juntl majl.
34 Twutzxix kxel nqꞌmaꞌn kyeꞌy, a naꞌmxtaq kybꞌaj kyimxjal, a iteꞌ tojjo tqꞌijil jaꞌlin, aj t-xi xkyejo jniꞌ luꞌn.
35 A kyaꞌj ex txꞌotxꞌ ok kchi bꞌajil, me mex weꞌ Nyol nlayx chi kyijx kyeꞌ, tuꞌn mi chi japin bꞌaje.
36 Me alkye qꞌij ex alkye or chin ula, mix aꞌl teꞌ bꞌilte, mixpe aye angel toj kyaꞌj, mixpe ayinkuy, a Kꞌwalbꞌaj te Dios; qalaꞌ oꞌkx te nMan bꞌilte.
37 Quꞌn ikytziꞌn tzeꞌnkuj bꞌaj kyojjo qꞌij te Noé, ex ikytzin kbꞌajiljo, aj wula, ayiꞌn Tkꞌwal Ichin.
38 Quꞌn ikytziꞌn tzeꞌnqej qꞌij, tej naꞌmtaq ttzaj qꞌaqabꞌil; kykyaqil xjal twutz txꞌotxꞌ nchi bꞌaj waꞌntaq, ex nchi bꞌaj txꞌujtetaq, ex nchi bꞌaj mejetaq, ex nchi bꞌaj xi kyqꞌoꞌntaq kykꞌwal toj mejebꞌlin, tzmaxi teꞌ kyokx Noé toj ma tij bark.
39 Me ntiꞌx bꞌiꞌn kyuꞌn, teꞌ ttzaj qꞌaqabꞌil kyibꞌaj, ex bꞌeꞌx bꞌajxi mulqꞌaj toj aꞌ kykyaqilx. Ikytzin kbꞌajiljo, aj wula ayiꞌn, a Tkꞌwal Ichin.
40 Tojjo qꞌij anetziꞌn, kabꞌe ichin nchi aqꞌnintaq toj kytxꞌotxꞌ. Jun teꞌ kxel qꞌiꞌn, ex jun teꞌ kyjel.
41 Ex kabꞌe qya nchi cheꞌn junx tiꞌj kyka. Ex ikyxjo, jun teꞌ kxel qꞌiꞌn, ex jun teꞌ kyjel.
42 Kyutzꞌlinku kyibꞌa toj kynimbꞌila. Quꞌn mi bꞌiꞌn kyuꞌn alkye or kchin ula, a ayiꞌn kyAjawiꞌy.
43 Tzꞌeltzin kynikyꞌa te: Noqit bꞌiꞌn tuꞌn jun tajaw ja, jniꞌ or tuꞌn tkanin ileqꞌ qnikyꞌin, matla kubꞌ tutzꞌlin tibꞌ, tuꞌn mi tzꞌokxi ileqꞌ elqꞌil toj tja.
44 Tuꞌntzintzjo ikyjo, kybꞌinchinku kyibꞌa, quꞌn ntiꞌkux toj kynabꞌla aj wula, ayiꞌn Tkꞌwal Ichin.
Jun techil tuꞌn Jesús tiꞌj jun aqꞌnil wen ex tiꞌj juntl, a nya wen
(Lc. 12:41-48)
45 ¿Ankye teꞌ aqꞌnil tzꞌaqle ex sakꞌ? Ok kyjel qꞌoꞌn teꞌ tuꞌn tajaw ja, aj t-xiꞌ toj jun tbꞌe, te nejinel kyxoljo txqantl, tuꞌn t-xi tqꞌoꞌn kywa noqx aj tpoꞌn ambꞌil te wabꞌj.
46 Kyꞌiwlinxix teꞌ aqꞌnil, qa nbꞌinchintaq tiꞌjjo taqꞌin toj tumil, aj tuljo tajaw ja.
47 Twutzxix kxel nqꞌmaꞌn kyeꞌy, bꞌeꞌx kxel tqꞌoꞌn tajaw ja toklin te nejinel tibꞌaj tkyaqiljo at te.
48 Me qa nya wenjo aqꞌnil, exsin qa chiꞌ kyjaluꞌn toj tanmin: Yajla tzul tajaw ja.
49 Exsin tzꞌok tentz bꞌyol kyeꞌ tukꞌa, ex tzꞌok tukꞌlin tibꞌ loꞌl ex txꞌujtil kyukꞌa txꞌujtinel.
50 Me ntiꞌkux toj tnabꞌl, tej tpon tajaw ja, quꞌn ntiꞌxtaq bꞌiꞌn tuꞌn.
51 Ex kꞌwel kawin kujxix wen, majx kxel smaꞌn toj qꞌaqꞌ te jun majx, junx kyukꞌa xmiletzꞌ, jaꞌ k-oqꞌile, ex kchi juꞌchꞌile tste tuꞌn kyixkꞌoj.