67
देवाचे उपकारस्मरण करण्याचा राष्ट्रांना आदेश
1 देवाने आमच्यावर दया करावी आणि आम्हांस आशीर्वाद द्यावा.
आणि त्याने आमच्यावर आपला मुखप्रकाश पाडावा.
2 याकरिता की, तुझे मार्ग पृथ्वीवर माहित व्हावेत,
तुझे तारण सर्व राष्ट्रामध्ये कळावे.
3 हे देवा, लोक तुझी स्तुती करोत;
सर्व लोक तुझी स्तुती करोत.
4 राष्ट्रे हर्ष करोत आणि हर्षाने गावोत,
कारण तू लोकांचा न्याय सरळपणे करशील
आणि राष्ट्रावर राज्य करशील.
5 हे देवा, लोक तुझी स्तुती करोत;
सर्व लोक तुझी स्तुती करोत.
6 भूमीने आपला हंगाम दिला आहे
आणि देव, आमचा देव, आम्हास आशीर्वाद देवो.
7 देव आम्हास आशीर्वाद देवो आणि
पृथ्वीवरील सर्व सीमा त्याचा सन्मान करोत.