1 Wẽtup e'at pe te'e­ru­wa­'a­tunug kahato Iesui kape nagnia ehay enoi haria i'ewyte miwan enoi haria tawa wato Ieru­sarẽi kaipy­wiaria wywo. 2 Mi'i hawyi ta'a­tuenuk hap tote te'e­ra­'a­kasa Iesui ekatu­wy­ria'in yt te'e­ru­we­posei i nagnia mienoi yt ewy i. 3 Mi'i hawyi te'e­ra­ha'at kahato katu­pono yne Iuteu ywania te'e­ru­we­posei yne te'e­renuk hamo. Kare'en kyi'at haria te'e­ruwei yne. 4 Yt te'e­ruwei i pote yt te'e­renuk kuap i. Ta'i niatpo kahato ti i'atu­we­pokuap hap. Katu­pono yne ta'a­tupyi wuat'i y'y eiam ko'i mi'u eiam ko'i wuat'i ta'a­tupyi te'e­renuk hamo. Aikotã nagnia inug sa'a­wy'i hap ewy ta'a­tunug. 5 Mi'i hap yn ta'a­tunug. Ma'ato irania'in Iesui mohey haria yt te'e­ru­we­pokuap i mi'i tã. Mi'i pote nagnia ehay enoi haria miwan enoi haria apo'i­'a­tu'e Iesui pe — Wo'o­mu'e hat kat poteĩ emimu­'eria yt te'e­ru­we­posei posei i urumu'e haria ewy i i'atu'e. Kat poteĩ yt ta'a­tunug i ainãpin sa'a­wy­'iwuat hap ko'i i'atu'e. Katu­pono ti aipo pitpit hap wywo yt naku i watu'u aimi'u yt naku i i'atu'e. 6 Mi'i pote Iesui ti'a­tu­wesat — Nimo te ti ase'i Isaia henoi tomiwan me ehetiat typy ihay rakat etiat. Mio tã e Isaia — Mi'i tã haria Tupana mõtypot ta'a­tuwẽ pywiat haria yn mi'iria ma'ato yt ta'a­tu­py'a pyi i ta'a­tu­mõ­typot Tupana e Isaia 29.13 pe. 7 Ta'i mi'iria ti Tupana mõtypot sa'ag ne'i katu­pono yt ta'a­tu­henoi Tupana ehay sese i ma'ato miit'in kaipywiat sehay yn ta'a­tu­henoi e ti Isaia henoi ehetiat e Iesui. 8 Mi'i hawyi po'og to'e — Ta'i Tupana ehay atoiat haria ti eipe katu­pono nagnia ehay yn ni topy­hu'at eipy'a pe i'ewyte ewehenoi miit'in e hap ko'i ma'ato Tupana e hap meremo eweiwaure are e. 9 Ta'i apuete ewei'e ti Tupana miky­'esat ko'i nug hawe hawyi eimi­ky­'esat yn ewetunug at ka'ap. Tupana ehay aikotã waku watunug e hap pun haria eipe wen ma'ato ei'e hap aikotã waku watunug e hap ewetunug kahato. 10 Nimo te ti Tupana tinãpin tehay moherep hat Musei — Waku ti eimẽ­pyt'in eimõ­typot hanuaria wo tukup­te'en are e. Waku ta'a­tuty ta'a­tu­'ywot ky'e kahato haria wo te'e­ro­py­hu'at e. Ma'ato yt kat i ta'a­tu­ty'in ta'a­tu­'y­wot'in mõtypot hap i'atuete pote ta'a­tu­sa­ty'i saty'i ta'a­tu­ty'in ta'a­tu­'y­wot'in. Waku mi'iria miit'in ti'a­tu­sa­ty'i saty'i nu wo ta'a­tu­ku­'uro hap kape e Tupana sa'a­wy'i Musei pe mekewat Esutu 20.12 piat pe. 11 Ma'ato eipe wẽtup sehay moherep haria e Iesui pa'iria pe nagnia pe. Yt mio tã ewei'e hin i katu­pono mio tã ewei'e — Waku Tupana pe yn eweium eipo hap nug hap ko'i ewei'e sa'ag aha'y­ru'in muo ahaki­'yt'in muo. Waku Tupana yn wati­mõ­typot yt kan hamo i wati­mõ­typot ai'y­wot'in ewei'e sa'ag. Waku watum aity ai'ywot sa'up Tupana pa'i pe ewei'e sa'ag e. Waku watum sa'up aipo hap nug hap ko'i ahepa'i pe uruepe Tupana wanuat ewei'e sa'ag yn eimu'e haria pe e Iesui. 12 Yt naku i ti eimienoi katu­pono koitywy yt kat i ra'yn miit'in po hap nug hap ta'a­tu­'ywot ta'a­tuty piat hap e. Yt ta'a­tu­mõ'ẽ hin i ta'a­tu­ty'in ta'a­tu­'y­wot'in me mesup e. Yt naku i are katu­pono mesup yt ta'a­tu­mõ­typot hin i ta'a­tu­ty'in ta'a­tu­'y­wot'in eimienoi sa'ag nagnia ehay upi pyi e. Mi'i pote mesup ta'a­tu­'y­wot'in me — Papai Mamai i'atu'e yt kat i ti koitywy topy­hu'at uikaipyi eipo­wyro hamuat hap i'atu'e katu­pono uimiium ehepiat eipo­wyro hamo atum yne ra'yn Tupana mõtypot yat piaria akag ko'i pe i'atu'e sa'ag eimienoi upi ma'ato yt Tupana e hap ewy hin i ei'e hap ko'i are. 13 Ta'i mi'i hap ko'i ewywuat ti rat sa'ag ne'i ewehenoi miit'in me ma'ato Tupana e hap yt eweimo­herep hin i yt naku i rat eipe are. Katu­pono Tupana ehay etiat eipohep takaria eipe. Mi'i pytkai — Uruehay ti Tupana ehay toĩne'en ewei'e sa'ag ne'i. Mi'i hap kaipyi ti Irania'in Tupana ehay sese yt ikuap hin i are e Iesui Iuteu ywania mu'e haria pe wẽtup miwan enoi haria pe.

14 Mi'i hawyi Iesui ti'a­tu­kaykay tuwe­wawi irania'in miit'in miat henoi hamo — Koitywy are'e teran ehepe aikope pyi som yt nakuap i tut e. 15 Pywo ti yt eimi'u kaipyi i ti i'ewyte yt eiposei eipysei hap eiwe­painug hap kaipyi i ti tut i'aparap ehepiat hap e. 16 Ma'ato miit'in minug yt nakuap i ti tuwẽtem i'atu­py'a pyi i'atu­wa­nẽtup sa'ag hap kaipyi e. Pyno ehewaure ka'a pote eiwa­nẽtup to mio wat ui'e hap kape e Iesui i'atuepe.

17 Mi'i hawyi Iesui toto temiit'in wywo miit'in typy'i rakaria py'a­setpyi hawyi teke wẽtup netap we. Mi'i hawyi meiũran hemiit'in apo'i­'a­tu'e Iesui pe — Kat ereĩ i'atuepe sehay hã'ãkap wuo ehenoi Mehĩ i'atu'e. 18 Mi'i hawyi Iesui ti'a­tu­wesat — Are pãi yt eweikuap i apo uhehay e. Irania'in ewy te ti apo eipe e. Pyno ahenoi i ehepe e. Yt miit'in mi'u kaipyi i ti tuwenug yt naku i hap e. 19 Pywo pe ti mi'u yt teke i aiwa­nẽtup hawe aipy'a piat ma'ato aimẽ'ẽn me yn teke kuap e. Mi'i hawyi tuwẽtem hawyi toto i ra'yn aipiit pyi e Iesui. Mio tã tupono ti waku yne mi'u aimi'u wo e Iesui. 20 Mi'i hawyi Iesui to'e — Uiwy­ria'in miit'in minug yt nakuat i tuwẽtem i'atu­py'a pyi ti e. Pywo pe ti miit'in py'a pyi tuwetẽm wanẽtup yt nakuat i hap e. 21 Tuwepyi tutunug yt nakuap i e. Wuat'i hary­po­ria'in nywo e hat sero­'ok'e hat miit auka hat wẽtup ok ti se'aito wywo uito e hat wẽtup ok ti seha­ry'i wywo uito e hat miit'in py'a pyi tuwẽtem 22 I'ewyte uiwano yn irania'in ekare'en e hat ati'a­tu­mo­weu­ka'i uito irania'in e hat atima'at sehay wo wẽtup ok e hat uito ti po'og uiwaku irania'in kai e hat ti Tupana ehay etiat weky­ry'i hat yt iwe'eg i rakat tuwepyi ta'a­tuehay ta'a­tu­py'a pywiat ta'a­tunug yt naku i e. 23 Pyno uiwy­ria'in eweikuap ta'yn som miit py'a pyi tuwẽtem wanẽtup hap yt naku i hap. Mi'i wo ti yt naku i tuwenug tuwe­mohun e Iesui temiit'in me.

24 Mi'i hawyi Iesui toto pya kahato tetama pyi wẽtup ywania etama kape i ra'yn wẽtup setama pya wuat kape. Mi'i hap tote put'ok'e ra'yn i'atue­tama Tiru piat hawyi iheg me ra'yn toĩne'en. Katu­pono yt toiky­'esat i miit'in miat tokuap hap. Ma'ato yt aikotã me kuap i tuwemig. 25 Mi'i hawyi wẽtup ok hary­poria tikuap Iesui etiat hawyi toikat ra'yn Iesui. 26 Kat pote tomẽpyt piit piat ahiag putsit hamo toikat Iesui. Mi'i hary­poria so yt Iesui ywania i ra'yn. Wẽtup setama pywiat mekewat yi Siru­we­nisia pywiat. Mi'i ti wẽtup ta'yn ipusu Kereku ehay puo ra'yn ihay. Mi'i hawyi toipuẽti Iesui hawyi tuwe­pỹ­'ã­tutuk howa kape hawyi to'e — Mimi e etihep o ten ahiag uimẽpyt piit piat e haty wo. 27 Mi'i hawyi Iesui tiwesat — Apuete mana e sa'a­wy'i ti atipoi teran ui'y­wania e katu­pono yt naku i hira­karia mi'u wo urutopoi awareria ne'i e. 28 Mi'i hawyi to'e Iesui pe hary­poria — Are an mi'i tã ti Mimi e ma'ato ti i'ewyte aware hit ko'i tu'u mi'u ku'i hewo rakat e'ywania mẽpyt'in tenuk turan e. 29 Mio tã e pote Iesui tiwesat — Hẽ ti waku kahato mana uiwesat en e. Pyno era'aipok i ro emẽpyt kape katu­pono koitywy ti yt kat i ra'yn ahiag emẽpyt piit pe are'e hap ewy e. Atisopo ra'yn wyti ahiag emẽpyt piit pyi mana e. Pyno koitywy waku ra'yn tuwete e. Yt kat i ra'yn som pyno ahiag emẽpyt piit pe mana e. 30 Mi'i hawyi ity ta'aipok ta'yn tomẽpyt kape. Put'ok'e to'yat pe hawyi toipuẽti ra'yn tomẽpyt yni pe waku pe i ra'yn. Tokosap ta'yn heso'ok hap. Mi'i hawyi ti ity tikuap ta'yn tomẽpyt piit pywiat ahiag wẽtem hap.

31 Mi'i hawyi toto Iesui tawa Tiru pyi yi Sitãu sakpo ra'yn. Mi'i hawyi ta'aipok i ra'yn hẽpype tetama sese kape i ra'yn. Mi'i hap upi toi'a­tu­mu'e tetama Karireia hyemyi'a piaria 10 tawa ko'i. 32 Mi'i hap tote ta'a­tuerut ra'yn Iesui kape wẽtup ok hewaure rakat yt ihay hãpyk kuap i rakat. Mi'i hawyi ta'a­tu­hẽtup Iesui pe imoehãite topo wuat hamo. 33 Mi'i hawyi Iesui tioto hewaure rakat miit'in tok pyi hawyi totemig na'yn hewaure ka'a ko'i hawyi kuitu'e ra'yn hawyi tohẽku pen tẽty hy wo. 34 Mi'i hawyi Iesui iha'at atipy kape hawyi kynkyn'e — Etimoe­waure ka'a i ro meiũwat miit Tupana e. Ma'ato towat topusu puo Iesui to'e tope — Ewata e. 35 Mi'i hawyi meremo hewaure ka'a i ra'yn ihay kuap wuat'i ewy ra'yn. 36 Mi'i hawyi Iesui wãi'e irania'in me haty wo — Yt ewehenoi tei'o uhepiat imoehãite hap irania'in me e wen ma'ato ta'a­tu­henoi henoi ra'yn wuat'i puo ra'yn yt Iesui miky­'esat ewy hin i ra'yn. 37 Mi'i hawyi ta'a­tukuap wuat'i puo ra'yn Iesui piat hewaure rakat moehãite hap hawyi te'e­ro'e to'ope — Waku kahato Iesui tunug i'atu'e. Hewaure rakaria wyti tutunug hewaure ka'a ko'i wo ra'yn i'atu'e. Yt ihay kuap i rakaria tutunug ihay kuap i ko'i wo ra'yn i'atu'e. Mi'i hawyi tuwat tuwat Iesui kape pya pyi.