1 Mehĩ'in mana'in aiku­'uro hap kape waku wato­mohey o are. Uimi­ky­'eria kahato eipe. Woro­ho­'o­ky'e eipe. Uhehat'at kahato eiky­'ewi. Uimo­wepit haria eipe. Arehum kahato ehowawi. Uheinyt'in uheywyt'in yt uimõti te hin i. Atikuap aikotã eweikup­te'en wẽtup miit ewy Aika­'iwat wywo. 2 Mi'i hawyi mana Ewotia mana Sintiki ahẽtup ehowawi eipe Aika­'iwat mohey haria pote eweikup­te'en wo'o­ky'e haria wo'o­wese haria kahato. Waku wẽtup ehay ewy aikotã eiky­py'yt ewy eweikup­te'en Iesui mohey haria eipe pote. Aito Iesui mohey haria pote yt naku i watu­kup­te'en yt wo'o­ky'e i haria wo yt naku i are. 3 Sa'a­wy'i eipotpap kahato uiwywo mana'in. Sa'a­wy'i mehĩ Kementi wywo watuwat irania'in aipo­wyro haria wywo sehay wakuat Iesui etiat sytpok hamo. Mi'iria set yne toĩne'en Tupana miwan atipy piat ete mekewat miwan ete uwe aru toĩne'en wuat'i e'at pe e hap tote. Pywo pe ti mana'in sa'a­wy'i eipotpap kahato uiwywo. Mi'i pote atiky­'esat kahato waure­'e­wei'e o eiwu­'uka hap ete are. Atiky­'esat kahato eiwo­'o­wese hap ta'yn aikotã sa'a­wy'i eiwo­'o­ky'e hap ewy ra'yn atiky­'esat uheinyt'in are. Mi'i pote ahẽtup ei'a­pykok hanuat pe — Uhyt are'e eti'a­tunug no uheinyt'in wo'o­ky'e haria wo ra'yn are. Mehĩ are'e uipo­wyro en tawa Wiripu piaria nãpin hamo. Pyno mehĩ waku ere'e mana Ewotia i'ewyte mana Sintiki pe — Yt eiwu'uka po'og nei'o ehehay wo ere'e o i'atuepe are ei'a­pykok hat pe mana'in.

4 Pyno uiwy­ria'in wo'o­mo­wepit haria ewywuaria wo o eweikup­te'en. Wuat'i e'at pe waku — Tupana urumo­wepit hat kahato En waku wato'e at ka'ap. Tupana urumo­wepit hat kahato En waku wato'e Tupana pe are. 5 I'ewyte ti waku yt ipy'ahak takaria wo i watu­kup­te'en e. Waku yne miit'in wesat hano watoĩ­ne'en. Yt eweiwaure tei'o Aika­'iwat ut hamuat hap e'at katu­pono ta'aipok irane Ai'akag koro are. Mi'i pote waku wakuaria ewy watu­kup­te'en wuat'i e'at pe. 6 Pyno yt eiwa­nẽtup ko'i ko'i i ran o. Po'og waku wahẽtup Tupana kape aipo­wyro hamuat hap. Waku wato'e Tupana pe — Etum o uruepe uruwat yt kat i rakat. Uruikuap kahato ra'yn egyi'at hap Tupana waku uruhẽtup. Mi'i pote urutu­wehum kahato ewawi urupy'a pyi Tupana waku wato'e Tupana pe. 7 Mi'i tã watunug pote yt kat i hin i aiwa­nẽtup ko'i ko'i hap atunik kahato. Aiwa­nẽtup hawe wo'o­wese hap yn topy­hu'at. Tupana ainug waku pe kahato aiwa­nẽtup hawe yt miit'in mikuap ok tã i tutum ahepe aipe­rup'i kahato hap. Towese hap ewy tutum ahepe. Mi'i pote toihep aheso'ok hap ko'i. Mi'i hawyi aiwa­nẽtup hap Iesui wanẽtup hap ewy wẽtup miit ewy kahato ra'yn ainug. Aipo­typot timoma ra'yn aiwa­nẽtup hap aipy'a piat yt naku i nug hap i'ewyte aiwa­nẽtup sa'ag hawiat.

8 Kurin po'og ahenoi hawyi waku. Uheywyt'in uheinyt'in wati­pyhyp aiwa­nẽtup hap yt naku i hap. Mi'i hawyi wẽtup kape yn aiwa­nẽtup hap. Wakuat kape yn watu­wa­nẽtup aikotã miit'in miat wakuat rakat ewy aiwa­nẽtup hap aikotã pywuat wanẽtup hat ewy aikotã miit'in mimõ­typot kahato hap wanẽtup hap ewy aikotã hãpyk kahato rakat ewy waku watu­wa­nẽtup. Waku ihainia hary­poria we'eg nakaria ewy watu­wa­nẽtup. Waku iwese kahato rakat ewy aiwa­nẽtup hap. Mi'i hawyi — Meimuẽ­waria wyti waku kahato rakaria i'atu'e hap ewy waku aiwa­nẽtup hap. Kat e hap kat e hap po'og po'og waku mi'i ewywuat waku watu­wa­nẽtup. Kat e hap kat e hap ete Tupana — Waku e pyno mi'i hap ete waku watu­wa­nẽtup at ka'ap. 9 I'ewyte atiky­'esat kahato ehewyry uhepiat einãpin hap nug haria wo. Atiky­'esat uimi­po­'oro einãpin hamuat eweiky'e kahato hap. Sa'a­wy'i ti areĩne'en eitokpe turan wakuat yn atunug ehepuo. Waku ewetunug aikotã uheko ewei'a­kasa hap ewy wakuap nug hap ete. Mi'i tã ewetunug mote wo'o­ky'e hap eiwo­'opiat hap eweipuẽti Tupana miky­'esat ewy. Mi'i hawyi ti aru eipe­rup'i hap topy­hu'at aikai are.

10 Mio ti put'ok'e eimiium uipo­wyro hamuat hap. Mi'i hap ti uimo­wepit kahato. Mi'i hawyi uipy'a perup'i kahato Uika­'iwat ete. — Waku kahato En are Iesui pe. Mio tã are emiium uhepiat uimo­'ok­pi­pok'i po'og po'og hap ete katu­pono uiky'e hap moherep kahato hap eimiium. Sa'a­wy'i ti uipo­wyro teran kahato eipe wen ma'ato mi'i re mu'ap yt eweipuẽti i uiky'e ehepiat hap moherep hamo. 11 Sa'a­wy'i te ti yt kat i sẽtup ui'e hap. Yt ahenoi i irania'in me yt kat i uiat e hap katu­pono koitywy atikuap ta'yn uiwepit sio uhekat iwato hap etiat sio kurin uiat uiwepit hap atikuap. 12 Atikuap kahato seha­ky­'e'i hap etiat i'ewyte atikuap kahato sekat hap etiat. Sa'a­wy'i meimuẽwat yt atikuap i yt kurin i ma'ato koitywy atikuap ta'yn uhesy'at pytkai uiwepit i'ewyte ui'ok pote uiwepit. Uhekat kurin hawyi arehum i'ewyte iwato uhekat pote arehum ne. Koitywy ahepap ta'yn wehum hap. 13 Ma'ato yt uiwe­kaipyi i tut uhesaika hap ma'ato Aipo­typot Iesui kaipyi atipuẽti. Mi'i ti kat e hap kat e hap etiat — Uimoe­saika hap wuat'i etiat kuap hap ete uimo­wa­tetup are Tupana pe. I'ewyte waku kahato eipe mi'i e hap ti ere'e Tupana pe. 14 Ma'ato waku eiminug ewetum uhepe. Ta'i uhepiat ho'opot hap toĩne'en mesuwe. Uimo­so­'opot kahato mesuwe wo'o­pyhik hawe. Mi'i turan eimi­po­'oro put'ok'e uhete. Mi'i hawyi arehum kahato eimiium uhepiat ete. 15 Ehe'yi Masẽ­tunia pe mio i'atu kahato Iesui mohey haria tukup­te'en. Ha'a­wyte areto ra'yn i'atue­wawi sehay Iesui etiat wakuat moherep hamo wuat'i tawa pe kat e hap kat e hap upi. Mio koitywy ahok'iwat yne tawa pe Iesui mohey haria te'e­ru­wa­'a­tunug tuereto ma'ato yt kat i te ta'a­tu­po­'oro uhowawi ta'a­tumiium ko'i. Ma'ato eipe Iesui mohey haria tawa Wiripu piaria ewetum kahato ra'yn uhepe. Eweipat'ok kahato uhepe ehekat ko'i. 16 Sa'a­wy'i areto tawa Tesa­ro­nika kape. Itote yt uhekat hin i ma'ato mi'i turan uipo­wyro hap eweipo­'oro po'oro kahato uhowawi kat uimi­ky­'esat ko'i sa'a­wy'i eweipo­'oro. 17 Yt ahẽtup hin i eimiium wuat i'ewyte yt atiky­'esat i eheka­re'en uiwa­nẽtup hawiat hap pytkai eweipo­'oro. Yt eimiium kape hin i araha'at. Yt ehekat hin i uheha pe. Eiky'e hap yn uheha pe uhepiat hap wen ma'ato eimiium uimo­wepit kahato katu­pono mi'i kaipyi atikuap uiky'e ehepiat hap. Mi'i kaipyi atikuap eipe Tupana ky'e kahato haria hap. Mi'i eimiium ko'i yne topy­hu'at atipy pe rakanuat ehegyi'at hap toimo­herep hamuat itote emipo­'oro ko'i. 18 Mehĩ Epawu­titu tum yne eimiium eimi­po­'oro ko'i uhepe. Ikahu kahato uipuẽti eimiium aikotã sa'a­wy'i nagnia tiwuk mohag hy ikamhig se rakat Tupana mõtypot hamo. Mi'i hap ewy atipuẽti eimiium ikamhig se kahato eimiium Tupana mowepit kahato hap. — Waku kahato e Tupana eimiium me. Koitywy areĩne'en hekat rakat ewy ra'yn ewetum iwato uhepiat pote. Ewetum iwato pote uipo sakpo ewetum uhepe. 19 Tupana tum aru yne yt kat i aikawiat rakat ahepe. Ta'i Uhetu­pana tum aru wuat'i yt kat i eiwat rakat tekat iwato kahato hap kaipyi. Aikotã tekat iwato kahato atipy pe hap ewy te tutum ehepe. Ta'i hegyi'at kahato aru ahepe katu­pono Ha'yru Aipo­typot Iesui iku'uro aika­wiano haype. Mi'i pote toĩ yne aipo pe imiium ko'i.

20 Mi'i tupono to'iro watu­wehum Aika­'iwat Tupana kape. To'iro wati­mõ­typot Mi'i yn mesu­wepyi mũki­'ite e'ihot'ok wuat'i e'at pe waku mi'i tã pãi. 21 Mi'i tupono kuekatu atipo­'oro torania Tupana eropat haria kape Tupana emiit'in kape mekewat Aipo­typot Iesui emiit'in ko'i kape i'ewyte Iesui mohey haria uheywyt'in uheinyt'in torania kape atipo­'oro kuekatu hap are. 22 Morekuat Sesara emiit'in sura­ra'in i'ewyte kuekatu ipo'oro ehowawi. I'atu kahato mesuwe Iesui mohey haria. Mi'iria i'ewyte kuekatu ipo'oro ehowawi.

23 Pyno ahẽtup Tupana pe — Eti'a­tu­ky'e kahato emohey haria tawa Wiripu piaria are ahẽtup. Egyi'at kahato hap kaipyi eti'a­tu­poi­tyro mi'iria ewaku hap ok tã are yn Aipo­typot Aika­'iwat Iesui pe eika­wiano hamo ahẽtup. Tupana Pã'ãu eiam mo eipiit ko'i hap yn ahẽtup Tupana pe at ka'ap eika­wiano haype. Morekuat Sesa wo'o­pyhyp hawe areĩne'en mesup. Uimiwan Iesui etiat atipo­'oro ehewowi tawa Wiripu piaria Iesui mohey haria pe. Toran na'yn uimiwan.

Uito Iesui potpo­'oro Pauru.